أولي ابتدائي .. فاكرها
الحمد لله قدرنا نوصل لبعض هذه الجوابات الجبارة.. مش اختراع طبعا.. نص أصحابنا أمهاتهم مدرسات.. وربنا يكرم عبد الناصر اللي افتتح معهد إعداد المعلمات في الستينات..
29/03/2006
داليا العقاد ـ منى سليم ـ ولاد البلد:
فاكر أولى ابتدائي.. عندما كانت تكسو البراءة وجهك، وتكتسب أفعالك لون طفولي ساذج، وكان قلبك قلب خصاية، باختصار هل تتذكر هذه الأيام .. عندما كنت علي استعداد أن تقضى ليلك نهارك تغنى أغنية لبلبة " بابا حبيبي ماما حبيبتي صاحبي حبيبي..".
لما كنت لسه بتقول ع السكر ..أوكر، وعلى الصابونة.. أبونة..
افتكرت ولا.. عموماً اسمع الذكريات (اللي تشرف) للإخوة والأخوات.. وبعدين نحكي كلنا عن نوادرنا اللي اغلبها (فضايح طبعاً) في الابتدائية.
أنا بحبك أوى يا ميس
نتذكر طبعاً، أهم شخص مر علينا في هذا اليوم الصعب.. أول أيام المدرسة.. إنها الست الـ(ميس)، وللي كان في مدارس حكومية كانت اسمها "الأبله".
دخلت لتفض خنافتنا عن مين يقعد في التختة الأولى.. وتقولك أنها زى ماما عشان تبطل غباءك وتقعد في مكانك من غير عياط وكأنك بقيت يتيم وقاعد في جنازة أهلك كلهم، ولأنها الميس فربنا انعم عليها بنعمة كبيرة اسمها الجوابات الغرامية الهامة اللي بيكتبها أمثالنا زمان لما كنا تلامذة عشان نعبر عن حبنا ليها.
الحمد لله قدرنا نوصل لبعض هذه الجوابات الجبارة.. مش اختراع طبعا.. نص أصحابنا أمهاتهم مدرسات.. وربنا يكرم عبد الناصر اللي افتتح معهد إعداد المعلمات في الستينات..
الجوابات طبعاً اغلبها ا أوراق مقطوعة من كراريسهم.. مرة من كراسة عربي ومرة من كراسة انجليزي ومرة أخري من كراسة رسم ومرة رابعة ورقة فلوسكاب.. لكن الشيء المميز أن رسائلهم مليئة بالرسومات والاستيكارز قلوب وأزهار ونجوم ملونة، وطبعا لا تعلق على الغلطات الإملائية، سيبونا (غبية الكلمة دى إنا اللي قايلاها .. منى) دعونا على رأى (داليا) لا نضيع وقتا وندخل في المضمون بأقلامهم ..
فصل 3 \4 وميس ياسمين
نبدأ مع هادير في 3 إبتدائى (بقت في كلية صيدلة زى ما الميس بتقول) ولأنها دائما مميزة كتبت (أنا أحب ميس ياسمين جدا جداً، وأحب أكتب لها شعر..
دخلت حجرة مظلمة..
وجدت شمعه منورة
قلت مين يا ترى..
قالت امرأة أنا ميس ياسمين
ورسالة أخري بس الاسم مش واضح لكن برضه للأستاذة ياسمين ( أنا بحبك يا ميس لو سمحتي متسبينيش طول عمرك)، ومن نفس الفصل 3\4 أحمد على (أنا احبك من كل قلبي اكثرمن أمي واسمع كلامك في كل حجات).
وبالطبع توجد رسائل تحمل أكثر من تعليق، كتب واحدة منها فصل 2\1 لميس هدى بعد ما ربنا سترها معاها واتجوزت.. (مبروك يا احلي ميس انتى ومستر احمد جوزك، إحنا بنحبكوا أوى ).
ولا يخلو الأمر بالطبع من رسائل الشر زى رسالة واحد بلاش نقول اسمه لميس أسماء ( (أنا احبك واتمني أن تحبيني كما تحبي عمرو هو أنا مش شاطر يا ميس على فكرة هو بيغش منى في امتحان الشهر بتاع الحساب والله).
وهناك طبعا أوقات الفراق الصعبة زى معتز وهو في أولى ابتدائي (ميس أنا بحبك ومش عايز تمشى أنا بحب المدرسة وهجى كل يوم مش هاغايب خلاص).
حاجة تنرفذ .. من زمان
كتبنا احلي كلام لكن طبعا إحنا استحالة ننسى أن في ميسات وناظر وناس كتيير عايزة يتكتبلها هي كمان...
أنا (منى) هاحكى لكم تجربة مريرة من تانية ابتدائى.. كنت بجد والله شاطرة أوى وكانت السنة الوحيدة اللي أقدم فيها إذاعة المدرسة، المهم في حصة الألعاب ميس كريمة هانم تأخرت وإحنا ما بنفعش ننزل للحوش ولا نغير هدومنا من غير ما هي تيجى تخدنا في طابور، كنت عقبال عندكوا أمين الفصل وكتبت اسم العيال كلها الهانم مشرفة الدور جت شافتنا هزأتنا وقعدت تزعق وبعتت عم جودة يناديها.
