طفي النور يا بهية

السادس من أكتوبر العاشر من رمضان الساعة اتنين الظهر من سنة ثلاثة وسبعين.. أمي قالتلي ما تروحش المدرسة بكرة علشان الحرب قامت، انا قلتلها لأ هأروح المدرسة بكرة علشان الحرب قامت، وكبرت في دماغي وأمي لمت الموضوع.

الحرب .. إذن هي الحرب .. ولتنزل لعنة الرب على كل من يتآمر على بيت المقدس.

في المدرسة الصبح كان فيه بت رزلة رزالة ماسكة الإذاعة المدرسية وصوتها مسرسع في الميكرفون – عرفت بعد ذلك أنها بنت الناظر ويا صباح التوريث- خلصنا الطابور بدري وطلعنا على الفصول، أول حصة كانت أبلة لواحظ، تاني حصة ولغاية آخر حصة برضه ابلة لواحظ.

يا ولاد مين يعرف إحنا بنحارب مين؟ ده سؤال أبلة لواحظ.

كان قاعد جنبي ولد صعيدي ساكن في البيت اللي جنبنا بس صعيدي بجد مش تايواني واسمه عبد الناصر لأنه كان من أسيوط .. مد صبعه وقال: أيوة احنا عنجاتل الانجليز!!

إنجليز .. الله يخيبك .. مين اللي قالك كده ..أبوي جاللي إن احنا عنجاتل الإنجليز،وجاللي كمان إن شكلهم أبيض وشعرهم أصفر، ولم أدري بنفسي إلا ويحي رمضان زميلي ينزل تحت الدكة ويستخبى فتلك بالضبط مواصفاته .. بس الجدع ذنبه ايه، وإذا كان يحي أبيض وشعره أصفر إذن يبقى جاسوس، وعبد الناصر من زمان متغاظ منه، وتمللي يقوله: اتلم يا خرع يللي شبه النسوان، والنسوان الحلوة كمان، أنت لو حدانا في البلد، كنا طخناك وطاوينا عارك، ومع ذلك، كان الأثنين أصدقاء في كثير من المواقف.

أبلة لواحظ حاولت تجيب عبد الناصر يمين تجيبه شمال راسه وألف سيف إن احنا عنجاتل الإنجليز.

حد تاني يا ولاد يعرف إحنا بنحارب مين؟

مديت أيدي: أيوة يا أبلة، بنحارب العدو .

اللي هو مين يا احمد؟

اللي هو إسرائيل .. إسرائيل العدو هو فيه عدو تاني يا أبلة؟

أبلة لواحظ قالتالي برافو عليك، يا ولاد أي حد يلاقي لعبة أطفال في الشارع أوعى يمد أيده وياخدها، لإن اسرائيل بتحدف لعب من الطيارات علشان أطفالنا يموتوا، علشان لو الأطفال ماتوا أهلهم يحزنوا ولما أهلهم يحزنوا ما يعرفوش يحاربوا.. يوووووه كلام كبير أوي يا أبلة.. بس ما علينا...وبعدين لعبة يعني ايه لعية.. يعني ممكن اسرائيل تحدفلنا عجلة .. أبويا من أسبوعين وداني الاتحاد الإشتراكي اللي في جنينة الأزبكية، وكانوا بيركبو الولاد عجل هناك، كان نفسي يدوني عجلة هدية، بس بابا حبيبي ما يقدرش يشتريلي عجلة، مش مهم، إسرائيل هترملنا عجل، وأنا بقى هأشوف القنبلة حطنها فين وأشيلها قبل ما تنفجر، وأخد العجلة وأبقى ضحكت عليهم.

ده انت لا تبقى صاحبي ولا ألعب معاك!!!.. ده خالد فتوحة صاحبي اكتشفت بعد ذلك أنه بن عمي مش لزم أوي بس أبوه يبقى ابن عم ابويا.

