المصريين أهما !
أنا المصري.. كريم العنصرين.. والمصريين أهما حيوية وعزم وهِمة.. إلى آخر تلك الكلمات اللي بتدل على إن المصري هو السوبر مان الوحيد على الكرة الأرضية!
بس ده كان زمان.. النهاردة المصريين حاجات تانية خالص.. غير الأخ هيريدوت لما قال "مصر هبة النيل والمصريين" ومحدش لحد النهاردة متأكد إذا كانت الجملة دخل فيها المصريين ولا لأ ..بس المصريين من زمان معروف عنهم الطيبة.. والكرم والشجاعة!
المصري النهاردة كريم برضه زى زمان.. بس بشكل تاني.. اجدع ما في المصريين الكرم في الداتا.. والداتا هي المعلومات بس الداتا بالذات يعني المعلومات اللى بتهم مخابرات أو صحفي.. أي صحفي لو قعد في أتوبيس ولا ميكروباص ورمى ودن بس على اتنين جمبه هيعمل صفحة جرنان من صميم الواقع المصري.. ده لو رمى ودن بس.. أمال بقى لو شد حيله وسألهم على أي حاجة.. تلاقي المصري كرارة بتكر معلومات.. حنفية معلومات وانفتحت وعايزه جلدة!
المصري كمان طيب بس مش أهبل.. يعني طيب بمزاجه وغلس بمزاجه قوي.. عجبني قوي وصف محمد صبحي في تخاريف "شعبي الحبيب الصبور المهاود"
أهو إحنا بقى المهاود ده.. علينا مهاوده تشل وتجيب العصبي.. اذكر سائح إيراني كان في مصر من كام شهر سألته أيه اكتر حاجة لاحظتها على المصريين.. كان رده موجز مبتسمين ومبسوطين مهما بيحصلهم!.. معذور ميعرفش سر المهنة.. إننا الشعب المهاود وإننا لو مضحكناش هننتحر!
المهاود بقى لما يغلس تلاقيه بيتنح.. يعني اتفرج على المصري جوا أي مواصلة خاصة المترو.. يشوف الناس كلها عاوزه ايه وتضرب دماغه انه عايز العكس "حاكم احنا مبنفتريش ولا بنيجي غير ع الضعيف اللى زينا إنما الأقوى مننا نكش ونتلم قدامه".
يلاقي كل الناس عايزة الشباك مفتوح وهيفطسو م الحر وده قاعد جمب الشباك وخايف على شوية الشعرات اللى فى راسه ليطيروا ..والله ما فاتحه.. وياعم يهديك يرضيك مفيش!
أو لو أتحرم أصلا من القعاد جمب الشباك تلاقيه بينفخ ومخنوق من انه قاعد برضه بس قال مش جمبه.. وفيه غيره أساسا يتمنوا يقعدوا مش مهم فين.. حاكم المترو بتاعنا مش بيقضينا لا مؤاخذه.. أكيد العيب مش في المترو طبعا أكيد فينا إحنا.. إحنا اللي كتير عليه مش هو اللى ضيق علينا.. إحنا بنعتذر لوزارة المواصلات على التضخم ده!
المصري لسه شجاع وكريم وطيب وفيه كل العبر بس متفهمش الظاهر حالة انتكاسة جت عليه.. محتاج يترمم!
تجربة بسيطة جرب تعملها.. روح في أي حتة فاضية نسبيا مفيهاش زحمة.. وزعق بأي كلام.. اذ فجأة هتلاقيه اكتر شعب بيطلع -منين متفهمش- بس بيتلم اسرع من البرق.. وده اللى بيسموه الاتحاد وقت الازمات!
معرفش ليه لما سمعت جملة "شعبي المهاود" افتكرت نكتة عن شعبٍ ما.. عايش في مكانٍ ما.. على كوكبٍ ما.. الحكومة بتاعته قررت إنها تعمل ضرايب كتير، وبعدين الناس هترفض وتعترض ع الضرايب دي.. فالحكومة تشيلها وتلغيها.. فالناس تعرف قد إيه إن الحكومة طيبة!
المهم.. تم فرض ضرايب على كل واحد طالع كوبري على أمل أنهم يرفضوا أو يشجبوا.. محدش اعترض.. راحوا رفعوا قيمة الفلوس اللى بتندفع.. محدش اعترض!
الحكومة قررت تعمل ضرايب على اللي طالع الكوبري وضرايب وهو نازل م الكوبري، على اعتبار انه تصرف اكيد هيجيب رد فعل من الشعب.. وراح واحد من المسئولين للمكان يشوف إيه الأخبار.. لقى واحد بينفخ ومخنوق قوى..