تقريباً سمعت لها كلمتين، جت عنيها بتطق شرار، أنا طبعاً كنت واقفة على السبورة بكتب الأسامى، قالت كل واحد يقعد مكانه وجابت عصاية وكان أول ضربة من نصيبي لان أنا هانم وبقعد في الصف الأول وبعد كده ما كملتش وقالت يالا على الحوش .. بجد مش قادرة أسامحها... طبعا كتبتلها جواب قولتلها فيه إني موش مسامحاها أبدا..
بره الفصل.. في الحوش
نكتفي بهذا القدر، نخرج شوية بره الفصل ونروح الحوش..
بالطبع أول حاجة ممكن نفتكرها الاتهام الشهير في حد (اسمه اشرف او نهلة الطخينة اللي بتقعد في الديسك الأخير) بيدخل الفصل في الفسحة وياخد الاستيكة والفلوس اللي بابا مديهانى عشان اجيب حاجة حلوة في المرواح.
تانى حاجة طبعا.. لما ننزل الفسحة فأهم لعبة في تاريخ المجتمع الابتدائي.. "نلعب نضرب" .. فاكرها .. كل الولاد يضربه كل البنات .. وبعدين النهاية المنطقية شد شعر .. شتيمة .. عياط .. ترررن .. الجرس ضرب كله ع الفصل .. بسرعة يا ولد انت وهو وهى.
وآخر الذكريات لا تنسى مهم كان، الغراميات الخالدة .. كانت تملك أطول ضفيرة في الحياة .. كان اشطر واحد وكان بيحب يلعب معا.
واحد مش عايزين نفضحه، حكي لنا عن أنهم كانوا مع بعض في الفصل وجيران، هي كانت ساكنة تحتهم، بس مامته هو مدرسة انجليزي وكانت بتذاكر لهم سوا فوق.
عادى بقى، سابتهم يحلوا الواجب وكانت كل شوية تشتمه لأنه بيحل غلط وبيلخبطها، وبعد كده خد القرار وقلها انا بحبك اوى ..باسها وطلع يجرى. انتهى الوقف طبعا ان هي راحت زى العبيطة وقالت لمامته ابنك مش مؤدب ياطنط .. وعملت للود عقدة من الجنس للطيف .. ربنا يسامحها.
بس خلاص ، إحنا خلصنا اللي عندنا.. احكوا انتوا بقى .. ا
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
اول يوم بابا وصلني المدرسه ودخل معايا ودخل للمدير راح قايله عندنا فصلين واحد الاستاذ يوسف راضي والتاني (مش فاكر اسمه) بابا قاله وديه عند الاستاذ يوسف راضي (فلسطيني الجنسيه) المهم دخلت الفصل لقيت المدرس يقول أواال اتنين يروحوا العيال قايلين وراه أواال اتنين (عشان احنا في اول اتنين يعني مش اول واحد)اصل هناك مش الف وباء هناك واحد واتنين
المهم الحصه الاولى خلصت على انه يقول اول اتنين واحنا نقول وراه الحصه التانيه بقا يقول واحد نقول وراه اتنين نقول وراه تلاته نقول وراه .
انا كنت داخل المدرسه كبير لان راحت عليا سنه كنت حاسس اني مدايق اوي وايه اللي احنا بنقوله ده ؟ خصوصا اني كنت بعرف اقرا ومش طالبه اني اقول اول اتنين او واحد اتنين
في الفسحه قابلت اخويا وقلتله الحق هوه انا جي المدرسه دي عشان اتعلم واحد اتنين وبعدين احنا اتاخرنا اوي مش كده بابا وماما يقلقوا علينا .
لو اضفنا للجو اللي انا بحكيه ده ان كان في ولد اسمه (يزن) سوري عمال يعيط طول ما هو قاعد يبقى انا كنت حاسس اني في مورستان حقيقي
وكفايه كلام كده
مش عايزكم تفهموني غلط في الموضوع ده
ان طيب والله وماقدرش ازعل من حد ساعتين علي بعض بس لو حد ظلمني مابقدرش انساهاله ابدا حتي لو كنت سامحته
كان فيه مدرسة مش فاكر اسمها كانت هوايتها انها تضربنا تقريبا عشان نسكت وكانت بتستظرف وتقول (مش انا اللي ضربتكم دي العصايا) يا سلااااام
نفسي بقه اقابلها تاني دلوقتي وانا هاقنعها ان ايدي هي الي هتكسر نافوخها مش انا
بصراحة انا لسه باكرهها لحد دلوقتي
قلبتوا علي المواجع
وسلام
Dabdoob
احكلكو ايه ولاه ايه ولاه ايه
اولا انا كنت شقييييه جدا في الفصل من الاخر كنت مشاغبه
بس كنت غبيه برضه والله اليوم اللي عمري ماانساه
والاستاده بتديني الشهادة واناجبت فيها كحكه في الحسا
ب
وريحيه ماما بقي وفرررررحانه انا الوحيده اللي جبت
كحكه
هي كنت بتخبز جوه المصيبه كنت بتعمل كحك برضه اه والله
لقتها عماله تصوت كحكه كحكه ياحماره مااحنا عندنا كتير
اهوه وانا مستغربه هي بتزعق ليه دا انا الوحيده
اللي جبتها . الظاهر الحساب عمل عميله لما كبرت
وقررت اخش رياضه انتقاما
يلا كانت ايام لديده لو ترجع بس من غير كحك
انا بقى يا جماعة اولى ابتدائى دي عملالي عقده ...و انا صغيرة ماما ماكانتش بتحب تعملي ضفاير و كانت بتقصلي شعري عل طول القصة بتاع مي عبد النبي قصير بس مغطي الحلق بتاعي..الميس لما شافتني في الزحمة بتاع اول يوم افتكرتني ولد.قعدتني وسط الولاد ..لا و في اخر صف..
