جوزي.. تخين وبنظارة

فتى الأحلام أو الزوج المستقبلي له مواصفات خاصة نختزنها في عقولنا نحن البنات على مر السنين، وطبعا أهمها أن يكون وسيما، رشيقا، أنيقا، نظيفا..

ولو قارننا الأوصاف السابقة سنجدها أشبه بنجوم السينما، يعني زمان البنت كانت تحب تتجوز واحد شبه أحمد رمزي أو رشدي أباظة، ودلوقتي تلاقيها بتحلم بشبيه أحمد السقا وهاني سلامة أو توم كروز.. لكن عمرنا ما شفنا واحدة بتحلم تتجوز واحد شبه "علاء ولي الدين" مثلا..!

يمكن كل المواصفات اللي عند البنات كانت لدي مثلها تماما، فدوما كنت أحلم بهذا الشاب الوسيم الرشيق.. وكان من الممكن أن أتخلى عن الوسامة في سبيل الرشاقة، ولكن النصيب كان مختلفا تماما عن أحلامي، والغريب أنني تقبلت الأمر بل وأحببته بشدة!.

عشان يعيش

مواقف كثيرة مررت بها منذ تقدم العريس الموعود بطلب الزواج مني، فلازلت أتذكر نظرة أمي لي بعد أول نظرة تلقيها على زوجي الحالي، ووجهها الذي انقلب ليتحول إلى اللون الأصفر بعدما فوجئت بحجمه الضخم وطوله الفارع، وقتها دخلت علّي غرفتي لتعلن رفضها للموضوع من بدايته لأنه "تخين" جدا ووشه "مكلبظ" قوي.

وأخذت تذكرني بكل من سبقوه من المهندسين والدكاترة والمدرسين.. اللذين أطلقت عليهم أفظع الأوصاف.. فالأول رفيع قوي والثاني قصير زيادة عن اللزوم والأخير شعره أكرت..

وقتها شعرت بالأسى لرأيها في زوجي المستقبلي، ولكن سرعان ما تغيرت النظرة بعد أول قعدة لها معه، لأنها غيرت رأيها كليا وأصبح هو الأقرب إليها من ابنها وخطيب أختي، وأصبح هو المؤدب الرشيق الجميل.. سبحان مغير الأحوال.. الحمد لله الزيارة الأولى مرت بسلام.

الزيارة الثانية كانت يوم الخطوبة والتي تجمع فيها الأهل والأقارب لمعاينة عريس بنتهم كما يحدث دوما، ولأننا فلاحين تبقي المعاينة عيني عينك، يعني كل الخالات والعمات والأعمام يحضرون ويباركون للعريس وأهله.

يومها اختلفت ردود الأفعال ولكنها كانت جميعا تدور حول حجم العريس وإزاي إنه أخر صبر بنتهم، لكن أظرف تعليق سمعته يومها كان من عمتي.."حلو يا بنتي تخين تخين حلو..عشان ميدوبش من الزمن وعمايله"! ساعتها ضحكت من قلبي وأتذكر هذه الجملة كلما زرت عمتي وأذكرها بها أيضا.

3 ركاب

في فترة الخطوبة.. بدأت تعليقات الناس على جسم زوجي، فواحد يقول إيه العصفورة اللي جنب الفيل، والتاني مراية الحب بقى بس مش كثير عليكي ده، وغيرها من التعليقات السخيفة، وطبعا لأننا شعب ظريف بنحب الطرافة ورمي الافيهات عمال على بطال.

أكثر الأشياء التي كانت تؤرقني في فترة الخطوبة وكتب الكتاب هي المواصلات، فزوجي يصر على ركوب التاكسي لأنه الوسيلة الوحيدة التي تحافظ على كرامته وتحرمه من افيهات وتعليقات الناس، لأن سواق الميكروباص يرفض الوقوف له لأنه تخين، والركاب ينظرون له بغضب لأنه يستولي على جزء كبير من الكرسي وغيرها من المواقف.

