ستموني الإغنية المصرية..
إنه إسلام خليل الشاعر الملاكي لشعبولا وصاحب أغنية الدنمارك وأخيرا أغنية أنفلونزا الطيور
28/03/2006
هيثم دبور – الدستور:
هو ماركه مسجله لكل مناسبة وأي مصيبة يمكنه أن يصوغها في شكل، أغنيه شعبيه أو سبوبه غنائية، يتقاسمها مع شعبان عبد الرحيم في كل المناسبات، فضائيات، أفراح شعبيه، كباريهات، سبوع، طهور، كله ماشي..
إنه إسلام خليل الشاعر الملاكي لشعبولا وصاحب أغنية الدنمارك وأخيرا أغنية أنفلونزا الطيور
أخيرا قرر أن يعترف لجريدة الدستور ويحكي أكثر عن حياته وكلماته فكان هذا الحوار:
* من أين جاءت لك فكرة أغنية أنفلونزا الطيور؟
أي حاجه بتهم الناس بحب أعملها أغنية وبحب أعبر عن حركاتهم وأحداثهم لكن موضوع الأنفلونزا ما كنتش ناوي أكتب فيه لحد ما صحفيين كثير طلبوني وقالوا لي إن مجلس الشورى عايزنى أكتب أغنيه لشعبان عن الأنفلونزا قمت كاتب على طول.
* ومش ناوي تعمل حاجه عن العبارة؟
لأ، لأن الجاني الحقيقي مش معروف للحكومة، ومش حابب أكتب عن الضحايا عشان الناس نوحوا وخلاص.
* ناس كتير شايفة إنك تسترزق من مصايبهم ؟
أبدا، يعنى الواحد لما يعمل أغنيه عن الرسول ـ صلى الله عليه وسلم ـ يبقى بيسترزق؟ احنا عملنا الأغنية دى وأهديناها للفضائيات من غير فلوس.
* وما أخدتوش فلوس من منتج الشريط؟
لأ طبعا أخدنا، دا حتى ألبوم شعبان الجديد إتاجل عشان ننزل الأغنيه دى فيه، كنت كلمت المنتج علاء وهبة وطلبن منه يشيل الأغنية الدينيه اللى كنت عاملها لشعبان عبد الرحيم ويحط أغنيه الدنمارك لأنها سمعت أكتر والناس بتطلبها .
* والأغنية الدينية التانية كانت عن إيه؟
كانت دعاء دينيا إننا لازم نحب بعض وربنا يسترها علينا، يعنى موضوع لذيذ ودينى .
* ومادمت تعبر عن هموم الناس.. لماذا لم تكتب أغية عن مظاهرات كفاية والشعب اللى بيتضرب من أمن الدولة ؟
لأنى بشوف إن الحاجات دى والحكايات دى أغلبها مصطنع يعنى همه اللى بيجوا جنب الأمن أو يبدأوا ،وأنا لما بتابع البرامج فى التليفزيون، بحس إن الحاجات دى مصطنعه.
* عشان كده كتبت أغنيه للرئيس ساعة الأنتخابا ت؟
آه.. لأنه كان أحسن حد ممكن يمسك البلد من ساعة السادات ولحد دلوقتى، ولأن مرشحين كتير كانوا أكبر منه فى السن!
* وعملت حاجه فى إنتخابات مجلس الشعب ؟
عملت أكتر من 100 أغنية ناس كتير طلبوها منى عشان يغنوها كدعاية وإن الراجل ده كويس وحيصلح لكم الدايرة وحيحقق أمنياتكم.
*وعلى كده تعرف الـ100 كلهم ؟
ولا حتى ربعهم، همه بيقولولى أكتب أقوم كاتب على طول ،وفيه ناس مشاهير طلبت منى أكتب لهم زى كمال الشاذلى ويوسف بطرس غالى ومحمود معروف.
* كلهم حزب وطنى ؟يعنى مكتبتش حاجه للإخوان ؟
معرفش، اللى بيطلب منى بأكتب له.
* طب كتبت حاجه لحد فيها الإسلام هو الحل ؟
لأ
* مش شايف إنه تناقض إنك تعمل أغنية للرسول ـ صلى الله عليه وسلم ـ والتانية لمروى بتقول ـ الصراحه راحه ـ أو أغنية شعبان الأخيرة اللى اسمها ـ وحياة أمك ـ ؟
لأ، أبدا أنا صنايعى كويس بعرف أعمل أغنية لذيذه،زى مابيطلب منى بالضبط.
* وبتعمل إيه غير التأليف اليومين دول؟
أنا بقيت موجه موسيقى لإدارة منشية القناطر التعليمية بعدما كنت مدرس عربى ودين فى التعليم الإبتدائى، وبحاول أعلم العيال الموسيقى وببقى مبسوط إنهم حافظين الأغانى بتاعتى وحاطبع ديوانى قريب.
* ديوان إيه ؟
ديوان الشعر اللى باكتبه، الثقافة الجماهيرية عرضت على طبعه وقالت لى إنهم بيحاولوا يضموا أشعار الشعراء الكبار وبدأت فعلا أجهز مع قصر ثقافة القناطر للديوان ده .
• جمهورية مصر القبطية.. على الانترنت!
• الأقباط.. وبنك فيصل!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
ربنا يهديه ويهدى كل الناس اللى سايبه كل حاجه ومهتمه بالاغانى والشعرا ء وحاجات غريبه
ربنا يهدى
هوه صحيح كلام البنى أدم ده غريب... بس مش نطلع من ده كله إنه شاعر ... و إن الشعراء بقى ولاد...
أولا ده مش شاعر حضرتك.... ثانيا... مش فاهم... مين قالك إن الناس مهتمة بالشعراء؟!!.. على اساس إننا عايشين فى مكتبة ولا إيه... عموما ياريت... و أخيرا بقى... ربنا يهدينلا جميعا...