مترو مصر .. خربط خرابيط!

خط أحمر على كل أرصفة محطات المترو عند العربتان الرابعة والخامسة، اللتان أصبح مكتوبا عليهما "للسيدات فقط".

ومن أعلى تسمع: (أيها السادة المواطنون.. تم نقل عربتي السيدات في مترو الأنفاق إلى منتصف القطار.. الرجاء من الرجال الالتزام بالتعليمات وإلا تعرضوا للغرامة المالية).

بعد الاستفتاء

الأزمة في التغيير الذي حدث يوم الاثنين 7/1/2008، أن السيدات راحوا يركبوا أول عربيتين كالمعتاد، بس المرة دى كان السادة الرجال محتلين مكانهم.

القرار صدر الأسبوع الماضي، و"جاء بعد عدد من الاستفتاءات بين الركاب ورصد لسلوكهم، وتقارير الهيئة القومية للأنفاق، التي وصلت إلى أن تغيير عربتي السيدات من المقدمة إلى المنتصف أفضل"؛ حسب تصريحات سابقة للمهندس مجدي العزب، رئيس الشركة المصرية لتشغيل وإدارة مترو الأنفاق.

"عشرينات" حاولت التقاط طرائف قرار التغيير الذي وصفه البعض بالقرار السخيف، وآخرين وصفوه باللاشئ يعنى مش هيغير حاجة..

- "أنا متغاظة .. هما ليه بيغيروا العربيات .. هو كان حد اشتكى.. مش عايزين الرابعة والخامسة عايزين الأولى والثانية".. كانت صرخات لـ"فاطمة الزهراء محمد" من ركاب محطة الهرم.

- خناقة بين بنتين المفروض أنهم أصحاب واقفين أمام العربية الثانية:

• يلا نرجع

- خلاص نركب المرة دي

• لأ هنرجع

- المترو هيفوتنا ..

المترو قفل بابه ومشي.. والخناقة لسه شغالة!!.

- واحدة ست كبيرة في السن دخلت في العربية الأولى ولم تجد من الرجال من يقف لها، وواحد بيعلق وقال "يروحوا يركبوا عربيتهم".

- ناظر محطة حدائق المعادي واقف عند الخط الأحمر الجديد بيقول للرجالة اللي واقفة "يا تطلعوا العربيات اللي قدام يا ترجعوا العربيات اللي وراء.. محدش يقف قدام الخط الأحمر".

- خناقة بين ولاد وبنات في محطة دار السلام وكل واحد بيحاول يثبت أن دي عربيته.

- بين كل محطة ومحطة اللي واقفين جوه بيضحكوا على اللي واقفين بره!!.

- عامل النظافة في نقاش مع العسكري: "مبتقولش ليه للرجالة إن دى مش عربياتهم ولا إحنا هنشتغل بدل الشرطة كمان".

- بنات كتير في حالة استغراب شديد، لما دخلوا أول عربية ولاقوا الرجالة في وشهم!

- مجموعة بنات ركبوا في العربية الثانية – عربية السيدات سابقا – بيقولوا في غيظ: "الرجالة ما صدقت خدت عربية البنات".

- ضحكات البنات لسه شغالة وبيقولوا: "هو ايه اللى بيحصل .. الدنيا متلخبطة كده ليه؟".

وأنتم.. أخبرونا عما لاحظتموه في أول يوم بعد تغيير عربات السيدات؟

aa95

قرارات عشوائية

أرسل هذا التعليق بواسطة : عشوائى

مسئول المترو المحترم اخذ قرارة البطولى بنقل عربات الحريم بناءا على حادثة وقعت وراح فيها خسائر وضحايا وناس اتعورت وماتت

حيث انة لما كانت العربة الاولى والتانية للحريم كان بعض السائقين الفاسقين يتركون كرسى قيادة المترو ويبصبصون للبنات والحريمات ويتركون اشارات المرور وينظرون الى الكعوب والنهود ويسرحون فى ملك اللة مما ترتب عنة حوادث قاتلة

من اجل هذا ومن اجل عيونهم الزائغة قرر صاحب القرار وضع عربات فى النصف بعيد عن السائقين الفسقة وسترهم بعيدا

ونحن نحيى اريحتة وشهامتة

كما ان بعض الاطفال كانوا يتركون امهاتهم ويذهبوا لمكان السائق ويلعبوا مهة الكوتشينة

