مصراوى على طوول
تعليقاً على أحدي الزميلات الصحفيات
على الزي الذي اظهر بيه في الفيس بوك
أثارت لدي شجون لمصر
عندما قالت لي بمزاح:
(خشيت ان تتوه عندك الهوية منبهرا بالخليج الساحر)
فوجدتني أكتب هذا الكلمات .. قد يجد طعمها من جال بهذا البلد وكان كثير الحراك واحتك بكل فئات شعبنا .. وعرف اهتماماته المختلفة فنية ورياضية وسياسية واجتماعية وثقافية.
وهذه كلماتي:
رغم الكندورة البيضا والأزياء الخليجية
ويمكن اخشم صاحبي أو نرقص حربية
وحبي لبلد جديدة أهلها رحبوا بيّ
لكنّي عمري ياناس ماتتوه عندي الوطنية
وعمري يامصر ماهانسى جدوري المصرية
ده سمر الكشافة والرحلة الخلوية
و الاقصر و النوبة ... ومواويل المراكبية
والمرسي أبو العباس وجمالك يااسكندرية
وبورسعيد والساويسة واغاني السمسمية
وساقية الفيوم ...وحمص الغربية
ووسط البلد بجمالها وشقاوة المصراوية
وعبد الخالق ثروت والحركة السياسية
وقهوة البورصة والنيل في المغربية
ووقفة الاتوبيس والناس الغلباوية
وشكاوي الناس وطهأها... م الغلا والمهية
ولا شهامة المصري ولاكسوف المصرية
وزحمة المترو وتشجيع الأهلاوية
ولمة العيلة ورمضان والعيدية
والشيخ محمد رفعت وتواشيح الفجرية
وساحة الجامعة الزحمة والشباب الفقرية
يااااااااااه يامصر عليكي ، فيكي قسوة وحنية
ليكي وحشة يامصر في قلبي عمالة تزيد فيه
خسيس من ينسى اصله وتتوه عنده الهوية
ـــــــــــــ
* نقلا عن ملاحظات سامح البرى على الـ facebook
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
أنا فعلا بحس إن الرحاله والكشافين أكتر ناس بيحسوا بكلامي
يعني … أصل حياة الكشافة ليها مذاقها وذكرياتها
ولإنك اسماعلاوي خليني أضيف
ولا حماسة الدراوش وليل الاسماعليه
ولا طعامة المانجا والخضرة والحنية
احساسك عالي وصادق
ربنا يكرمك وترجع لمصر موفق وناجح وراضي ربك
اخيك / احمد موسى
وإن ترحل الغيامة سريعا قبل أن يحل الجدب
ياريت نشوف من مصر حنية .. ومن الخلاجية اخوية.
ربنا يوفقك في اي مكان تروحه .. وتفضلك روحك دايما كده .. شايفة الحلو هنا وهناك.
انا عارفة انك هناك مش في غربة .. واننا هنا مش في وطن ..
لكن كلنا نسعى في ارض الله لعلنا نُقبض على ما يحبه ويرضاه … وبالتوفيق ان شاء الله.
اخوك هاني