آنسة لو سمحت..!

- أتفضلي يا مدام ..

- آنسة يا أخويا.. عدلها لي بقى يارب

حوار اعتدنا أن تكون بطلته الراحلة زينات صدقي، ولكن يبدو أنها عبارة مكررة عند كثير من بنات حواء..

قد نسمعه كثيرا في إحدى وسائل المواصلات أو في محلات الملابس والأحذية، فهو تصحيح لابد منه.

أما العكس (اتفضلي يا آنسة.. مدام لو سمحت)، فقد لا تسمع به أبدا في رحلاتك في أي من تلك الأماكن السابقة.

لقب لكل مرحلة

المرأة كائن مختلف عن الرجل لديه ظروفه واهتماماته وطرقه في الوصول إلى ما يريد، تخفي سنها خوفا من فقدان الرجل، تخشى تأخر الزواج خوفا من العنوسة.. وإذا تزوجت تصر على الحفاظ على نضارتها وجمالها خوفا من الطلاق..

تحصل في كل مرحلة على لقب مختلف، قد يبدو غريبا على بعضهن ولكنه يسير معهن كالقدر تماما.. "آنسة" قبل الزواج، و"مدام" بعده، و"حاجة" في أواخر سنواتها.

نزل الحاجة

رضوى، تحكي عن أحد تلك المواقف التي تتعرض لها كثيرا، فتقول: "أنا أصلا من ساعة ما كنت في الكلية والناس بتقولى مدام، وأنا الحقيقة كنت بتضايق جدا من كدة، ولما أتجوزت مش لاقيه حد يقول لي يا مدام مش عارفة ليه الظاهر إن شكلي صغر، بس الجديد بقى إن مرة كنت راكبة ميكروباص وبقول للسواق على جنب، فراكب مشكورا أراد توصيل صوتي لسواق الميكروباص فقال: على جنب علشان الحاجة تنزل، طبعا مصدقتش أن الراجل شايفنى عجوزة للدرجة دى، لكن الحقيقة قلت الحمد لله وربنا يكتبها لي".

أما مريم فهي على العكس من رضوى، لم تحفل بكلمة مدام حتى بعد أن تزوجت، فالجميع يصرون أنها "آنسة" مع أنها ترتدي دبلة في يدها اليسرى "تخرق عين العفريت" كما وصفت. وعن شعورها تجاه هذه الألقاب تقول: "أنا لا بضايق ولا بافرح لما حد يقول لي يا آنسة، عادي.. يمكن بعد الجواز كنت مستغربة شوية عشان كان وضع جديد، وفكرة أن الواحدة أتجوزت دي بتبقى غريبة عليها شوية لكن عادي".

عندك كم عيل يا أختي

"سلمى" – آنسة - لديها الكثير من المواقف حول لقبها في عيون الآخرين، ولكن هذه المرة كان من النساء بني جنسها، تحكي قائلة:" أنا متعودة إني العب رياضة وأروح الجيم، ومرة كنت هناك وواحدة جت قعدت جنبي وكان جنبنا ست تانية وقعدوا يتكلموا عن العيال والتربية والرجالة، وفجأة الست بصت لي كده وقالت: وأنتي بقى يا أختي عندك كم عيل؟، وقتها زعلت جدا، بس الموقف عدى، الظاهر إن شكلي مدام بجد".

أما "مدام سحر" كما تصر أن يناديها الآخرين، فلديها رأي مختلف تقول: "أنا بأحب الناس تقدرني، وفكرة مدام ولا آنسة دي مهمة لأنها واجب، يعني ميصحش شاب صغير يناديني يقول لي يا آنسة، وأنا كنت مصرة من قبل حتى جوازي وبالتحديد من وقت كتب كتابي أن الناس تناديني مدام، ولو حد أخطا بلفت انتباهه وده مش عيب، لكن العيب إني أبقى مطمع للناس خصوصا في بلدنا..المدام بيحترموها أكثر!".

شايفني قرطاس لب

هند لا تشعر بفارق بين اللقبين ولكنها تعبر بصراحة عن فرحتها عندما يناديها أحدهم بآنسة بالرغم من كونها أم لطفلين، ولكن ما يضحكها كثيرا هو أن يفعل أحدهم ذلك وهي تسير مع زوجها وتحمل طفلتها الصغرى على يدها في حين يمسك زوجها الطفل الآخر في يده.

تحكي هند عن أحد تلك المرات، فتقول: "مرة كنا خارجين نتعشى بره وخلصنا وقررنا نتمشى على النيل، وفعلا خرجنا ورحنا نشتري حمص الشام، الرجل قال: أتفضلي يا آنسة.. ساعتها جوزي بص له قوي، وقال له: هو حضرتك شايفها واقفة مع قرطاس لب، وأنا كنت هافطس من الضحك، بس طبعا مثلت إني متضايقة ومشينا من غير ما نشرب الحمص".