الصراحه انبسط و عملت عصابة م الولاد و كنت انا رئيستها و كانوا كلهم بيسمعوا كلامي و ما يقدروش يتنولي كلمه...بس بعد شويه كنت بابص للبنات ..كلهم قاعدين جنب بعض و بيخرجوا الفسحه سوا..و كلهم عاملين ضفاير و بيلبسوا توك....فاقسمت بيني و بين نفسي ان تبقى عندي اكبر ضفيرة و اني اشتري توك البلد كلها و اجبر كل البنات انها تمشي معايا و كمان يسمعوا كلامي (حاجه كده زي فيلم امير الانتقام)
بس ...تاني سنة عملت كده و بقيت الكل في الكل....بس العصابه القديمه بتاعتي العيال طلعوا جدعان و لما رشحت نفسي عشلن ابقى رئيسة الفصل خلوا كل الفصل صوتلى تحت تهديد السلاح .....و الله كانت ايام
أولى ابتدائي
كنت بكره الصحيان بدري وبحب السهر طفله وكل يوم خناقة وعياط واستخبى تحت الشرير ويجبوني بس وبعد الحرب دي كلها اتحشر في زي المدرسة اللي كان مريله وشنطه فيها سندوتشات مش بحبها
على باب المدرسة او الفصل حسب التساهيل يعني اسيب السندوتشات
طفله هادية مش بتتكلم خالص تفتكروها خرساء ودني بتحمر وتسخن في الشتا وانا بحل واجب الحساب الغلس
واعد على صوابعي " لحد النهاردة" واتعلق بالميس الطيبة بتاعتي اللي مش فاكره اسمها وارجع البيت اعمل الواجب واعمل نايمه في السرير لقرب الفجر وبعد ساعه ولا اتنين نفس الايد بتصحيني وتبتدي خناقه الصحب واستخبى تحت السرير ويجبوني "
ياااااااااااه كانت ايام
اولى ابتدائي دي كانت اجمل يوم ...
لاني كنت سعيده جدا وانا رايحه المدرسه لاني كنت ببص ع الاولاد اللي اكبر مني وهما شايلين الشنط والزمزميات ورايحين المدرسه وكان بيبقى نفسي اقلدهم ..
لكن اللي انا فاكراه اوي في اول يوم منظر الولاد معايا في الفصل ..
كانوا في تناقض غريب ..
اللي الاقيه واخد ركن وعمال يعيط ..
واللي فاتح السرينه ععععععععع عازو مااااااااااااااماااااااا ... لدرجة اني كنت شايفه لوزه وانا قاعده مكاني ...
واللي عمال يضحك زي الاهيل ..
واللي مطلع سندوشتات وعمال ياكل ..مع اننا كنا لسه داخلين الفصل ..
بين كل دول ودول انا كنت بتفرج بهدوء ع السيرك اللي اتنصب حواليا ..
غير كدا المكان ما كنش غريب عني لاني ..
كنت بدخله كل يوم من وانا عمري 8 شهور مع مامتي ..
لانها كانت بتشتغل اداريه هناك ..
وكنت بتحرك بكل حريه ..اسيبها واسحف والمدرسين يلاقوني داخله عليهم الفصل ..
كان جو جميل انا كنت متعوده عليه ..
لكن للاسف انا دخلت المدرسه من هنا .. وماماكانت اترقت واتنقلت طبعا ..
لكن حقيقي كانت ايام لذيذه ..
دا غير الحفلات في الدراسه او حتر النادي الصيفي والمكتبه اللي كنت مشتركه فيهم ..
واني كمان كنت بقدم اذاعة المدرسه من 3 ابتدائي لحد الثانوي ..
اقوللكم ايه ولا ايه بس ..
طبعا الابتدائي دا كان احلا ايام حياتي ..
تارعحجح مهفقتكككككككك كتلب ننعلر ممخعغل ننههعاى ههعغللا نهعفل ههغاى مخهعغاى مهعغللا وهعغلفبرلا ىةنهعغلفبرلا ةنهعغلبرلا ىةتعغببرلاىنهقثيبرلاىتعغفبرلا ىخهعغبرلاىةنهعغللاىةنهعغفبرلاىتعغفقبللاتنقبلاتهغاىةنهعغ