انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

عيد وفرفش.. بدون تحرش!

ولاد البلدقراءة في ٤ دبقلم أحمد محمد

منذ حادثة التحرش الشهيرة التي وقعت في أول أيام عيد الفطر قبل ثلاث أعوام، أصبح التحرش هو الموضة الجديدة بعد المعاكسة والملامسة، إذ أصبح هناك مصطلح "تحرش العيد" مثل "كحك العيد" و"أفلام العيد"!

فمع مرور الوقت، أصبح التحرش هو حديث الساعة، في البرامج والأفلام والمسلسلات وبالطبع انتقل الأمر إلى الفيس بوك الذي اشتد عليه الجدل حول كيفية مواجهة التحرش، وكان آخر مظاهر هذا الجدل هو المجموعة التي تم إنشاؤها تحت اسم "هاعيد وأفرفش من غير ما أتحرش"!

وفي تعريف المجموعة قال محمد حمدي مؤسسها: "شباب مصر اللي بجد عارف إن رب رمضان هو رب باقى الشهور، بالتالى عيب جدا شبابنا يكون بيصلى التراويح ويقيم الليل لحد آخر يوم فى رمضان، ومن أول يوم فى العيد نلاقى الشباب بيتحرشوا بالبنات والسيدات فى الشوارع.. الجروب ده معمول علشان نقول إننا هنعيد وهنفرفش.. بس مش هنتحرش. وأرفق كلامه بأنه يجري التنسيق مع مجموعة من شيوخ المساجد الكبرى لتوعية الشباب بعدم التحرش فى خطب صلاة التراويح وخطب الجمعة".

البنت مكانها البيت

وتعليقا علي الفكرة قال أسامة عبد العال، بعد انضمامه للمجموعة: "الفكرة هايلة يا محمد

بس على فكرة التحرش فى مصر مش انحراف جنسي ده انحراف فكري".

كما قالت مها دسوقي: "فكرة الجروب حلوة قوي.. شكرا يا محمد.. ويا ريت بجد الولاد والرجالة في الشارع فعلا يبطلوا اللي بيعملوه ده ويدونا كبنات حقنا في الأمان، وإني أنزل الشارع وأقضي مصالحي من غير ما يتحرق دمي ولا أحس إني عملت عملة لما فكرت أنزل.. بس في حاجة، الولاد لما تيجي تتكلم معاهم في حاجة زي دي حجتهم بتكون (طب ما البنات هما اللي لبسهم كذا وكذا) وأنا مش مع البنات اللي بيلبسوا لبس متبرج بس في الأول وفي الأخر ربنا اللي بيحاسب مش حد تاني.. إن شاء الله الجروب ده يوصل لكل الناس ويوصل لهم المعنى ده".

بينما قالت سارة محمد نجيب:"بجد جروب هايل!! بس نصيحتي لأي بنت خليكي في بيتك لأن بجد مفيش فايدة وأنا خايفة من اللي هيحصل ومحبكش الخروج في العيد.. ده حتي التجمعات بتنقل انفلونزا خنازير! وبتخلي الخنازير تقرب لك.. واللهم إني صائمة هههه".

هذه الجملة دفعت مؤسس الجروب إلى الرد عليها قائلا: "تفتكرى الحل إننا نقعد البنات فى العيد فى البيوت؟ طب هاتعملى إيه مع التحرش بالفتيات فى المواصلات؟ هتعملى عربيات للسيدات فقط.. طيب هاتعملى إيه فى التحرش فى الجامعة.. الخ. المفروض مواجهة التحرش تكون من خلال إننا نفهم الشباب إن ده غلط مش إننا ما ننزلش بناتنا اليوم ده".

ليه الشباب بيتحرش

كما أثارت المجموعة عدداً من القضايا للمناقشة مثل: "إزاي نوقف ظاهرة التحرش؟"، و"تتصرف إزاي لو اتعرضت / شفت موقف تحرش؟" و"ليه الشباب بيتحرش؟" و"حادث جديد: التحرش في نهار رمضان" و"إتكلموا عن مواقف التحرش اللي شوفتوها". وكان أكثر تلك الموضوعات إثارة للنقاش هو "ليه الشباب بيتحرش؟" ربما لاقترابه من محاولة الوصول إلي أصل المشكلة وهو ما يعتبر الخطوة الأولى لعلاجها.

وعن أسباب التحرش قالت مها إيجي: "مجرد سلوك سىء لأنى بشوف أولاد صغيرين أعمارهم تتراوح بين 8 و11 سنة بيتحرشوا بالبنات سواء بالكلام أو اللمس وده مش كبت لأن ده مش سن بلوغ ولا شهوة لكن الطفل فى السن ده بيحاول أنه يثبت إنه مش صغير فيقلد الكبار".

