شعبولا : يعني إيييييييييه وطني ؟

عارف كويس إن الناس بتقول عليا إني ظاهرة وح تنتهي، وأنا بقولهم إني مش مجرد ظاهرة لأني بقالي سنين بغني، وكل يوم بتزداد شهرتي، ولحد دلوقتي لسة بغني وح أفضل أغني لحد ما الناس اللي بتسمعني تزهق مني أو أموت.

ومش عارف ليه يصر بعض الناس على إني سأواجه الفشل، ويكتبون الكثير من الكلام عن أنني سأفشل في يوما ما، وهذا حدث معي حتى في السينما، وأنا فاكر كويس قبل ما يتعرض فيلم "مواطن ومخبر وحرامي" الناس قالت إن الفيلم ح يفشل، لكن الحمد لله، ربنا كسفهم والفيلم نجح وحقق إيرادات.

وكمان فيه ناس معينة اتضايقت لما عملت أغنية علشان عيد ميلاد الريس مبارك، مع أن كل واحد حر يعمل اللي هو عايزه، أنا بحب الريس وغنيت له في عيلاد ميلاده، وكان نفسي أغني في فرح ابنه جمال، بس الظروف بقة وكمان محدش عازمني، ومش شايف مشكلة لو أن جمال بقى الريس بتاعنا، ولو بقى ريسنا أنا ح أعمل أغنية ليه مخصوص أبارك له فيها على الكرسي.

رغم إني مش عارف يعني أية حزب وطني ولا فيه كام حزب في مصر، كل اللي أعرفه إني بحب الريس وهو اللي لازم يحكمنا لأنه بيتصرف بحكمة في كل الأزمات، ومعرفش يعني إيه دستور بالظبط بس سمعت إنه إتعدل، وفرحت بالتعديل لأنه بيقف ضد الإرهاب والإرهابيين اللي مش بحبهم.

وكان لازم اغني لحماس وفتح، صحيح أنا مش عارف هما ليه بيتخانقوا، بس بسمع أخبار كتير، وأصحابي بيقولولي إنهم بيتخانقوا على الحكم والرئاسة، وده ميصحش وحرام الناس اللي بتموت كل يوم من غير ذنب.

وأنا شايف إن كل واحد حر يعمل اللي هو عايزه، أنا بحب ألبس ساعتين في إيد واحدة، وبحب ألبس اكسسوارت وسلاسل كتير، ولما بشوف حاجة غلط مش بسكت وبتكلم، مش بحب التدخين علشان كدة قولت "ح ابطل السجاير"، ومطلبتش من حد أنه يبطل السجاير، ومش بحب إسرائيل ولا اللي بتعمله في فسلطين علشان كدة قولت "أنا بكره إسرائيل".

وأنا بستغرب فعلا من اللي مش بتعجبهم الأغاني بتاعتي، ومش عاجبهم إني بغني في السياسة، هو مش برضوا الفنان لازم يكون له دور في المجتمع ولازم يغني لكل حاجة مش بس للحب والعواطف، يعني أحمد عدوية غني للزحمة وأنا غنيت ضد الإرهاب، بس فيه مطربين مش بيعرفوا يغنوا غير للبنات وبس ودول مش فنانين، أما أنا فبغني لتوعية الشباب المصري والعربي.

فيه ناس بتنتقدني، والغريب إن نفس الناس دول بيجيبوني علشان أغني في أفراحهم، أنا عمري ما قولت إني مطرب، وعارف كويس إني مش مطرب أنا بس بحب الغنا، والحمد لله الناس بتحبني زي ما أنا ويمكن لو كان مظهري أو شكلي غير كدة كانت الناس كرهتني أو مبقتش مشهور أوي كدة، والناس كلها تعرف إني طيب ومش بحب الظلم، علشان كدة ربنا بيكرمني دايما، كفاية أني بغني في كل الأفراح الشعبية وأفراح الأكابر في أفخم الفنادق وبعمل مسرحيات، ومسلسلات وأفلام في السينما، والصيف ده ح ينزلي 3 أفلام إن شاء المولى، وبعمل فوازير رمضان.

والحمد لله فيه فنانين كبار وبيحبوني وسمعت مرة إن عادل إمام قال إنه بيحبني، وكمان سمير غانم خدني معاه في المسرحية بتاعته وكان مبسوط مني أوي، وأنا علشان بحب سمير روحت معاه المسرحية مع إنها خلتني اعتذر عن حفلات كتير، بس سمير حبيب قلبي، كمان مصطفى قمر قال إنه بيحب يسمع أغنياتي ومعحب بيها، بس فيه ناس تانية ومنهم مطربين بيحقدوا عليا وبيقولوا إني مش بفهم الأغاني اللي بغنيها، طيب هما ليه طالما بيفهموا في السياسة وفي كل حاجة أوي كدة مغنوش الأغاني دي، يا ريت كل واحد يخليه في حاله واللي عنده كلمه حلوة يقولها واللي مش عنده ميقولش.

