علقت النتيجة.. ولا موضة قديمة؟

- جات لك النتيجة؟..

= لا يا عم نتيجة إيه.. ده أنت قديم قوي

يبحث الكثير في مثل هذا التوقيت من كل عام عن "نتيجة" السنة الجديدة خاصة الآباء والأمهات، لكن يختلف الأمر حاليا عند الشباب فالبعض الآن ينظر إليها باعتبارها موضة قديمة!.

(ولاد البلد) سألت عن النتيجة ومدى ارتباط الناس بها..

الاسم :محمد عبد المجيد

السن:23

الرأي:لا طبعا ولا عمري أفكر أجيب نتيجة دي موضة قديمة، خصوصا أن الأيام أصبحت شبه بعضها ومعدتش بتفرق يعني لو سألتي حد ماشي في الشارع النهارده إيه في الأسبوع مش كام في الشهر صعب أنه يفتكر لأن الناس بقت ماشية في دايرة مش عارفة تخرج منها، وكمان هتفرق في إيه يعني لما نشوف التاريخ كام، بلاش أحسن ما نعكر نفسنا ونحسبها بالورقة والقلم.

الاسم: ليلى فاروق

السن:17

الرأي:النتيجة بقي في حاجات كتير بتغني عنها اليومين دول زى الموبيل، يعني مثلا لو في ميعاد مهم عندي أكيد بسجله في "ريميندر" على الموبايل عشان افتكره، وعشان كده مش بحتاج للنتيجة بعكس زمان وارتباطنا بالنتيجة والحكم والأمثال اللي كانت بتتكتب عليها، لكن دلوقت معدش ناس كتيرة بتهتم بالموضوع ده.

الاسم:مجدي عبد الغني

السن:34

الرأي :النتيجة عندنا في البيت في كل مكان عشان نعرف مواقيت الصلاة والتاريخ طبعا والأعياد والأجازات الرسمية، وحياتنا بيحصل لها في البيت لخبطه كبيرة لو نسينا ولم نقطع الورقة كام يوم نبقي مش عارفين إحنا في يوم إيه، ولو حد أعطانا نتيجة تبقي هديه كويسة جدا، وأنا بكون حريص أن يكون تقريبا عندي البيت 3 نتائج واحده في الصالون وأخرى في غرفه ابني وأخيرة في غرفة نومي، وللعلم أنا بحس أن الموضوع ده تعود يعنى مقدرش أعيش من غير نتيجة في البيت بحس إني تايه جدا.

الاسم: نيره أحمد بهجت

السن:52

الرأي: محدش يقدر يستغني عن النتيجة علشان مواعيد صلاة والشروق وكمان أنا بحب الحكم والأمثال اللي موجودة في كل ورقة، لالنتيجة دي شيء أساسي وإحنا أكتر الهدايا اللي بتيجي لنا إما نتائج أو أجندات لكن الأجندات مش مهمة بالنسبة لي خالص الأهم النتيجة، مع إني أحفادي بيتريقوا ويقولوا لي أنتي قديمة أوي يا ستو لكنهم ميعرفوش قيمة النتائج لأن أبوهم وأمهم عمرهم ما جابوا نتيجة أبدا في حياتهم يعني هما مالهمش ذنب وبيعتمدوا بس على التاريخ المكتوب على المحمول.

الاسم: تامر على

السن:13

الرأي: أنا بحب النتيجة اللي بتكون عليها رسومات يعنى تومى وجيري أو عرائس وألوان كتير، وكمان في نتائج ميكي ماوس بحبها، لكن اللي عليها أسماء شركات ومصانع لا مش بحبها شكلها كئيب.

نتيجة ذات أصول

- الدكتور عز الدين الأسيوطي، أستاذ علم الاجتماع بجامعة جنوب الوادي: لنتيجة الحائط أصول اجتماعية وموروث ثقافي، فقبل تواجد النتائج كان أجدادنا يعرفون التوقيت عن طريق الشمس غروبها وشروقها، ولكن مع التطور بدأت بعض الشركات في عمل دعاية إعلامية لها عن طريق بعض النتائج التي نعرفها الآن وشيئا فشيئا ارتبط الكثيرين بالنتيجة وأصبح إهدائها لنا في مثل هذا التوقيت شيء محبب، لكن اليوم ينفر الكثير من الشباب من النتيجة وذلك عائد إلى تمردهم على الكثير من موروثاتنا وأشياء ارتبط بها آبائهم وأمهاتهم.