خبير تظبيط

أما "دعاء"، فهي تتعرض للكثير من تلك المواقف، ولكنها هذه المرة كانت في العتبة عند أحد البائعين، وكان البائع مصر على أن يغير في الألقاب ولكن بشكل أثار تساؤلها فقررت أن تسأله.."أنت ليه بتقول لناس معينة يا مدام وناس تانية يا آنسة"؟

انفجر البائع في الضحك وقال لها: هاقول لك ورزقي على الله، بس خليه سر، بصي أنا بأحب أبسط الزبونة وخصوصا الستات بيخافوا على شكلهم ويحبوا يداروا سنهم، فأنا باشوف الست اللي باين عليها كبيرة ومتجوزة وأقول لها يا آنسة تضحك وتشتري، والبنت الصغيرة أقول لها يا مدام فتعتبرها بشرة خير وتضحك وبرضه تشتري، وبكده أبقي "باظبط" الزبونة وآخد بقشيش وأبيع والحمد لله.

حواديت كلها دارت حول اللقب الذي تفضله السيدات.. وأنتِ.. بتحبي أي لقب ؟

7282

ما بتفرق

أرسل هذا التعليق بواسطة : شام مصطفى

بمنتهى الصراحة ما بتفرق معى الان لانى انسة وما بتضايق اذا شخص قالى يامدام لكنى لما اتزوج اكيد بتضايق اذا شخص قال لى يا انسة لان اكيد زوجى بيتضايق وانا اكيد بغضب لغضبه

يامدام ولا يا انسة

أرسل هذا التعليق بواسطة : رائد

هههههههههههه

الموضوع ده مسخرة انا مش عارفه جه على بالك ازاي برافو عليكي يا حاجة، يووووووووووه قصدي ياانسة يانهار مالوش ملامح يمكن تكوني متجوزة يلا خليها يا مدام

بلاد الله لخلق الله

أرسل هذا التعليق بواسطة : انسة لو سمحتى

ههههههه

الموضوع ده بيحصل فعلا و أنا أخدت بالى من اللى بيمعلوه البياعين فعلا بحس انهم بيستعبطوا علشان يخلوا فيه كلام بينهم و بين الزبونة فتشتري منهم

اقولك على موقف يضحك : مرة اختى دخلت تشتري من السوبر ماركت حلاوة و هي أصلا لسة ما اتجوزتش و شكلها كمان صغير بس كان في راجل جنبها هي بتقول للبائع :"كيلو حلاوة لو سمحت" و فس نفس الوقت الراجل اللى جنبها بيقول للبائع :" نص كيلو حلاوة لو سمحت"

قام البائع بصلهم بغيظ و قالهم :" نص و لا كيلو حددوا بسرعة ؟؟" ههههههههه

انتى الولية

أرسل هذا التعليق بواسطة : كتكوتة وحلوة وقطوقطة

بصراحة مش بتفرق معايا بس انا عمرى ماحد بيقولى يا مدام لانى اساسا مافيش حد بيصدق انى مخطوبة لان شكلى صغير

بس بصراحة قبل ماتخطب وكتير فى الشغل لما كان حد يسالنى انسة ولا مدام كنت اقولهم قولو استاذة مش لازم نربط الناس بالحالة الاجتماعية مش هاقول للراجل يا متجوز عمرو مثلا او يا خاطب فهمى مثلا اشمعنى الست بقى اللى لازم تبقى مرتبطة بحد

وعلى راى احمد راتب فى المسرحية احنا عندنا لا بنقول لا مدام ولا انسة هو تعالى يا ولية وخلاص

بس بصراحة احلى كلمى نفسى اسمعها ويارب ربنا يكتبهالى

ام مربم

انتى الولية

أرسل هذا التعليق بواسطة : كتكوتة وحلوة وقطوقطة

بصراحة مش بتفرق معايا بس انا عمرى ماحد بيقولى يا مدام لانى اساسا مافيش حد بيصدق انى مخطوبة لان شكلى صغير

بس بصراحة قبل ماتخطب وكتير فى الشغل لما كان حد يسالنى انسة ولا مدام كنت اقولهم قولو استاذة مش لازم نربط الناس بالحالة الاجتماعية مش هاقول للراجل يا متجوز عمرو مثلا او يا خاطب فهمى مثلا اشمعنى الست بقى اللى لازم تبقى مرتبطة بحد

وعلى راى احمد راتب فى المسرحية احنا عندنا لا بنقول لا مدام ولا انسة هو تعالى يا ولية وخلاص

بس بصراحة احلى كلمى نفسى اسمعها ويارب ربنا يكتبهالى

ام مربم

يا دكتور

أرسل هذا التعليق بواسطة : امممممممممم

بصراحه وبالرغم من انى لسه انسه الا انى بضايق لما حد ينادى " انسه " يمكن علشان بحسها شتيمه وبتفكرنى انى المفروض اكون" مدام " او لانى دكتورة ومتعودة يقولواى يا " دكتور" بس انا ما عنديش مانع ينادوا " مادموزيل " دى بالنسبه لى الطف .