ليه بنحبك يا ريس؟

'ياريس كل سنة وانت طيب وربنا يخليك لينا'..

كل سنة ومصر تعيش معك أغلي وأعز أيامها.. سنوات مرت وكأنها حلم جميل داعبنا، وجعلنا نبتسم لكل أيامنا.

في عيد ميلادك ياريس ندعو الله لك بالعمر المديد، لكي تحقق لنا المزيد والمزيد.. فنحن سيدي الرئيس قدرك، وانت قدرنا. لمن غيرك نشكو؟! من مين غيرك نطلب!! لمن غيرك نروي احلامنا وآمالنا في مستقبل نملك فيه القدرة علي ان نحقق طموحاتنا، ونترك لاولادنا وأحفادنا وطنا عزيزا وقادرا علي ان يحقق لنا كل ما نتمناه.

بصراحة.. إحنا بنحبك لأنك إنسان أصيل.. بتعرف تحافظ علي كرامة وكبرياء بلدك وشعبك.. بتعرف تقرأ المستقبل صح ياريس.. وفي كل حاجة.. بره وجوه.

بنحبك.. لأنك مابتعملش حاجة إلا بعد ماتحسبها صح.. ويكون قرارك في الصميم.. بنحبك لان تاريخك كله نظيف.

تاريخ بطل.. كان يكفيه من كل الدنيا وسام الانتصار في حرب أكتوبر. الوسام الذي وضعه شعب مصر كله علي صدرك داخل مجلس الشعب تقديرا لبطولاتك ودورك الذي فتح أبواب أعظم انتصاراتنا.

دايما ياريس، القرار الغلط في أي مجال يكون له تأثيرات سلبية، بتختلف من مكان لمكان.. ولكن في الطيران القرار الغلط يعني الموت.. من هنا دايما بيكون فيه تقدير وحسابات كاملة قبل أي قرار.

طول ما إحنا معاك ياريس حسينا بالحكاية دي.. مفيش انفعال ولاغضب.. أي حاجة دايما تسبقها دراسة كاملة.. كتير قوي ياريس مواقف مرت علينا وعلي بلدنا.. تحديات كتيرة لا لها أول ولا لها آخر.. لكنك ياريس عدتها كلها بسلام.. بحنكة ومهارة وتفكير.. كانت دايما ياريس مصر معاك.. في قلبك وعقلك والعدو والحبيب دايما بيحسب لبلدنا معاك ألف حساب.

بنحبك ياريس.. لأن سمعة مصر معاك أصبحت زي البرلنت.. وبيحسدونا عليك.. لأنك مننا.. دايما ياريس كنت معانا.

ساعات كتيرة كنا بنكلم نفسنا.. بنقول ياتري الريس حاسس بينا.. ياتري الريس حاسس بمشاكلنا وهمومنا.. وفي كل مرة ياريس نكتشف الحقيقة إنك معانا.. أنت جزء مننا وإحنا جزء منك.. بتتكلم زينا.. وحاسس بالظروف الصعبة اللي إحنا عشناها.

وبصراحة ياريس.. إحنا نسينا أيام زمان.. إحنا ادلعنا ياريس في عهدك.. ونسينا كل حاجة وحشة.. نسينا زمن الاشتراكية اللي ضحكوا بيها علينا لاننا اكتشفنا إننا بنعيش في وهم جميل صحينا منه يوم 5 يونيه.

نسينا زمن تليفون العمدة وبقينا دلوقتي محتارين.. نركب 012 ولا 010 ولا 011 ولا أرضي.

نسينا القطارات ماركة اللي يحب النبي يزق!! نسينا زمن كل حاجة بالبطاقة من قطن العرايس لحد قماش التيل والبفتة والدبلان.. نسينا زمن المجاري اللي طافحة وطلمبات الميه البحاري ووضع النواية جوه الزير.. نسينا ياريس زمن زوار الفجر وزوار الصبح والظهر والعشا.. نسينا اللهو الخفي ونسينا نشوف النجوم في عز الظهر.

دلوقتي كله بيتكلم.. مفيش حد خايف.. شلت الخوف من قلوبنا يا ريس ودي نعمة إحنا مكناش حاسين بيها.. دلوقتي ممكن أي واحد ينتقد رئيس الجمهورية والحكومة وكل حاجة!! ساعات بنزودها حبتين!! لكن جوانا شعور إننا مش خايفين.. عارفين إن فيه كبير في البلد.. بيحبنا وبنحبه.. عايش في قلوبنا وقريب دايما مننا.

بنحبك ياريس لأنك مننا.. انت الرئيس الذي لا يتحدث بلغتين.. اللي بتقوله في الغرف المغلقة هو اللي بتقوله في العلن.. ودايما آراءك وأفكارك سباقة والعالم كله يا ريس آد أيه بيحترمك ويقدرك.. طولة بالك وسعة صدرك ياريس وحبك لينا.. خلانا نطمع أكتر واكتر ياريس.

