من داخل الميكروباص!

(من وحي ما يحدث داخل ميكروباصات القاهرة... الميكروباص يغادر المحطة متجها إلى طريقه)

السائق: والنبي يا إخوانا الأجرة مع بعض.. والأجرة موحدة يا أخوانا إحنا بالليل

(يبدأ الركاب الآن في تجميع الأجرة ويرسلونها واحد تلو الآخر للسائق)

السائق: لسه فيه ناس ما دفعتش.

يصيح راكب بأعلى صوت: على جنب يا أسطى الله يكرمك.

فيتدخل آخر: والناصية الجاية معاك يا ريس.

راكبة تخاطب الراكب الذي أمامها: والنبي أديله واحد يا خويا

فيتدخل آخر وهو يسلم السائق الأجرة: خليهم اتنين معاك لو سمحت

راكب من الكنبة الخلفية يرسل الأجرة: خد أتنين من الجنيه وواحد من الخمسة جنيه

زميله في نفس الكنبة: أبعت ربع جنيه ورا يا أسطى

(السائق يرسل الربع جنيه للراكب)

راكب بجوار السائق: الباقي يا أسطى عشان نازل

راكب مر عليه الربع جنيه أثناء محاولة وصوله إلى صاحبه: والنبي يا أسطى الربع جنيه ده مقطوع غيٌره.

(الربع جنيه وصل إلى السائق من جديد)

السائق يتساءل: حد معاه ربعين؟

صاحب الباقي يسأل من الكنبة الخلفية: معاك ربع وتاخد ُنص؟

السائق: معايا..

(تمت الصفقة بنجاح.. تمر فترة يظن فيها الجميع أن الأجرة وصلت كاملة للسائق)

السائق: حد عايز فكة 5- 10- 20

راكبة مسنة من الكنبة الأمامية: ثانية واحدة والنبي لما أنزل يا ابني.

(يهدئ السائق السرعة ويقف على الناصية)

السائق: أنزلي يا حاجة على مهلك.

فيرد أحد الركاب: ربنا يشفي كل مريض

وتبدأ الراكبة المسنة في الدعاء للسائق: ربنا يوقف لك ولاد الحلال.. متشكرة أوي يا ابني.. ربنا يسهل لك طريقك يا ابني..

(السائق وهو ينظر للسماء مقبلا وجه وظهر يده اليمنى)

السائق: والله يا جماعة عليها أقساط.. والمخالفات ما بترحمش.

راكب في الكرسي المجاور: ربنا يفتح عليك وعلينا يا أسطى

راكب من الكنبة الوسطى: قبل الكوبري معاك يا أسطى

السائق بكل حزم وهو يعد فلوس الأجرة: قبل الكوبري ممنوع عشان فيه دورية.

(بعد لحظات صمت يكتشف السائق نقصاً في الأجرة)

السائق يصرخ في الركاب: يا جماعة اللي ما دفعش ورا

عدد من الركاب يتبرعون بالرد: كل العربية معاك يا عم.

السائق يصر: لسه فيه واحد ناقص يا جماعة.

راكبة ترد: يا خويا دا ابني وقاعد على حجري.

(السائق يهدئ وينظر خلفه للراكبة)

الراكبة وهي ترفع ابنها لأعلى: ده واد صغير.. عاوز أجرة عليه كمان

راكب يتدخل في الحوار: الناصية الجاية يا ريس.

السائق: كل ده صغير يا ست.. ده شحط في الجامعة أهو

الراكبة ساخرة من كلامه: يسمع منك ربنا يا خويا ويطلع دكتور أو باشمهندس أد الدنيا

الراكب يتدخل صارخاً: إيه يا أسطى.. مش قلت لك على جنب

السائق وهو يشوح بيديه للراكب: يا بيه معلش ما سمعتش

الراكب بقرف: أنت أطرش ولا إيه

السائق: ليه الغلط يا فندي

(الراكب وهو ينزل من الميكروباص)

الراكب: أنا أغلط زي ما أنا عاوز.. ده أنا أشتريك وأشتري عربيتك دي

السائق يخاطبه وهو يرحل بعيداً: ما دام أنت غني أوي كده أركب تاكسي يوصل لك لغاية الشقة فوق... (الميكروباص ابتعد).. يا ابن.... يا... يا... عالم ولاد...

