يا بنات.. رأيكم إيه في البرادعي؟

الآلاف من المصريين كانوا في مطار القاهرة في انتظار وصول الدكتور محمد البرادعي، ومن تواجد هناك كان سيلاحظ وجود الفتيات لكن ليس بأعداد كبيرة مثل الشباب..

فكيف ترى الفتيات الدكتور البرادعي؟ وماذا يقلن عنه بعد عودته إلى مصر ونيته خوض الانتخابات الرئاسية؟

(ولاد البلد) استطلعت آراء مجموعة من الفتيات من مختلف الفئات عن البرادعي..

نيرمين سعد الدين

الوظيفة: معيدة بكلية الآداب- قسم تاريخ

السن:27

الرأي: أنا شايفة أن د.محمد البرادعي شخصية مميزة في مجاله بس لحد دلوقتي مالوش برنامج محدد يخلينا مرحبين به أو ضده، وكمان شايفة أن اللي بيحصل معه "أوفر" جداً، والناس باصين للموضوع على أنه تغيير لمجرد التغيير، بمعنى أن الناس عملت منه رمز مع أنه لم يرشح نفسه بعد، ولم يبدي حتى رغبته في الترشيح هو قال (أنا عايز حاجات تتحقق) وإحنا ما صدقنا.

رشا الحلواني

الوظيفة: طالبة بكلية الهندسة

السن: 24

الرأي: بصراحة أنا حاسة أنه نجم سينمائي أو بطل أسطوري أو فارس شعبي مثل الشخصيات العظيمة التي قرانا عنها في الكتب مثل سعد زغلول أو أدهم الشرقاوي، ظهر لنا فجأة والناس ما صدقت تجتمع عليه كأنه يمتلك عصا سحرية لحل المشاكل التي نعاني منها.

ميادة حسين

الوظيفة: خريجة تجارة إدارة أعمال

السن: 24

الرأي: مع احترامي الشديد لكل انجازاته بالخارج لكن البرادعى يعرف إيه عن مصر وعاش فيها قد إيه، ومش علشان معه شهادات كذا وكذا وكذا يبقى يقدر يحكم بيهم البلد، وحاول يعمل ايه في الحملة اللي هو عاملها ولا حاجة وماذا قدم لنا خلال زيارته لمصر؟ أسئلة كثيرة نبحث لها عن إجابة.

هبة مجدي

الوظيفة: سكرتيرة

السن: 26

الرأي: أنا بصراحة معرفش حاجة عن البرادعي خالص كل اللي أعرفه عنه أنه كان يعمل بالخارج، وعرفت كمان من فترة قريبة أنه مصري وفي الفترة الأخيرة عرفت أنه ناوي يرجع مصر ويستقر فيها ويرشح نفسه للرئاسة وبدأت الناس والجرايد كلها تتكلم عنه وبشوف صوره بشكل يومي على صفحات الجرائد.

ندا أحمد

الوظيفة: طالبة بكلية الآثار

السن : 21

الرأي: أنا شايفة أن الهوجة بتاعة البرداعي دي مجرد فقاعة هواء والناس فرحانة بيه وهتروح مع الوقت زي أي ظاهرة تنتشر فترة ويظل الجميع يتحدث عنها ثم تختفي بحدوث ظاهرة أخري.

مروة عبد العزيز

الوظيفة: منسقة بالعمل العام

السن 25

الرأي: أنا شايفة إن البرادعي يمتلك شخصية محترمة وكمان قيادية بس المشكلة أنه لم يعش في مصر كثيرا عشان يقدر يعرف مشاكلها وقضاياها، وأرى أن هذا هو العائق الوحيد ولكن أنا مع أي حد يعمل تغيير حقيقي في مصر، لأن التغير سنة الحياة ونحتاج لفكر وروح جديدة وعقلية متجددة كل ذلك عندما يتحقق فسوف تختفي الدكتاتورية والنواحي السلبية الموجودة في المجتمع.

هناء محسن

الوظيفة: صحفية

الرأي: أنا أرحب بالبرادعى كعالم مصري وليس سياسي ولكن إحنا عايزين واحد عايش هموم مصر عارف أحوالها ومشاكلها ويمتلك رؤية لإصلاحها ومن الممكن أن نستفيد من البرادعي وعلمائنا بالخارج في أشياء أخرى، ولكن البرادعي نفسه شخصية ناجحة ولها مكانة بالخارج قبل الداخل ومجرد ظهوره على الشاشة يلفت انتباهك ويتمتع بالقبول والحضور كالنجوم.

شيماء محمد

الوظيفة: خريجة معهد التعاون

الرأي: أنا بصراحة بسمع كلام كتير ومتناقض عن البرادعي يعني في ناس بتقول أنه عميل ومدفوع من الخارج حتى يحكم مصر على أهوائهم وفي ناس تانية بتقول أنه شخصية زعيمة والناس كلها بتأيده ومعه، أنا مش فاهمة حب الناس ده دوافعه أيه والتفافهم حوله أساسه أيه يعني مفيش حاجة قدمها لمصر عشان الحماس ده كله ولا كل ده عشان قال نعم للتغيير، وأعتقد أنه لو لم يعلن قبل مجيئه لمصر أنه ينوي الترشيح للرئاسة لم يكن أحد ذهب لاستقباله في المطار.

أمل إسماعيل

الوظيفة: عاملة بإحدى محلات الملابس

الرأي: هو مين البرادعي ده أنا حاسة أني سمعت الاسم ده قبل كده بس مش عارفة إيه حكايته بالظبط وبصراحة شوفت شكله في نشرات الإخبار بس مهتمتش أني أعرف حكايته وأول ما بشوفه بقلب المحطة أصلي بصراحة مش بحب السياسية، ياريت تكلموني أحسن عن أحمد عز أو أحمد السقا ويا ريت نتكلم عن عمرو دياب عشان أنا من عشاقه.

وأنتِ .. ما رأيك في البرادعي؟

أقرأ أيضاً :

10 وسائل للتخلص من البرادعي

البرادعي- أوباما.. نوبل وأشياء أخرى

يافيس بوكك يا برادعي ..!

هل يكون موسي نائباً للبرادعي

البرادعي: محدش يقدر يمنعني

البرادعي × الشاذلي.. ع الفيس بوك

عبد الرحمن يوسف: الأمل في البرادعي

شباب الإخوان .. مع البرادعي

يا بنات .. رأيكم أيه في البرادعي

د. طه.. أول ضحايا تأييد البرادعي