قالوا عني (دسك مان)!
في هذا العام 2007.. قالوا عني (دسك مان).. ودي شغلتي في موقع عشرينات.. المسؤل عن قسم (الديسك)، وممكن تقولوا رئيسه لأن مفيش غيري فيه.. و(الدسك) للي ما يعرفش يعني أية دسك هو "المطبخ" الصحفي اللي لازم تمر عليه كل الموضوعات قبل ما تنزل أون لاين.. أعيد صياغتها وأصححها وأظبطها وأروقها وأهندسها.. وما أدراكم ما الدسك؟
الموضوعات في عشرينات 3 فئات، من الصحفيين اللي في المكتب زمايلي يعني، أو مراسلين جوه مصر، ومراسلين بره مصر.. يعني من الآخر مفيش حاجة بتفلت من تحت أيدي.. (قبل ما أنسى زميلتي "رضوة حسن" هي المسؤلة عن موضوعات السعودية).
2007.. عام كامل من الدسك، اليوم الواحد ممكن أدسكلي 4 موضوعات في المتوسط، عشرينات وولاد البلد، بتزيد في حالة الملفات والطوارئ، ويوم الخميس علشان بدسك فيه موضوعات الخميس والسبت كمان لأنه يوم أجازة.
بيحصل كتير "شد وجذب" خصوصا في موضوعات زمايلي العشريناتية، من أمثال: "محمد..أنت غيرت المقدمة ليه؟"، "فاروق – وده اسم الشهرة- أنا عنواني كان أفضل بكتييير"، "أنت غيرت اللي كنت كاتباه"، "حرام عليك يا مفتري تشيل فقرة كاملة من موضوعي"!! والجمل أصحابها غالبا هبة الله أحمد ومروة صلاح.
وقبل ما أشتغل في الموضوع – وخصوصا أن غالبية العاملين في عشرينات من البنات وأخص بالذكر دعاء الشامي ومنى سليم - الكلام ما بيخرجش عن: "محمد.. أنا لازم أروح بدري عندنا عزومة بص على موضوعي قوام قوام"!، "أنا عندي خروجه النهارده يعني خلص بسرعة لازم أرفع الموضوع قبل ما أمشي"!.
هموم الدسك والوطن
أما موضوعات المراسلين بقى، فيا سلام على الموضوعات اللي كلها "زُبد"، واللي حتخلي الواحد من سكان مستشفي العباسية قريب قوي، وخد عندك.. ُمراسلة من دولة عربية بتكتب عن المعاكسات، وتقريبا موضوع المعاكسة كان مزعلها شوية من الشباب، فكتبت ووصفتهم بـ "الكلاب النابحة والذئاب الجامحة"!!.
أما أطرف جملة قابلتها خلال 2007 فوردت في موضوع لمراسلة من مصر، فبعد أن انتهت من موضوعها أرادت أن تكتب خاتمة، فضربت بكل التقاليد الصحفية الأرض، وقالت: "والآن .. حبيبي القارئ"!!.
طبعا كل الكلام ده بـ" يتقص"، لأني طبعا لو سبته مش بعيد بكرة ألاقي حد كاتب "روحي قلبي القارئ"!!.
المراسلين في مصر، مسؤل عنهم أ. عبد الله الطحاوي، وده بقى حبيبي من أيام الجيزة.. قصدي مجلة (البداية).. وكل يوم فيه بنا مناوشات على الموضوعات، وكل شوية ينده عليا بصوت عالي لأنه حاطط السماعة على ودانه: "يا فاروق.. خلصت الموضوع"؟!.
أما بقى لو حصل غلطة في موضوع وعدت عليا – بتحصل كتير- آلاقي شيرين (مديرة التحرير) بتنده عليا من أوضتها وتقول بشوية جد: "فاروق.. تعالى هنا واقفل الباب وراك"، وانتوا عارفين الباقي!!.
هموم الدسك تشاركني فيها رضوة - وهي دفعتي في كلية الإعلام- وكل يوم فيه بنا حوارات وورشة عمل صحفية.."اية رأيك في العنوان ده.. ولا ده أحسن"، وهي برضه لما تحتاجني تنده عليا أروح أقعد على الكرسي الفاضي اللي جنبها - بنسميه "الشزلونج"- علشان أسترخي عليه وأفكر في عنوان يناسب موضوع من السعودية، ويا سلام بقى لو عزمتني على حاجة يطلع أحلى عنوان!.
أكتر ناس بتريحني في الدسك فهو أحمد الهواري، ، ومعاه علي عبد المنعم اللي كتير قوي بصعب عليه وبدعيله لما ياخد موضوع يدسكه بدالي (وعلى فكرة الاثنين أهلوية زيّي).
