انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

شفت .. مظاهرة المليون

ولاد البلدقراءة في ٨ د

في مصر، تتمتع (الملايين) بشعبية عالية.. و بالرغم من ذلك مازلنا عاجزين عن حشد مليون "بني آدم" للتظاهر!!

26/03/2006

منى سليم – ولاد البلد:

في مصر، تتمتع (الملايين) بشعبية عالية..، شعب من "ملايين" البشر، و"ملايين" الجنيهات مهربة للخارج، وديون بالـ"ملايين"، وحبيب الملايين (الريس طبعا)، لكن رغم كل هذه الملايين مازلنا في مصر عاجزين عن حشد مليون "بني آدم" للتظاهر في مظاهرة لأي سبب (رغم وجود أسباب كثيرة أقلها رغيف العيش)، رغم أن بلاد برة تستطيع أن تفعل ذلك بمنتهى السهولة في حين أنها لا تتمتع بملاييننا المهربة ولا بعدد سكاننا المليوني..

الغريب أنه بالنظر لحال المجتمع المصري سنجد أن هناك مليون وسيلة لعمل مظاهرة بمليون بني آدم، لكن البني آدمين قاعدين مكانهم، وكل معلوماتهم عن المليون.. برنامج جورج قرداحي..

تعالوا نتساءل لماذا لم تشهد حواري وشوارع وميادين المحروسة مظاهرة تحمل هذا الاسم..؟، الإجابة (ربما) تكون في السطور القادمة..

كلام كبير ليه لازمة

يعني إيه "مظاهرة"..؟؟

التعريفات العلمية بتقول إن المظاهرة هي أداة من أدوات التعبير الشعبي عن شيء ما (فرح أو حزن، غضب أو تأييد) بمعنى أن التظاهر ليس دائما ضد النظام الحاكم، أو تعبير عن الكبت..

ورغم أن النظريات اختلفت في تعريف المظاهرة، لكنها تتفق جميعا على أن "الست مظاهرة" أسلوب مرحلي وليس وحيد يستهدف خلق رأى عام موحد ضد أو مع قضية معينة، ويتوقف نجاحه على كم وكيف الشرائح الاجتماعية التي تنحاز إلى القضية ودرجة إصرارها على ذلك وطبيعة النظام الذي تواجهه".

أيضا اتفقت النظريات على إنك لو عايز تعمل مظاهرة تكون محتاج إلى التالي:

ناس – مكان – شعارات – حاجة غايظانا عشان نهتف ضدها (أو حاجات مفرحانا نهتف بحياتها)– صحة عشان نستحمل الضرب – أمن مركزي عشان يضرب..

تعالوا ناخد كلام الناس اللي بتفهم، وندخل بيه إلى قلب المحروسة..

Catch cadre

ـ بالنسبة للقضية.. ماذا تقول الجرائد عنا..

عندنا قانون طوارئ وتشريد عمال، وعندنا اتفاقيات مع الصهاينة بتخرب الاقتصاد، وكمان في موت الآلاف منا بحريق قطار أو غرق عبارة والفاعل دائماَ GHOST راكب مصر ولونه رمادي شبة الموت و اسمه" فسادوش ابن تسلطوش".

أما عن الكم والكيف والإصرار فحدث ولاحرج، ففي دولة تعداد سكانها يصل 70 مليونا نبحث عن 10% فقط ليجتمعوا على أى قضية من القضايا السابقة، وإذا حسبنا عدد المتضررين إلى المتظاهرين نخرج بالنتائج التالية:

ـ عدد المعتقلين السياسيين في مصر وفق التصريحات الرسمية 25 ألف مواطن اضرب هذا العدد في 4 على الأقل وهم أفراد أسرهم .. يديك 150 ألف على الأقل، وبرغم هذا لا تتعدى أفراد مظاهرة اسر المعتقلين أل 300 فرد.

