دواعي أمنية في قسم العمرانية..!

عجوز يعبر بوابة المترو الالكترونية ويهم إلى الباب الزجاجي الذي يعرف طريقه يوميا ليجد شخص ضخم ومفتول العضلات يخبره بأن يمر من الخلف فالباب مغلق لـ"دواعي أمنية"...

سيدة تحمل طفل صغير تسرع إلى الباب لتجد صاحبنا المفتول يقف أمامها يسد عين الشمس ليخبرها إن عليها أن تأخذ الطريق الآخر ولا تكلف خاطرها لتسأل عن السبب بل تنصرف وهي تردد "حسبي الله ونعم الوكيل.."

تابعت ما حدث عن قرب قبل أن أنصاع إلى أمر السيد الأمين لتنفيذ دواعيه الأمنية فأذهب إلى الناحية التي يذهب إليها الجميع حتى دون أن يعرفوا إلى أين تؤدي بهم، لأجد الطريق طويل وسلالم بعدها سلالم..

فقررت العودة إلى الأمين لأسأله عن الطريق والسبب فصاح بحدة:" ما قلنا دواعي أمنيه والطريق اللي الناس ماشية فيه روحي وراهم".

تركته دون أن اعرف ماذا أفعل وذهبت إلى حيث تريد تلك الدواعي الأمنية وأنا في قمة الغضب والشعور بالضعف أمام هذه الدولة البوليسية...

ذهبت لأصعد أكبر سلم يمكنك تخيله فهو عبارة عن 3 سلالم في بعض لأجد نفسي على نفس الكوبري بفارق 10 سنتيمرات فقط عن شباك التذاكر الذي يقع داخل المحطة وهي المسافة التي تمثل سمك باب المترو الذي أغلقته الدواعي الأمنية..

ماقلنا دواعي أمنية

شعرت بالاهانة الشديدة والغضب لأن هناك من أراد أن يفرض على رؤيته ودواعيه دون سبب واضح وحتى بلا هدف فما الذي استفاده من غلق الباب وجعل الناس تطلع سلالم وتنزل سلالم وفي النهاية تصل إلى نفس المكان...

وصلت للمكان الذي سأركب منه الميكروباص بعد اللفة الطويلة ووجدت ثلاث بشوات أحدهم يحمل على كتفه 3 نجوم ونسر واثنين كل منهما يحمل ثلاث شرائط حمر...فقلت الحمد لله أكيد الضابط ده يعرف..

المهم رميت السلام على البشوات ونظرت إلى الباشا أبو نجوم ونسر ودار بيننا الحوار التالي :

أنا: من فضلك ممكن اعرف ليه قافيلن باب المترو؟

الضابط: دواعي أمنية يا آنسة(مع أني حامل في الشهر السابع)

أنا: حضرتك بعد إذنك ايه هي الدواعي الأمنية اللي تخلي الشرطة تجبر المواطنين انهم يطلعوا سلالم وينزلوا سلالم عشان في الآخر نيجي عند نفس الباب ...؟

الضابط: انا قلت لك دواعي أمنية أمن يعني والمهم إننا عارفين شغلنا.

أنا:طيب من فضلك أنا محتاجة أفهم هل هي دواعي أمنية فردية ولا أمن دولة ولا إيه بالظبط وليه كل العساكر دي والهرم مفيهوش أي حاجة تستدعي وجودهم؟

الضابط ينظر بضيق ونفاذ صبر:على فكرة أنا معنديش كلام تاني وقلت لك اللي عندي

قال كده وطبعا لسان حاله وعينيه بيقولوا لي هه هاتمشي ولا نوريكي الدواعي الأمنية عامله أزاي

قتيل...مظاهرة..طوارئ

انسحبت بعد أن تأكدت أنني لن اعرف منه أكثر مما قال لأجد عامل الأمن في مركز للأدوات الالكترونية.. رايته يتحدث إلى الباشا ويعزم عليه بالشاي فقلت أكيد هيقول لي المفيد.. فنظر لي وقال بصوت هامس:"فيه دربكة جامدة وشغب والباشا الحكمدار ومدير أمن الجيزة والدنيا مقلوبة في القسم" ونظر حوله فرأى شخص في ملابس مدنية فقال لي وأنا اعرف منين فيه إيه إسألي الباشا يقول لك..