في عيد ميلادك الناس.. اهلك... وشعبك... كل اللي بيحبوك المفروض يقدموا لك ورود الدنيا كلها.. لكنك ياريس كنت سباق بالخير.. طول عمرك سباق بالخير.. العلاوة ياريس كانت مفاجأة.. كانت عبور بالموظفين الغلابة من الدوامة اللي عايشينها ليل نهار.. الناس كلها دعت لك ياريس بالصحة والسعادة.. حسوا ساعتها انك جزء منهم وانت بتطالب الحكومة إنها تدبر الموارد عشان العلاوة لأن الناس مش ناقصه.!!

الناس ياريس كلها بتقولك في عيد ميلادك كتر خيرك.. وربنا يديك الصحة.. والسنة الجاية برضه هنقولك عايزين علاوة ياريس.. 'علاوة ريس'.. له في قلب كل مصري حب ما يتقدرش بأموال الدنيا كلها.

كل سنة ومصر معاك بخير ياريس ونفضل دايما نقولك عايزين وعايزين.. والسنة الجاية مش مهم العلاوة تبقي 30 % خليها 25 % بس!! إحنا مش طماعين!!

كل سنة وأنت بكل خير ياريس

be1c

الحمير على اشكالها تقع

أرسل هذا التعليق بواسطة : emad hamdy

منافق مع منافق احنا مالنا

مش مصدقة نفسي

أرسل هذا التعليق بواسطة : لور دكاش

بجد مش مصدقة نفسي.. هو لسة فيه كده.. الراجل ده جايب النفاق ده كله منين.. وأصلا هوالنفاق ده لسة موجود أصلا.. أنا مذهولة

اكرام الميت دفنة

أرسل هذا التعليق بواسطة : uy

قال الرسول علية السلام

اكرام الميت دفنة

تب الى الله يا قط

أرسل هذا التعليق بواسطة : محمد سيد

ممتاز يا ولد يا ممتاز لقد عبرت عن المشاعر الصادقة لكل منافق للسلطة أما باقى المصريين فيحسدونك على هذاالقدر العظيم من النفاق الفج.

يا رجل لقد سمعت بعض كلماتك يتفوه بها بعض المتدينين وهو يخاطب بها ربه خصوصا عندما تقول (لمن غيرك نشكو؟! من مين غيرك نطلب) سامحك الله.

اختشى على دمك ياقط واتكلم عن نفسك دانت طلعت بامبرز لوعلى امين موجود كان تف فى وشك البجح

أرسل هذا التعليق بواسطة : كوز المحبة

القط دة على فكرة من الناس اللى بتخدع مبارك وتوهمة وتصورلة الاشياء بغير حقيقتها ليضمن لية فتفوتة من البواقى والفضل وعندنا قطط كتيير من نفس الفصيلة دى منتشرة فى كل نواحى الحياة همها الاول والاخير مصالحها الشخصية

لن أُنافق

أرسل هذا التعليق بواسطة : أحمد مطر

وَنَافِقْ

ثمَّ نَافِقْ ، ثمَّ نَافِقْ

لا يَسْلَمُ الجَسَدُ النَّحِيلُ مِنَ الأَذَى

إنْ لَمْ تُنَافِقْ

نَافِقْ

فَمَاذَا في النِّفَاقِ

إذَا كَذَبْتَ وَأَنْتَ صَادِقْ؟

نَافِقْ

فَإنَّ الجَهْلَ أَنْ تَهْوِي

لِيَرْقَى فَوْقَ جُثَّتِكَ الْمُنَافِقْ

لَكَ مَبْدَأٌ ؟ لا تَبْتَئِسْ

كُنْ ثَابِتَاً

لَكِنْ .. بِمُخْتَلَفِ الْمَنَاطِقْ

وَاسْبِقْ سِوَاكَ بِكُلِّ سَابِقَةٍ

فَإنَّ الحُكْمَ مَحْجُوزٌ

لأَرْبَابِ السَّوَابِقْ

õõõ

هَذِي مَقَالَةُ خَائِفٍ

مُتَمَلِّقٍ ، مُتَسَلِّقٍ

وَمَقَالَتِي : أَنَا لَنْ أُنَافِقْ

حَتَّى وَلَوْ وَضَعُوا بِكَفَيَّ

الْمَغَارِبَ وَالْمَشَارِقْ

يَا دَافِنِينَ رُؤُوسَكُمْ مِثْلَ النَّعَامِ

تَنَعَّمُوا

وَتَنَقَّلُوا بَيْنَ الْمَبَادِئِ كَالْلَقَالِقْ

وَدَعُوا الْبُطُولَةَ لِي أَنَا

حَيْثُ البُطُولةُ بَاطِلٌ

وَالحَقُّ زَاهِقْ !

هَذَا أَنَا

أُجْرِي مَعَ الْمَوْتِ السِّبَاقَ

وَإنَّنِي أَدْرِي بِأَنَّ الْمَوْتَ سَابِقْ

لَكِنَّمَا سَيَظَلُّ رَأْسِي عَالِيَاً أَبَدَاً

وَحَسْبِي أَنَّنِي في الخَفْضِ شَاهِقْ !

