مقلب جامعاوى
والمقلب هو اختراع جامعاوى بالأساس يتعلمه الطلبة by the way بعد الوصول لطريق مسدود مكتوب على حيطته ..( الصراحة ممنوعة يا ولد وأوعى تقول)
23/03/2006
منى سليم – ولاد البلد:
ندخل الجامعة ونخرج منها ونقعد نقول هنا ضحكنا.. هنا مشينا..
لكن اللي عمرنا ما ننساه هو المقلب اللي عاملناه جوه المحاضرة وعند باب الجامعة أو في لجنة الامتحان..
والمقلب هو اختراع جامعاوى بالأساس يتعلمه الطلبة by the way بعد الوصول لطريق مسدود مكتوب على حيطته ..( الصراحة ممنوعة يا ولد وأوعى تقول) :
* أن الدكتور المحترم ببقول كلام غلط وبيعيد ويزيد في كلام أكل عليه التاريخ وشرب ودخل الحمام كمان، وانه عامل موضوع الغياب والحضور في المدرج الزحمة ده عشان يستخدمه ضدنا لو تشجعنا وما اشتريناش الملزمة، وانه مستعد للرد على اى سؤال ييجى من ناحية الهوانم الأمورات ومالوش في أسئلة الولاد.
* وان الأستاذ العميد بيخاف من الأمن وممكن بحرمك من درجة معيد لأنك شكلك مش ظريف ويوحي بالعبط، و لأنه عالم وباحث قديم أمين ممكن يمنعك من تقديم مسرحية لأن فيها كلمات غير مهضومة بتتعبه ذى مصر والأمة والإسلام، وانه ما بيكسفش لما يخدك على جنب ويقول يستحى " يا بنى بطل الكلام ده أنت مش هتغير حاجة ومش هاتوصل لشيء غير انك هتخرب بيتي وأنا ورايا عيال".
* وكمان البنات الامورات والولاد أولاد الذوات اللى مرصوصين في آخر بينش كذابين وبيمثلوا على بعض وما حدش فيهم في الآخر هيتجوز التانى، وما حدش من البهوات اكبر راجل أعمال في مصر، ولا واحده من الهوانم شعرها اصفر بجد.
* والعيال اللى قالبنها كآبة في البينش الأول مش هيجيبوا الديب من ديله، والحكاية ممكن تتاخد ببساطة وشطارة، و ما فيهاش حاجة لما الأستاذة اللى هتبقى دكتورة إن شاء الله ترد على البنى آدمين السلام، وان حضرته وان كان طلع الأول على الدفعة السنة اللى فاتت مش لازم يقف يتكلم كل مرة عن رأى الدكاترة الجهابذة في قدراته الأكثر جهبذة.
أما المقالب بقى فهي ساحة للتنافس والتأليف والافتكاسات، اضحك مع بعضها وأرسل لنا من رصيدك الجامعاوى ...
الكوسة خضار مشروع
في صباح يوم مشمس (يعنى الساعة 6 الصبح) وبعد يوم دامي من أحداث انتخابات طلابية مزورة قام طلبة كلية هندسة جامعة القاهرة بتمرير اشولة مليئة بالكوسة إلى داخل الحرم الجامعي، وفى تمام الثامنة بدأت جموع من الأساتذة والطلبة تتوافد إلى ساحة الكلية ومدرجاتها ومكاتبها.
وهنا وجدوا نفسهم وجها لوجه مع المقلب، الكوسة تقمصت شخصية قلم رصاص وعملت أسهم وإشارات على كل مكتب وبوابة داخل الكلية، وعند مكتب الأمن والعميد ورعاية الشباب كتبت بخط كبير وبأصابع الكوسة كلمة " كوووووسة"..
وطبعا الأيادي الآثمة اختفت وتاهت بين الأعداد الغفيرة لمهندسي المستقيل، مش كان أحسن وأذوق للدكاترة يخلوا الانتخابات نزيهة بدل التهزىء ده.
حاجة صعبة أوى
ولأننا نتعامل مع الجامعات الإقليمية للأسف بمبدأ الناس اللى ورا الباب يفوتنا الكثير من المقالب والحكايات.
في مدينة الإسماعيلية وبجامعة فتاة السويس بمدرج 3 كلية تجارة وقف الدكتور( اللى دايما روحه في مناخيره وبيكره البلد والمجتمع والتخلف وعايز يرجع أمريكا) .. المهم .. يشرح إحدى محاضراته في علم الحاسوب، وهنا وقعت الفاجعة .. لأنه مش بيحب الدلع استخدم أكثر الطرق ركز نظره على نقطه تنتهي هندسياً بالواد بتاع كل مرة اللى قاعد في آخر بينش وعمال ياكل في ودن اللى جنبه ثم وبمنتهى البساطة حدفه بالجذمة في وشه.
ولم يكن من الطالب (الرغاى اللى مش فاهم ولا كلمة من الانجليزي اللى عمال يرصه الدكتور) إلا أن جاء برد أكثر بساطة وهو انه خد فردة الجذمة وفك من المدرج والدكتور يصرخ ولد تعال هنا رجع الجذمة قدامى دلوقتى يا حيوان، واخذ يردد هذه الكلمة حتى وصل حافي أما مكتب العميد وهنا عثر أخيرا على الطالب وفى يده الجذمة يضعها بين يدي الأستاذ العميد.