أرسل هذا التعليق بواسطة : عشوائية

يا سلالالالالالالالالالالالالام ..... هوه عشان السائقين فسقة وعنيهم زايغة ويدب فيهم رصاصة ... يبقى نشحتف الخلق ؟؟ طيب ازاى بقي ، طيب يعملوا بقى اختبار أخلاق وحسن سير وسلوك لسواقين المترو قبل ما يعينوهم ويشوفوهم عنيهم زايغة ولا لا ؟

دايما كده لما ما نعرفش نعالج المشكلة الأساسية نقوم نعالج المشاكل المترتبة علي المشكلة

وبعدين مين قال ان لما يبعدوا عربية السيدات عن السائق الاطفال هيبعدوا برضه ...ابدااااااا ، انا امبارح كنت راكبة العربية الاولي واتصمدت صحيح بس لقيتها فيها طفال برضه واشقيا جدا .

بس تعرفوا يا بنات جنسي كده احسن عشان لما يلبس المترو في المترو اللى قدامه نكون بعيد ، ولو يلبس المترو اللى ورانا في المترو اللي راكبين فيه يلبس في العربيات اللى ورا .. يعنى احنا بعيد ...خخخخخخخخخخخخخخخخ

يا مترو خليك حنين

أرسل هذا التعليق بواسطة : انا البرنس

المترو بتاع مصر ساعات بيمشى من غير فرامل - هو فية و احد فاضى يصلح الفرامل - وبيمشى احيانا بفضل بركة دعاء الوالدين والحريم الولايا اللى بيدعوا ان ربنا يستر

والمصيبة ان عدد عساكر الامن فى المحطات والمخبرين والامناء والسادة الضباط اكثر من عدد السواقين والميكانيكية وطواقم الاصلاح - وواقفين لا بيعملوا حاجة ولا محتاجة - بيبرقوا بغباء للى رايح واللى جاى وخصوصا لو كانت بنت حلوة

والاعطال على ودنة وقطارات بتتلغى وفى الصيف المكيفات خربانة

وبعدين عبدة بية مظهر اصدر فرمان موقع من ابو سلطانية بتغيير عربات الحريم لتكون فى النصف - طيب يا عبدة بية خليهم وراء خالص فى اخر القطار - يقول لك لا - لية - علشان نقرفهم شوية

فوضي

أرسل هذا التعليق بواسطة : إيمان نبيل

انا بقي هرصد من داخل عربه السيدات الجديده..قرات خبر نقل عبيه السيدات ..وبالتالي اول مره اركبه بعد التعديل بحثت عنها وسط العربياي اخيرا وجدتها ..ووجدت بجواري الساده الرجال قلت مش مشكله..اكيد لسه معوفوش..شويه ووجدت من يتحدث في الميكرفون السلام عليكم..قررت الهيئه نقل عربيه السيدات............ وعلي السادة الرجال مراعاه فروق العربيات والا تعرض للغرامه الماليه..

ربرغم ذلك لم يحرك ذلك البان احدا.

نظرت داخل العربات وهي مكتظه بالرجال وشويه بدا بعد الرجال يدركوا الحقيقه العجيبه..

وهم يتحدثون الي بعدهم هو العربيه كلها العربيات كلها بقت ستات ؟؟يعني اللي في النص واللي قدام..فرد الاخر وانا ايش عرفني شايفني انا اللي بسوق؟؟

بصراحه صعبوا عليا وكنت عايزه ابدد حيرتهم لكن قلت بعدين يعرفوا..

وشويه واحد بعد ما دخل وادرك انه وقع في عربه السيدات..بدات عليه علامات الخوف وكانه داخل عربه العفاريت..ومحتار يخرج يجري يمين ولا شمال..قلتله لا احنا في التانيه اجري شمال..

وواحده صحبتي قالت منهم لله هيجننو الناس(الرجال طبعا) الناس فعلا شكلهم مضحك ومبكي تخبط وتراشق بالالفاظ حتي وان امراه قالت دي عبت السيدات رد عليها رجل وقال انتي معقده؟؟

ةاخر طالب جويه يعلم من البدايه انها عربه السيدات..وبرغم ذلك اصر علي الركوب والجلوس وقال انا مش نازل ولما فشل زميله في اقناعه.وهم بانزول حلف ان هيقطع علاقته بيه لو نزل..

وانه مش نازل مهما حصل حتي لو دفعت الغرامه..

