بتحب مصر إمتى؟

إمتى أكتر مرة حبيت فيها مصر بجد؟.. وإنك فخور بانتمائك لها؟.. عُمرك حسيت إنك غيران عليها من حد قال في حقها كلمة مش كويسه؟

يمكن لما مشيت في مظاهرة، أو لما سمعت أغنية حلوة حركت مشاعرك تجاهها؟، ولا لما مشيت بين شوارعها ووسط ناسها أو على كورنيش نيلها.. ولا بيقتصر إحساسك بالحب ده في كره القدم بس؟!

أسئلة جاوب عليها شباب من أهلها..

مصر.. مصر

منار على، 20 سنة، تقول: "أكتر وقت بحب فيه مصر لما بقابل حد فخور إنه مصري، أو لما بقابل حد من بلد تانيه بيحب مصر ونفسه يكون مصري، وأخرها طبعا لما مصر خدت كأس الأمم الإفريقية، لما نزلنا الشارع بعد الماتش النهائي ولقيت أطفال صغيرين لا يتعدى عمرهم العشر سنوات راسمين على وجوههم علم مصر وبيهتفوا من قلوبهم وبيقولوا مصر..مصر، وقتها حسيت أني بجد بحبها".

أما هايدي عبد الرحمن، 18 سنة، فتقول: "لما مصر بتثبت أنها رائده في أي مجال من المجالات بحس أنى بحبها وفخور بها سواء كان المجال ده رياضة أو سياسة أو ثقافة أو فن، يعنى لما فتحنا معبر رفح للفلسطينيين حسيت إني فرحانة وفخورة بأني مصرية".

أما مينا سمير، مهندس، فقد استنكر سؤالنا بشدة قائلا: "أنا طول عمري بحبها وما حسيتش مرة إني بكرهها لأن الحب دايم مش متذبذب".

"مش فاكرة"

هند،18 سنة، لما سألناها إمتى أكتر مرة حبيتى فيها مصر؟ أجابت: "مش فاكرة.. وعمري ما حسيت بأني سعيدة بانتمائي ليها، ولا حتى بحس إني غيرانة عليها".

أحمد إبراهيم، 18 سنة، حَب مصر لما درس تاريخها في المدرسة، ولكن لما كبر عرف أن التاريخ مزور، يقول: "لما عرفت الحقيقة كرهت اللي كتب التاريخ على مزاجه، بس معرفتش أكرهها"!.

محمود أمين، 21 سنة، يقول: "حسيت إني بحبها فيه لما سبتها وسافرت السعودية وقضيت عيد الفطر والأضحى هناك، وإتاكدت أن العيد في أي مكان غير مصر مش عيد بالمرة لأني حسيت وقتها إني بحبها ومشتاق إليها ومقدرش أعيش في مكان تاني غيرها".

في الكورة بس

مهند، 24 سنة، يوضح: "أنا عمري ما كرهت مصر، أنا أشعر أحيانا أنها جزء مني لا يتجزأ ولا يصلح أن يتجزأ، ولكن بما إني شخص رياضي فأكثر وقت بحس إني بعشقها وقت الانتصارات الرياضية".

أما دعاء، 20 سنة، فتعترف: "إنني لا أشعر بالانتماء لمصر ولا أشعر بحبي لها إلا في مباريات كرة القدم، ولكن هذا ليس ذنبي فهو ذنب الحكومة والنظام.. أنا أشعر أن بداخل كل شخص مصري جرعة انتماء عظيمة ولكنه لا يعرف أزاي يعبر عنها، ومفيش منفذ ليها إلا الكورة، علشان كده إحنا ما بنصدق أن يتحقق أي إنجاز كروي حتى ننزل إلى الشوارع ونصرخ بأعلى صوتنا مصر".

وأنت.. إمتى بتحبها؟

1840

من أغنية بحبك يامصر (فايزة أحمد)

أرسل هذا التعليق بواسطة : واحد بيحب مصر

يا بلادي يا بلادي.. بحبك يا بلادي.. يامصر بحبك.. بحبك يا مصر.. ولو خيروني أقول يحرموني من نور عيوني وأحبك يامصر..

كلام بين الشباب فى مقهى فى رمسيس

أرسل هذا التعليق بواسطة : قهوجى

بعد الشعبية الكبيرة التى حققها الكابتن حسن شحاتة وبعد فوزة ببطولة افريقيا

الشباب بيقولوا لية الكابتن حسن شحاتة ما يترشحش فى الانتخابات لرياسة الجمهورية

طيب ماهو حسن شحاتة كابتن كبير اى نعم مش كابتن طيار ولكنة كابتن جاب النصر والبطولة

صحيح

اية رأيكم الكابتن حسن شحاتة يحكم مصر

يمكن

وابوتريكة يبقى رئيس وزارة

أرسل هذا التعليق بواسطة : مش مهم

حسن شحاتة يبقى رئيس الدولة

وابو تريكة رئيس الوزراء

برضة يمشى

بجد

أرسل هذا التعليق بواسطة : هبل

بجد موضوع ولا اهيف بتحب مصر امتى لما اكون مع مراتى المصريه هيقولها السعودى والليبى والعرب اجمع وتحس بالجوع امتى لما ابقى عايش فى مصر الزيت ب 12 جنيه امتى جوه قلب مصر

مش بتحب مصر امتى مفيش حد مش بيحب مصر لان الى بيحب بيحب طول العمر مش بالوقت ولا الزمن ولا المكان

مصرى وافتخر

أرسل هذا التعليق بواسطة : محمد عامر

ياجماعه فرقوا بين مصر الحكومه ومصر الشعب والدوله

ممكن ناس متحبش الحكومه بس ده مش معناه انها بتكره مصر كبلد

وفيه ناس بتقول هى مصر اديتنا ايه ادينا مش لاقيين شغل و و و بس ياجماعه دى اسمها حكومه مصر مش مصر

عن نفسى انا بحب مصر اكيد ومبحبش الحكومه

بس انا مصرى وافتخر