- ملحوظة: وأنا بكتب الموضوع ده، جت جنبي مروة وسألتني عن موضوع ليها، ولما قولتلها - في غلاسة معتادة بنا – "أنا شغال في موضوع ومش فاضي"، قالت: "عيني عليا مش لاقيه مُدسك"؟
* للعودة إلى صفحة الملف الرئيسية:
- يوم 32/12/2007!
aee1
الكينج
أرسل هذا التعليق بواسطة : دودو جارتك
ماااااااااااااشي يافاروق بقى انا برضه اللي بامشي عشان العزومات ولا الماسنجر اللي على طول مفتوح وعليه صور ...استغفر الله العظيم
انا قلت لك متخبطش في في مووضعك بس انت اضطريتني افشي اسرار جاري العزيز رغم محاولاتي الحثيثة على الحفاظ عليها بس يلا بقى انت اللي جبته لنفسك
هووووووووووس فاروق الكنج وصل، تحيتي له في الصباح لاتختلف عنها في المساء محمد هو جاري العزيز في المكتب والذي يقرر مزاج عشرينات طوال الاسبوع فالموضوعات تخرج من تحت يده كما قال ولكنه احيانا ياتي مقريف مش نايم كويس يقوم يعمل ايه بقى يشيل كده الكلام بالزوفة وياحظه الحلو لو محمد مبسوط وبيضحك ولو من غير سبب( وده شيء بيجنن استاذ عبد الله ويخليه يشد في شعره) بس في النهاية اليوم بيعدي
بصراحة بيتعب كثير وهو انسان مختلف تماما ولكنه تغير كثيرا فقد تلبسته روح عشرينات كما حدث مع مروة على راي شرين
محمد و الشازلونج
بجد كنت هزعل اوي يا محمد لو مكنتش جبت سيرة الشازلونج اللى بيطلع منه اجمل العناوين و انا و محمد على طول فى مراهنات العنوان ده هيجيب تعليقات من القراء و نجي الصبح نفاجئ بان الموضوع يا عين امة محدش عبره بجد اجتماعنا على الاشزلونج مرة يخيب و مرات بيصيب فالى احبائى القراء ارجو التعليقات على كل الموضوعات علشان تجبروا خاطرى انا و محمد او روقه كما القبه و طبعا هو عارف من روقة التي اقصدها
موضوع حلو بجد ، وفيه روح جميلة كلها حب وود بينكم وبين بعض ، والأكثر من كده هو الوحدة الا موجودة في عشرينات ، تحس انه انتو في دائرة واحدة ومينفعش حد يخرج منها ، بس بجد ديسك مان ، بس فيه سؤال مين الديسك بتاعك ، وما انت لازم تحتج وتلاقيلك ديسك اشمعني هما بقي ، اعمل ثورة انت وروضة وطالبو بديسك ههههههههه
بالتوفيييييييييييييييييييييييييييييييييييييييييييييق
مشروع صحفى كبير
أرسل هذا التعليق بواسطة : محمد عبد القادر
طول عمرى كنت حاسس انك مشروع لصحفى كويس ودايما كنت بستنى اقرأ موضوعاتك واشعارك من زمان من ايام السنوى . فاكر الايام الحلوة دى يا محمد. وبجد مش علشان صحبى انا بستمتع بكتاباته جدا ولسه يا فاروق كمل وان شاء الله هتبقى احسن واكبر لانى ملاحظ ان اسلوبك ومواضيعك فيها تطور جميل وتسلسل لصحفى كبير وربنا معاك ياعجم وابقى افتكرنا ياعم
موضوع جميل
أرسل هذا التعليق بواسطة : طارق ديلواني
موضوع جميل يا محمد لكن لم تقل رايك في موضوعات مراسلي الخارج يعني موضوعاتي مثلا!!!
عموما المعاناة الحقيقية لمحرري الديسك في الصحف اليومية ..و مع ذلك وارجو ان تحترم رايي فانا ارى ان تحرير المواد بشكلها النهائي في عشرينات في كثير منها ضعيف وبحاجة الى اعادة تحرير
يا أيها المبدع
أرسل هذا التعليق بواسطة : أحمد العمودي
ما عندي شي أقوله غير إلا أنك مبدع.. بالفعل مبدع..
بالتوفيق دوما أخي محمد
الى دودو جارتك
سخيفه
موسوعة (سخافات) لشريف الدواخلي
بعد اذنك يا شريف انا بجمع كل موضوعاتك وحعمل منها موسوعة حسميها سخافات لشريف الدواخلي