خلي لسانك سكر وبطل شتيمة

"ببساطة جداً.. إحنا شباب مصر العاقلين جداً والطبيعين جداً.. إحنا ناس بتحب بعضها، وبنخاف علي بعض بجد، بنتكلم في الكورة والتنمية البشرية .. بنحب الأزهر والكنيسة .. بنروح الأهرامات وبرج القاهرة، بنعشق صوت فيروز ومنير، بنروح سينما وبنزور معرض الكتاب، بنكتب شعر وقصة وبنتكلم عن العنصرية ومارسيل خليفة والشيخ بتاع المسجد، وأطلقنا حملة (لسانك سكر) علشان إحنا ضد ظاهرة الشتيمة والسباب.. لسانك سكر.. بالنقاش والتفاهم.. والحب".

.. كلمات تقرأها على حائط جروب (لسانك سكر) على الفيس بوك، كتبها الصحفي الشاب "محمد بربر" ليشرح باختصار فكرة الجروب الذي أسسه ويضم حتى الآن 10 آلاف عضو، بعد أن أصبحت "الشتيمة" منتشرة كالماء والهواء وأصبح من المستحيل أن تمشى في شارع أو تركب أتوبيس أو ميكروباص أو تدخل مدرسة أو مستشفى أو تعود إلى منزلك حتى تخترق طبلة أذنك "شتيمة" سواء كانت لشخص أو لمسئول أو لنادي أو للبلد واللي فيها.

الغريب والطريف ما تقرأه على الجروب أن المصريين يتبادلون 10 آلاف نوع من الشتائم وفقاً لدراسة حديثة أعدها المركز القومي للبحوث!، والغريب أن الشتيمة أحياناً ما تصبح عمل وطني مثلما شهدنا في أحداث مباراة مصر والجزائر والتي تسابق فيها المشاهير بمختلف أنواعهم من وزراء ومسئولين وفنانين لسباب وشتيمة البلد الآخر لتصبح الشتيمة في هذا الوقت بمثابة صك الوطنية الوحيد!.

من جهته يقول بربر: "الموضوع في البداية كان عبارة عن تحقيق صحفي لقي استحسان الكثيرين فوجدت أنه من الأفضل أن يتحول التحقيق إلى مبادرة حتى تصل إلى أكبر عدد ممكن من الأفراد، وبما أن الفيس بوك الآن أصبح أكثر مكان يمكن أن يلتقي فيه الشباب فوجدت أنه المكان المناسب للحملة، وبعد إنشاء الجروب بساعات قليلة وصل عدد الأعضاء إلى 800 عضو، أما تفكيري في هذا الموضوع تحديدا فسببه هو ملاحظة أن الحوار الراقي الآن أصبح نادراً للغاية وأصبحت حواراتنا مليئة بالشتيمة والسب سواء في أوقات الهزار أو الجد، وربما يرجع ذلك إلى مشكلات الحياة التي جعلت الناس أكثر عنفاً وضيقاً".

بتشتم مين؟

طرحنا هذا السؤال على عدد من الشباب وكان ردهم كالتالي..

- محمود عزت، 24 سنة: "طبعاً بأشتم أصحابي لكن بهزار طبعا وساعات في وقت الزهق بيكون بجد، وأكيد بأشتم أخواتي الأصغر مني طول الوقت والغريب أني بأسمعهم بيشتمونى بصوت واطي لكن بأعمل نفسى مش سامع".

- رامي حسين، 26 سنة: "بأشتم أغلب المسئولين في مصر لأنهم مش بيقدروا الذل اللي إحنا فيه وكل واحد فيهم بيحسسنا أنه بيعمل اللي ماتعملش، وطبعا طول الوقت بلعن وبأشتم في المواصلات اللي واقفة طول اليوم وفى الناس اللي بقى خلقها ضيق ومش طايقة".

- سهام عبد الحفيظ، 30 سنة: "أنا مابحبش الشتيمة لكن ده ما يمنعش أن في حاجات كتير بتستفزني وتخليني أشتم.. طبعا لما يكون الطريق واقف أدعى على كل مسئولين البلد واحد واحد بالإسم، وأكيد طبعا بأشتم كل أصحابي وصاحباتي في وقت الهزار بس، وكنت زمان بأشتم أي مدرس يضربني وكنت بأكتبله الشتيمة على السبورة علشان أول ما يدخل الفصل يشوفها ويذنبنا كلنا".

- على أبو الفضل، 18 سنة: "طبعا بأشتم الثانوية العامة ومناهجها العقيمة والخبراء اللي وضعوها ، وأشتم المدارس اللي مابنستفدش منها أي حاجة، وبأشتم المدرسين اللي كل همهم الدروس الخصوصية".