الإضراب الجاي.. نكسة ولا ثورة ؟
مصر لم تولد من جديد اليوم يا أستاذ سرايا لأنها شاخت وبلغت الثمانين
الإضراب الجاي.. نكسة ولا ثورة ؟
أحمد الهواري – ولاد البلد – عشرينات- 5/5/2008
في الموعد المقرر لإضراب 4 مايو ازدحمت الشوارع بالمارة والسيارات، وكان واضحا -رغم الاستنفار الأمني في وسط القاهرة- أن الإضراب لم يكن على نفس مستوى إضراب 6 إبريل، وهو ما دفع البعض للتساؤل عن أسباب عدم النجاح، ودارت أغلب التساؤلات في نفس المكان الذي انطلقت منه الدعوة للإضراب.. الـ facebook.
انطلق الشباب فيه للبحث عن أسباب فشل الإضراب لمحاولة تلافيها في الإضراب القادم، حيث لم يكد يمر إضراب أمس 4 مايو إلا وكانت الدعوات قد بدأت لإضراب جديد، حدد البعض ميعاده يوم"5 يونيو" تحت شعار "مصر في نكسة"، بينما حدده البعض الآخر يوم "23 يوليو" تحت شعار "ثورة جديدة".. وبالطبع كان هناك من هاجم الفكرة قائلا: "كفاية إضرابات".
تنظيم الصفوف
على مجموعة "إضراب 6 ابريل نجح.. وهنكمل المشوار يا رجالة مصر أول أسبوع من شهر مايو"، قال أيمن محمد: "المشكلة ببساطة إن تكرار مسألة الإضراب ده في حد ذاته هو سبب الفشل رقم واحد، الغريب أن الكل كان فاهم لما الإضراب الأول نجح يبقى التاني هينجح وكان باين جدا أسباب الفشل.. الأحزاب والفئات المسيسة دخلت في الموضوع، وكان فيه إحساس عند شباب الفيس بوك إنها لعبة وكل واحد عنده رأى فرحان بيه عايز يعلنه وخلاص، ده طبعا إلى جانب اختفاء ثقافة الحوار وسيطرة الأنا على كل واحد (اللي بيكتب فاهم أنه منشئ مصر الحديثة ومحدش عارف مستقبل البلد إلا سعادته)، والعشوائية وتجنب أساليب أقوى أثرا والتمسك بالإضراب وده بيعكس فقر فكري".
وفي نفس المجموعة - التي تجاوز عدد المشتركين فيها 22 ألف مشترك- يوضح "أحمد متولي" أنه في شهر يوليو سيكون المواطنين في أجازة صيفية والكل في أجازة، مقترحا مظاهرة في هذا اليوم. وهو الأمر الذي وافقه عليه "عبده فرماوي" قائلا: "أنا معاك في كل كلامك.. لازم ننظم أنفسنا من جديد ونعيد ترتيب الصفوف عشان ننجح إن شاء الله في إضراب 23 يوليو لو قررنا فعلا".
ولكن "هنا نبيل" عارضت الاثنين قائلة: "هو إحنا ليه بنقول إن الإضراب فشل، صحيح مفيش حد عمل حاجه والأمور كانت طبيعية بس ده ميمنعش أن كل المطالب تقريبا تم تنفيذها، يعني المرتبات زادت (هي صحيح زيادة مش كافية لمواجهة الأسعار بس برده زادت وده إحنا كنا طالبينه)، المعتقلين وتم الإفراج عنهم، والأسعار وبيقولوا هتنزل أو على الأقل هيخافوا يزودها تاني.. إيه بقي مطالب إضراب يوليو.. أنا كنت من أول المشجعين على الإضراب والاعتصام كمان بس فكرت مع نفسي شويه مش لقيت ليه سبب أصلا.. يا ريت توضحوا إحنا هنعمل اعتصام ليه؟".