- سأله:"مالك؟ حاجة مضايقاك؟"
- رد عليه:"أكيد ما أنت شايف الزحمة ووقفة الأحوال عشان الضرايب في الطالعة والنازلة"
– قاله:"طب حلو.. تحب تطلب من الحكومة ايه؟"
- قاله:"ياريت ولله لو هتوصل كلمتي للمسئولين قولهم بس يزودوا عدد الناس اللى بتحصل الضرايب عشان الزحمة دي!".
مصر هبة الجيش
انا قرأت عبارة مصر هبة النيل قلت لازم اصحح
والصحيح هو مصر هبة الجيش
لولا الجيش ما كانت مصر
احنا عايشين في خير الجيش
عجبتني اوي حكايه مصر هبه الجيش دي بس اللي عجبني اكثر حكايه ابلغ عن هذا التعليق
هههههههه هبلغ عن التعليق ليه هو الموقع مش متراقب ولا ايه
انا كنت هكتب تعليق بس رجعت في كلامي احسن حد يبلغ عني بعدين يشيلو العده
المشكلة مش فى الشعب
تحية طيبة الى مى كامل مقاله جميلة لكن انا مختلف مع حضرتك و مع ناس كتير اوى فى موضوع ان شعبنا شعب سلبى العيب مش فى الشعب العيب فى القيادة يعنى اى شعب فى العالم بيطلع منهم مجموعة (حزب جمعية اى حاجه) بافكار جديده مختلفة بيطرحوها على الشعب بيتفاعل الشعب و يلتف حولين الناس و الافكار دى و تتولد المعارضة و يبدأو يطوروا مع بعض لكن ايه اللى مطلوب من الشعب انه يطلع يقول لأه لوحده طيب ازاى طيب حصل فى انهى شعب فى العالم انه يطلع كده من غير قيادة او طلع كده يصلح لوحده من غير جبهة او منظمة او حركة او جمعية ..
شعبنا مش سلبى و انتخابات مجلس الشعب ووقفة الناس مع الاخوان و المعارضه خير دليل على كده (العدد اللى راح الانتخابات كان اكبر من الانتخابات اللى قبلها بكتيييييير..فى ناس ماتت فى الانتخابات دى و ما كنوش من اى جبهة كانوا ناس عادية خرجوا عشان يأيدوا مرشحين من المعارضة)الاعتصامات فى المصانع من العمال ...
المشكلة فى المعارضه اللى عايشه فى حته و المجتمع فى حته تانيه و بدل من ان المعارضه تقرب للشارع عايزاه هو اللى يقربلها ..يعنى مثلا على مر العصور كان الشعب بيطلع عشان يقول لأه زى ما طلع ضد الفرنسيين و كان القيادة الازهر و لما طلع ضد الحاكم العثمانى عشان محمد على .
فى ناس فى شعبنا نفسهم بلدهم تبقى اجمل بلد بس مش لاقيين الايدين اللى تتشبك فى بعضها عشان كده مستعدين انهم يموتوا بس يكونوا عارفين ان بموتهم ده فى فايده للبلد البلد دى شعبها عظيم بس المشكلة ان بره فى الدول المتقدمة فى معارضات بتعلمهم بتفهمهم و ده طبيعى لكن هنا المعارضه عندها اورام....................
أضم صوتى الى صوت واحد من الناس
أرسل هذا التعليق بواسطة : نبضة قلب
يامى أنتى عسل
وواخده بالك انك كتبتى المقال بنفس منطق ((حاكم احنا مبنفتريش ولا بنيجي غير ع الضعيف اللى زينا
إنما الأقوى مننا نكش ونتلم قدامه ))
نفس المنطق اللى خلاكى تقولى العبر فى الشعب
وماتقوليش مين السبب اللى وصل الشعب الى هذه الحاله من اليأس والاستسلام
هو هو نفس المنطق اللى خلاكى لم تحددى فى النكته حكومه انهى بلد؟
بس احنا اجدع شعب يحل الكلمات المتقاطعه
حقيقه المقاله حلوه تسلم الايادى
ميه ميه والله
أرسل هذا التعليق بواسطة : انا محمد
يعنى كل اللى الراجل عايزه يا مى انهم يكتروا اللى بياخدوا الضرايب
طب والله فيه الخير
ما شاء الله عليكى
فعلا شعب غريب وضرايب غريبه وحكومه غريبه
وربنا يستر بقى