بين كلمة المتهم والشهيد فرق

بين كلمة المتهم والشهيد فرق

من مدونة The Lost Princess

ضحكنا واتفائلنا كتير نيجي للجد بقي

أكيد في كتير سمعوا عن شخص اسمه السموره وان السموره ده تاجر حشيش وبانجو في بورسعيد في منطقتي الكويت والسلام وان الحكومة بعد بلاغات من الموطنين لمدة سنتين ماتحركتش غير لما المواطنين بعتوا البلاغات دي لوزارة الداخلية في القاهرة

و أخيرا البوليس اتحرك يوم الأحد اللي فات اللي حصل أن أثناء محاصرة قوات الأمن وأفراد من العمليات الخاصة للمكان عدي تاكسي من المنطقة التاكسي كان راكبه شاب عنده 26 سنة واسمه محمد حسن الزناتي وخاطب, ومحمد مكنش معاه فكه واخد 2 جنيه من واحد صاحبه ثمن المشوار, وقف له عم حسن محمود وده راجل كبير وعنده ابن متزوج وبنتين واحده فيهم مكتوب كتابها وولد تاني.

طبعا مكنش معروف ان المنطقه دي فيها كمين او ممنوع المرور منها واللي حصل ان السائق عدي من نفس الشارع المحاصر عشان يوصل محمد لبيته السائق فوجئ بقوات الأمن اللي محاصره المكان وبتطلب منه انه يقف الراجل اتخض واتلخبط ومبقاش عارف يعمل إيه وحاول انه يمشي بسرعه

الاجراء اللي المفروض قوات الأمن تاخده انها تطلق الرصاص علي كوتشات العربية عشان تمنعها من المشي، لكن اللي حصل انهم أطلقوا النار علي العربية واللي جواها وقتل السائق ومحمد بطلقة في الرأس.

طلقه في الرأس دي يا جماعة يعني اللي كان بيضرب كان بيضرب عشان يقتل مش عشان يوقف العربية، وفعلا فارق محمد وعم حسن الحياة، وطبعا مش محتاجين إني أقول أن الحكومة ماقبضتش علي سموره غير بعد الحادثه دي بخمس أيام.

يعني الناس اللي مالهمش ذنب اتقتلوا والمجرم الحقيقي قدر انه يهرب هو وأخوه وفضلت الحكومه تجري وراه وماقدرتش انها توصله غير لما بلغ عن مكانه احد الأشخاص اللي قدر انه يتعرف عليه.

نرجع لموضوع محمد وعم حسن, الحكومة نزلت بيان بأسماء أفراد العصابة اللي اتقتلوا وطبعا مش محتاجين إني اقول إن اسم محمد وعم حسن من ضمنهم، الحكومه في بيانها قالت إن التاكسي لما اقتحم المكان وطلبوا منه انه يقف, اطلق الرصاص علي البوليس والبوليس بادلهم إطلاق النار.

أصل القانون يمنع انك تطلق النار علي أعزل, وماينفعش إن ظابط أو عسكري يضرب رصاص لو اللي قدامه مبدأش بده أو علي الأقل أشهر السلاح في وضع لإطلاق النار

طبعا بردو محدش محتاج إني أقول إن كلام الشهود العيان بينفوا ده تماما وقالوا أن التاكسي ما أطلقش أي أعيرة ناريه, وبن عمة محمد قال انه يتحدي أي حد لو قاله إن ابن خاله كان بيشيل في جيبه قصافه مش مسدس, وعم حسن لو كان تابع تجار المخدرات مكنش هيتحكم عليه ب6 شهور في قضية شيك بدون رصيد من أقساط التاكسي اللي كان مصدر رزقه , واللي طبعا دلوقتي ماينفعش خالص من الرصاص اللي اضرب عليه.

مفيش حد مابيغلطش اه, واحنا مش ملايكه ومش معصومين من الخطأ محدش قال حاجه, لكن انك تضرب رصاص علي شخصين لا يحملون السلاح وضرب الرصاص يكون بغرض القتل فده مش خطأ, دي خطيئة..

انك لما تغلط في كارثة زي دي, بدل ما تعتذر تزور الحقايق وتزيفها, يبقي ده مش خطأ دي خطيئه ثانية. لما الحكومة تمارس الضغط علي عائلات الضحايا عشان يتدفنوا بالليل, يبقي ده مش خطأ دي خطيئة ثالثة..

أهالي الناس دي مش عايزين غير تبرئة أسمائهم , وان بدل اسم المتهم يتكتب قبل أسمائهم الشهيد أو المقتول خطأ.. في أم قلبها مليان حسره علي ابنها اللي اتقتل فبلاش نحرق قلبها بزياده ونقول علي ابنها اللي اتقتل ظلم انه تاجر مخدرات..

في بنت مكتوب كتابها مش عارفه مين اللي هيجوزها بعد مقتل أبوها, فبلاش نكون السبب في إن خطيبها يسيبها لأن أبوها كان ضمن العصابة.. حرام نقتلهم ظلم ونظلمهم بعد مايموتوا , مش هيبقوا اتظلموا وهم بيموتوا وبعد ما يموتوا كمان..

الأجل مكتوب وكل واحد مكتوب له هيموت امتي وفين ودي حاجه بتاعة ربنا لكن ده عمره ما يمنع ان الغلطان لازم يتحاسب ويدفع ثمن غلطته, وإننا لازم نعترف بالحقيقة ونبرأ اسم الناس دي

e6c3

أرسل هذا التعليق بواسطة : OMAR

المره دي اناهدعي لوحدي يارب خلصنا منه يارب 26 سنه يارب عمال يغرق في ناس ويحرق في ناس ويقتل في ناس من غير سبب يا رب دى عدى فرعون انت غرقت فرعون لما افتري بس دى احرقه

تفتكر لو كان السموره ده هو اللي جوه التاكسي كان ايه اللي حصل؟؟

أرسل هذا التعليق بواسطة : mostafa

تفتكر لو كان السموره ده هو اللي جوه التاكسي كان ايه اللي حصل؟؟

اكيد الرصاصه عمرها ما كانت هاتيجي في دماغه.... ليه؟؟؟؟؟

الحكومه ها تقولك اصله كان اعزل مع انه كان معاه سلاح فحبينا نضرب على الكاوتشات برضو خيشت....

علشان كده هرب ..... قدر الله وما شاء فعل...

ماهو عندنا في بلدنا دي كل حاجه ماشيه بالمشقلب........