أبيض في أبيض
وهو ما وافقها عليه "حمدي أسامة" لكن في مجموعة "كلنا هانلبس هدوم سودا يوم 4 مايو"، قائلا: أنا بأقول إن الإضراب مفشلش وأنه نجح بصورة كبيرة، كفاية إن الناس كلها كانت بتتكلم عنه، كفاية إن حس الإضراب وصل للناس، كفاية إن الأمن في المحلة مثلا كان في كل شبر من كتر الرعب، كفايا صوتنا يوصل للناس.. وللأمام دائما يا شباب مصر العظيمة وماتسمعوش لكل الإشاعات اللي تثبط عزيمتكم.. الحرب النفسية أقوى الحروب، وإن شاء الله هانكمل مشوارنا".
فيما اقترح "سامي" ساخرا قضاء يوم النكسة في المنزل وتخصيصه للقراءة والكتابة عنها والبحث في أحداثها.. أو برفع رايات بيضاء إشارة لحالة الاستسلام والعجز اللي بتمارسه القيادة السياسية إلى الآن.. "أهو إذا كان لبس البرتقالي والأسود منفعش.. نلبس أبيض".
فيما طالب "أحمد دومة" في نفس المجموعة بالتمهل قليلا قبل الدعوة للإضراب القادم قائلا: "الأمر - فعلاً- يحتاج لتأني ودراسة قبل الإعلان عنه، أدعوكم في حالة الرغبة في إقامة إضراب آخر للتواصل مع كافة القوى و(الجروبات) والتيارات السياسية في مصر قبل الإعلان.. أرجو أن يلتزم الجميع بالدعوة".
قنوات المعارضة.. الرسمية
أما في مجموعة "6 إبريل.. إضراب عام لشعب مصر" والذي تجاوز عدد أعضاءه 74 ألف عضو، قال "عبد الحميد أحمد": "عندي فكرة غريبة شوية وعايز حد يطورها معايا، أو يقولي بلاش دي غلط.. هي فكرة قديمة شوية بس ممكن تنجح.. نجمع توقيع 5 مليون مصري نطالب فيه بإسقاط حكومة نظيف.. حكومة نظيف بس في الأول وننشره في قنوات المعارضة الرسمية".
فيما حاول "أبو فاتورة" الشد من أزر المشاركين قائلا: "إيه يا جماعة.. إنتوا هتبدأو تقلقوا عند أول سلمة ولا إيه؟.. التغيير عاوز نفس طوييييل وأعصاب هادية.. مش ممكن اللي اتهد في سنين طويلة من الشخصية والسلبية والفساد وكل عوامل وصفات التخلف يتبنى كده في كام شهر ولا كام سنة.. أكيد إحنا نجحنا، مش عاوزة كلام، ومعني رد الفعل اللي أخذته الحكومة مش فرقعة إعلامية إحنا خدناها لأ، ده لأنهم عارفين قدرة الناس وإمكانيتهم في التغيير، عشان كده خدوا كل احتياطهم، أنا مش عاوز إننا نتسرع في أحكام أو قرارات.. مش عاوز اليأس يدب في نفوسنا شوية شوية.. التغيير الكبير عاوز همم كبيرة.. نقف بقه شوية نقيم ونفكر ونستعد للخطوة اللي جاية، ونستفيد من تجارب اللي فات.. ما فيش فشل وما فيش أخطاء.. فيه تجارب وخبرات".
6b46
اضراب لية ولمين وعلشان اية
أرسل هذا التعليق بواسطة : من المندسين
هى بلد مين بالضبط
مش هى بلد ضباط مباحث امن الدولة والمخابرات
مش المفروض يخافوا عليها زى اى واحد من الشعب
مش الشعب الخائف المرتعد اللى كل بيقول انا مالى خلينى اربى عيالى
دى مش بلدنا لوحدنا
مفيش اضراب تنانى ولا تالت
مفيش سمع لاى واحد الوطنية بتحرقة شوية
اسعار البنزين هتتضاعف والاسعار خلال شهر هتبقى 3 اضعاف الموجود والكل هيجوع بجد
انما تستاهلوا اللى بيجرالكوا
لما يبقى شعب اشجع مافية بنت اسمها اسراء عبد الفتاح
مافيش اضراب ومش هنشارك فى حاجة
ويارب يولعوا فى البلد