ع الكوبري.. أتنين أتنين
"سوق بينا يا أسطى على الكورنيش ناكل درة ونشرب مانجه"..
إحدى الأغنيات التي تعكس صورة الكورنيش – والكباري طبعا- في مصر، لكن بتعديل بسيط .. فبجانب الدرة يظهر الترمس، وحمص الشام، والشاي، والحاجة الساقعة.. وتختفي المانجه لأن سعرها غالي، وبالطبع لا تتماشى مع طبيعة المكان ذو الطبيعة الرخيصة أو المجانية!
فبعد أن أصبح من الصعب على جيب أي شاب الجلوس مع حبيبته في أي كافيتريا هادئة، أصبح الكوبري والكورنيش هما قبلة العشاق.. "ميه وهوا ووجه حسن".. ومش مشكلة ممكن استحمال "غلاسة" من يفسد عليهم لحظاتهم الرومانسية .. باعة الورد والفل أو الترمس..
حيلة للهروب
"مكان العشاق الغلابة" هكذا وصفت "إيمان" الكورنيش، وقالت "اتفقت أنا وخطيبي منروحش كافيتريات مرة تانية، بعد ما دفعنا في مرة واحدة 87 جنية!!، بنيجي هنا على الكورنيش لأن مينفعش نصرف كل فلوسنا على اللقاءات، المفترض إننا عايزين نجهز شقتنا".
أما "سعيد" خطيب "إيمان" فقد ابتكر حيلة للتهرب من إلحاح الباعة الجائلين فيقول "لما بييجيلي واحد من دول بعمل حاجة بسيطة قوي، باخده على جنب وبقوله أنا مش معايا فلوس وبلاش تحرجني قدام خطيبتي، هنا يتركني البائع ويمشي، ويتركنا غارقين في ضحكاتنا على هذه الحيلة".
المكان المناسب
"ريمون"، أحد رواد الكورنيش بشكل دائم، حيث يرى أنه المكان المناسب للقاء خطيبته حتى ولو كان يعاني من عيون المارة، يقول: "أسعار الكافيتريات ارتفعت جدا، وأنا مرتبي ميقدرش يتحملها، وخاصة أننا مازلنا مخطوبين ومحتاجين نوفر عشان جوازنا، أما الكورنيش فلا يكلفنا غير كام جنية، بس المشكلة الوحيدة فيه نظرة الناس عليك أنت وخطيبتك وانتوا واقفين، والناس اللي في العربيات ممكن يشتموك بصوت عالي وهم ماشيين"، خطيبة "ريمون" ورغم كل هذه الأشياء وافقت على كل ما قاله، والسبب التوفير من أجل عش الزوجية!.
النقاب أيضاً كان موجوداً على الكوبري، فضمن الثنائيات التي اصطفت على جانبيه، وقفت فتاة ترتدي نقابا مع شاب، حاولت الحديث إلى الشاب إلا أنه رفض الحديث إطلاقا بدعوى إنه "مينفعش" و "مش عايز أتكلم مع الصحافة"، بينما ارتبكت الفتاة بشكل كبير وأدارت وجهها إلى الناحية الأخرى!!.
"ده ابتزاز"
"الكل يتعامل معنا وكأننا بنعمل حاجة غلط والمفروض نديلهم رشوة عشان يسكتوا"!، هكذا تحدث إلينا "أحمد" بغضب شديد، فقبل أن نتحدث معه مباشرة، كان يرفض بشدة شراء وردة من أحد الباعة على كوبري قصر النيل وبالفعل نجح في ذلك رغم إلحاح البائع، يقول: "برفض أشتري حاجة، لأني بحس إن ده ابتزاز، بيتكلموا معايا ويحسسوني إني بستخسر أشتري وردة لخطيبتي وأنا مش بحب الأسلوب ده، أنا ممكن أشتري لوحدي، إنما بالأسلوب ده لا".
ورغم الرومانسية التي يشتهر بها الكوبري قصر النيل إلا أن "أحمد" أكد لنا أنه لا يحب أن يأتي إليه.. "بقيت بكره الكوبري والكورنيش من المعاملة اللي بيعاملونا بيها عليه، و لولا أن خطيبتي هي اللي بتطلب بإلحاح إننا نتمشى عليه مكنتش جيت"!.
على العكس كان "خالد"، فهو "بيشتري دماغه"، يقول: "أنا فعلا بحب النيل، وبحب أتمشى عليه وخاصة بالليل، كل ما في الأمر إني بشتري دماغي، بشتري وردة وكيس ترمس وخلاص، وقتها مفيش حد بيغلس علينا وبقدر أقف أنا وحبيبتي على راحتنا".
"مبقاش في أخلاق"
"هو حضرتك صحفي يا أستاذ" هكذا سألتني إحدى السيدات التي كانت تسير بصحبة ابنتها، وعندما أجبتها بالإيجاب قالت لي: "طب اكتبوا عن المناظر اللي موجودة على الكورنيش دي، مبقاش في أخلاق ولا أدب، البنت من دول بتخرج من ورا أهلها عشان تقابل الشباب من غير أي رقابة عليهم، إحنا في مصر مش أجانب عشان يقف الولد جنب البنت بالشكل ده ويمسك إيديها".
كلمات هذه السيدة أثارت أحد الشباب الذي كان يقف بالقرب منا، فتدخل في الحديث قائلا: "الحب مش حرام، ولو كان أهلنا بيسمحوا لنا إننا نعبر عن مشاعرنا بشكل طبيعي، كنا اتكلمنا قدامهم واتقابلنا قدامهم، بس للأسف ده مش بيحصل، ده غير طبعا الطلبات اللي ملهاش أخر اللي تواجه الشاب منا أول ما يروح يخطب الإنسانة اللي بيحبها، وبالتالي مفيش قدامنا غير إننا نتقابل على الكورنيش أو الكوبري، وده مش غلط لأننا واقفين قدام الناس كلها ومش بنعمل حاجة غلط".