فسحة.. أون لاين!
الأسباب العشرة لسقوط (عمارة يعقوبيان)
ولاد البلد * – عشرينات – 13/10/2007
شاشتك قدامك.. موسك في إيدك.. سماعتك في ودنك.. يبقى أنت أكيد أكيد في صفحة مصر "ولاد البلد" اللي يسعدها أن تدعوك لثلاث فسح أون لاين.. وأنت أمام جهازك "مأنتخ" لا مواصلات، ولا فلوس ولا تحرش جنسي.
فقط.. دوس كليك واختار المكان.. كورنيش النيل.. حديقة الحيوان.. سيتي ستارز.. وأنت حر تتحنطر أو تركب مركب أو تتجول في محلات سيتي ستارز.. ولف ودور براحتك.
زحمة الكورنيش!
لو اخترت تتمشى وتروح كورنيش النيل طبعا هتلاقى الدنيا زحمة وخلى بالك وأنت ماشي وماتعملش زى السنة اللى فاتت وتعمل "قضية رأي عام".. وساعتها هاتكون ندمان على الفسحة.
أمامك الآن أشكال وألوان من البشرية ناس كتير منهم أجانب وعرب ومصريين من كل مكان في الأرض... كما تشاهد في هذا الجاليري
طبعا معاك معاك لب وسوداني ولو حبيت تأكل يبقى أكيد سميط وبيض وجبنة.. دور في التلاجة.. وتركب أحلى مركب وتتفسح في النيل.. وممكن تركب الحنطور وتتحنطر.
أنت دلوقتي تحت كوبري قصر النيل؛ لأن أغلبية الناس يتعبرونه أول الكورنيش؛ لأن الجزء الثاني مخصص للفنادق والمولات.
حاجة ساقعة!
تمشي شوية هتلاقى في الأول تكعيبتين للجلوس.. تقدر تقعد على أى واحدة فيهم.. بس لو لقتها فاضية، وأكيد هتلاقى بجانبها بائعي الشاي وحمص الشام والحاجة الساقعة وهتلاقى بائع الورد مستنيك تقعد.. عشان يرخم عليك؟
تمشى قدام شوية وهتلاقى شباب بتنده وتقول: "رحلة في النيل" طبعا مركب في النيل لمدة 10 دقايق بس، هتحس إنك أصلا ماركبتش مركب من حلاوة النيل الرحلة بتكلفه من جنيه إلى جنيهين.. المركب بتطلع من المرسى لحد تحت كوبري 6 أكتوبر.
وتحت الكوبري!
تحت الكوبري.. هاتلاقي مكان جميل تقدر تستخبى من أشعة الشمس في الحر، وتقعد بس بلاش تكتر في القعدة عشان ماتزهقش تنظر إلى الجهة الأخرى من النيل تلاقي البواخر الفاخرة طبعا على الضفة التانية، وبالعكس بعد الكوبري بحوالي مائة متر، ترى مرسى الأتوبيس النهري (باخرة الفقراء).
وبجواره مرسى البواخر التي تأخذك إلى القناطر الخيرية سعر المركب شامل دخول القناطر وأيضا ذهاب وعودة من خمسة جنيهات إلى عشر جنيهات، وما تدفعش أكتر من كده وأكيد هتتمتع في المركب لأنك هتعيش أجمل لحظات العمر مع نهر النيل أمام المرسى سترى مقر الإذاعة والتليفزيون.
وبعد المرسى ستكون في أحلى رياضة، وهى المشي لكن على ضفاف النيل ومعك الباعة من بائعي الشاي والورد السميط والبيض والجبنة.
سيتي لعب وفرجة
ولو قررت تروح سيتي ستارز.. الحلم.. واللعب.. والحب.. ننصحك خليها فرجة بس ولو اشتريت خليك في الخفيف.. خلينا من الأول نتفق.. أنت معاك فلوس ولا لأ؟
شكلك معاك؟!.. قشطة.. كمل الموضوع.. مش معاك كمل برضك.. وعلى هناك direct أو كليك زي ما أنت شايف كله في الصناعي يعني مياه معدنية وخضرة ونخل صناعي ناقص الوجوه الحسنة... طبيعي ..طبعا كلها ستارز.. فقط اجلس مكانك وشاهد جاليري مصور لسيتي ستارز على شاشتك
مين بيتفرج على مين
لا كاني ولا ماني أنت عاوز تستعيد ذكريات الطفولة عليك بحديقة الحيوانات لسه التذكرة رخيصة ..نسينا أنت أون لاين مفيش تذاكر خالص.. أنت تدخل من الباب الرئيسي.. أشعة الشمس تواجهك بحفاوة شديدة.
طبعا وأنت ماشي معانا ذكريات الطفولة تدافع على خيالك ..رحلات المدرسة والشلة.. والعيلة ..
ولن نعدك برحلة عن الحيوانات فقط، وزي ما أنت شايف تحولت الحديقة إلى ملاه شعبية أو مسرح فني مفتوح لاستعراض أنواع الفنون المختلفة سواء الغناء او الرقص..
دعك من مشاهدة الحيوانات والطيور.. إيه رأيك في هذا المشهد فريق موسيقي ووصلة غنائية.. قدامك فرح شعبي يا معلم.. بتعرف تغني أو بترقص كويس، عندك الطرقات مكان لاستعراض مواهب الرقص بين رواد الحديقة.
بس متزعلشي إذا شاهدت قفصاً من أقفاص الحيوانات المنتشرة حول هذا الحفل الصاخب حيث انقلب الوضع وأصبحت الحيوانات هي التي تشاهد تصرفات وسلوكيات المصريين.
خد الموزة دي من القرد وسيب النمر يتسلى.. الأكثر طرافة أن إدارة الحديقة وفرت فرقة مزمار بلدي لتتجول في الحديقة وخلفها عدد كبير من الزائرين وكأنهم في زفة عروسة داخل إحدى القرى المصرية موسيقى المزمار صاخبة يتردد صداها سلامات سلامات يا حببنا يا بلديات!
ملحوظة لن تجد الظرافة فهي ماتت.. وماتت معها ظرافة الحديقة كلها ..ومتزعلشي معلشي إحنا بنتفسح وكل عام وأنت بخير.. شاهد جاليري مصورمن داخل حديقة الحيوان وأنت فى منزلك
__________________________
* أخذكم في هذه الرحلة: مروة صلاح ومحمد كمال وحسام الهندي
1edd
واللة فكرة حلوة
أرسل هذا التعليق بواسطة : ابو ليلى
الرحلات حلوة وجميلة وبتنسى الانسان همومة
والنيل والقناطر وركوب القارب او الاتوبيس النهرى - كل دة رائع جدا
والانسان لما بياخد كاميرا ويصور صور بتبقى لها زكريات جميلة
ومطلوب فك الكلكعة ونسيان السماجة ورخامة الظروف وخلونا نضحك
ويجعل عيدكم سعيد