فَإذَا انْتَهَى الشَّوْطُ الأَخِيرُ

وَصَفَّقَ الجَمْعُ الْمُنَافِقْ

سَيَظَلُّ نَعْلِي عَالِيَاً

فَوْقَ الرُّؤُوسِ

إذَا عَلاَ رَأْسِي عَلَى عُقَدِ الْمَشَانِقْ !

جتكوا الارف

أرسل هذا التعليق بواسطة : abu osama

انا حاسس انى هرجع جتكوا الارف مليتوا البلد

لا أعلم قط أكثر إمتيازا منه

أرسل هذا التعليق بواسطة : ابو عمر

أتحفنا رئيس تحرير جريدة قومية كبرى بمناسبة عيد ميلاد الرئيس بمقالة من العيار الثقيل والتي لا يأتي بمثلها إلا رئيس تحرير جريدة قومية كبرى.وبإمكان القارئ أن يقف عند كل كلمة في هذا المقال (الجامد أوي) بلغة هذا الزمان. ولكن ما شد إنتباهي و أثار إعجابي فقرة النسيان وفقدان الذاكرة والتي يقول فيها \" نسينا القطارات ماركة اللي يحب النبي يزق!! نسينا زمن كل حاجة بالبطاقة من قطن العرايس لحد قماش التيل والبفتة والدبلان.. نسينا زمن المجاري اللي طافحة وطلمبات الميه البحاري ووضع النواية جوه الزير.. نسينا ياريس زمن زوار الفجر وزوار الصبح والظهر والعشا.. نسينا اللهو الخفي ونسينا نشوف النجوم في عز الظهر. \"

فعلا القطارات زمان كانت تحتاج زق أما الان فهناك القطار أبو جزرة و قطار الصعيد المحترق والقطار الذي يخرج من طريقه و يدخل البيوت.

فعلا زمان كانت كل حاجة بالبطاقة و كنت تحصل عليها بعد مجهود شديد أما الان فأغلبية الشعب الفقير لا يستطيع شراء أبسط الإحتياجات من الخبز و الفول.

فعلا كانت المجاري طافحة أغلب الوقت ولكن كانت هناك شبكة مجاري أما الان فكل العشوائيات لا توجد بها شبكة مجاري من الأصل ولا عزاء للصحة العامة و النظافة.

فعلا كان هناك زوار فجر ولكن كانت لهم أوقات محددة أما الان فالمواطن المصرى معرض لبطش السلطة طوال ساعات اليوم و كان التعذيب فى المعتقلات أما الان فالتعذيب والمعاناة في كل قسم شرطة أو حتى أي كمين مرور.

وقد ختم المقال الجبار بانه مش طماع و لا يريد الكثير من الرئيس ولكن يبدوا أن بيننا بعض الطماعين فنرجوا من الله فى العام القادم أن نكون قد شفينا من حالة النسيان و فقدان الذاكرة .

و أخيرا كل سنة و الريس وقطه طيبين.

قط الريس وكلب الست

أرسل هذا التعليق بواسطة : سفروت

ياقط عاوز لك فار زى جيرى بتاع توم وجيرى علشان يادبك

أشج الخلجات يابشررررررررر

أرسل هذا التعليق بواسطة : محمد السيد

أيووووووووووووووووة يا جدعان ..

إيه ده هو في حد بيوصل للدرجة دي؟ انا مش مصدق الكلام يمكن اول مرة اكمل حاجة من النوع ده بتاعة عيد الميلاد لآخرها. معرفتش والله اسيبها في النص ...

أيييييييييييييييييييييييوه ياعالم ...

لمن غيرك نشكو؟! من مين غيرك نطلب!! لمن غيرك نروي احلامنا وآمالنا في مستقبل نملك فيه القدرة علي ان نحقق طموحاتنا،

ليه ياسيدي .. أقول ايه بس؟

وفي كل حاجة.. بره وجوه.

بنحبك.. لأنك مابتعملش حاجة إلا بعد ماتحسبها صح.. ويكون قرارك في الصميم..

أشِتم يعني ولا أعمل ايه؟؟

012 ولا 010 ولا 011 ولا أرضي

ياعالم حد يقول له اننا في سنة 2008 .. الحاجات دي فضيحة مش انجاز ..

طول عمرك سباق بالخير..

يخرب بيت كده ياشيخ ... تعالي لي يا أمه

إحنا نسينا أيام زمان.. إحنا ادلعنا ياريس في عهدك

لا بقي ... ده كتير كتيييييييييييييير

الله يجازيكم يا عشرينات .. هي ناقصاكم يعني

لا للتنكيد ... لا للتزويق ... نعم لشيل البنى آدمين اللي تشل دي

mohamedmat@hotmail.com

ليه بنحبك يا ريس؟

أرسل هذا التعليق بواسطة : emad hamdy

هل الأخ القط له اولاد وزوجة واهل؟ مجرد سؤال موقفة اية امامهم واولادة موقفهم اية امام زملائهم والست القطة الكبيرة زوجتة موقفها اية امام الجيران ولا مام زملائها فى العمل يصراحة ياقط انت عاوز كلب ينهشك جتك القرف فيك وفي الي مشغلك