عدد من الركاب: خلاص يا أسطى صلي ع النبي.

السائق يبرر شتائمه: ما هو اللي بيغلط يا أخوانا.. والله ما جيت جنبه

راكب مجاور: معلش يا أسطى

السائق: والله يا أفندية الواحد مش عارف يعمل إيه للزباين.

(الميكروباص يصل المحطة.. )

السائق: يالا يا إخوانا.. آخر الخط.. حمد لله ع السلامة.

____________________________________

* المقالة أرسلها أحمد عبد الحكم في مسابقة عشرينات، لكنها لم تتأهل إلى التصفية النهائية، وسوف نوالي نشر موضوعات ومقالات المتسابقين في تلك المساحة.

عشرينات بتلمعك يا احمد عبدالحكم

أرسل هذا التعليق بواسطة : مش مروة عبدالفيل ولا مروى صلاح

شد حيلك يا احم عبدالحكم واهي عشرينات بتلمعك اهه بأه ما لكش حجه

ويا بخت من كانت عشرينات خالته

يا ريت تصلحوا الاسم

أرسل هذا التعليق بواسطة : أحمد حمدي عبد الحكم

اسمي أحمد حمدي عبد الحكم مش احمد عبد الحكم

شكرا يا \" مش مروة عبدالفيل ولا مروى صلاح \" ، و انا شادد حيلي بس يا ريت الموضوع يكون عجبكم و اوعدكم بمزيد من الموضوعات

حلوه

أرسل هذا التعليق بواسطة : أحمد سلميان

أبوحميد أزيك

حلوه أوي التدوينة دي و لو إن بصراحه معظم بتوع الميكروباصات قلة ادبهم ما وردتش علي حد مش بالأدب اللي انت شايفه ده

تقولشي السواق دا ملاك ياخويا!

أرسل هذا التعليق بواسطة : محمد العربي

بصراحة كدة ، انا نفسي اركب مع سواق مؤدب زي ده! ممكن يابوحميد تقولي دا شغال على خط ايه؟

اقتراح بكتابة الجزء الثاني من القصه

أرسل هذا التعليق بواسطة : مش رضوى حسن ولا شريف الدواخلي ولا البراء اشرف

والله يا اخ حكم خيالي سرح في قصص صلاح ابو سيف وتخيلت الجزء الثاني من القصه الا وهو في موقف الميكروباصات يعني مسرح القصة حيبقى في الموقف

سواق الباص هو الشاب الوسيم نور الشريف ومعلم الموقف هو الشرير توفيق الدقن وفيه بنت حلوه وصغيره بتعمل القهوة والشاي للسواقين هي ميرفت امين وتدور قصة حب بين البنت الحلوة بتاعة الشاي وسائق الميكروباص الوسيم نور الشريف والعزول هو وتوفيق الدقن معلم الموقف اللي عامل فرده على السواقين وكل السواقين بتكرهه وبتحب نور الشريف وعايز يتجوز البنت الحلوه بتاعة القهوة والشاي (ميرفت امين) وهي ما بتحبوش ومش طايقاه وامها امينة رزق عماله تزن على ودانها علشان خاطر تتجوز المعلم وتقولها يا بت دا حينغنغك في الدهب فيه واحدة تسيب المعلم الكبير الغني دا وتتجوز حتته سواق سنكوك وهي تقولها بحبه يا ماما بحبه القلب وما يريد يا ماما... الله بأه

المتهم بأه ندخل في الجد بأه وهنا حندخل قصة عماد الكبير سواق الميكروباص المشهور والضابط اسلام نبيه

