ساعة ولادة

عندي في الدولاب 500 جنيه أمانة بتاعت فلانة... ومستلفة من علانة مبلغ كذا .. وإوعى تتجوز عليا لو جرالي حاجة

27/03/2006

رغداء بندق - ولاد البلد

وأخيرا استطعت أن أقتطع من ساعات يومي بضع دقائق أستطيع أن أسجل فيها ساعات ولادتي لطفلي الأول عمار.

كان يوم جمعة ابتديته بالآم متباعدة اقدر استحملها حتى اقتربت الساعة وأستعدينا نروح المستشفى في الساعة السابعة مساءا ...في الطريق فضلت أذكر تامر(زوجي)

- عندي في الدولاب 500 جنيه أمانة بتاعت فلانة... ومستلفة من علانة مبلغ كذا .. وإوعى تتجوز عليا لو جرالي حاجة

(يقاطعني) إيه اللي بتقوليه ده يا رغدة ... مش وقته أذكري الله

- يااااااااااااارب اديني ساعة خفيفة (واستمر في البكاء)

وأخيرا وصلت المستشفى والألم يزيد وازداد أنا خوفا وبكاءا.. أعترف أن البداية كانت إلى حد ما محتملة لكن خاتمتها كانت فضيحة.بدأ الألم يزيد وبدل ما يجي كل 3 أو 4 دقايق بقى كل دقيقة ومع كل دقيقة استنجاد بالله ثم الدكتور

-أنا تعبت ... طب اديني أي مسكن

- لو اديتك مش هتولدي

(أستمر في العياط بصوت أعلى ...)

- مش قادرة ياتامرررررررررر.. يماما اعملي لي حاجة

- لا اله الا الله .. يا بنتي كلها ساعة ولا اتنين ونخلص .. استحملي انت بس

-استحمل اية يا ماما .. انا مش عارفة انت جالك نفس تولدي 6 ازاي!!!

- الله يكسفك .. انت لسانك طويل حتى وانت بتولدي.

(تامر مازال ماسك في ايدي ويقولي) ادع لاخواتك ، واخواتي، ادع ربنا يجعلة من الصالحين

بسرعة احاول افتكر اسماء اخواتي واخوات تامر ووالدينا .. وابدأ في تذكر طلبات صديقاتي

- يا رب ارزق ( فلانة وعلانة وترتانة ...الخ) بزوج صالح يستاهلهم ، يا رب اشفي والدينا من كل علة، يا رب ارزق فلان وزوجته بالخلف الصالح ويا رب ويا رب ..

ولله الحمد منستش حد ممن وصاني بالدعاء له لان ساعات المخاض كانت طويلة وكانت كل ساعة بتعدي عليا احس انها دهر واقول في صراخ معجون بالدموع

- لك حق يا ستنا مريم تقولي" ياليتني مت قبل هذا وكنت نسيا منسيا"

أكمل دعائي بذكر أسماء الله الحسنى وأعيد سلسة الدعوات والاستنجاد بالدكتور واللي أشهد له بهدوء الأعصاب لدرجة أني قلت له.

- مش عاوزة أولد طبيعي ... خلصني عاوزة أولد قيصري ...افتحوووووووا لي بطنننني

- يا مدام رغداء ... انا اتحطيت في المواقف دي كتير فياريت تشوفي كلام غير ده تقنعيني بيه .

مش عارفة الراجل ده بيستفزني عشان اولد بسرعة ولا ده طبعه!!

- تعبت يا بابا

- ربنا يهون عليك يا بنتي ... انا بقول عليك جدعة .. استحملي

- مفهاش جدعنة دي يا بابا.. اعملوا لي حاجة... ادوني الحقنة بتاعت الولادة بدون ألم

- ماتقلقيش يا مدام رغدة.. دكتور التخدير مستنيكي تحت

- خلصوني باة.. انا تعبت

حاول الدكتور يطمني

- لااااا لسة بدري إنت قدامك ولا تلات ساعات ... وبعدين اللي فيك ده مش ألم ...ده دلع

- دلع !!! كل اللي فيا ده ودلع امال لو جد هيبقى إييييه ...آآآآآآآآآآآآآآآآآه

- أيوة صدقيني...ده إحنا لسه في الأول

- والنبي إية... يا سلام

- هقولك على حاجة يا مدام رغداء

(أحاول أبلع الألم وإلتزم الصمت لانه واضح هيقولي حاجة تخفف عني الوجع)

- خير؟؟

- اتفرجي على هيفاء وهبي وانت تنسي الألم ( هااهاهاها)

(آخد بالي إن الدش شغال على أغنية من أغاني هيفاء ..أقول بهمس)

- يالهوي ع الخفة ... (ثم يبدأ صوتي يعلو بحيث يسمعه الدكتور ومساعده) إنت جايب روقان البال ده منين!!!

وبعد أكتر من 8 ساعات متواصلة أخيرا هدخل أوضة العمليات ويصمم زوجي العزيز أنه يدخل معايا الأوضة ...مسكت في إيديه

- أنا خايفة ياتامر( وأعيييييييييييييييييط)

- أنا دخل معاك أهوه ... قولي يارب

حاول الدكتور ومساعده إنه يهديني قال

- إية يا مدام رغدة ... ما تخليك راجل أمال

(ومن شده غيظي منه ونفاذ صبري قلت له)

- والله لو فيك نقطة ألم واحدة من اللي فيا مش هتستحملها.

وبعد تتابع الآهات والصرخات أتذكر دكتور التخدير بيقولي

- هاتي إيدك بسرعة

- وكأني مسمعتش من صوت الدكتور ومساعدة وكمان صوت العدد والحركة المريبة في الأوضة غير صوته..وبسرعة أرمي له ايدي ويلتقطها هوه وكان ده آخر عهدي بغرفة العمليات.

وبعد ساعة أو أكتر أفوق من البنج وأول كلمة أقولها لتامر

- هوه خلاص؟؟

- أيوة يارغدة ... حمدا لله على سلامتك

• الفوائد.. لأبى مصعب المصري

• هوس ومهووس وبينهما.. هسهس!

• هوس اسمه فيفا !

• لعنة فيلم الرئيس !!