نجوم التسعينيات.. لسه بتسمعهم؟
إيهاب توفيق، مصطفى قمر، هاني شاكر، مدحت صالح، علاء عبد الخالق، أنوشكا، سيمون وغيرهم.. نجوم لمعوا في الثمانينيات والتسعينيات وأغانيهم كانت "بتكسر الدنيا"، لكن أين هم الآن؟ وهل لازال هناك من يسمعهم ويشترى ألبوماتهم الجديدة؟
طرح إيهاب توفيق في الصيف الماضي ألبوم "لازم تسمع" لكن مبيعاته لم تتجاوز 10 آلاف نسخة مقارنة بألبوم عمرو دياب –مثلا- الذي وزع 400 ألف نسخة!، كذلك هاني شاكر لم ينجح ألبومه الأخير"حبيب حياتي" في تحقيق مبيعات جيدة، أما مصطفى كامل -المطرب الشعبي الأول قبل خمس سنوات- لم يسمع أحد عن ألبومه الأخير" 3مرات"، ولا يختلف مصطفى قمر ومدحت صالح كثيرا عن الآخرين حيث لا تتخطى مبيعات ألبوماتهم حاجز الـ10الآف نسخة، في حين نجد أسماء أخرى قد اختفت تماما مثل شيماء سعيد وسيمون وميادة الحناوى وأنوشكا.
يا ترى.. أنت لسه بتسمعهم؟
نوران وحيد: رغم أني كنت أحب أسمع إيهاب توفيق ومصطفى قمر وهاني شاكر كتير جدا، إلا أنه من الصعب أسمعهم حاليا، لأنهم بطلوا يقدموا جديد في أغانيهم وبيكرروا اللي بيقولوه في كل ألبوم جديد يصدروه.
ماجد مبروك: زمان كنت مغرم بمصطفى كامل وبأشتري له كل ألبوماته وأسمعها كل يوم، لكن دلوقتي خلاص بطلت أسمعه من 3 سنين لأنه بقى ممل جدا وبقى عبد الباسط حمودة أحسن منه بكتير وكمان طارق الشيخ وبيقولوا كلام حلو، كمان بطلت أسمع هاني شاكر لأني شايف أنه المفروض يبطل يغني ويحافظ على النجومية اللي عملها في السنين اللي فاتت.
طارق شحاتة: ياااه.. أنا بطلت اسمع الناس دي من زمان، يمكن من خمس سنين أو أكتر، دلوقتى الواحد ممكن يسمع عمرو دياب أو محمد منير لكن مدحت صالح وميادة الحناوي وباقي الناس دي صعب أوي، ده كمان ألبوماتهم بتنزل ومحدش بيسمع عنها حاجة.
رحاب إبراهيم: هي الناس دي لسه بتغني أصلا؟، أنا أخر مرة سمعت فيها أنوشكا أو سيمون بتغني كان من ست سبع سنين، حتى أغانيهم القديمة الواحد بطل يسمعها لأن الوقت أتغير ومبقتش مناسبة، ده غير أن شرايط الكاسيت اللي كانت عليها الأغاني دى ضاعت وما بقتش تتباع كمان.
نادر عبد الرحمن: أنا لسه بأسمع إيهاب توفيق ومصطفى قمر أحيانا لو قدموا حاجة حلوة، وهاني شاكر كنت بأسمعه وأنا في إعدادي يعنى من 10 سنين لكن دلوقتي خلاص.
منى محمود: طبعا لسه بأسمع هاني شاكر ومصطفى قمر وميادة الحناوي، وعندى كل شرايطهم القديمة، الناس دى ما ينفعش الواحد ما يسمعهمش لأنهم فنانين بجد وبيقولوا كلام حلو مش زى كلام الأيام دي التافه اللي مالوش معنى.