الحياة توست وشوية فول
العنوان صح جدا ... أيوة أنا كاتبة توست بالفول ... مافيش داعي للنضارة .. أيوة العنوان "ت و س ت ب ا ل ف و ل".. وحبدأ كلامي معاكم بسؤال بسيط أوي ... جربت تاكل توست بالفول قبل كده؟؟
سؤال غريب .. وأكيد إنتوا مش عارفين أنا ليه بسأل سؤال زيه ده؟؟
فكر في يومك شوية كده .. أكيد مش مختلف عن يوم صاحبك .. وأكيد مش مختلف عن يومي .. حاسة إن كلنا عبارة عن فيلم محطوط على شريط فيديو وكل شوية تعمل إعادة .. لحد لما زهقت
تصحى الصبح من النوم بعد عذاب طبعا ... والمنبة يكون صوتة إتنبح .. ويحلف ميت يمين إنه مش حيصحي شخصية زيك تاني .. بس طبعا المنبة "مجبر اخاك لا بطل " .. والحل الوحيد علشان يخلص منك إنه يموت وساعتها حتروح تدور على منبه تاني تعذبه معاك.
بعد لما تصحى .. تدخل الحمام تكمل نوم جوه شوية ... تخرج تشد اي حاجة من الدولاب .. مش مهم تكوي لأنك كده كده حتركب المترو أو الاتوبيس أو الميكرباس وكلها حتقوم بالواجب وزيادة ومعاك ... إحساسي وانا نازلة من المترو كل يوم إن الغسالة الاتوماتيك كانت شغالة على العصر .. البنات طبعا عارفين الهدوم بيبقى شكلها عامل إزاي أما الولاد فبطلب منهم يكتشفوا بنفسهم
المهم تنزل من بيتك مكشر وشايل على رأسك طاجن ستك.. وشايل اسلحتك ومستعد لأي خناقة... تمشي من نفس الشوارع ... تركب نفس وسيلة المواصلات اللي بتركبها كل يوم... تشوف نفس الناس اللي بتنزل معاك كل يوم الصبح في نفس ميعادك .. تروح الشغل تعمل نفس الحاجات اللي بتعملها كل يوم .... تاكل نفس الأكل .. تشرب نفس الشرب .. تسلم على نفس الناس ... وعلى آخر اليوم تروح .. تعبان .. هلكان .. جعان ... تاكل وتقوم بحاجات بسيطة وتنام... وهكذا كل يوم ... مجرد دوسة على زرار التشغيل ويتكرر بنفس التفاصيل .. وهلم جرجر
إيه الملل ده يا جماعة .. أنا نفسي زهقت من الكلام اللي أنا كتباه فوق ده .. متخيلين إننا عايشين جوة التفاصيل المملة أوي دي ... وعمرنا مش بنغيرها ... وكأننا مبرمجين عليها
اكيد بتقولوا دلوقتي .. ايه علاقة الكلام ده بتوست الفول ؟؟
أقولكم .. فكرت في فكرة بسيطة علشان الملل والدوامة اللي إحنا عايشين فيها .. فكرت إننا كل يوم نبتكر حاجة جديدة ... تفصيلة صغيرة بسيطة ومختلفة... تدخلها يومك .. وكل يوم تدخل تفصيلة تانية مختلفة عن اليوم اللي قابلة ومع الوقت حتحس بالتغيير.. حتحس إنك كل يوم بتتفرج على فيلم جديد.. بس البطل فيه واحد ... هو إنت طبعا وممكن تحتفظ معاك بشوية شخصيات ثابتة جوة فيلم حياتك اللي إنت فيه المخرج والبطل وكاتب السيناريو وممكن يكون معاك مساعدين.. مش هي دي المشكلة .. المهم إن الحكاية حتكون مختلفة
يوم حتاكل توست بس حتحط عليه فول مش جبنة ولا لانشون
يوم تاني كل عيش بلدي .. وحط جواه همبورجور او سويس أو بيف
يوم تالت حتعمل ورقة ... ترسمها بنفسك أو تعملها على الكمبيوتر ... ارسم عليها وش بيضحك وأكتب عليها مثلا(صباح الخير يا... ).. أو اكتب عليها (ابتسم من فضلك)... أو إكتب عليها (وحشتيني يا أنا) .. علقها على الحيطة اللي قدامك او على السقف .. الحاجة اللي عينك بتقع عليها أو لما تصحى.. وممكن تعمل منها نسخة تانية حطها على باب البيت ... علشانك وعلشان أسرتك وأهو كله بثوابه يعني.
يوم رابع .. تغير مسيرتك .. لو بيتك قريب من الشغل جرب تصحى يوم واحد بدري (ومش تكررها تاني علشان مش تكره نفسك وتكرهني أنا عارفة إن الموضوع صعب ).. وخدها مشي وبلاش تركب وسيلة مواصلات .. او إمشي من شوارع مختلفة .. أو إركب وسيلة مواصلات مختلفة والبهدلة واحدة .. عادي جدا
يوم خامس إلبس لون جديد .. أو غير ستايل لبسك ... دي مرة واحدة في السنة .. علشان فلوسنا احنا مش لاقينها اصلا
يوم سادس .. تقول لنفسك أنا حبتسم مهما حصل .. خالي شعارك الابتسام.. ابستم لكل اللي تقابلة تعرفة أو ماتعرفوش.. في غيرك حيبتسم ليك علشان الابتسامة معدية وأكيد ناس تانية حتقول ايه المجنون ده .. مش مشكلة .. مجنون بس مبسوط
جرب كل يوم خميس تعمل حاجة مختلفة بعد الشغل .. إمشي .. أخرج ... أكيد حتلاقي حاجة مختلفة تتعمل
وكل يوم فكر لنفسك حبيبتك في حاجة.. أكيد حتفرح منك أوي وحترضى عنك وإنت كمان حتفرح معاها وحتفرح معاك ناس كتير .. علشان السعادة معدية خصوصا للقريبين منك أوي.
وعلى رأي اللي قال : هي الحياة ايه غير توست وفول وشوية تفاصيل تانية فوق بعض