الوقفة(العيد القومي للاستحمام)

فالاستحمام ليلة العيد يعتبر طقساً اعتدنا عليه منذ الصغر.. (يا حُماية العيد نضفتينا.. وجددتي النشاط فينا يا حُماية العيد)..

إنها ليست أغنية لوقفة يوم العيد، لكنها "افتكاسة" تتماشى مع ما يحدث يوم الوقفة، فكلنا يستحم ويتعطر ويصر على النوم بملابسه جديدة – إذا كان قد اشترى أصلاً – فالاستحمام ليلة العيد يعتبر طقساً اعتدنا عليه منذ الصغر.. ولذلك نزلنا إلى الشارع لنعرف مدى استمرار هذه الظاهرة.

سألنا تامر، الطالب بإعلام القاهرة: "أنت بتستحمى ليلة العيد؟!"، فضحك ثم قال: "ومين مبيستحماش في العيد ده حتى الناس اللي ما بتعرفش شكل الصابونة والليفة.. عندهم حمية العيد دي حاجة تانية خالص طبعا الكل بيستحمى وأنا أقترح أن يطلق عليه يوم الحموم العالمي".

على جانب آخر، يقول عمرو شعلان (محامي): "عادة الحموم بالنسبة للمصريين تمثل طقساً أساسياً، ولا أتخيل العيد من غير حُماية العيد.. والحمام عندنا في اليوم ده بيكون عامل زي طابور العيش كامل العدد وبالخناق عشان ندخل نستحمى وكأن الحمام عامل أوبن داي في اليوم ده لكن أنا شايف إنها عادة ظريفة"

حتى لا يطفش زوجك

من جهتها، ترى ألفت سعيد أن حًماية العيد أهم حاجة في العيد كله وأضافت: "أعتقد أن حُماية العيد هامة جداً بالنسبة لربات البيوت، لأن زي ما أنتم عارفين تنضيف الشقة بيعمل فينا إيه فطبعا حتى لو مش قاصدين إننا نستحم عشان العيد لازم نستحم على الأقل عشان الرجالة متطفش من البيوت"!

بينما يرى فادي أن الحموم "عادة اعتدنا عليها وإحنا لسه أطفال وعلى فكرة كل البيت لازم يستحمى، فمثلا أنا وأخوتي الصبيان بعد ما يرحوا عند الحلاق ويرجعوا في وقفة العيد لازم جري على الحمام".

"نعم هو أنتي فكراني إيه جربانة بستنى العيد عشان استحمي"، هكذا كانت إجابة كريمة التي أضافت: "يعني سؤال غريب أوي حلوة بتستحمي في العيد دي.. وافرض مفيش عيد مش هستحمى.. أنا كده كده كل يوم بستحمى".

حتى الكلب بيستحمى

أيمن الغزالي قال لنا: "النضيف نضيف وأكيد مش بيكون في تغيير، إلا في اللبس الحلو أو الجديد علشان العيد.. وطبعا الاستحمام في حد ذاته مش مهم بقدر أهمية الطقوس المصاحبة ليه ومتنسوش طبعا وقت الحموم نفسه بيكون قبل الفجر على طول عشان الصلاة وده توقيت وهمي".

"الحموم ده شيء تعلمناه من أهالينا من زمان أول يوم العيد نصحى من النجمة نستحمى الحُماية التمام ونلبس اللبس الجديد وناخد العيدية ونخرج"، هكذا كان رأي معاذ الشيخ الذي أكد أنه لا يكتفي بالاستحمام وحده، بل ويصر على اصطحاب الكلب الذي يمتلكه معه ليشاركه فرحة حُماية العيد.

أما محمد عثمان، فقد أبدى اندهاشه الشديد من تساؤلنا، وفجأة وجدناه يقول: "حموم إيه.. وفين الجديد يعني في حماية العيد ده من ضمن الطقوس المصرية القديمة اللي أتربينا عليها وأتربى أهالينا عليها من جدودنا، وليها طعم تاني، وأضاف أنه في الأيام العادية البعيدة عن الأعياد ممكن يستمر وجوده في الحمام للاستحمام مثلا ربع ساعة، لكن في الأعياد اهتم بنظافتي زيادة عن اللزوم وممكن أستمر في الحمام مثلا نص ساعة".

حمام التلات

"أنا كل عيد لازم أطير لحمام التلات أنا وبعض البنات من أهلي وجيراني"، هكذا أوضحت حنان سيد (طالبة بمعهد خدمة اجتماعية)، وقالت أن عيد الفطر بالنسبة لها مناسبة خاصة جدا لأنه يأتي بعد رمضان وكما تعلمون ففي هذا الشهر قليلا ما نهتم بأنفسنا، لذا ومع انقضاؤه في كل عام أطير أنا وصاحباتي لحمام التلات ونقضي الوقفة هناك ونستحمى حُماية العيد بتاعتنا".

ويبدو أن موسم حمام التلات يبدأ مع آخر أيام شهر رمضان، حيث تحرص ميرفت عادل أيضاً على الذهاب إليه في وقفة كل عيد، وتقول إنها تحرص على هذه العادة منذ خمس سنوات في العيد من كل عام، رغم إنها أحيانا تذهب إليه في غير العيد، إلا أنها لا يمكنها على حد كلامها أن يمر عيد الفطر دون الاستحمام فيه، لذلك فالكثيرات يحرصن على حجز أماكنهن قبل انقضاء رمضان بأسبوعين مثلا.