طبعا المعلم اللي هوا توفيق الدقن حيشطط غضبا لما عرف ان البت بتحب نور الشريف (اللي هو عماد الكبير سائق الميركروباص) فقرر تدبير مقلب له

فذهب المعلم اللي هو توفيق الدقن الى ضابط القسم صديقه الضابط اسلام نبيه وهو في الفيلم حيبقى (صلاح السعدني) وحيشتكيلوا الواد السواق الهلفوت نور الشريف (عماد الكبير)

فالضابط حيقولوا بس كده يا معلم سيبلي الموضوع دا انا حجبلك خبره انا مش حخليه يفتح عينه في الحته تاني

و صلاح السعدني اللي هو الضابط اسلام نبيه بعت المخبرين بتوعه الموقف وجروا شكل نور الشريف اللي هو (عماد الكبير) وسحبوه من قدام حبيبته ميرفت امين البت الحلوه بتاعة القهوة والشاي وضربوه قدامها وجروه على القسم

والضابط اسلام نبيه اللي هو صلاح السعدني عمل عملته السودا وصور السائق المسكين

(وهنا بقا حنحط حكاية عماد الكبير مع اسلام نبيه كاملة بكل احداثها)

وطبعا ميرفت امين حزينه من اللي حصل وبعدين يوم المحكمة بتاعة اسلام نبيه اللي هو صلاح السعدني كلهم يروحوا المحكمة ويسمعوا النطق بالحكم ويزغرطوا ان ربنا ظهر الحق والمعلم اللي هو توفيق الدقن حيهرب من الموقف ونور الشريف اللي هو عماد الكبير حيبقى معلم الموقف ويتجوز ميرفت امين البت الحلوه بتاعة القهوة والشاي ويخلفوا صبيان وبنات وتوته توته فرغت الحدوته حلوه ولا ملتوته