بادي U

بينما قالت نورهان محمد: "الشباب كابت شهوته اللي مطحونة في كل مكان.. ملابس داخلية.. وملابس عارية لهيفاء ودانا.. الموضة دلوقتى بكينى وباديهات على شكل ( (uكبيرةةةة والبنات اللي معندهاش حياء كترت لأنها خايفة وحاسة أنها مش هاتجوز فبتعمل بدع فى لبسها عشان الولاد يجرو وراها، والولاد عشان يثبتو أنهم رجالة بيتحرشوا".

وعلي نفس الموضوع علق محمد إبراهيم قائلا: "ياجماعة لا داعي للتناقض إحنا بنقول الشباب بيصلوا التراويح والقيام وبيصوموا وبيجو في العيد بيتحرشوا.. لو خلينا بالنا ممكن نقول إن بعض البنات أيضا بيصوموا ويصلوا وكل حاجة وفي العيد بيلبسوا ما أمتع النظر وحمل من الذنوب قناطير.. السبب الأساسي ياجماعة لو الظاهرة دي بتحصل لإن البنات لبسهم مثير أحيانا.. ده طبعا مش عذر للشباب.. لكن لو البنات حافظت علي مظهرها ولبست إللي المفروض من الدين الإسلامي مش هيحصل ولو حصل تبقي حالة شاذة".