ونظرت حولي لاكتشف إن المكان كله ملغم بمخبرين في ملابس مدنية تعرفهم من وقفتهم ونظرتهم، الآن اتضحت الصورة بالتأكيد هناك حدث كبير وإلا ماذا يحدث هنا قلتها لنفسي ركبت الميكروباص وقررت أن أسأل السائق، فهو بالتأكيد يعرف ما يحدث لأنه هنا من الصبح رايح جاي ع الطريق، وسألته واتضح إنه لا يدري بوجود العساكر من الأصل وعندما علم اتخذ طريقا داخليا وترك الطريق الرئيسي..

تبرع أحد الركاب وهو شاب في منتصف العشرينات من عمره قائلا:"فيه مظاهرات عند قسم العمرانية عشان أهل الشاب اللي مات في القسم من كم يوم، أهله عاملين مظاهرة وبيهددوا بحرق القسم والبنزينة اللي جنبه وطبعا الدنيا اتقلبت عشان القسم"..

ويكمل:"وعلى فكرة العساكر دول مش هنا بس دول من عند فندق الفورسيزون وأنت جاية من الدقي على الهرم ولحد الطالبية، وعربيات أمن مركزي تكفي بلد بحالها، وأي حد ماشي في الشارع يسألوه رايح فين وجاي منين، وأنا لسه جاي من هنا وقالوا لي ارجع أحسن".

تعذيب التكتك

في الطريق ظلت سيارات الأمن المركزي موجودة والعساكر من المترو إلى الطالبية وبالتحديد عند سينما رادوبيس الصيفي التي أغلقت وأطفئت أنوارها واتخذت سيارات الأمن المركزي منها موقف لها والعساكر على الجانبين...

نزلت من الميكروباص لاستقل آخر (وفقا لنظام تقسيم الشارع لمحطات)وسألت السائق الجديد عما حدث فرد علي بعد نظرة طويلة: أصل فيه مظاهرات عند القسم عشان التوك توك"

أنا : توك توك ازاي يعني بقى أنت عايز تقنعني إن الداخلية مقلوبة وضباط ونسور ونجوم كل ده عشان توك توك

السواق:أنت مش مصدقاني بصي يا انسة أصله مش توك توك واحد دول 8000 توك توك من الطالبية والعمرانية وأصحاب التكاتك وأهاليهم واقفين عند القسم وعاميلن مظاهرة من المغرب لأنهم عايزين التوك توك.. شوفي كم عيلة بقى أتوقف حاله،ا وهو بقالهم 3 أيام بيلموا فيهم"

كفاية دواعي

موقع كفاية خبر بتاريخ الخميس 15/11/2007 يدعو المواطنين إلى التظاهر أمام قسم العمرانية الذي راح فيه ضحيتين خلال ثلاثة أشهر فقط في تمام الساعة السادسة الى السابعة.

وعلى مدونة مابدا لي لصاحبها عمرو عزت تدوينة بعنوان "العمرانية ليه؟" ولينك يدخلك مباشرة على موقع البديل لتجد تحقيق صحفي يحكي عن تفاصيل ثماني جرائم قتل تمت بداخل قسم العمرانية خلال سبع سنوات فقط هي عمر القسم الذي يصفه محرر البديل بالحديث نسبيا

خبر عاجل بالمحمول : تم اختطاف د.ليلي سويف الناشطة بحركة كفاية و المنظمات الحقوقية و زوجة الأستاذ أحمد سيف الإسلام مدير مركز هشام مبارك لحقوق الإنسان و ذلك أثناء الإعداد لوقفة مصريون ضد التعذيب أمام قسم العمرانية بسيارة ميكروباص و رقم السيارة 413705 أجرة الجيزة واتجهت بها إلي ميدان الجيزة و نظرا للحشود الأمنية الكثيفة حول القسم ستلغي الوقفة الاحتجاجية

مظاهرة من أجل الميت، مظاهرة عشان التوك توك، مظاهرة للمعارضة ضد التعذيب، كلها أسباب تبدو واقعية ولكن أي منهم هو الحقيقة؟

ومن المسئول عن هذا التخبط ؟ ولماذا لا تخبرنا الشرطة بدواعيها الأمنية التي تدافع عنها بكل عزيز وغالي، دون أن تكلف خاطرها حتى أن تخبرنا نحن عن "أمنية" واحدة من أمانينا البسيطة مثل ركوب الميكروباص أو فهم ما يحدث أو حتى الدخول إلى قسم العمرانية دون الخروج جثة هامدة...