أتحرم من امتحانات الفصل الدراسي الاول ودخل دور تانى والأستاذ إنحرم من متعة إكمال الcourse مع الدفعة اللذيذة، ولكن بقى لتاريخ جامعة قناة السويس أن شهدت أراضيها هذه الموقعة التي كانت قماشة واسعة للتنكيت والتبكيت والقيل والقال.
• أنت سرحت يا حسين!
• إفطار الإخوان وسحور كفاية!
• الخطر الوطني الديمقراطي!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
انا اعلق اذن انا موجود
قبلك المرة دي يا هبهوب ( اول تعليق ده بيبقا دايما رخم عشان كده محدش بيتجرأ و يكتب اول تعليق ) بس معلش انا هعلق الاول
فكرتوني بالجامعه
لسه كنت هناك من اسبوعين بلم خلجاتي منها و اسحب ورقي
كان شعوري جميل لما اخذت شهادة الثانوية العامةو شوفت صورتي الطفولية اللي كانت فيها
حسيت اني كبرت و بقيت راجل يقدر يشيل مسئولية
شيل و انا اشيل
شيلني و اشيلك
فتح دماغك يا بيه
يا بخت من نفع و استنفع
ده القاموس بتاع السوق
السوق اللي بيبلع كل المرتجفين و المرتعشين
فكرتوني بالجامعه و نستوني السوق
يلعن ابو السوق يا جدع
يعني تبا لك ايها السوق
مشكورين ماقصرتوا...
دى بمناسبه جمعاء يا اكرم..
انا بقى احلى افتكاسه لفتت نظرى(ايام ما كان عندى نظر)
كان لينا واحد زميلنا مخنوقين منه شويه قررنا نعمل فيه مقلب تمام
فام ولادالحلال (اللى هما زمايلنا برده)بتصوير ورق عليه صورته و تحتها هذا الشخص مريض و متغيب و عود يا باسم الام تبكى بحرقه و الاب يذرف الدموع و ساعدونا يا ذوى القلوب الرحيمه
و جه صاحبنا الكليه و شاف دا و فهم وعينكو ما تشوف الا النور(دنا اختك يا سلطان دنا اختك مين)
فضل مخاصم الكل ييجى تيرم كامل
معلش يا جماعه عشان اتكلمت عن السوق و مكلمتش عن الجامعه اصلي علاقتي بالجامعه كانت علاقة مش و لا بد
كنت اكتر ايام بروحها هي ايام الامحانات مع اني كنت في كلية هندسه ( الواحد مش عارف كنت بينجح ازاي ؟؟ )
الواحد كان بيشتري ورق الدروس اللي المعيدين عاملينوه و كان بيصور اي ورقه مع اي زميل و طبعا لان الناس كانت عارفه اني بجمع ورق اي معيد كنت مصدر المحبين جميعا
حتى ان واحد صاحبنا لقاني بشتري ورق عنب فتوسل اليا انه ياخده يصوره مني
المهم راحت الايام دي يا مين يلايمني عليها
بس من غير امتحانات و حياتك و كتر الشطه
كان معانا واحد رخم قوي وبصراحة غبي بس صمام و بيرتب على طول ..طلع معانا رحلة الاقصر و اسوان .العيال خلوة نايم و كلموة في التليفون وقالوله :احنا ادارة الفندق لو سمحت احنا بنسيق السنترال ممكن تحط التليفون في كيس بلاستيك وماتجيش نحيته لحد مانخلص عشان مايكهربكش ..راح زي العبيط عامل كده فصوروه جنب التليفون اللي في الكيس و فضحوه في الدفعه كلها
عشان يحرم يرتب ع الدفعه
والله كانت ايام جميلة اووووى بس انا كنت بروح الجامعه بس عشان افك على نفسى شوية اصلى انا بزهق على طول المهم انا عمرى ماحضرت محاضره وكنت بعتمد على صحابى فى الورق والكلام دا والحمد لله نجحت بس ازاى مش عارفه
انا بقة كنت دايما لما اروح الجامعه احب اروك كافترية الجامعه اوووووى مش عارفه لية بس تقريبا بحس براحه هناك ومرة كنت باكل بطاطس وصحابى شافونى ومن ساعتها بقة اسمى بطاطس اى رايكم اسم حلو مش كده
وتصور لما روحت اخد الشهاده من الكلية لاقيت اسمى فيها بطااااااااطس تصورو الجامعه دى مش بيستخبى فيها حاجة خااااالص
بس كانت ايام جميلة على الاقل ارحم من البطاله اللى احنا فيها
ينهار اسود. بجد ربنا يبشركو بالخير طمنتوني على مستقبلي المشرق. انا لسه سنة تانية وقدامي اربع سنين وتلاتة ماجستير وبقول " يارب" اذا بي اتفاجئ بكلامكو المتفاءل عن الي جاي.
" يا قلبي يا كتاكت ياما انت شايف وساكت"
والله يجماعه انتم خلتوني اتشجع واكتب عن العيشة الريقة بتاعتي في الكليه من اول اوله لحد ان شاء الله ما أخلص فيها
هو الصراحة مفيش سنه عدت الا وكنا ايه حاطين ايدينا على قلبنا بس نجحنا صيحي صيفنا سنه بس مش المهم المهم النتيجة اجدع حاجة بقى والله الصحبة بس انا نويت اني هنتقم من الدكاترة انا وزمايلي وبدانا التدريب على ضرب الجزم من مستوى القاعدة لحد قذائف القلل من كاتيوشا اليد وكمان عملنا كمائن وضربنا الكوماندوز وحددنا الاماكن الي هتم فيها المهاجمة بس يارب ننجح في الحطة ودعواتكم