عم محمد.. لسه بيرقص تويست

"أبيضّ النحاس أبيضّ"..

نداء ما زال يطلقه عم "محمد شحاتة" مبيض النحاس، من داخل محله في حي النحاسين بالجمالية، بعد أن عفا على مهنته الزمن وأصبحت من التراث.. فرغم اكتساح الطشت البلاستيك والحلل الألمونيوم لبيوتنا، فما يزال متمسكا بتلميع النحاس بقدميه من خلال رقصته الشهيرة "التويست"..

النحاس زي الدهب

توارث عم محمد هذه المهنه أبا عن جد، يقول: "هي دي المهنة اللي أعرفها، شغلانة أبويا وجدي، والمثل بيقول من فات قديمه تاه، ولو سبت الشغلانه دى حاشتغل إيه؟ لسه حأتعلم يعني شغلانه من أول وجديد، فيه زباين لسه بتقدر النحاس وبتستخدمه بس للزينة مش للأكل والشرب زى زمان، وكمان محلات الحلويات بتستخدم الحلل النحاس ودى طبعا لازم تتنظف كويس كل فترة، لكن فين كل كام سنة لما يفتكروا يلمعوها".

وكما يصر عم محمد ألاّ "يفوت قديمه"، فقد أراد أيضا ألاّ يكون "باب النجار مخلّع"، فهو لا يزال يستخدم النحاس في بيته رافضا دخول الألمونيوم إليه، عن سبب ذلك يوضح: "دي مفيش زيها، بتدي للأكل طعم حلو، وكمان بيقولوا عليها صحية قوي، أنا بصراحة مش عارف الناس ازاي بتستحمل تأكل فى الحلل الألمونيوم، دي طعم الأكل فيها ماسخ قوي، وأنا لغاية دلوقتي بألمع حلل البيت".

النحاس – كما يخبرنا عم محمد- كان في الريف المصري من مقام الذهب، فأي عروس حينما تقوم بتأسيس منزل الزوجية يجب أن تشتري الأواني النحاسية التي تعبر عن مدى ثرائها، كما تشتري الإبريق والطبق النحاسي الكبير الذي يستخدم في غسل اليد بعد الأكل، وكان عندما يتقدم شاب للزواج بإحدى بنات القرية فالكلام عن النحاس زي الكلام عن الذهب، "كم جرام من الذهب وكم قنطار من النحاس" وبعد ذلك كل شيء يهون.

ذكريات راقصة

عندما سألنا عم محمد عن ذكرياته، تنهد طويلا وابتسم ثم قال: "كنت بشتغل مع أبويا، وما كانش لينا مكان ثابت، كنا بنلف في الشوارع والحواري في القاهرة أو المحافظات، ومعانا عدة الشغل الفحم والمنفاخ وأعواد القصدير، وننادي "أبيضّ نحاس أبيضّ"، فالستات كلها تطلع بالحاجات اللي عايزه تتلمع عندها، كان بيبقى مولد، كنا نحفر حفره ونملاها فحم ونولعه ونطحن الطوب الأحمر ونوزعه في الحلة أو الطشت، ونرقص الرقصة الشهيرة المعروفة عننا، اللي بيقولوا عليها عامله زي رقصة أجنبي اسمها التويست، وبعدين نشطفه بمية النار الخام، ونسيبه شوية ونشطفه تانى بمية النار المخففة، ونحط الحاجة اللي بنلمعها على النار، وأول ما تطلع من النار وهى سخنه ندعكها بقطنه فيها قصدير ونوزعه كويس، وبعدها نلمعها تاني بالنشادر ولما تبرد نجليها بالرمل عشان نشيل السموم".

يكمل: "طبعا كانت لازم الحلل تتلمع كل شهرين على الأقل وإلا تكوّنت السموم، وقتها طقم الحلل الكامل كان بيتبيض بـ 10 قروش وده كان مبلغ عال قوي كان فيه البركة، لكن طبعا الأسعار دي أتغيرت، القطعة الواحدة بتكلف مش أقل من 5 جنية، لأن الخامات نفسها اللي بنظف بيها أسعارها ولعّت، ده كيلو القصدير اللي كان بـ 40 قرش بادفع فيه دلوقتي 100 جنيه".

رغم انتقال عم محمد في محل خاص به - تغلب عليه البساطة- إلا أن المهنة ظلت كما هي بنفس الخطوات والطقوس، والفرق الوحيد هو استبدال الحفرة وإشعال الفحم بأنبوبة الغاز.

قبل أن نغادر عم محمد كان يهم في رقصة "من بتوع زمان" مع إناء نحاسي تغير لونه، ليودعنا بقوله: "الصراحة كانت أيام.. ما كناش ملاحقين على الزباين.. كانت صنعه تأكل البقلاوة.. صحيح إن الشغلانة دي بقى زبونها قليل أو تقريبا مش موجود، إلا إن ربك بيرزق".

2612

الشعب المصري كله بيرقص تويست

الشعب المصري كله بيرقص تويست وغير التويست

حتى انزلي شوفي كده في الشارع