وأحكي لكم عن أكثر المواقف التي غاظتني.. في مرة من مرات سفرنا لبلدتي -والسيارة البيجو هي وسيلة السفر لدينا- ركبنا السيارة في الكرسي الأخير اللي بياخد شخصين، بعد خمس دقائق وصل 3 ركاب رفيعين، السائق فجأة طلب من الركاب الموجودين ينزلوا لأنه مش طالع الدور ده وكنا أول النازلين، وبعد دقيقة ركب الـ3 ركاب مكاننا في الكرسي الأخير، ساعتها فلت لساني مني وتركته على راحته مع السائق المستفز.

صورة فرح

كل بنت طبعا بتحلم بفستان الفرح والزفة والرقص مع عريسها، وصورة الفرح في الاستديو التي توزعها على صديقاتها من بابا المنظرة يعني..

لكن زوجي يرفض الرقص ولا يحب مظاهر الزفة ولا الجلوس في الكوشة ولم يفعلها إلا بعد زن طويل من كل المحيطين بنا، أما الأدهى والأمر كانت صورة الفرح..

دخلنا الأستوديو، والمصور بدأ يظبط الكادر وكل مرة يكتشف إني قصيرة قوي ولا يوجد تناسب أبدا، وأخيرا توصل إلى حل جهنمي أنه يوقفني على كرسي وياخد كل الصور من الجنب لأن العريس تخين، ولو عملنا حركات العرسان المعتادة في الصور هتطلع الصور سيئة جدا، وبالفعل لم أحصل على صور "المنظرة" وبالرغم من ذلك وزعتها جميعا لأنه كان عريس زي القمر.

وكمان طيب

ورغم كل تلك المواقف فمازال هناك موقف واحد لا أستطيع نسيانه أبدا لأنه أقصر وأقرب وصف لزوجي العزيز، وهو الوصف الذي نصحه به صديقه الأنتيم "مصعب" عندما قرر أن يخبرني برغبته في الزواج..

براء: تفتكر أقول لها مميزاتي إيه؟

مصعب:وهو ده سؤال.. طبعا تقول لها تخين وبنظارة.

والآن وبعد عامين من تجربتي مع زوجي التخين، خلصت إلى وصف آخر أقرب إليه هو "طيب وتخين وبنظارة" وهي الصفة التي يشترك فيها جميع البدناء، فجميعهم طيبون للغاية وقلوبهم رقيقة وتشبه كثيرا قلوب الأطفال.

b3da

مش للدرجة دي

أرسل هذا التعليق بواسطة : محمد عبدالعاطي

الموضوع جميل و اسلوبك جميل اوي يا دعاء .. انما مش شايف براء تخين اوي للدرجة المهوله دي

يمكن انا اخر مرة شوفته فيها كان في ستمبر 2005 ووزنة زاد بعدها

المهم مبروك عليكي ومبروك عليه

أبشر يا طحاوى

أرسل هذا التعليق بواسطة : ياسر أبو العلا

إذا كانت الأستاذة دعاء تقول هذا الكلام الرائع عن براء وهو يستحقه لاشك ، فأبشر يا عبد الله يا طحاوى بأنه من الممكن أن يأتى اليوم الذى تفرح فيه زوجتك بأنها تزوجت " تخينا وبنظارة ... وطيبًا أيضًا " وهى نفس الأوصاف التى يشترك فيها كل من براء والطحاوى ، وإذا كان براء الذى أراه كالعصفور إلى جانب صديقى اللدود عبد الله قيلت فى حقه هذه الكلمات الرقيقة ، فليس مستبعدًا أن نقرأ مثل هذه الكلمات فى حق الطحاوى أو غيره من أصدقائى الأعزاء الذين يستولون على جزء كبير من الأكسجين المخصص لعدد أكبر بكثير من البشر .

ولكن عندى سؤال - بالمناسبة يعنى - وهو لماذا ترتبط السمنة بطيبة القلب وخفة الدم ؟

أتمنى أن يحاول أحد الزملاء" العشريناتية " البحث فى هذه القضية التى أعتقد أننا نلاحظها جميعا .