ـ عدد العاطلين في مصر بأقل تقدير(وهو تقدير الحكومة 9 مليون عاطل)، بعضهم خريجين جدد من عام 1995 وآخرين طردوا من مصانعهم وأعمالهم عشان الحكومة تقدر تتبع خطواتها الرشيدة في البيع، والخص .. خص .. ة.

ـ عدد الغارقين في العبارة والمحروقين في القطر حوالي 2000 اضرب الرقم * 6 المرة دي واطرح منه 2000 اللي ماتوا لأنهم مش هيقعدوا يتظاهروا يبقوا 10 آلاف.

ـ هات الغرقانين على المطرودين وكمان المعتقلين وحط فوقهم موظفين الحكومة والعيال اللي مش عايزة تذاكر وهات الفراخ المطلوقة من غير اأفلونزا والناس اللي اتشردت بعد أن هجرتها فراخها وحط فوقهم الناس اللي ماشية حافية وشعرها منكوش تحت الكوبري وخليهم ينادوا على كل الشباب والستات اللي قاعدين على قهوة البورصة والبستان وريش.. واجمع وشوف هيدوك كام .. مش عارف يمكن يقدروا يقفلوا الاستاد زى مظاهرة الحزب الوطني اللي الواحد فيها بعشرين جنيه، ولكن أن يصلوا إلى الرقم المجنون "مليون" فهو أمر إلى الآن خارج نطاق الخدمة.

لا نخرج للمظاهرات ونكتفي بالأسئلة، هو إحنا فاقدين الثقة في تأثيرها ولا في أنفسنا .. ننزل ولا ما ننزلش .. هنغير ولا مش هنغير؟.. تفتكر ايه

الحركة مازالت في الثلاجة

أغلب المهتمين بالنقد والتحليل والتعليل يرمون بغيظهم على الأحزاب والحركات السياسية وضعفها، واتفقت الآراء أن أهم سمات الوجه هي التلوين وعدم الجدية وخلط المصالح بالصالح مما أصدر عنهم رائحة لا يستسيغها الشارع المصري.

وقد جاءت سيرتهم بالخير في مركز البحوث الجنائية، فقالوا أن الشعب المصري لا يثق في الأحزاب السياسية بنسبة 67,7 %، كما لم تتعد نسبة المشاركة بتلك الأحزاب نسبة 8,4 % من مجمل الشعب الكريم.

ويذكرهم الأستاذ الصحفي عبد الحليم قنديل بالخير، ويحكى عن أحزاب الست نزيهة و مطابع " الأمل " التي يملكها عتاولة حزب التجمع خالد محي الدين و رفعت السعيد و التي تنفرد وحدها كل عام بالحصول على مناقصة طبع كتب وزارة التعليم و التي تكلف نحو 32 مليار جنيه بالرغم من وجود المطابع الأميرية التي من المفترض أن تتكفل هي بذلك الدور.

خالد الذكر

ولكن ولأن الكلمة الأخيرة تبقى دائماً لصوت الأغلبية فلابد من الوقوف مع الحزب الأكبر وذكر (خالد الذكر) "الشعب المصري".

وهو أيضا حزب ويتخذ أسماء عدة، فمرة يكون "الصبر حلو" .. " أكثر من كده و يزيح ربنا " أو يعلن عن هويته ويقول "الصمت سيد الأخلاق"، وليس لديه شخصيات كاريزمية قيادية، فجميع الأعضاء مبهرين ولديهم قدرات عالية على التحكم بالصمت.

كانت هذه مقدمة مختصرة وإليك التفاصيل..

فإن كان سؤالنا لماذا لم تخرج مظاهرة المليون فإن الجزء الأكبر من الإجابة يرجع ببساطة إلى أن مجمل من يشاركون في الحياة السياسية في مصر أيا كان شكل و رائحة تلك المشاركة لا يتعدى 44,8 % فقط، ولا يعنى الاهتمام المشاركة فقط بالطبع، فالمشاركين لا يتعدوا 8.4 8,4 و الباقي يكتفي بالفرجة أو كما تقول عنها الدراسة (مجرد المتابعة)و قالت أن عزوف سيادتنا( بعدنا يعنى ) متعدد الأسباب، أولها الانشغال بكسب لقمة العيش بنسبة 57,6 % و لعدم وجود وقت الفراغ بنسبة 29,6 %، و 43 % خوفا من الحبس و الإهانة.

