الثورة الأتوبيسية

لم أكن ادري ان ركوبي الإعتيادي للأتوبيس أثناء عودتي من العمل قد يتحول إلى تجربة مصغرة للثورة في المجتمع المصري ( من وجهة نظري طبعا )، فعندما ركبت الأتوبيس الذي اركبه يومياً فأدفع نصف جنيه فقط لأنني انزل قبل نصف المسافة، فوجئت بالكمسري يطالبني بجنيهاً كاملاً بحجة أن التذكرة موحدة ، الغريب أنني اركب هذا الأتوبيس يومياً واعرف جيدا أن قيمة التذكرة هي نصف جنيه ، وهي قيمة ما دفعته بالأمس لا منذ عام او عامين.

أدركت ان هذا الكمسري يقطع للناس من التذكرة التي قيمتها جنيه، كي يتضاعف إيراده فيحصل على نسبة أكبر بالطبع لأن كل كمسري له نسبة على التذاكر، بكل هدوء رفضت قائلاً له انا ادفع كل يوم تذكرة بنصف جنيه ، معلهش مش حأدفع الجنيه أعطاني النصف جنيه وقال لي : خلاص انزل وخد الأتوبيس اللي بتدفع فيه نصف جنيه الأتوبيس ده بجنيه.

قلت له : لأ انا مش حدفع غير نص جنيه في الأتوبيس ده ، حتقطع لي تذكرة من ام نص جنيه او اتخذ ضدي الإجراء اللي بتتخذوه، قالي خلاص مش عايز تدفع ما تدفعش ، بالفعل وقفت قريباًً منه حتى لا يتخيل انني هربت منه بل وقفت بجواره متأهباً للمواجهة.

ظلت مناوشات بيني وبينه طوال الطريق من نوعية ، ادفع يا أستاذ ، وانا لأ مش حدفع غير نصف جنيه ، انا ممكن اسلمك في القسم ، طيب مفيش مشاكل يا ريت نطلع على القسم وكل واحد ياخد حقه.

وهنا بدأت المشاركة الجماهيرية ، لكن المشاركة الجماهيرية لم تكن في مصلحتي ، لكنها كانت في مصلحة الكمسري ، احد الركاب قال لي ان هذا الأتوبيس بجنيه لكنني أكدت له اني راكب هذا الأتوبيس امبارح بنصف جنيه ، فإذا به يقول اكيد اتوبيس رقم 251 ، قلت له حضرتك انا مش مسطول علشان ما ابقاش عارف انا راكب ايه ، ظل يردد بطريقة شبه هستيرية ده 251 ، وكلما حاولت اتكلم اجده يقاطعني ده 251 ، فتركته.

الحاجات الطيبات طبعا تدخلن مؤكدين إن الأتوبيس ابو نص جنيه التاني بتاع الحكومة، اكدت لهؤلاء الحاجات إن الأتوبيس التاني بتاع الحكومة بربع جنيه يا حاجة وده برده اتوبيس حكومة بس الحكومة بتنصب علينا والكمسري برده بينصب علينا.

بدأت المشادات تحمى بيني وبين الركاب عندما قال احد الركاب انا لو مكانك وحد ما رضاش يدفع التذكرة انزله ، قلت له وانت مالك انت مش راكب زيي زيك خليك في حالك ، فإذا به يقول بكل بجاحة انا بقول رأيي، تعصب راكب آخر وقال لي : - يعني هو حينصب عليك، الكمسري الصامت مستمتعا بتدخل الناس قال له: - انصب عليه ليه يا حاج ده انا موظف يعني مش بحطهم في جيبي، ساعتها قلت له : - لأ انت بتاخد نسبة على التذاكر بيدخل جيبك فمن مصلحتك تكتر التذاكر، ثار ثائر قائلاً : وأنت مالك حتبص له في رزقه، قلت له : لأ مش ببص لحد في رزقه لكن هو بياكل من رزقي انا، بياخد من عرقي وشقايا ويحط في جيبه.

في هذه المرحلة كنت قد بدأت احس بالضيق، وانا اسمع الناس هي التي تقنن للسرقة والنصب عليه، وان في هذا الشعب ملايين هي مستعدة لتكريس الظلمة والنصابين.

كانت محطتي قد اقتربت اخرجت جنيهاً واعطيته له وقلت له :

صدقني حأشتكيك في الهيئة ومش حسيبك ، بسخرية أملاني رقم الأتوبيس ، نزلت في محطتي واثناء مشيي إلى منزلي ادركت تماماً أن هذا الشعب قد ربي على السكوت حتى ضجر من السكوت فلما جاء الوقت الذي اصبح الكل يتكلم فيه تكلم هذا الشعب ، لكنه يا ريته سكت، وان في هذا الشعب ملايين هي مستعدة لتكريس الظلمة والنصابين ، وان الكثيرين من ابناء هذا الشعب هم مستعدين تماماً لأن يطاطوا امام كل من يجلس على كرسي حتى لو كان كرسي الكمسري او كرسي سائق الميكروباص.

أخذت استعيد ذكريات من هذه النوعية في ذاكرتي ، اكتشفت انني مررت بهذا الموقف كثيراً، ادركت انه لا احد مستعد لإسكات الظالم بينما هناك الملايين هي مستعدة لأخراس المظلوم.

عدت إلى بيتي ضحكت من تجربة الثورة الفاشلة ، أدركت ان من استحق شيئاً استحقه عن جدارة ، فالشعوب التي استحقت الحرية استحقتها عن جدارة ، والشعوب التي استحقت الظلم والقهر استحقته عن جدارة أيضا، كمثل زميل ثائر سابق تعرفونه جيداً عدت إلى بيتي وانا اردد .. مفيش فايدة

2f96

غطينى وصوتى

أرسل هذا التعليق بواسطة : مفيش فايدة

تجربة تجزم انهم مهيئون للضرب بالجزم

أرسل هذا التعليق بواسطة : مهاب

انا كنت بدفع مخالفات المرور اللى بتيجى على العربيه وانافى اغالب معفش عنها حاجه لقيت امام شباك الخزينة كل واحد مطلع جنيه فوق قيمه المخالفه واى حد يسأل عن السبب يقول اللى بعده وعلى فكره انا الوحيد اللى سألت و فعلا الناس وقفت مع الصراف مش معايا مع انه بيسرقهم ولماتقصيت عن الحكايه عرفت ان قيمه الحيله اليوميه فى حدود300 جنيه حقيقى الشعب ده يموت فى اللى يسرقه فى مقوله بتقول لبنان اللى محليها اهلها وانا بقول مصر اللى موحشها برضه اهلها اللى ملهموش علاقه بالمصريين الحقيقين اللى بنقرأه عليهم فى الكتب صحيح نظام خاى الناس تستعزب الزل و المهاتة 0

اكثر من رائع

أرسل هذا التعليق بواسطة : ريما

فعلا مقال اكثر من رائع... و لفت انتباهي اني انا من هدول الناس... يعني انا ديما بستحي اجادل بالفلوس مع اني احيانا بكون عارفة انوعم بينصب علي... لاني كنت بستحي .. بس هلا انتبهت اني بطريقة غير مقصودة عم بشجع النصب.. يعني الموضوع مش شغلة مصاري ازيادة بدفعهم و خلص... بس من هلا بوعد نفسي ما اسكت على حقي..

و شكر