سكان الخيام.. اللحمة يوم 5

على أطراف مدينة المحلة الكبرى وفي واحدة من أهم مناطق المدينة الصناعية الكبرى وهي منطقة السوق، انتصبت مجموعة من الخيام، إذا ذهبت إلى هناك ستلاحقك عيون ارتسمت في وجوه شاحبة، ذنبها الوحيد هو الفقر، أقاموا خيامهم في هذه المنطقة بعد أن كانوا يقيمون في شقق سكنية بالكاد توفر لهم حياة إنسانية، إلا أن خطأ مهندس وارتشاء سلطة في منطقة ما ينتج عنه في النهاية انهيار عمارة أو إزالتها، وبعدها تسلم حكومتنا "المباركة" كل الأسر للخيام..

ذهبنا إلى سكان الخيام في اليوم الأول من رمضان، وتناولنا الإفطار معهم، فكانت تلك هي وجباتهم..

لا نستعد لرمضان

علي محمد أحمد الجلاد، أحد سكان الخيام، وعامل على سيارة نقل، إلا أنه لا يعمل حاليا بسبب مرض زوجته الذي يجبره على البقاء مع أسرته في الخيمة خوفا على أبنائه عباس (7 سنوات) وعليه (5 سنوات).

يقول لنا عن مائدة إفطاره التي لم تتعد المكرونة والسلطة: "نحن لا نستعد لرمضان، لأننا ليس لدينا المال الكافي لهذا الاستعداد، كل ما نأكله في رمضان هو من باب الله، ولا نعرف ماذا سنأكل إلا قبل الإفطار بقليل".

يضيف: "لا نرى اللحمة سوى في رمضان من خلال المساعدات، لأن كيلو اللحمة بأكثر من 30 جنيه، ولذلك فإننا ننتظر حتى يساعدنا الله من خلال أحد الناس الطيبين، ولكن حتى الآن لا نعرف متى سنرى اللحم في هذا الشهر".

اللحمة في الجمعية

بعد عدة أمتار وجدنا "الطاهرة حسن يوسف" تفترش الأرض بجوار إحدى الخيام مع ابنها وبنتها وزوج بنتها، وأمامهم وجبة إفطارهم في اليوم الأول من رمضان والتي احتوت على باذنجان وأرز فقط، تقول الطاهرة: "معاشي 70 جنية ولا أستطيع شراء ياميش ولا حتى كيلو لحمة، بنشرب الشاي أو العرق سوس أو التمر هندي بدلا من الياميش اللي مبقناش نعرف حتى شكله..، يوجد إحدى الجمعيات الخيرية توزع كيس فيه مواد غذائية في رمضان، وعندما سألناهم على اللحمة طلبوا منا الذهاب إلى مقر الجمعية يوم 5 رمضان".

أخرتها الموت

أما نادية محمد، فتقيم في خيمتها مع ابنتها المطلقة منذ 6 سنوات، لا تزد وجبة إفطارهما عن طبق من الباذنجان والأرز، تقول نادية: "لا يوجد عندي ما أطبخه، عادة ما أفطر في مائدة الرحمن أو أدخل المقابر فيعطيني أي أحد أي شيء آكله، مفيش مساعدات زي زمان، لا لحمة ولا فراخ، لو محدش ساعدنا ناكل أي شيء، ولو حتى عود جرجير.. أهي لقمة وأخرتها الموت"!.

الياميش طعمه غريب

على الله إبراهيم عثمان، يقيم في خيمته مع زوجته وأطفاله الستة، افترشوا جميعهم الأرض حول 3 أطباق أرز وبطاطس وقطعة لحم واحدة، يقول: "في رمضان فيه واحد طيب بيبعت لينا كل يوم أكل عبارة عن طبق رز فيه قطعة من اللحم وبطاطس، وإذا لم يحدث ذلك، نشتري بجنية عيش ونأكله مع الجبنة، لأن في واحد طيب ساعدنا بعلبة جبنة".