وبهذا تصبح المعادلة بديهية ومحسومة بأنه لن تخرج مظاهرة المليون طالما المشهد لا يتغير، حيث يقف عشرون شخصا أشبه بالجيتو ينددون و يصرخون تحت الشمس في شارع عبد الخالق ثروت و الباقي 70 مليون إلا عشرين متراصين في أتوبيس النقل العام المارق دائما أمام هذا التجمع الجديد على الشارع المصري.

وإن كان هذا هو حالنا في الشأن العام فالوضع في شئوننا الخاصة يجيب الكافية، فجاء في تقرير ما ( آه التقرير الاستراتيجي العربي لعام2002 ) أن 14 % فقط من الشعب المصري يتقدم بالشكاوى إلى الجهات الرسمية و المسئولين ورد هذا إلى عدة أسباب أهمها الصورة المنطبعة لدى المواطن عن العلاقة السيئة بين الناشط السياسي وقوات الأمن .

و أمام هذه الأرقام و دلالاتها يقف علمي التاريخ و الاجتماع موقفا محيرا فإذا ذهبنا إلى التاريخ المعاصر قابلنا ارتفاع حركة المشاركة الشعبية في مصر و وصولها لأعلي الدرجات عقب الحرب العالمية الثانية و حتى قيام ثورة يوليو و أيضا فيما تلاهما، و برغم اختلاف الأوضاع خرجت مظاهرات تندد بالنكسة عامي 68 و 69 و مظاهرات كبري تطالب بالحرب عامي 72 و 73 و الظاهرة الأبقي و الأكبر هي خروج الجموع الحاشدة يومي 17 و 18 يناير 1977 لتندد بارتفاع الأسعار و رفع الدعم عن السلع الأساسية .

وإن سألت علم الاجتماع السياسي فعليك أن تتحير مابين أسماء النظريات وفي النهاية تترك جميع الاحتمالات مفتوحة.

فهناك نظريات " التوقعات المتصاعدة " و التي تربط بين الحرمان النسبي و الإحباط و السلوك الهجومي فتشير إلى أنه عندما يتفق حال الجميع في أن ما هو متوقع بعيد تمام البعد عن ما هو قائم فإنهم يتجمعون تلقائيا في جماعة واحدة خاصة عندما يرتبط هذا بافتقاد العدالة.

أما أن ينتج عن هذه الجماعة فعلا غير الصمت فهذا ما اختلفت حوله النظريات فبعضها يري أن الحرمان و الكبت بالتأكيد يوصلان إلى الانفجار، وآخرين ( تقريباً شربوا من النيل) بيقولوا أن قهر الشعوب و سياسيات التجويع إلا تنقل حياتك من سلبية إلا سلبية، وأن الاستبداد السياسي سيؤدى بالتالي إلى ثورات ضد هذا النظام و لكن الاستبداد الاقتصادي يؤدى بالناس إلى الموت البطيء.

عادى بقى

تخيل إحنا مكبوتين ومحروقين وكل ما قالت عنه النظرية الأولى، وشكلنا بيقول على وشك الانشطار و الانفجار وبنطلع شرار.

وفى نفس الوقت دايما نقول .. "المصري هيعمل ايه.. غصب عنه .. مشغول بالجري وراء لقمة العيش ولو قلت مظاهرة هايفكر أن المرتب لا يتجاوز300 جنيه والأسرة لا تقل عن ست أفراد والخروج في المظاهرة يعنى خصم يوم كامل من المرتب اللي بيخلص قبل ما ييجى في الديون وأغلب الناس اللي في المظاهرات من المتيسرين ماديا فلا يوجد بينهم من ينهمك في عملين عشان يكفى عياله".. وبسرعة ننهى الكلام ونقول صدق الأخ سعد زغلول لما قال( مافيش فايدة)، وننسى إنها آخر كلمة قالها بعد ما عاش و اتنفى وعمل اتفاقات وانتكاسات واكتفى.

