DJ إسلامي.. على واحدة ونص!

أنا : سلامو عليكو

ولاء: أزيك عامله إيه؟

أنا : أنتِ إيه الأخبار.. هتتجوزي أمتي بقي؟

ولاء: يوم الجمعة اللي جايه في مسجد التقوى، بعد المغرب أوعي تنسي..

أنا : لا طبعا أكيد هتلاقيني.

بعد المكالمة..

أنا: طبعا هيبقي زى أخر فرح رحته، أخره دُف وكل شويه تلاقي المأذون يزعق ويقول: "الصوت"، علشان الستات تخرس خالص، وعلشان يبقي فرح "كوتيمي"..

يوم الفرح..

بعد ما لبست الحته اللي علي الحبل، وأمام المسجد سمعت صوت أغاني أفراح وطبل ومزيكه، افتكرت فيه فرح جنب المسجد.. ولكن فجأة ألاقي الطبل والزمر ده مصدره DJ إسلامي في المكان المخصص للسيدات داخل قاعة ملحقة بالمسجد!

والكل هاتك يا رقص وغني، وطبعا العروسة كانت متشيكه علي الأخر، ورقصها مع صحبتها كان أكبر دليل علي فرحتها بليلة العمر..

وفي وسط الطبل والزمر ده، لاحظت وجود هذه الفتاة التي تشّغل الـDJ بالطبع لفت نظري وجودها، أما الذي لفت نظري أكثر أفواج الفتيات – من صديقات العروسة- وهن يقصدن الفتاة يسألنها أزاي ممكن تيجي في أفراحهم وإيه أخبار الأسعار..

وبما أنني فضولية قررت أنا كمان أسألها وأتعرف عليها وأعرف منها أزاي جتلها فكرة الشغلانه دي..

وكانت دي الحكاية..

ممكن أتعرف عليكي؟

اسمي هاجر أحمد، وعندي 17 سنة، طالبه في ثانوية عامة.

أنتِ بدأتي من أمتي الشغلانه دي؟ وازاي جتلك الفكرة؟

من أول الصيف ده، في السنة اللي فاتت كنت بشتغل في فرقه أفراح للبنات وكنا بنعمل استعراضات وبنقوم أحيانا باستخدام الـ DJ..، ولكن حصلت أحداث كتيرة خلت الفرقة تتوقف..، وكانت الفرقة لها صيتها فكانت كل ما عروسه تتصل عشان تروح الفرقة فرحها نقولها ما فيش غير الـ DJ فكان في بعض العرائس بتقول مش مشكله أنا عايزه الـ DJ بس، فأصبحت ما فيش فرقه أفراح للبنات لكن فيه DJ لأفراح البنات..

طيب أيه أسعار الـ DJ ويا تري بتكسبي أد إيه؟

أنا بأجر الـ DJفي كل فرح بروحه لأني لسه مبتدئه وما ينفعش أخاطر واشتري واحد دلوقتي، وتأجيره في كل مرة بيكون بمبلغ 250 جنيه، وباخد في الفرح 400 جنيه يعني المكسب بيبقي حوالي 150 جنيه شامله أجرة النقل.

طيب أزاي بتوافقي بين دراستك وشغلك؟

أجمل حاجه أن الأفراح دايما بتتركز في فصل الصيف يعني لما الأجازة بتيجي، وفي الشتاء غالبا الأفراح بتبقى في أيام الأجازات، ولو حصل وجه فرح في وقت فعلا عندي فيه مذاكرة طبعا بعتذر.

وإيه الصعوبات اللي بتواجهك؟

المشكلة الحقيقية مع أهلي خاصة بابا بسبب التأخير؛ لأن دايما مهما اتفق مع العروسة علي وقت لنهاية الفرح، ييجي أصحاب الفرح ويتحايلوا عليا شويه عشان بيبقي الفرح لسه ما خلص والناس لسه ما خلصتش طاقة الرقص اللي عندها..، وبالتالي بتأخر وبابا يقولي تهديده المعتاد ده أخر فرح هتروحيه، فاعقد أتاحيل عليه شويه وقوله الفرح ده وخلاص عشان نفسي أغير الموبيل بتاعي، فأصعب عليه ويوافق وهكذا.

سمعت الموضوع دا قبل كدا

أرسل هذا التعليق بواسطة : barbie girl

انا لسة سامعة حجاية ال دى جى البنت دا من اختى وبرده فضلت مذبهلة شوية كدا

بس دا طلع حقيقة اهو

يعنى إيه

أرسل هذا التعليق بواسطة : زنوبه

مش فاهمه !! يعنى بيبقى فيه مزيكا وآغانى ورقص داخل المسجد ! طيب مش ده يبقى حرام!!!