ليه يعني .. بتقولك عجلة من عندي الإسرائيلين.. عاوز تركب عجلة من عند الإسرائيلين، قلتله خلاص يا عم مش عاوز العجلة .. خالد؟ تيجي نعمل هيصة حرب زي اللي عملناها امبارح ونشتم موشى ديان؟

قاللي آه وتعالى نطلع من المدرسة على شارع الموسكي على حارة المزين وندخل درب البرابرة لغاية الترماي اللي في شارع الجيش، قلتله ماشي .. عاوزين صفيحة.. قاللي عند عم سيد الفراش.

نزلت على عم سيد الفراش.. لقيته قاعد في أودة ضلمة، ومعاه داده نجوي.. يا عم سيد بتعمل ايه في الضلمة.. ده سؤالي البديهي بينما ألقي نظرة.. ضربة من قبضة يده جعلتني أبوح بما أريد فوراً.. عام سيد اديني صفيحة الجاز الفاضية اللي عندك

تهبب بيها ايه يا أغبى أخواتك؟

هنرش المدرسة علشان ما نتعبش دادة نجوى زي انت ما تاعبها.. يا عم سيد مش احنا في رمضان .. أومال ماسك سيجارة ليه.

الحل الوحيد معي هو أن يلقي لي بالصفيحة، بينما دادة نجوى تشير لي بيدها بعلامة أعرفها جيداً وتعني .. سأذبحك.

الآن الصفيحة معي .. وجماهير المدرسة تنتظرني .. وبنت الناظرة عملالي فيها خضرة الشريفة واحنا ولاد الشوارع.

الصفيحة في يدي .. والحرب مشتعلة على الجبهة .. والعيال بتوع المدرسة حواليا من كل جانب ينتظرون الإشارة لي للبدء .. وصوت الأغنية الفلكلورية في هذا الجو المشحون تهب في إذني:

يا حبيبي يا احمد....يللي ع الجبهة.

أه ياروحي يا أحمد ...يللي ع الجبهة..

أحمد مجاشي ...لألأ

ولا سبش عضة..لألأ

تحت المخدة..لألأ

ولم أكن أدري عن احمد ذلك الذي سيترك الجبهة والقتال، ليترك بصمته بعضة تحت مخدة، غير أن اقتران اسمه باسمي أثار في الحماس، وتمنيت كثيرا، ومازلت أن اكون على الجبهة .. لا لشئ سوى لاختبار قدرتي على العض.

ولا أدري حتى الآن كيف كانت تلك الأغاني الفلكورية تخرج من تحت غطاء الرقابة وقتها.

المهم الصفيحة معي.. الجو مشتعل حماس .. والجماهير الغفيرة من العيال معي.

وهيا يا رجال .. قولوا ورايا

موشى ديان الهش الهش

ضرب مراته بطبق المش

موشى ديان الغول الغول

ضرب مراته بطبق الفول

موشى ديان

فتح الحلة

لقى تعبان

حطه في (نقط)

قال يا سلام

ثم استمرت المظاهرة حتى وصلت إلى البيت وأمي بتسمع الراديو وماسكة ورق لزاق عماله تلزقه على الإزاز الإزرق قالتلي ده بتاع الغارة، والشباك في الدور الأرضي وأحنا الحقيقة ساكنين تحت الشباك بشوية، وكان فيه جدار من طوب أحمر قدام الباب ولقيت ناس يتقيم الجدار مرة تانية، وخرجنا تاني للحارة، والمرة دي جه يحي رمضان أبو شعر أصفر علشان يلعب معانا، قلنا هنلعب حرب، 3 مصر و3 إسرائيل، قلتله لأ 3 مصر و3 العدو، قاللي ما نقول إسرائيل، قلتله ما هي إسرائيل هي العدو، ونشوف مين اللي هيغلب.. طبعا بدون كلام كان يحي بيلعب دور العدو، وكنت بألعب في فريق المصريين.

واتفقنا نحفر قناة في النص، وحفرنا القناة، وكل همنا إن احنا نعدي وناخد أرضنا، هوب الطوب اشتغل، حدفوا علينا طوب من كل مكان .. وعموا عينينا بالتراب.. خالد قال .. عيني عيني .. بس هأفضل وراكم.. قلتله تحب تبطل لعب .. قال لما أخد بتاري الأول .. لازم أعمي عينهم زي ما عموا عيني.. بس الطوب كان شديد، والتراب ملا الحارة، واحنا خدنا علقة في الأول نصها موت.. ورجعنا لورا شوية .. بس ما سبناش اللعب .. قصدي الحرب .. جت طوبة في دماغي أثارها موجودة إلى اليوم .. رأيت الدماء تسيل من رأسي ..

