مصر على وش (سكينة)
ملامحها حفرتها السنوات الطويلة.. وبين الإصرار والكفاح عاشت تربي أبنائها وبناتها..
وبداخل صومعتها الصغيرة، بين رشة ميه وقطعة من الحديد ساخنة، راقبت أحوال البلد وصراعات الداخل والخارج طوال عمرها المديد..
الست (سكينه عبد الدايم)، أقدم وأكبر مكوجية في مصر، فهي تودع في العام المقبل عامها الـ 99 ومستقبلة عامها المائة.
- أزيك يا ست سكينة ؟
نحمده ونشكر فضله أبوس إيدى وش وضهر .
- من أمتي بتشتغلي مكوجية ؟
في الأول لما أتجوزت بعد شهر ونص بالظبط، بعتو لجوزي في الحرب اللي في فلسطين (1948) ومن وقتها وأنا أعمل في الشغلانه لأصرف علي نفسي وأبنائي، لأن كومندار الجيش قرر أنه يصرف لي 30 قرشا بس ومكنش بيكفي حاجة.
- الشغلانة دي مش مرهقة عليكي شوية؟
ياااه.. أنا أتعودت عليها خلاص ومن غيرها أموت، ودلوقتي معايا وائل حفيدي بيساعدني.
- تفتكري كان مهرك كام وقتها ؟
هما 7 جنية، 3 منهم مؤخر صداق والباقي مدفعوش، وأفتكر كمان أن سريري كان بـ 20 قرش وماكنش فى شبكة.
- وامتى رجع زوجك ؟
أنا أستنيته 13 سنة ولما مجاش أبويا جوزنى لابن عمي، عشان لازم رجل يحمينا وبعد يومين من جوازي الجديد رجع جوزي الأولاني.. كل شيء نصيب.. وعلي فكره ابن عمى كان برضه مكوجي.
- إيه حكاية المكوجية في عيلتكم ؟
جدنا الكبير كان مكوجي فتوارثنا المهنة، وابن عمي كان مش أي مكوجي ده كان مكوجي للعائلات والأسر العريقة في الخمسينات.
- والمحل ده هو أول محل بالنسبة لكي ؟
لا كان هناك محل آخر، لكن ربنا ينتقم منهم الإنجليز هدوه علينا، رغم أنى كنت متعهده كوي لبسهم، لأنهم كانوا بيقيموا في المعهد الفرنسي بالجيزة مكان المحل الأولأني.
- سمعنا أن لكي علاقة بالوسط الإعلامي ؟
آه كانت الست المذيعة "سامية الأتربي" قبل ما تكون مذيعة وهي لسه صغيرة بتيجى لي المحل عشان أكوى لبس أسرتها، أما الأستاذ "طارق علام" ربنا يحميه فكل شهرين تقريبا لازم يزورني يشوفني لو محتاجه حاجة، وكان السنة اللي فاتت هيطلعني أحج بس رجلي أتكسرت، وكان مواعدني أنه هيشوفللى سكن بدل البيت اللي هيقع عليه ده بس يظهر أن الظروف مسمحتلوش.. ومش بس كده أنا قبلت كمان الست "جيهان السادات".
- جيهان السادات مره واحدة كده ؟
آه.. طبعا، أصل أنا كنت رايحة الجامعة أدفع مصاريف بنتي فوزيه وكان الطابور طويل أوى فاستريحت شوية، والست جيهان شفتنى وقتها وسألتني عن ظروفي فقلتلها.. وعلي طول ربنا يكرمها قررت أنها تصرف ليه معونة شهرية 40 جنية من الشؤون الاجتماعية.
- أنتي لسه بتستعملي المكواة الحديد ؟ متعرفيش أن في حاجه اخترعوها اسمها مكواة بالكهرباء ؟
- آه عارفة ومبحبهاش، أنا بحب أسخن المكواة دي بنفسي علي الباجور.
- وإيه الفرق بين أسعارك دلوقتي عن زمان ؟
كنت زمان بكوي البنطلون مثلا بـ 3 قروش لكن دلوقتي بـ75 قرش، بس أقولك حاجه الفلوس زمان كان فيها البركة دلوقتي فيها عفريت.
- بتشوفي التليفزيون ؟
ساعات كده بس بحب مسلسلات التليفزيون والجدع ده التخين "الفخراني".
- بتحبي الريس مبارك ؟
آه طبعا، كويس ماله، بس زمان في البلد دي كان فيها خير مع أن كان فيها حروب، بس دلوقتي الشباب كده حالهم مايل وميسرش عدو ولا حبيب، والدنيا غاليه ومفيش خير بين الناس وبعضهم.
f198
أرسل هذا التعليق بواسطة : سامي الحكيم
هي دي مصر يا مورا
هو في ايه؟
أرسل هذا التعليق بواسطة : الباشا
ايه علاقة الموضوع بمهدي عاكف ولا برسوم ياخوانا...هو في ايه بس...لكم دينكم ولي دين...
صحيح احنا في زمن العبث...كل واحد شايف ان اللي بيعملوا ثوابت وان اللي بيعمله غيره هو الاستثثناء
-وادعو ال سبيل ربك بالحكمة والموعظة الحسنة- مش بالشتايم وقله القيمة...
تحياتي لكم واحترامي