نقطة صفر

زي ما قلنا لو بتفكر كنوع من التغيير تجمع مليون مصري وتقف بهم في الشارع، فسوف تحتاج للمقادير التالية:

قضية + ناس كتيييير + غيظ + إصرار + حلم .. ايه كمان

نسينا نقولك على أهم شرط وهو " الأخت مطالب".. آه .. يعني أنت لازم تكون محدد أنت عايز ايه، وسعادتك طالع في الشارع بتصوت ليه برضه؟

نصيحة .. لو حصلك زي ما حصلنا ومن كتر ما أنت عايز اتكتمت .. افتح التليفزيون على فيلم "الإرهاب والكباب" واتفرج على مشهد عادل إمام لما وقفت الداخلية كلها تحت مجمع التحرير تسأل عن المطالب .. تنح وقعد على جنب .. وقال أنا مش عايز أتهان .. لا في بيتي ولا في شغلي ولا في الشارع" .. فكر في أي من تلك الخانات تضم صوتك إليها، ولا تنسى في خانة اسمها أضف جديدا..

عموما وطبعا وكل الحاجات، إحنا ما قولناش حاجة .. وأنت وحظك بقى.

• تصادم.. تاني!

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. طماطم كُتب في
    بس فى حاجه
    المشكلة مش فى انك ازاى تلم الناس المشكلة فى ان الناس خايفة اى حد عايز يدخل فى مظاهرة بيخاف عشان قبل مايدخل بيتهوم هيدخل المعتقل مفيش ديمقراطية وبعدين المظاهرات فى الدول التانية بتقدر تطلع بنتيجة لاكن احنا هنا بنزعق وبس
    ولا حياه لمن تنادى
    وفى حاجة جميلة اوى عشان احنا طبعا عدد السكان كتير فدا طبعا مكتر الامن المركزى
    بجد عساكر مفيش عندهم مخ ابدا متبرمجين على الضرب بس سبحان تلاقيهم طلعو منين متعرفش
    مرة واحده تلاقيهم قدامك
    وبعدين الشعب تعبان اخرة لقمة عيشة وبس
    لانه فقد المصداقية فى كل حاجة خلاص مبقاش يصدق حد
    غير نفسة ولونة ساعات بيشك فى نفسة
    مصر خلاص ضااااااااااااااااااااااعت
    واحنا بالتالى ضعنااااااااااااااااااااا
  2. مخ مخ كُتب في
    لا ياجماعة
    لا ياطماطم
    مصر لسة ماضعتشى
    واحنا لسة مضعناش
    بس انا فى راى ان المشكلة مش فى الحكومة.الحكومة دى مش من برة مصر الحكومة دى من مصر..........والناصح يفهم
    مشكلة مظاهرة المليون
    كل الى اتقال الاول دة صح بس لازم نضيف حاجة مهمة جدا
    ان الشخص المتظاهر دة لازم يكون عامل الى علية فى عملة وبيتقنو حتى لو كان العمل دة بسيط جدا
    وبالتالى المعادلة تكون
    انا بعمل الى علية كويس جدا وعاوز مردود دة
    كرامة احترام
    والشخص دة مابيتنزلش عن حقو بسهولة
    وبتالى بنوصل لشخص عندو القدرة انو يتظاااااااااااااااااااااااهر
  3. مخ مخ كُتب في
    سوأل
    هل ال 70 مليون مصرى بيحولو يعملو الى عليهم؟
    ولا
    ياعمى مشى حالك مهى كويسة اية!!!!!
    هى مش مشى خلاص!!
    اشترى دماغك مهى فل!!!
    كبر ياعم!!!!!!!!!!!!!!
العودة إلى الأعلى