صوت شادية من راديو خالتي صديقة:

عبرنا الهزيمة يا مصر يا عظيمة

وبسمك يا بلادي عدينا القنال

بمسك يا بلادي حققنا المحال

خالد قاللي .. ما تخافش هتموت شهيد وتشوف ربنا .. ويتدخل الجنة.. وهناك ممكن تركب العجلة اللي انت عاوزها .. كمان الجنة فيها تفاح أحمر، كان منظر الدم على وجهي كفيل بأني أصمم أنا كمان على اخد تاري

هذه المرة كان صوت عبد الحليم حافظ:

ابنك يقولك يا بطل هاتللي نهار

ابنك يقولك يا بطل هاتللي انتصار

ابنك يقولك ثورتك عارفة الطريق

وعارفة مين يا ابا العدو ومين الصديق

ثابتة كما الجبل الاشم

حالفة ع الانتصار

.. خالد بقى له تار عندهم وانا لي تار..وشريف له تار .. ما خلوش حد مننا إلا وبقى له عندهم تار .. المهم لازم ننتصر أحسن العيال دول .. لو ضربونا مش هنعرف نقيم وشنا في الحارة ولا المدرسة تاني، هتبقى معرة.

يأتيني صوت وردة الجزائرية

حلوة بلادي السمرا

بلادي الحرا ..بلادي

وأنا على الربابة باغني

قول معايا يا شعب

تحيا مصر

ومن راديو آخر عبد الحليم حافظ

خللي السلاح صاحي صاحي صاحي

لو نامت الدنيا صحت مع سلاحي

سلاحي في ايديا

نهار وليل صاحي

ينادي يا ثوار

عدونا غدار

خلي السلاح السلاح صاحي صاحي صاحي

خطفت عصايا ونقيت اتخن واحد فيهم، كان اسمه سامي العجل، وضربته ضربة خلته عيط، وقع على الأرض ووقعت فوقيه.. سيبني سيبني، ده كان توسله .. بس هو مين.. قطرات الدم بتنزل على وشه من عندي.. قلتله قول أنا مرة (إمرأة) .. قال أنا مرة .. قلتله قول أنا إسرائيلي مرة .. قاللي أنا إسرائيلي مرة .. قول مصر منتصرة والعدو مهزوم .. قال مصر منتصرة والعدو مهزوم .. وفجأة أغمض عينيه وتوقفت أنفاسه.. وسقطت يده على الأرض.. والعيال المصريين اللي معايا قالوا : هيه هيه هيه أحمد قتل العدو احمد قتل العدو.

بينما أنا غير منتبه للدنيا، إذا به يقول لي ما تلعبش معايا تاني انت بتضرب بجد، وبكرة في اللعب انت يا احمد تعمل إسرائيل وانا اعمل مصر ..وكأن أمه دعت عليه في اليوم ده .. أعمل إسرائيلي .. يا نهار أبوك .. وبينما أحاول أن أهوي عليه بيدي .. إذا بيد تنشق عنها الأرض مثل جسمي تماماً، تأخذني لتطيح بي بعيداً .. دي خالتي صبرية ام سامي.. واللي كنت مسميها جولدامائير .. من كتر ما أبويا كان بيتكلم عليها في قعدات أصحابه اللي كان بيخليني فيها، عن جولدا مائير طبعا.. مش خالتي صبرية.

بس الحق .. أنها أول ما شافت الدم نازل من وشي .. شهقت شهقة واخدتني على أمي ، وأمي قالتلي يعني هي الحرب في كل مكان، وبينما تنصرف خالتي صبرية ناديت عليها بأعلى صوتي: يا جولداااا مائييييييييييييير .. وقد أشارت لي هي الأخرى بيدها بعلامة .. معناها .. هأخليك مش راجل.. ولم أكن أعرف كل إشارات النساء حتى تلك اللحظة.

