في البحر سمكة.. اسمها حسين !

طفل صغير اسمه "حسين رمضان".. عمره 12سنة.. تجده على إحدى شواطئ الإسكندرية.. في الصباح يخلع حذائه ويضعه جانبا ثم ينزل بين الصخور لكي يجمع الصدف والقواقع.. في همة ونشاط يمارس عمله.. ثم يأخذ ما جمعه ويضعهم في ملابسه ويعود ليرتدي حذائه ويختفي عن الأنظار لساعات معدودة.. حتى يعود وقد امتلأت يداه بعقود من الصدف يعرضها للبيع على المصطافين خاصة الفتيات ليترك لهم زينة من رائحة البحر عليها بصمة من صنع يده.

يقول الطفل الإسكندراني: "أنا أصغر إخواتي ليا ست إخوات أكبر مني، أبويا وأمي عندهم كافيهات وشغالين فيها.. أنا في المدرسة في سنة ستة ابتدائي".

في الصيف يتحول حسين لبيع العقود التي يصنعها بنفسه، يقول: "عقود الصدف دي مزاج وبتجيب فلوس كويسة، أنا بجيب الصدف من وسط الصخور وبحط بين كل صدفة وصدفة كور صغيرة بشتريها بالجملة من المنشية وخيط وأعمل العقود وأنزل أبيعها ومش لوحدي بكون أنا وأولاد عمي، وبنكسب الحمد لله والفلوس دي أن بشيلها ليا عشان لما أكبر أقدر أطلع ضابط، أصلي سمعت إن الواحد عشان يبقي ضابط لازم يدفع فلوس كتير أوي، عشان كده بحاول أظبط نفسي من دلوقتي".

البحر مليان خير

يجمع حسين القواقع أيضا ويعمل منها عقود مثل الصدف، فبرأيه "البحر ده مليان خير، واللي يفتح معاه يكسب من وراه دهب، وبعدين الناس المصيفة اللي من مصر والمناطق التانيه بيحبو العقود دي ويبقوا عايزين يشتروها ودي بتبقي فرصة لينا وهي أي حاجة تجيب فلوس".

لأن البحر برأي بائع العقود ملئ بالخير فقد رفض أن يتعلم حرفة كما يحثه جده دائما واختار البحر الذي يعشقه.. "أول حاجه عملتها بقيت أصطاد الكابوريا من وسط الصخور، وكان يومي كله جري ومراقبة في الكابوريا، ورغم أني بحبها وأحب أصطادها لكني سبتها في حالها لما لقيت نفسي بتعب ومش بلاقي حق التعب ده، ولقيت القواقع قدامي بتبرق فجتني الفكرة وقولت لاولاد عمي واشتغلنا مع بعض وربك بيكرم".

حاسس إني سمكة

يتوقف حسين عن كلامه قليلا وهو يقلب في العقود التي يحملها في يديه ثم يكمل: "في ناس بتقولي إن ده فهلوة، بس الفهلوة مش عيب، أنا عايز أعيش وأعتمد على نفسي، وبعدين أنا ما بنصبش على حد، أنا كل اللي بعمله حاجة الناس بتحبها وتشتريها".

عندما ينتهي الصيف يعود حسين إلى المدرسة وفيها "بذاكر كويس عشان أنجح ومضيعش اللي أنا عملته في الصيف، وكما أحقق حلمي وأبقي ضابط".

الشتاء لا يمنع حسين من نزول البحر ومنطقه في ذلك: "مهما ألف وأدور لازم أرجع للبحر.. في الصيف وفي الشتا.. في الشغل واللعب.. أنا حاسس إني سمكة ومقدرش أبعد عن البحر أبدا".