الواحد علي كدة يضمن عروسة

أرسل هذا التعليق بواسطة : ابو يوسف

برضة انا كل خوفي اني يتقال علي كدة

لا يا ستي دعاء

انا اروح اعمل رجيم من الان وصاعد

ومش هاكل ولا اشرب حتي اخس

والعروسة متقولش كدة

انا مش قصير ازعه ولا طويل واهبل

موضوع ظريف ودمه خفيف انا بحترم جدا اى شخص بدين بتعامل معاه لا باسخر منه ولا اى حاجة بس بصراحة انا بسخر من الرفيعين جدا او القصيرين لان القصير دايما كده بس جبار ودايما اى قصير تلاقيه استاذ كلام .

انا لا انا تخين ولا رفيع بين البينين ولا طويل ولا قصير بين البينين برضه .

بس لازم اخس 7-8 كيلو عشاناوصل للجسم الرياضى هه دعواتكم معانا

يالهوى

أرسل هذا التعليق بواسطة : المعلم

تخين وبنضارة بس والا فية حاجة تانية

ياخوفى لا يكون ما بيعرفش يطلع السلم

وبعدين العتبة جزاز والسلم نايلون فى نايلون وبسبب النضارة مش شايف الالوان

والوزن التقيل دة مصيبة بتكبس على النفس وخصوصا بعد اكلة محشى

عزائى للتخان وربنا يصبر نسوانهم

طويييييييل

أرسل هذا التعليق بواسطة : هش

بس البراء مش تخين اوى

وفيه ميزه انه طويل يغنى ممكن يخس وابسط نزول فى وزنه هيبان عشان طويل

روح جيم بيجاما يا براء

هههههههههه

والله موضوع عثل

تخين بس هيخس عشانى

أرسل هذا التعليق بواسطة : Barbie girl

انا كمان مش بحب التخان..لان اخويا تخين وعملى عقدة نفسية ههههه وهو كمان اتعقد منى عشان كل شوية اقوله خس يانى خس ..اخر ما هو زهق منى قالى يارب تتجوزى واحد تخين..وعدت السنين..وفى الاخر حبيت واحد والله مكانش تخين وفجأة لتاقيته تخن مش عارفة ليه بقى..بس على مين!!!انا مصممة انه يخس وهو وعدنى انه هيخس ههههههههههه عشان اخويا مايفرحش فيا ويتريق عليا...موضوع عسول خالص وعجبنى اوى

علاء ولي الدين

أرسل هذا التعليق بواسطة : hana

زعلت منك يا دودو انا كنت بحب علاء ولي الدين الله يرحمه و كنت عايزة اتجوزه و اخليه اسعد راجل تخين في العالم

علاء كان بجد فتى احلامي كان انسان جميل و طيب و مثقف و كل الناس كانت بتحبوا و على فكرة انا ما كنتش بحبه علشان دمه خفيف انا كنت بحبه علشان شخصيته و لما توفى الله يرحمه صحابي كلموني عزوني فيه

شفتي بقى ان في بنات ممكن تحب التخان و تموت فيهم.....اه صحيح ما انتي واحدة مننا اهه :)

من زميلة

أرسل هذا التعليق بواسطة : مي حمدي

الموضوع مش بالطول ولا التخن ولا الرفع...أهم حاجة التفاهم وكل شيئ نصيب...على فكرة أنا خسيت 20 كيلو الحمد لله...وقابلني مواقف بايخة كتير برضه من ناس مش بتراعي شعور حد...عموما المقال لطيف وألف مبروك

أرسل هذا التعليق بواسطة : مصـ( الخير )ـعب

برضه يا بيرو يا حبيبي "تخين وبنضارة"

وده الوصف اللي أنت حطيته ليك في مدونتك بعد ما قعدت تلف وتدور كتير :)

واسمح لي أفضحك شوية، وأقول لكم اكتشاف دعاء الخطير ..

لما تكتب "تخين" على بحث الصور في جوجل ..

تاني صورة على طول صورة براء

شكرا يا دعاء على الاكتشاف المذهل ده

"بحبك يا صاحبي"