كان أذان المغرب قد اقترب، وعاد والدي من عمله وبعد الإفطار جلس مع عم سيف، جاره وقريبه وزميله في نفس المقهى، جلسا للتسامر وتدخين الشيشة، بينما أمي تحضر الفحم على وابور الجاز، وأجلسني والدي بجواره.. وهو الشئ الذي كان يرفضه عم سيف بمنتهى القوة وكانت الشيشة في بيتنا مشتعلة والحرب على الجبهة مشتعلة، ودار الحديث، حول عدد الطيارات المسقطة وايه اللي بيحصل على الجبهة، وابن عمي يسري اللي حارب في 67 وبيحارب دلوقتي على الجبهة، وابويا كل شوية يقول ابن اخويا عدا القنال، تلاقيه دلوقتي هو اللي رفع العلم، بينما صوت الراديو بجواري يذيع بيان.. وانا اتميلت دخان شيشة ..ويكمل أبي المرة دي هياخدوا علقة موت.. تيجي يا سيف نفتح قهوة في تل أبيب .. وكلما أردت الدخول في الحديث أشاح لي عم سيف بالسكوت.. أيه الرجل الرخم ده.. بينما أخدني أبي في حضنه وهو يقول .. ايه يا ابو حميد عاوز تقول ايه؟ بابا أنا النهاردة عملت حرب مع العدو وانتصرت عليهم، وخليته قال أنا مرة .. وشتمت جولدا مائير، وعملت مظاهرات في الحارة والمدرسة، وشتمت موشى ديان، تاخدني معاك تل أبيب في القهوة الجديدة؟

بينما أمي تضحك .. ده مسمى صبرية مرات عبده جولدامائير، وعامل ابنها العدو.. ومخللي الحارة جبهة.. وبينما رأسي بدأ يدور من دخان الشيشة، كانت تلك الكلمة من أمي كفيلة لنقلي إلى عوالم أخرى.. الجبهة، ترددت هذه الكلمة كثيراً في أذني .. يا ترى شكلها ايه.. بيقولوا الجبهة مفيش حاجة تشبهلها، وإن مش أي حد يقدر يروح هناك، الأبطال بس هما اللي بيقدروا يروحوا الجيهة، واتخيل نفسي لابس لبس الصاعقة، ورايح ع الجبهة، مش من الجبهة الواحد يبقى قريب من فلسطين، يعني ممكن اشوف منى اللي كانت معايا في الحضانة هناك، وبيقولوا كمان إن الجبهة، كلها تراب في تراب، بس تراب من نوع معين، بيقولوا عليها تراب غالي أوي، ده مرة واحد صاحي في الفصل قاللي عارف لو شفت تراب الجبهة ومت هناك ع الجبهة وادفنت في تراب الجبهة يبقى هتشوف ربنا علشان اللي بيموت على تراب الجبهة بيبقى شهيد و الشهيد بيشوف ربنا، بس ساعتها مش هأطلب عجلة، عاوز اركب عربية جيش، صاحبي قاللي اسمها جيب، مش مهم المهم إني أركب عربية الجيش وأبقى على تراب الجبهة ولو مت ابقى شهيد، ده بيقول التراب بتاعها، بيجيبوه من حتى بعيدة اوي، مش أي تراب، وبينما تتصاعد أنفاس الشيشة وأنا مرمي في حضن أبويا وبألعب في شعره، تتهادى إلي كلمات لم أفهمها.. نيكسون.. فض الاشتباك .. صواريخ سام 6 .. ولم يلتصق بأذني إلا كلمتين

التراب غالي .. إسرائيل العدو

ab41

ايش هدا يا زلمة

أرسل هذا التعليق بواسطة : تحية من فلسطين

هذه أحلى ذكريات سمعتها من مذكرات أطفال عن تلك الفترة، الله معكم يا عشرينات

كانت مصر لسة مصر

هى مصر دلوقتى كانت زى مصر ايامها ؟

كان كيلو اللحمة بجنية واحد

ورغيف الخبز بقرش تعريفة

والجريدة بتلاتة تعريفة والبيبسىكولا بتلاتة تعريفة وكيلو الرز ب 5 صاغ وتذكرة القطر من القاهرة لاسكندرية ب 35 قرش

