يا كارينا يا ساتر بنات مصر!
بعد أن غزت "الباديهات الكارينا" الأسواق المصرية وانتشرت في شوارعها لتلتصق بجلود بناتها وتظهر تفاصيل أجسادهن، وبعد أن انتقلت هذه الموضة للمرحلة التالية لتقدم "الإسترتش والبنتاكور
الكارينا"، وصلت الآن إلي موقع الـ"face book " على الانترنت.
وأنشأ البعض مجموعات تشكر في "الكارينا" وتتساءل عن شكل الحياة بدونه، بينما جاءت بعض الآراء الرافضة لهذه الموضة لأنها تتعارض مع أخلاقيات مجتمعنا.
ومن هذه المجموعات التي تتناول الكارينا بمختلف أشكاله مجموعات "يا كارينا يا ساتر بنات مصر كلها"،و"تخيلي حياتك بدون الكارينا"، و"لا حياة بدون كارينا"، و"بنات المنصورة ما تمشيش من غير الكارينا"، و"كارينا.. جزء من شخصيتك"، بالإضافة إلي مجموعة مشتركة بين "الكارينا" الحريمي و"قطونيل" الرجالي، أطلق عليها منشأها اسم "يا قطونيل يا ساتر ولاد مصر.. يا كارينا يا ساترة بنات مصر".
"ربنا يهدينا جميعا"
ولم تقتصر مجموعات الكارينا علي البنات فقط، فقد أنشأ نبيل أحمد مجموعة "يا كارينا يا ساتر بنات مصر كلها" قائلا إنها تهدف للتصويت علي الكارينا وما إذا كنت معه أو ضده، وربما هذا ما دفع عليا ناجي للقول "إيه يا جدعان مش حوار نتكلم في كارينا، لو ولاد دخلوا الجروب وقروا الكلام ده بجد قرف أوي". ولكن داليا عصام ردت عليها قائلة "إيه يا عليا عموما إحنا مش بنتكلم في حاجة عيب يعني".
وفي نفس المجموعة قالت آية صفوت "أنا كمان تقريبا مش بنزل من غير كارينا كل يوم، ودي طبعا مش حاجة كويسة (لأنه يظهر تفاصيل جسدها).. يلا ربنا يهدينا جميعا والموضة دي تروح لحالها".
نيفين سامي ترى أن"كل حاجة فيها الحلو وفيها الوحش، يعني مثلا الكارينا فيها حاجات حلوة جدا بالذات للمحجبات (أكمام تحت العباءات لتخفي ما يظهر من المعصم)، بس هي فعلا وحشة لما واحدة محجبه تلبسه بكم تحت بادي تاني (كت) بيبقى ماسك أوى..بصراحة هي حاجة سيئة جدا طبعا بس أنا ساعات للأسف بعمل كده".
وعلقت نيفين علي كلام مايا حسان التي تؤكد أنها عمرها في حياتها ما نزلت من غير كارينا قائلة "يا مايا الكارينا لسه طالع من سنتين بس".
جزء من شخصيتك
أما في مجموعة"كارينا.. جزء من شخصيتك" أعلنت سمر حربها علي هذه الموضة قائلة:" أنا حقيقي بكره الكارينا أوي، ده ضيق وبيخنق أوي وبيحرر.. أنا بكرهه ومبلبسوش، أختي وأصحابي بيلبسوه إنما أنا لأ".
لترد عليها إنجي أمين قائلة: "خلاص البسيه واقعدي في مكان فيه تكييف"، وتوافقها شاهندة حداد قائلة: "صحيح ما هو لو مش لبستي كارينا، هتلبسي إيه؟ أما ريهام عبد الكريم فتؤكد أنها متقدرش تعيش من غيره.
وعلي نفس المجموعة ثار نقاش عنوانه "قبل الكارينا كنا بنعمل إيه"، فتقول إنجي "أنا مش فاكرة بالظبط، بس تقريبا حوار بادي وتحتيه حاجة ده كان مش موجود كنا بنلبس بادي قطن وقطن وكده"، وتتفق معها شاهندة قائلة "هو كان في حاجات قطن وكده بس الكارينا وهمي بأه، بالذات في التوب اللى بيبقى مفتوح من فوق أوي ده لازم تحتيه كارينا طبعا".
قضية أبناء المنصورة
وفي مجموعة "بنات المنصورة متمشيش من غير بادي كارينا" تقول آيه عبد الحليم: "أكيد طبعا مينفعش واحدة محجبة في المنصورة تمشي من غير بادي كارينا"، أما ندا خالد فتقول: "مستقبلنا من غيره هيضيع.. يعيش الكارينا"، وتشاركها سالي الميهي الرأي رافعة شعار "كارينا إلي الأبد"، فيما قالت ولاء عبد الحليم أنه " أكيد يا جماعة 90 % من بنات المنصورة بيلبسوا باديهات كارينا وفيجا".
وفي نفس المجموعة لاحظ البعض كثرة وجود شباب ، قال أحدهم مستخدما اسم وصورة تامر حسني "مساء الخير عليكم جميعا، ويارب يبقى أحلي جروب علي الـface book"، ويرد عليه زيزو مالك قائلا "مين العبيط اللى عامل فيها تامر حسني ده"، لتهاجمهما ناهي زاهي قائلة "يا حول الله، مينفعش يبقي فيه مجموعة لينا، أهي مجموعة للبنات ثلاثة أرباعها ولاد، أصلا إحنا بنتكلم عن بادي كارينا انتو مالكو بأه.. جايين ليه.. متطفلين أوي الصبيان يارب"، ليرد عليها زيزو قائلا "لأ دي قضية رأي عام لازم يبقى فيها كل أبناء المنصورة".