الكُتَّاب

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. تحذير من القطارات كُتب في
    احذر اى بنت او امراة من ركوب القطارات
    فقد شاهدت فى محطة قطارات طنطا فتاة محجبة ترتدى بنطلون جينز تصعد الى القطار من على الرصيف فمد احد الاندال او الاوباش يدة بين فخذيها من الخلف وعندما صرخت قال انا كنت با اسندك وانت هتقعى
    ولم يعترض احد من الركاب او يتكلم
    وعندما ناقشت الموضوع مع بعض الناس قال لى ان كل الفتيات والسيدات يتجنبن ركوب القطارات لانتشار البلطجة والسرقة عاشت مصر بلد الاستقرار والامان
  2. جيمي كُتب في
    طب بالذمة ده كلام
    نعيد إزاى أحنا بقى دلوقتي
    مهو يا توفرولنا التحرش يا توفرولنا الكلة
    كل سنة وانتم طيبين يا عشريناتية وجعله الله في ميزان حسناتكم وتقبل منكم
  3. فعليه بالصيام كُتب في
    قال رسول الله صلى الله عليه وسلم يا معشر الشباب من استطاع منكم الباءة فليتزوج فإنه أغض للبصر وأحصن للفرج ومن لم يستطع فعليه بالصوم فإنه له وجاء).
  4. اترضاه لامك كُتب في
    أترضاه لأمك؟!!
    عن أبى أمامة (رضى الله عنه) قال: إن فتىً شاباً أتى النبى (صلى الله عليه وسلم) فقال: يا رسول الله ائذن لى فى الزنا ، فأقبل القوم فزجروه ، وقالوا: مه مه (*)!
    فقال له: "ادنه" – أى اقترب منى – ، فدنا منه قريبا ،
    قال: أتحبه لأمك؟ قال: لا والله ، جعلنى الله فداءك.
    قال: "ولا الناس يحبونه لأمهاتهم".
    قال: أفتحبه لابنتك؟ قال: "لا والله يا رسول الله ، جعلنى الله فداءك".
    قال: "ولا الناس يحبونه لبناتهم".
  5. وَلا تَبَرَّجْنَ كُتب في
    وأما قوله تعالى: وَلا تَبَرَّجْنَ تَبَرُّجَ الْجَاهِلِيَّةِ الْأُولَى [الأحزاب: 33] فمعناه: لا تظهرن زينتكن مثل فعل الجاهلية الأولى، فقد نقل ابن كثير أقوال العلماء في تفسير ت رج الجاهلية الأولى، فقال: قال مجاهد: كانت المرأة تخرج تمشي بين الرجال، فذلك تبرج الجاهلية.
    وقال قتادة: وَلا تَبَرَّجْنَ تَبَرُّجَ الْجَاهِلِيَّةِ الْأُولَى [الأحزاب: 33] يقول إذا خرجتن من بيوتكن، وكانت لهن مشية وتكسر وتغنج فنهى الله عن ذلك.
    وقال مقاتل بن حيان: التبرج أنها تلقي الخمار على رأسها ولا تشده فيواري قلائدها وقرطها وعنقها، ويبدو ذلك كله منها .
    والله أعلم
  6. وقرن في بيوتكن كُتب في
    قال ابن كثير في تفسيره: هذه آداب أمر الله بها نساء النبي صلى الله عليه وسلم، ونساء الأمة تبع لهن في ذلك.
    وقد جاءت هذه الآية ضمن مجموعة من الآيات نزلت في تخيير النبي صلى الله عليه وسلم أزواجه، فلما اخترنه أدبهن بهذه الآداب الكريمة الرفيعة، فقال: وَقَرْنَ فِي بُيُوتِكُنَّ [الأحزاب: 33] أي الْزَمْنَ بيوتكن، فلا تخرجن لغير حاجة، فيجوز لهن الخروج للصلاة في المسجد بشرط الحجاب وعدم التعطر، كما في الحديث: لا تمنعوا إماء الله مساجد الله، وليخرجن تفلات . رواه أحمد وصححه الأرناؤوط .
    وفي صحيح البخاري أن النبي صلى الله عليه وسلم قال لسودة: قد أذن الله لكن أن تخرجن لحوائجكن .
  7. جيمي كُتب في
    الأخ بتاع مشكلة التحرش و الى بيستشهد بالاية " وقرن في بيوتكم"
    قبل ما تتكلم اعرف بالظبط الاية نزلت ليه وامتى وفين وكان الوقت ده فيه ايه
  8. مشكلة التحرش كُتب في
    هما كلمتين لا ثالث لهما
    النساء تجلس في البيت تنفيذا لقول الله تعالى وقرن في بيوتكن
    او
    تتحمل كل اللي يجرالها يتحرشوا بيها يغتصبوها يخطفوها
    على مسؤليتها الشخصية
    لان ثورة 23 يوليو اعلنت القضاء على الاقطاع والزواج في مصر
    يا خسارة يا مصر
    عزك ومجدك راح مع كلاب الثورة
  9. ابومحسن غربة 28 سنه كُتب في
    الى الاخ المعلق رقم 10
    الاحوان التي تعيشها مصر الان كان يعيشها اهل الجزيرة العربية قبل البعثة المحمدية
    كانوا عرب همج القوي ياكل الضعيف ويقطعون الطرق ويسبون النساء الى اخره
    فبعث الله سبحانه وتعلى خاتم الانبياء المرسلين صلى الله عليه وسلم فمكث معهم 23 سنه علمهم المنهج الرباني
    وبعد ان انتهت مهنة النبي وفي اقل من 100 سنه كانت الدولة من اسبانيا الى الهند
    فيا عزيزي المعلق رقم 10 لا ياس مع الحياه ادعي لتطبيق منهج النبي بمفهوم اهل السنه والجماعة وليس بمفهوم الخوارج
    واول ناس حتتبهك البلطجية دول
    الصحابي ابو ذر الغفاري كان من قبيلة قطاعين طرق وامن بالنبي محمد صلى الله عليه وسلم وقابل النبي ثم ذهب الى قبيلته وبعد فترة من الزمن قبيلته قطاعين الطرق كلها جاءت لتبايع النبي محمد صلى الله عليه وسلم
  10. الزحام ثم الزحام كُتب في
    زيادة تكدس السكان فى منطقة محدودة زيادة كبيرة بتعمل عدوانية شديدة جدا
    بمعنى انك لو حبست 5 دجاجات فى قفص هيبقى سلوكهم عادى
    انما لو حبست عشرين دجاجة فى نفس القفص هتزداد العدوانية وهينقروا فى بعض وينتفوا ريش بعض
    المشكلة فى الكثافة السكانية
    مطلوب تفريغ التجمعات السكنية الى قرى ومدن جديدة فى الصحراء ذات كثافة سكانية قليلة
    اذن مشاكلنا كلها من الزحام
    لان كل شىء عشوائى
  11. مسخرة كُتب في
    عدت الى مصر بعد غربة 30 سنة
    الاخلاق اصبحت زبالة
    والتحرش بالبنات حتى من الرجال اصحاب الجلاليب فى الميكروباصات ووسائل المواصلات اصبحت حاجة عادية
    وانعدم الحياء
    وانتشرت السفالة وطول اللسان
    والبلطجة وشلل البلطجية الماجورين الذين يهاجمون اى بيت او مكان ويستاجرهم البعض لتصفية الحسابات
    مصر بقت حاجة تانية
    وانعدمت الشهامة
    ربما لضعف المقررات الدينية او الغائها بسبب محاربة التطرف فانهارت الاخلاق
العودة إلى الأعلى