ولتر البنزين بشلن يعنى خمسة صاغ

كان كل خريج بيلاقى وظيفة محترمة

كان كل يوم بقيتفتح 3 مصانع

كان الجيش للجميع ابن الغفير وابن الوزير فى نفس الصف لابس كاكى ومفيش واسطة

كانت مصر مهزومة بس عفية

كانت المعتقلات فاضية والسادات خرج الكل والاخوان المسلمين برة المعتقلات

وكانت صيحة القتال للمسلم والمسيحى اللة اكبر

لاول مرة فى تاريخ مصر ييجى العيد والناس متعملش كحك علشان العيال بتحارب وفيهم ناس ماتت

كانت مصر المؤهلات العليا دخلوا الجيش وبقوا ضباط احتياط

كان العدو واضح ومعروف ومحدد

كان فية فلاح شرقاوى اسمة عبد العاطى صائد الدبابات ضرب لوحدة 22 دبابة

وكان فية الرائد محمد المشد

وكان هناك كل ولاد الارض من القرى والنجوع والكفور من بحرى والصعيد

وكان لازم ننتصر

وغنت شادية يا حبيبتى يامصر

ومصر كانت حبيبتنا

لانة كانت مصر لكل عيالها مش لفئة الحرامية

تحية لكل مصرى كان بيركب ظهر القطار ايامها علشان ينزل من الجبهة يشوف امة ويرجع تانى

لاول مرة فى تاريخ مصر الحرامية والنشالين ما يسرقوش ايام الحرب ولم تسجل اقسام الشرطة حالة نشل واحدة طوال ايام الحرب - سلام لكل رفاق الحرب القدامى

الجنة للشهداء

ولا نامت اعين الجبناءذ

10/10

أرسل هذا التعليق بواسطة : Medo

So funny .. So childish .. So innocent .. So egyptian .. So artistic .. So genuine .. thank you and keep up the good work

شكرا على تعليقاتكم الطيبة

أرسل هذا التعليق بواسطة : أحمد محمد علي

الأخوة الأفاضل شكرا على تعليقاتكم الطيبة .. انتظروني في حلقة أول بوسة في حياتي على عشرينات .. حاجة كده زي اعلانات التلفزيون خالص تحياتي .. احمد

سردية في حب الكتوبر

أرسل هذا التعليق بواسطة : الطحاوي

بجد أدهشتني وانا باعتبرها اصدق سردية واجمل وصف قيل في تلك اللحظة لاسيما الفئة التي تحدثت عنها وغالبا ما تغيب في قصص الصعايدة والفلاحين وكان القاهرة ليس لهم نصيب احييك واحي روحك وقلمك البسيط السهل والعميق وياريت متحرمناش

اختراع

أرسل هذا التعليق بواسطة : البراء أشرف

صباح الفل يا أستاذ أحمد.. خليني أقولك إن اللي حضرتك كاتبه ده اختراع.. واختراع جامد قوي.. مش عارف نقدر نسميه ايه.. يمكن سردية زي ما عمنا الطحاوي بيقول.. ويمكن "شهادة".. شهادة حقيقية على ماشي مصري جميل.. مليان ضحك ولعب وحب وحرب..

بقدر ما استفزيت دموعي في بعض الأسطر.. بقدر ما اجبرتني على نسيانها لأبدأ في الضحك على سطور أخرى، ورغم إني قرأت لك من قبل مقال أو اتنين على عشرينات زماااااااان.. الا اني أول مرة آخد بالي من عبقرية سردك وحكيك..

أستاذ أحمد انت بتكتب زي ما بتتكلم.. وأنت لما بتتكلم بتجبر اللي حواليك على الانصات والتركيز.. وده اللي حصل مع تدوينتك العبقرية دي.

أشكرك بقدر ما أدخلت على قلبي السعادة.. فأنا منذ فترة ابحث عن تدوينات تستحق القراءة.. ولا أجد..

سلام يا صديقي العزيز.. وعلى أمل اللقاء قريباً

براء