4d71

نو كومنط

أرسل هذا التعليق بواسطة : مش هأقول لدواعي أمنية!

حاجة غبية جدا من دولة أغبى

دولة بنت....

أرسل هذا التعليق بواسطة : سالم طه

والله العظيم انت شجاعة ولو كم واحد عملوا زيك كده وسالوا عن حقهم وبطلوا خوف الدنيا هتتظبط والبني ادمين دول هيعرفوا انهم بيحكموا بني ادكمين مش حيوانات يشارورا لهم يمشوا ويترعبوا من اقل عسكري

ي دولة بوليسية ومحتاجة تتعامل مع مجرمين مش مع مصريين غلابة

خللي بالك م العيال يا دعاء

أرسل هذا التعليق بواسطة : أحمد محمد علي

خللي بالك م العيال يا دعاء انت في السابع، وعاوزين نشوف براء وهو أب، الله يسترك يا شيخة

وبعدين قالك دواعي أمنية، حبكت يعني تنط الصحفية من دماغك وتعمل تحقيق، وبعدين المشئ والسلالم بالنسبة لك مفيدة الأيام دي، ويمكن لو جه ولد سميه عمران تيمناً بالقسم الكريم بتع العمرانية، بس الحقيقة لو ربنا رزقكم ببنت مش عارف تسموها إيه، أو سموها عمرانية .. صحيح شقاوة شعب

قوات تسد عين الشمس على خساب صاحب المخل

أرسل هذا التعليق بواسطة : سعيد الدمياطى

فى الدول اللى بيقولوا عليها دول - الشرطة بتحمى المظاهرات وبتمشى معاها تأمنها وتحرسها

انما الهمج اللى بياكلوا فى ميزانية محلولة هدفهم قمع الشعب

ويطلع ابو جاموس يقول لك الحفاظ على المكتسبات

زمان كان مخبر بيروح يقبض على واحد الشرطة عايزاة

دلوقتى بتتحرك كتيبة من الهمج ويسدوا الشوارع علشان يقبضوا على واحد علية مخالفة

كل دة ارهاب للناس

عملية تخويف

قوات ضخمة جدا لموضوع هايف جدا

الحكومة خلاص وقررت تربينا

أرسل هذا التعليق بواسطة : حسام علي

ياجماعة الموضوع فعلا اصبح مهزلة الظاهر الحكومة خدت قرار خلاص بمنع المظاهرات وتربية حركة كفابة من اول وجديد ، وعلى فكرة كل اللي كان بيصل عشان منع مظاهرة كفاية فعلا وقبضوا على ناس منهم ومحدش عارف راحوا فين اللي اتقبض عليهم

وكانها بتقول لنا بقى خلاص اللي فات مات والوقفات والمظاهرات كانت زمان يا حلوين دلوقتي المقشةوالامن المركزي واللي مش عاجبه يوح قسم العمرانية يتروق

احنا اصلنا شعب ...

يابنتي تقول لنا ازاي بس هو احنا بني ادمين زيهم، لو فاهمة كده تبقي غلطاة هم بيعاملونا زي الحيوانات روحوا كده نروح تعالوا كده نيجي، واصلا تلاقي مفيش حد سال غيرك لان الناس اتعلمت تخاف كويس وتطنش كل اللي بيحصل

قال الحكومة تقول لنا ليه بتعمل فينا كده ما تبقاش حكومة مصر العربية

ربنا يتوب علينا منهم مفيش غير حسبي الله ونعم الوكيل

واصبر على جار السو يايرحل يا تجيله رصاصة تخلصنا منه