يضيف: "لا نأكل اللحم ولا الياميش ولا القطايف، لا نأكل هذه الأشياء، أشتري بجنية تمر هندي كل عيل شوية وخلاص، لأن الياميش طعمه غريب لأننا مش متعودين عليه، أما الذين يأكلون مثل هذه الأشياء فلا نريد التفكير فيهم، أو حتى النظر إليهم حتى لا نحزن، ولادي مرة كانوا بيتفرجوا على تليفزيون وشافوا فيلم الناس بتاكل بط وفراخ، رجعوا قالوا لي شوف ولاد الكلب بياكلوا بط وفراخ قد أيه"!!.

3a38

عفريته هانم

أرسل هذا التعليق بواسطة : عفريته

الله عليك ا استاذ احمد الموضوع بجد قوي والقضية المطروحه اقوى فعلا ما ذنب هؤلاء الغلابة في ما يحدث لهم؟

علامات استفهام ضلت طريقها في البحث عن اجابة لها

مين بياكل اللحمة

أرسل هذا التعليق بواسطة : عابر سبيل

الراجل البخيل اللى رصيدة فى البنك الشىء الفلانى وقاعد بيصيف فى خيمة يعنى عامل camping وبيدعى انة مش لاقى اللحمة

اللحمة مغرقة البلد والناس محتارة تاكلها ازاى - دا احنا من كترها عندنا بنصدرها لاستراليا

ناس كدابة وبتروج اشاعات ولازم يتحاسبوا

كل مواطن عندنا عندة فيلا ويخت وسيارة دفع رباعى والكداب يروج اشاعات انة ما بيكلش لحمة

المصانع واقفة ومش لاقيين ولا واحد يشتغل عندنا عجز فى العمالة وبنفكر نجيب عمال من هنولولو يشتغلوا عندنا

اية الهنا اللى احنا فية

ربنا يزيد ويبارك

ومبارك عليكم الشهر الفضيل

موضوع اكتر من رائع

أرسل هذا التعليق بواسطة : إيمان كمال

على أد ما الموضوع حلو ورائع ولكنه بيوجع جدا ازاى دول عايشين كده واحنا بيكون عندنا الاكل والشرب بزياده وبنكون حاسين كمان أنه مش كفايه ده غير الناس اللى بتعمل عزومات وتنوع فى الاكل زى مسرحيه عادل امام الواد سيد الشغال لما قال الناس اللى عندها لحمه وبتعزم ناس عندها لحمه برضه ده حقيقه لكن دول عشان غلابه منسيين اصلا وممكن نتعاطف معاهم ولكن التعاطف مش هيغير من الاوضاع ده

المهم ياريت يا احمد تكتر موضوعاتك جدا لانها من اكتر الموضوعات فى الموقع جديه وبتكون هامه وبتمس العقل والقلب

ربنا يرحمنا ويرحمهم

أرسل هذا التعليق بواسطة : محمد عبد العاطي

واقع مؤسف واصعب حاجة فيه انه مش فيلم ولا مسلسل لا الناس اللي مش لاقية تاكل دي واقع .. الناس اللي بشر زيهم زينا

موضوع عالي أوي يا بلال ومؤلم أوي

مشفتش الكلام ده

أرسل هذا التعليق بواسطة : sameh

انا من مدينة المحلة الكبرى وعارف المنطقة اللى انتو رحتوها وعاوز أعرف الكاتب وأفهمه ان الناس اللى عايشة فى المنطقة دى هيا اللى عملت فى نفسها كدا

كل واحد من الناس دى كان واخد شقة فى المساكن اللى ورا الخيم دى علطول وكلهم باعو شققهم وعملو الاكشاك والخيم دى

الخيم دى فى أجمد منطقة فى السوف يعنى لو كل واحد منهم أجر بس المكان اللى قدامة يوم السوق هيجب كيلو لحمة بعنى يجيب فى الاسبوع 2 كيلو لحمة

حضرتك رحت وسألت الناس والناس ردت عليك بكدب لأنهم مش كدا زى ما بيتكلمو هما اللى عاوزين يعيشو كدا

من المحلة يا سامح

أرسل هذا التعليق بواسطة : جندل

على فكرة احمد بلال من المحلة عاش وولد وترعرع فيها