لسه بتتكلم في محمول الشارع؟

"أتكلم براحتك المكالمة بنص جنية".. "احكي ودش والمكالمة بنص من غير غش".. "اتكلمى يا سلوى وقولي بحبك لعلي دى المكالمة بنص جنيه عايز إيه ارخص من كده يا مفتري"..

تلك هي بعض الشعارات التي كانت في كل مكان بالشوارع لتلفت النظر إلى وجود موبيل والمكالمة بـ 50 قرش، والذي كان مشروعا مربحا قبل سنوات عندما كانت دقيقة الموبيل بجنيه ونص، الآن تغير الحال في ظل العروض العديدة من جانب شركات الاتصالات الثلاثة ليقل الإقبال على محمول الشارع.

(ولاد البلد) التقت بعض الشباب والبنات من المتحدثين في "محمول الشارع"..

الاسم: عمر عبد الله

المهنة: طالب بكلية هندسة

الرأي: أحيانا اضطر للاتصال من موبيل الشارع لكن في حالات قليلة جدا يعنى ممكن يكون موبيلي فصل شحن فاتصل بالبيت مثلا أطمنهم بدل ما يقلقوا عليه لما يلاقوا موبايلي مغلق هي دي الحالة الوحيدة اللي ممكن اتصل فيها من الشارع وغير كده مفيش.

الاسم: ياسمين سعيد

المهنة: طالبة بالإعدادي

الرأي: أنا بتصل بأصحابي اللي معاهم موبيل من تليفون الشارع لأني معنديش موبيل ومش بحس أن المكالمة غالية زى ما أصحابي بيقولوا لكن يمكن عشان أنا مش متعودة أشيل موبيل فمعرفش أن الدقيقة تعتبر ببلاش، وساعات بتصل بماما مثلا أقولها أنا وصلت البيت ومش معايا مفتاح أو أنا هتأخر شويه.

الاسم: سامح عبد المتعال

المهنة: مدرس

الرأي: لا عمري ما بتكلم في موبيل الشارع وهتكلم ليه أنا عن نفسي عندي ثلاثة خطوط كل خط في جهاز خاص به يعنى لو عايز أتصل بأي حد في أي وقت بتصل، يعني مالوش لازمة موبيل الشارع، وأنا أعرف شباب كتير قفلوا مشروع الموبيل ده بعد سعر الدقايق ما نزل بالشكل ده.

الاسم: سالي حنا

المهنة: معدة برامج

الرأي: أنا ممكن فعلا أتكلم من موبيل الشارع في حالة إني عايزه أكلم حد ومش عايزاه يعرف رقمي أو أن في مشكلة معينة مع شخص ومش بيرد على رقمي ممكن أكلمه من الشارع.

كنت بكسب كتير

على الجانب الأخر التقينا بعض أصحاب مشاريع الموبيل من الواقفين على الأرصفة ينادون بـ "نص جنيه":

الاسم: صابر شريف

الرأي: أنا شايف أن اكتر فئة بتتكلم في موبيلات الشارع بنات وأولاد المرحلة الإعدادية والثانوي لأن معظمهم لا يملكون موبيل شخصي لكن ده بيكون في موسم المدارس لكن غير كده مفيش سوق للموبيل اللي بـ 50 قرش لأن الدقايق في كل الخطوط رخصت أوى، يعني مين المجنون اللي هيسيب العروض ويقف يتكلم وسط الدوشة وبالثمن الغالي ده؟.

الاسم: عبده الاشعل

الرأي: قليل لما حد ييجى يتكلم من عندي وأنا الأول كنت بكسب كتير أوى من الشغلانه دي أيام ما كانت الدقيقة بجنية ونص، لكن دلوقتي مفيش شغل غير نادر وأكترها بتكون من ناس بتعاكس حد أو واحد بيغير صوته وعامل واحده مثلا عشان كده أنا مش بعتبرها شغلانه دلوقتي وبشتغل في قهوة بالليل.

وأنت.. لسه بتتكلم بنص جنيه؟