مش هانشبع لطم بقى؟؟

المثل بيقول جنازة وشبع فيها لطم

والاعلام المصرى لقى جنازة ومش عايز يشبع فيها لطم

يعنى ايه تنضم القنوات الخاصة ويعملوا يوم فى حب مصر

بقى دة كان يوم فى حب مصر ؟؟ لا يوم فى التحريض ضد الجزائر

طيب لما الزبالة ملت شوارع القاهرة معملوش ليه يوم فى حب مصر وحرضوا الناس انهم يعملوا فايل ويبعتوه لجمعيات حقوق الانسان فى العالم كله عشان نشوف لنا حل فى موضوع مصر اللى اتبهدلت واتملت قمامة ما بيجيش منها غير الامراض

ليه ما عملوش يوم فى حب مصر عشان يفضحوا أقسام الشرطة اللى هارية المواطنين تعذيب ؟؟

ليه ما عملوش يوم فى حب مصر لما الشوارع اتزحمت بالعربيات وبقت سرعة العربيات فى وسط البلد لا تتعدى 20 كم فى الساعة يعنى الواحد يمشى على رجليه اسرع من العربية ؟؟

ليه ما عملوش يوم فى حب مصر عشان يشوفولهم حل فى الاطفال المصابين بالسرطان اللى كل يوم بيزيدوا عن اليوم اللى قبله ؟؟ ولا دى مش قضية امن قومى ؟؟ ولا دول مش هايبقوا رجالة بكرة

ليه ما عملوش يوم فى حب مصر لما المعبر اتقفل قدام اخوانا فى فلسطين اللى كانوا بيهربوا من جحيم نيران وقنابل العدو الفسفورية ؟؟

ليه ما عملوش يوم فى حب مصر لما كل يوم والتانى يتقتل لنا عسكرى او ضابط على الحدود من قوات العدو بنيران صديقة ؟؟

ولا هى نيران العدو بقت صديقة وتهويش الاخ بقى نيران ؟؟

انا لحد دلوقتى ما عرفتش كام واحد مصرى مات فى الخرطوم ؟؟

ثم ان الواحد لو ليه أخ عصبى شوية او حتى قليل الادب او على اقصى تقدير أخ صايع .. هاعمل معاه ايه ؟؟

هايقاطع اخوه ؟؟ هايقطع صلة رحمه .. عشان ربنا يوم القيامة يقطعه زى ما قطع صلته بأخوه

يكفينا ان العقلاء الجزائرين بيعتذروا لنا كل شوية سواء بالايميلات اللى بتوصلنا او اصدقائنا الشخصيين أو على الفيس بوك

انا مخنوقة اوى بسبب الموضوع دة

قد ما كنت مخنوقة من اللى حصل للمصريين فى الخرطوم

قد ما انا مخنوقة ان الموضوع عمال يشعلل وما بيهداش

اللهم اصلح ما بيننا وبين اخواننا العرب والمسلمين