اتخنقت.. وماحدش حاسس بيا

"أنت عارفة يعني إيه بنت تدخل البيت الساعة 10 ونص ولا 11 بالليل.. أنت عارفة الجيران ممكن يقولوا إيه؟؟ أنت لازم تسيبي الشغل ده فورا كان ماله شغلك القديم..لك مواعيد وبترجعي في النور"

كل ده عشان أنا اخترت اشتغل في الإعلام وعشان الإعلام ده بيتطلب أن البنت أحيانا ممكن تروح متأخر الساعة 11 مثلا!! لأن الطريق ممكن يكون واقف وعشان المصدر قال أقابلك 8 وأتأخر نص ساعة مع زحمة الشوارع ميعرفش إيه اللي ممكن يجرالي في البيت..

ومينفعش أبدي في الشغل أي تذمر لأن ببساطة صاحب العمل عايز الشغل وبس هو ماله يوجع دماغه...

وبالتالي دراستي ومذاكرتي في الثانوية وتمقيق عنيا وبهدلتي في الكلية عشان بس نفسي اشتغل في الميديا أو الإعلام كله راح وراء عادات وتقاليد العيلة اللي لسه شيفة أن البنت مينفعش تسافر مع فريق تصوير الفيلم لإعداد حلقة أو برنامج..رغم أنهم واثقين في بنتهم جدا..بس هاجس الذئاب البشرية مش قادر يطلع من دماغهم..

"بصي بقه أحنا أخدنا قرار أنك لازم تعدي في البيت لأنك غير مسؤولة أحنا أدناك الحرية وأنت محفظتيش عليها وللآسف بقيتي بتتأخري في الشغل، محنا بنشوف البنات كلها راجعة الساعة 5 أزاي ترجعي 8 و9..أزاي شغلك كله مع رجالة هو مافيش بنات غيرك" ..

بالتالي فكرة أني أكون طموحة أصبحت فكرة غير واردة أصلا لأن الطموح ده ممكن يضيعني ويأخرني لحد الساعة 11 بالليل..

آه نسيت أقولكم في باقي الخناقة بابا قالي "افرضي عريس جالك وعرف أنك بتتأخري بره لغاية 10 ونص".. قلت له يا بابا "مي" صاحبتي كانت بترجع 12 وتقدم لها جارها ..

الفكرة مش فكرة أني عايزة أتأخر وخلاص ..إنما فكرة أن شغلي ممكن يضطرني للتأخير ولو أنا ماعملتوش الدنيا مش هتقف هيلاقوا 1000 واحد غيري يعملوا ..الفكرة هو أن أنا لازم أفكر لحد فين.

يعني مثلا لو فكرت أقولهم أني عايزة أخد منحة في إنجلترا..أنا متخيلة الرد أنت اتهبلت يا بت أنت؟؟

طب هو أنا ليه مينفعش أفكر كده؟؟ عشان أنا بنت طب ليه مقعدتوناش في حرملك وبقينا زي ستات زمان؟؟ليه حتى التفكير ما ينفعش إلا في إطار معينليه حتى خيلنا بقه مقيد..

أنا نفس أعمل حاجات كتير وبحب السفر والتنقل والاختلاط بالثقافات المختلفة ومعرفة الناس.. يبقى آخرتي أني أقعد في البيت أرتب وأنظفه وأطبخ رغم أن ده مش هياخد من اليوم أكتر من ساعة ومش هزعل لو عملته..

بس يا ماما ويا بابا أنا عرفة أنكم بتحبوني قوي بس دلوقتي محدش لاقي شغل ولاد أو بنات وأنا الحمد لله بشتغل مع ناس كويسة وأنا اكمني محجبة بيبقى صعب عليا ألاقي مكان ليا في الميديا..

طب أنا تعبت نفسي ليه وذاكرت ليه..ربيته فيا الطموح ليه؟

ربتوني على أني أقول رأي ليه؟

أزاي تربوني كده وتطلبوا مني أكون واحدة تانية عشان الجيران ميشفنيش راجعة متأخر..

قولوا لي يا جماعة اسيب الشغل وأبر أبويا وأمي؟؟

ولا اسيب البيت واستقل بحياتي يمكن يضايقوا شوية بس بعدين هيصلحوني؟؟

ولا أجوز أول واحد يدق الباب بصرف النظر أنا عاوزاه ولا لأ عشان أنطلق؟؟

33e1

مشكلتك مشكلة جيل من الاباء للاسف اتربوا على كدة

أرسل هذا التعليق بواسطة : احمدابوصالح(صحفى)

مشكلة شغل الاعلام انة بيطلب الشغل احيان كتيرة ليلا ومش مهم الوقت بس للاسف العادات والتقاليد عندنا ان البنت عيب تتاخر عشان الجيران يقولوا اية وكمان الذائاب الجائعة الموجودة فى الشوارع وحاجات كدة كتير