فهل أصبح الكارينا بالفعل .. قضية رأي عام؟
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
البنات لبست او قلعت هتأثر في اية
هل اللبس مشكلة قومية عاملة لنا صداع فى الحياة ونكد فى المعيشة ؟
يا جماعة الخير شوفوا همومنا القومية
البطالة والجهل والفقر والمرض والادوية المغشوشة وتزوير الانتخابات
مشكلة التعذيب والاعتقالات الليلية وحقوق الانسان
انما البنات بتلبس اية - يا سيدى ما يلبسوا ويعيشوا حياتهم فى حدود الحشمة والادب والتقاليد بتاعتنا
ابوها او جوزها عايز كدة انت مالك
وعجبى
عشرينات مهمته هو ابراز التفاهات اللي شاغله الشعب المصري
اي تفاهات يتكلموا عنها
عملية مقصوده ومهمة جدا لتبصير الشعب المصري بعيوبه
والمحررين اوعوا تفتكروا انهم بيشتغلوا من دماغهم
ابدا دي خطة وسياسة مدروسة وعنهم رئيس تحرير بيوجهم وعندهم مدير تحرير بيراقب وعندهم سكرتير تحرير
والمواضيع في غاية الاهمية للي عنده بعد نظر
فيه كتاب اسمه على هامش السيرة كان بيتكلم عن احداث حصلت قبل البعثة المحمدية وان المجتمع الجاهلي بيحتضر لان الدين الاسلامي سيبقى على انقاض الجاهلية
الان فيه احداث بتحصل في مصر تدل على ضعف المجتمع وتفككه وشبه انهياره ونستطيع ان نقول هذه الاحداث على هامش حدث كبير مقبل على مصر وهو الغزو الامريكي لا قدر الله
الا اذا
فاق الناس وعادوا لرشدهم وتنبهوا للاخطار المحيطة بهم واصبحوا يدا واحدة وقوة واحدة يطيش ويتحطم عليها الاعصار القادم تماما كما يصطدم الاعصار بالجبال
طبعا محدث فهم حاجه
تصوروا اليهودى برضه عنده زمه متينة جدا احلى مننا الشعب العربى اللى تربى للاسف حاليا على الكسل والاكل على الجاهز
ولا تتعجب انها حياتنا اللتى سلبونا ايااها بطرق غير مباشرة للاسف
مشكوور للمحرر على الموضوع فعلا مضووع جميل ويارت نعرف يا بنات بقه يا اخواتنا اللى فى كل البيوت هتستعملوا الكارينا دى فى اصول المعقوول وفى حدود الحشمة والوقار اى تحت الحجاب مثلا ولاخفاء المعصم ولا تحت البديهات والتى شيرتهات النص كم وما خفى كان اعظم
عشرينات عندهم بعد نظر
و ده واضح في المواضيع بتاعتهم
مش عارف هاني سلامة ركب الميكروباص
و ده يا حبايبي موضوع بيتكلم عن إن مشكلة المواصلات… مش عارف حد شايف بعد نظر في الحكاية دي؟
ولا الموضوع اللي مش فاكر إسمه بتاع ولاد الباشوات اللي عاملين جروبات أمثال شعبية عالفيس بووك
ياااااااااااااا اااااي ده أيه بعد النازار اللي عندوكوا ده
واضح إن عشرينات وصلت بيهم إن هما يكتبوا تعليقات عن نفسهم
قشطة عليكوا
لو طلع علي التعليق ده نهار
بنات لابسين حجاب الراس والملابس محزقه جدا ولا تستر جسم الفتاة وتوضح مفاتن جسمها فالاخ الكاتب بيلفت النظر الى ذلك ان المفروض الواحدة طالما لابسه الحجاب تلبس ملابس فضفاضه لا تطشف مفاتن الجسم
والعنوان يا كارينة يا ساتر بنات مصر
تريقه على ان الكارينا محزقه قوي وبتبين مفاتن الجسم وبالتالي تجعل الحجاب لا قيمة له
تماما كما هو في الصورة
المشكله الاساسيه يا استاذ احمد ان فيه ف السوق تقليد للكارينا بنفس السعر بس ال material مختلفه و ناس كتير بينضحك عليها و بتشتريه
يا ريت الكل ياخد باله يا جماعه
يا اخواتي لا تحزن هنقول ايه غير حسبنا الله ونعم الوكيل في اللي صمم البادي دة
حسبنا الله ونعم الوكيل
اصل العيب مش عليهم العيب على البنات
لادول مش بنات العيب على المستهترات اللاتي لا تراعين حشمة ولا حياءا واشترته وارتدته
اين اولياء الامور
ولازم نهتم بالموضوع دة مع احترامي لكل من قال ما اهمية ان البنات تلبسولا مش تلبس
ازاي يا اخواننا بتقولوا كدة
اين اتباع دين الله وسنة حبيبه ؟
اين انتم حين تستهيفون هذه القضية فلا تجد منيقاومها بل تجد المرحبين
اتقوا الله في انفسكم وبناتكم
اتقوا الله
ماذا ستقولوا لله حين يسألكم هل غيرتم هذا المنكر من حولكم هل قاومتوه ؟
ماذا كان دوركم في هداية بنات المسلمين والحفاظ عليهم
والله لن تجدوا ما تقولوه
لاني بصراحة وجدت بعض من ردودكم البلهاء الباردة التي بالفعل لن نتحرك بها الى الامام بل الى الوراء قدما
اين الغيرة يا ابناء الاسلام ؟