بدأت "مذاكرة" ولا مش كييف؟

أيام قليلة ويبدأ موسم الامتحانات، وبما أن الامتحانات على الأبواب فإن موسم المذاكرة قد بدأ.. البعض يفضل المذاكرة في الساعات الأخيرة قبل الامتحان على طريقة "الأخير رزقه كتير"!، أما عن طرق المذاكرة فهي تتبع المثل القائل "كل شيخ وله طريقة".. فهناك من يبدأ المذاكرة بعد أن يتخلص من كل ملابسه، وهناك من يتخلص من شعره بالموس حتى لا يمكن أن تفرق بين رأسه وبين البطيخة!.

وإذا تصفحت جروبات "الفيس بوك" ستقرأ الكثير عن يوميات الطلبة المصريين مع المذاكرة.. فهناك جروبات تحمل أسماء "يلا نبطل مذاكرة"، "يلا بينا نضرب المذاكرة بالجزمة"، "إزاي تحب المذاكرة" وغيرها التي يحكى فيها الطلبة يومياتهم مع مذاكرة..

أنت بقى بدأت تذاكر ولا لسه؟ وإزاي؟

- رامي جمال – 3 ثانوي:

الحقيقة لسه مش هبدأ أذاكر بجد دلوقتي لأني متعود أذاكر قبل الامتحان بأسبوع واحد حتى لو كانت ثانوية عامة، طبعا ده غلط لكن أعمل أيه أنا طبيعتي كده، وبحاول كل سنة أذاكر قبل الامتحان بشهرين أو ثلاثة لكن بفشل فشل ذريع، أما عن طريقة مذاكرتي فهي عادية إلى حد ما لكن لازم طول الوقت أكون بشرب حاجات ساخنة، يعنى ممكن أشرب في يوم 30 أو 40 شاي وقهوة ونسكافيه!.

- نادية– أولي حقوق حلوان:

أنا بدأت المذاكرة من شهر تقريبا لأني خلاص همتحن بعد كام يوم، لكن عموما أنا مش بعرف أركز في المذاكرة بجد إلا قبل الامتحان بأيام ويمنكن ليلة الامتحان كمان، يمكن لأني أتعودت على كده في كل سنين الدراسة اللي قبل كده، أما طريقتي في المذاكرة فهي أني بذاكر وأنا واقفة ومش بقعد خالص حتى لو 5 ساعات متتالية.

- منى عامر– 4 آداب آثار:

أنا عندي مشكلة غريبة في المذاكرة وهي أني عكس كل الناس العادية اللي بتذاكر أكتر أيام الامتحان، لأني بذاكر في بداية السنة كويس جدا لكن قبل الامتحان تقريبا مش بذاكر وبالتالي مش بحل كويس في الامتحان، ورغم أنى امتحاني هيبتدي الأسبوع اللي جاي إلا أنى ما بدأتش مراجعة لغاية دلوقتى.. ربنا يستر.

- أحمد صلاح سالم– 4 تجارة القاهرة:

طبعا هتضحكوا عليا لو قولتلكوا أنى بذاكر كويس جداً في الحمام.. آه والله بجد ده حقيقي ومش عارف أعمل إيه، الغريب أن الموضوع ده اكتشفته بالصدفة في 3 ثانوي، دخلت مرة الحمام ونسيت وأخذت معايا الكتاب واكتشفت أن في ربع ساعة كنت أنجزت جزء كبير ومن ساعتها وأنا عامل حمام في أوضتي قاعد فيه ليل ونهار!.

- حازم عبد العاطي زكي – معهد فني تجاري:

أنا عندي عادة غريبة أوى في المذاكرة وهى أني لازم أقلع كل هدومي تقريبا سواء في الشتاء أو في الصيف، وده بيضطرنى طبعا أني أكون موجود جوه أوضتى طول اليوم وماخرجش خالص في أيام الامتحان، والموضوع ده بيجيب معايا نتيجة كويسة، هو صحيح في النهاية بنغش برضه لكن لما تغش وأنت مذاكر بتفرق كتير لما تغش وأنت مش مذاكر".