يلا يا اخ عبدالحكم اشتغل يا ابني اديني عمال اساعدك اهه

ما اسموش الميكروباص

خليك راجل مصري وابن موقف

اسمه الميكروباز

أرسل هذا التعليق بواسطة : ابومحسن غربة 26 سنه

ايوه يا جدعان

الصورة حتنطق وتتكلم وتقول انا مصر يا جدعان

نفسي اقعد في الميدان دا نص ساعة بس وارجع تاني

ميكروباص 15 مايو حلوان

أرسل هذا التعليق بواسطة : ابومحسن غربة 26 سنه

ايووووووووه يا احمد عبدالحكم الموضوع والصورة حته من مصر يا عبدالحكم

فكرتني بميكروباص 15 مايو حلوان

يلا بينا نغني لمصر في موقف ميكروباصات مصر يا حبايب مصر

مصر هي أمي .. نيلها هو دمي

شمسها ف سماري .. شكلها ف ملامحي

و إن كان لوني قمحي .. ده من فضل مصر

ما تلاقيش مثالها .. ست كل عصر

عشة جنب نيلها .. تسوى ألف قصر

ولا وردة بلدي .. فيها عطر مصر

ولا سحر مصر .. ولا جو مصر

ولا .. ولا .. ولا

ده شئ ملهش حصر

.. روحوا زوروا مصر

و إنتوا تعذروني .. لما أقول يا مصر

مصر .. مصر .. مصر

فاتك نص عمرك ياللي ما شفت مصر

ده التاريخ ف مصر .. و الهرم ف مصر .. و الكرم ف مصر

و الحلوين ف مصر .. و الجدعان ف مصر

ادوني عصاية .. أرقص رقص مصر

.. روحوا زوروا مصر

و انتوا تعذروني .. لما أقول يا مصر

مصر بلد الامن والامان

أرسل هذا التعليق بواسطة : ابو تريكة

زمان

ده التاريخ ف مصر .. و الهرم ف مصر .. و الكرم ف مصر

و الحلوين ف مصر .. و الجدعان ف مصر

والان

لايوجد كرامة لمواطن مصرى فقير يعذب فى كل شئ حتى فى اقسام الشرطة اللى المفروض اللجوء لها فى وقت الشدة النهاردة التعذيب فيها جهارا نهارا بعملية ممنهجة وعلى علم ومسمع من وزير الداخلية الخنزير حبيب العادلى الذى لا هو حبيب ولا هو عادلى والسيد الكلب احمد نظيف الذى لا هو نظيف ولا حاجة دى اوسخ واغبا خلق الله والسيد رئيس الجمهورية والسيد ابن رئيس الجمهورية الخنازير وعجبى على ام الدنيا عجبى عليكى يا مصر

كان عندى ميكروباظ - وعلية العوض

أرسل هذا التعليق بواسطة : مقهور

اتغربت كتير - وعلشان الميكروباظ فرشوا الارض لى حرير - وما فيش فايدة اللا هو مفيش فايدة

دخلت شريك فى ميكروباظ وقلت الهط شوية زى الناس

لقيت الميكروباص فى المركز بتاعى فى فرشوط بيعدى على 3 نقط مرور على الطريق - وكل نقطة مرور لها شهرية معلومة مدفوعة

وصول المخالفات والباشويش لة شهرية وبيحلف بالطلاق انة بيلم الشهرية من الميكروباظات ويعطيها للبية المأمور وان البية المأمور بيقسم الحصيلة على الضباط والرؤوس كلها على حسب الرتبة فى المركز

وفية ولد ارباب سوابق سابق ومسجل خطر بيقعد فى الموقف علشان بيطلع الكارتة او البون ولة نصيب معلوم قبل قيام اى تحرك للزفت الميكروباظ

والسيد ضابط المباحث فى المركز عامل جدول نبطشية بالترتيب لكل ميكروباظ فى الموقف انة يبات ليلة بالسواق قدام المركز علشان البية ضابط المباحث لما يحب يطلع تفتيش على القهاوى فى القرى او يزبط مخالفين او متهربين من دفع غرامة الدودة او عليهم غرامة ضريبة اطيان او بقال علية غرامة مخالفة والضابط عايز يحصلها يقوم علشان السرية المطلقة ما يطلعش بعربية الميرى بتاع المركز ويطلع بالميكروباظ هو والعساكر فى انصاف الليالى ويهاجم البيوت لتحصيل الغرامات ويقتحم البيوت علشان يقبض على الناس علشان عليهم غرامة

والسيد الميكانيكى واخوة الكهربائى وسمكرى السيارات كل دول لهم دخل من الميكروباظ

برضة يا اسيادنا سواق الميكروباظ معذور

عايش دايما فى توتر

وفى الاخر

قمت بقيادة الميكروباظ بتاعى ورميتة فى اقرب ترعة وقلت حادث وبعتة خردة ومن يومها وانا اعرف انام بالليل زى بقية البشر

الله يكون فى عون العبد ما كان العبد فى عون اخيه

أرسل هذا التعليق بواسطة : almalk

دى قصة حقيقية هو ده الى بيحصل فعلا

بس انت نسيت حاجة مهما ياحمد

ان السائق مبيوصلش الركاب الى اخر الخط

ولاكن السائق بيقسم الخط الى مراحل علشان يزود الاجرة

الله يكون فى عون الشعب المصر

لالا

أرسل هذا التعليق بواسطة : بودى

للاسف نسى الكاتب ان يذكر انه اختلس هذه المقالة

يمكنك بكل بساطة ان تذهب الى جوجل وتكتب عنوانها او اى جزء منها وستجدها على المنتديات بتاريخ قديم للغاية

تحياتى

هههههههه اكيد الخط اللى بتتكلم عليه دا خط وراق مناشى

اسالنى انا دانا عايشه ف المواصلات 24 ساعة

مشكور ع المقال وننتظر الزيد