و الله حرااااااااااااااااااااااااااام

أرسل هذا التعليق بواسطة : ولاء

كل مسئول يفتكر اي حاجه يروح قايلها لنفسو ومنزل قرار بيها و احنا اللي نتعك فيها يبئا حرااااااااااااام و لا لأ و طبعا كان موقف بشع اول يوم نزلت فيي بعد القرار دا و المشاكل و الخناقات و الفكاهه اللي شوفتها اليوم دا خصوصا الصبح بدري و انا جايا الشغل و الرجاله اللي بيركبو عربية السيدات و السيدات اللي بتركب عربية الرجاله و اللي يشتم و اللي يغلس و اللي و اللي ............

اسئلة ذكاء من المسئولين للمواطنين

أرسل هذا التعليق بواسطة : عبير صلاح

الحقيقة مش عارفة ارد اقول اية ... دايماً المسئولين يحطو اسئلة صعبة علشان يشوفوا معدلات الذكاء وصلت لفين يعنى اية الحكمة من نقل العربيتين ومين المسئول يعنى قرار فردى ولا قرار مبنى على استقصاء من السيدات والبنات ومرتداين المترو لا اعتقد لانه لن يغير من سلوكيات المواطنين والمواطنات.. وبعدين دا محصلات طبيعية من اى مسئول مصرى يثبت انه عمل تطوير فى عهده حتى لو تطوير " اهوج " !! يعنى مش مهم يشغولوا المراوح والتكيفات فى عز الحر فى فصول الصيف مثلاً او يلزموا الناس بابواب الصعود وابواب النزول مثلا او يمنعوا الباعة الجائلين او المتسولين او يحسنوا الخدمة ويقللو التذكرة ....و اوو اووو .... آاااه لكن مهم جداً يحطو خطوط حمرا دايماً وابداً علشان نحل اسئلة الذكاء العالى بتاعت المسئولين ... ما شاء الله على ولاديك المسئولين النابغين فى حل المشاكل يا مصر

أرسل هذا التعليق بواسطة : د ميدو

لكن الاغرب من كده انك علشان تعد العربيات كان المترو مشى لكن الأول كان أول عربيتين للسيدات لكن دلوقتي الواحد يجيب المترو من أول ويبدأ العد علشان مايتلخبط أو على حد تعبيرك يا أستاذ خباب باشا و"يخربط خرابيط" يركب في العربتين الأولى والتانية بس ونخلى عم الحج اللي بنادى انه تم تحويل العربتين الرابعة والخامسة السيدات يقول أسهل "بما ان هناك زيادة مفرطة فى عدد السيدات المتذايد يوميا تم تخصيص العربتين الأولى والثانية للرجال فقط ومن يخالف هذا القرار سوف يتم تعريضه للمسألة القانونية "

سيادة اللواء بتاع البيادة رئيس المرفق

أرسل هذا التعليق بواسطة : بودى

ماهو رئيس المرفق سعادة لواء من الذين بيوظفوهم فى نهاية خدمتهم العسكرية لتخريب مرفق من المرافق المدنية-

الراجل طوال عمرة بتاع صفا وانتباة وللامام سر وللخلف در

مالهم ومال مرفق المياة والمواصلات والنقل ورؤساء الاحياء وحكام المدن

قلبوها معسكرات صحراوية باوامر غبية

خباب بن الارت

كان خباب من المهاجرين الأولين وكان ممن يعذب في الله عز وجل

انا اول ما فتحت على الموضوع شدني اسم حضرتك

اسم صحابي جليل

اكيد ابوك كان رجل صالح علشان خاطر كده سماك باجل صحابة رسول اله صلى الله عليه وسلم

ادعي لوالدك

المرررررج والاوبرااااااااااااااا

أرسل هذا التعليق بواسطة : انا

في كل الاحوال سواء كانت العربيات في النص او في الطرف برضو بنتفعص وبنتبهدل ..خاصة عربيات السيدات ..اي نعم سهلت عليا اني اركب على طول بدل مامشي كل يوم مسافة طويلة لكن برضو المترو صعب جدا ..واصعبهم اتجاه المرج اللي بحس انه من اسوء المتروهات اللي موجوده ..سواء من جوة المترو او بره او حتى في مواعيد الوصول ..وبقول مش ممكن كم الفلوس والاعداد المهولة دي مش قادرين بيها يعملو مترو نظيف ...واستغربت اكتر لما روحت مترو الاوبرا وشفت الفرق البشع اللي بينو وبين مترو المرج وحلوان ..حسيت انه حاجة غريبة حاته كان هيجيلي اختناق من كتر النظافة .........واكيد هو ده سبب عدم تطوير المترو اللي عندنا .........