فالحل فى وجهة نظرى المتواضعة هو الشغل نهارا فقط زى مثلا صحفيات الجرائد القومية او حتى الحزبية وبلاش يكون فى الاعلام والتلفزيون بكدة تكون حققتى رغبت ومضاقتيش العائلة ... هو دة العندى من حل وربنا يوفقك ويوفق الجميع

يا محترم لنا تقاليد من زمان

أرسل هذا التعليق بواسطة : واحد من الشارع

الاب والام لا يتكلموا من فراغ

تلك عادات شعبنا ورثناة ابا عن جد

البنت لها حدود والست لها حدود والرجل لة حدود

اعرف طبيبة ماهرة جدا وتخطت الخمسين ولم يتقدم لها احد رغم انها ذات جمال لانها فضلت النجاح فى العمل والسهر فى العيادة حتى منتصف الليل

عملت فلوس اة - حققت ذاتها نعم - بنت عمارة نعم

ولكنها لم تسمع كلمة ماما من طفلة او طفل لها

لنا عادات يجب احترامها

ومن يخرج عتها لايلوم الا نفسة بعد فوات قطار العمر

سيبى الشغل وبرى ابوكى وامك وإن شاء الله ربنا هيرزقك انتى وابوكى وامك ويبعتلك ابن الحلال اللى يخليكى تنطلقى فى عبادة ربنا احسن من الاعلام ويعنى مهواش يعنى مجال محترم يتزعل عليا ده مجال مشبوة وكل الناس عارفة كده وانتى من اولهم طبعا استعينى بالله وصلى صلواتك واحفظى نفسك اخوكى فى الله ومخلص والله

لا تيأسى

نفس مشكلتى و نفس حيرتى

اهلك عندهم حق لان فعلا الذئاب اللى ببتريقوا عليهم موجودين

و ف نفس الوقت الاخ اللى بيقول انه مش مجال عدل اوى و تسبيه احسن .... بالعكس ........ انتى ع ثغر من ثغور الاسلام و لا يخفى ع عاقل قدر الاعلام الان و انه سلاح قوى و مؤثر لقوة او ضعف الحق و الاسلام

اعتقد انك تستمرى ف مجال الاعلام و الميديا اللى يحقق طموحك و ف نفس الوقت تحسى انك بتتعبى من اجل شىء مفيد لدينك اللى بيهاجم دلوقتى بشراسة

فيه القنوات الاسلامية زى الرسالة و اقرا و مكاتبهم هنا ف القاهره و ممكن تتوصلى ليهم و تحاولى تلاقى فرصة مناسبة و العمل هناك اكيد هيراعى ظروفك كبنت مسلمة طموحة

ربنا يوفقك يا رب و صدقينى لو اهلك حسوا انك بتعملى شىء مفيد اوى هما اللى هيشجعوكى

لا تيأسى و جددى هدفك و نيتك و طموحك لله

اسمعى كلامى ومدوريش بعديه

أرسل هذا التعليق بواسطة : سما

بصراحه مشكلتك دى شايفه ان حلها بسيط جدا وهو انك تستمرى فى تحقيق طموحك ومتسمعيش كلام حد يقولك بن الحلال ومش ابن الحلال والا مكنتيش اتعلمتى من الاساس وقعدتى فى بيتك وكان جالك برده بن الاحلال

يبنتى احنا فى مجتمع زباله بجد اه والله زباله فعلا ومتعرفيش ترضى الناس ازاى وبعدين سواء سيبتى شغلك او مسيبتهوش الناس بتتكلم لا يبقي متسمعيش كلام حد وتجاهلى اى كلام تسمعيه من بره واجري ورا طموحك وسدقينى هو الى هينجحك وهيخلى الكل يجري وراكى ويحترمك الزمن دا بقى زمن كدا البنت لازم تتحدى علشان تعيش ابعدى عن الياس والانكسار الى هيضيعك وفى نفس الوقت حاولى تقنعى اهلك وقوليلهم دا شغل انا مش قاعده بتفسح او بشتغل فى كباريه دا مجال محترم ولازم تعرفوا كدا واهم حاجه اقولها دلوقتى متسمعيش لكلام الجيران ولا مش جيران سيبك كل دا كلام فاضى والله

ليــــــــــه؟

أرسل هذا التعليق بواسطة : just a person

ميريهان

أوَ نحاسبهم على خوفهم علبنا

أوَ نتذمر من قلقهم

أوَ نقول ما بالهم بنا وماذا يشغلهم؟

طريقة تفكيرهم غيرنا ...................................... نعم

تعليمهم قديم................................................نعم

جيلهم مختلف ...............................................نعم

ولكنهم أولا وأخيرا ...... أبائـــــــــــــــــــــــــــــــــــــــــــــــــــــــــــــــــــــــــــــــــــــــنا