بحس دائما إن الغناء بيجري في دمي، وفي دم ولادي عصام وخميس وعبد الرحيم، وبحب أسمعهم وهما بيغنوا فكل واحد فيهم ليهم أسلوبه، وبساعدهم باللي بقدر عليه بس كل واحد فيهم شايف طريقه كويس، وبحب أسمع أغاني عبد الحليم حافظ ومحمد عبد الوهاب، وبتضايق أوي من الناس اللي بتقول إن شوهت أغنية عبد الوهاب "عاشق الروح" ومش واخدين بالهم إني غنيتها في فيلم كوميدي فكان لازم تبقى كوميديا، وبعدين أنا غنيتها بطريقتي ومش بطريقة عبدالوهاب الله يرحمه.

عايز بس أقول حاجة أخيرة للناس اللي بيحاولي يسخروا مني: "ربنا يسامحكم"، علشان أنا عمري ما إتسببت في أذى حد، لأن قلبي طيب وعلشان كدة ممكن حد ينصب عليا، وده حصل فعلاً من واحد ربنا يسامحه أخذ أكتر من نصف أجري في أحد الأفلام من غير ما أعرف، بس أنا سايبها كدة على ربنا وهو بيسترها وعمري ما فكرت بكرة ح أعمل إية.

وبقولها كمان للناس اللي بتحاول تركز على نقطة إني جاهل، ومش ذنبي أن أبويا وأمي مدخلونيش المدرسة ومش بعرف أقرا وأكتب... بس خلاص.

ـــــــــــــــــــــــــــــــــ

* كلمات المقالة جاءت على لسان شعبان عبد الرحيم، وصاغها الزميل (محمود التركي) بعد لقاء جمعه معه.

جمال مبارك رئيسا لمصر في دي حندق حق

شعبولا ذكر في مقاله انه حيفرح لو جمال مبارك بقى رئيس لمصر وعنده حق وما فيش فيها حاجه لان الامور استقرت عندنا نحن العرب بصفة عامه من ايام الخليفة معاوية ابو سفيان ان كل حاكم بيرتب للحاكم اللي بعده سواء كان ابنه او اخوه او حد ثاني لكن لازم الحاكم هو اللي يوصي بالخليفة بتاعه والامور مستقره في مصر على هذا الاساس تاريخيا

مفيش غير لما جه جمال عبد الناصر وبرضه هذا القانون مشي وجاب انور السادات وعمله نائب رئيس جمهورية وفهمت الناس ان منصب نائب رئيس الجمهورية يعني انه حيحكم لو الحاكم مات ونفس الحكاية عملها انور السادات جاب حسني مبارك نائب رئيس الجمهورية والله بقى عم حسني من حقه انه يرتب للخليفة بتاعه مثل كل الحكام اللي سبقوه واذا كان الاختيار لابنه مش مشكله

لماذا

لان حاكم الاردن مات وابنه مسك مكانه ومجراش حاجه

حاكم المغرب مات وابنه مسك مكانه ومحصلش حاجه

حاكم سوريا مات وابنه مسك مكانه ومحصلش حاجه

حاكم البحرين مات وابنه مسك مكانه ومحصلش حاجه

حاكم الامارات مات وابنه مسك مكانه ،محصلش حاجه

ايه المشكلة المشكلة في مصر

ما هو احنا بنظام نائب رئيس الجمهورية ما لناش اختيار

ولما يجيب ابنه مالناش اختيار

يبقي ايه المشكلة

توكلوا على الله وبايعوا جمال مبارك خليفة للرئيس مبارك بس يوعدنا انه يطبق الشريعة الاسلامية

يا عيني عليك

أرسل هذا التعليق بواسطة : حدوقة

حبيبي شعبولا تعجبني صراحته وفعلايبين ان مصر بتحب الرئيس من اكبرها لاصغرها وياريت يا شعبولا تجهز كلمات الاغاني من دلوقت والالحان علشان تعرضها على الرئيس جمال مبارك .

شعبولا تأكدت طالما أمثالك موجودين هنهزم اسرائيل وحرر فلسطين والعراق ونبقى اخر فل .

و الله العظيم الحوار ده مضروووووووووووووووووب

يا ريت يا عشرينات لما تنزلوحوارات او مواضيع تتأكدو انها مش مضروبه وانها سليمة عشان المصداقية

و الله العظيم الحوار ده مضروووووووووووووووووب

يا ريت يا عشرينات لما تنزلوحوارات او مواضيع تتأكدو انها مش مضروبه وانها سليمة عشان المصداقية

جمال مدرب كرة سلة او بالكتيرمديربنك

أرسل هذا التعليق بواسطة : يا حوووووووسنى تعال دوسنى

وماذال مسلسل خراب بيت مصر فى العهدالمبارك مستمروحيستمر بتوريث الاب لابنة ويقعديتفرج علية وهو بيسرق ويطمئن قلبة المريض بالسلطة على الاوضاع قبل ماربنا ياخدة وهناك باة كل واحد بعملة قدام عزيز منتقم