عمرك كنت كوبري؟!

أكيد لا نقصد الكوبري اللي بيوصلنا من مكان لآخر.. ولكن الكثير مننا يستغل شخص ما يعرفه لتحقيق حاجة في دماغه، يعني "بياخده كوبري" لحد ما يحقق اللي عايزه.. علاقة عاطفية، جوازه، شغلانة، تعارف..

الكوبري قد ينجح ويكون مفيد، وأحيانا تانيه بيقع، فنشوف كوبري بديل علشان يكون "واسطة".. وساعات يستغلك الكوبري وتكون العلاقة في اتجاهين ways2 ..

كباري للزواج

تقول مني عبد الله: "كانت لي صديقه أحبها جدا ولم تكن مرتبطة، وكان أخويا بيدور عن عروسة، فقمت أنا بالواجب وعرفتها عليه، فأعجب بيها جدا وتعرفوا أكتر علي بعض وأتخطبوا، وطبعا أخويا من ساعتها بيعاملني أحسن معاملة لأني كنت أنا السبب أو "الكوبري" اللي وصّله لفتاة أحلامه".

مني أحمد، تحكي لنا عن صديقتها التي كانت تكره الزواج ومش بتفكر فيه، لإيمانها أن كل الرجاله خاينين،وكان كل ما يتقدم ليها واحد ترفض بشدة، على أساس أنه أكيد بعد شهر من الجواز هيخونها!، تضيف: "أمها كانت تعاني من تفكيرها، فطلبت مني أن أعرفها علي حد يقنعها بأن أكيد مش كل الرجاله كده، وبالفعل عرفتها علي قريب لي كان بيدور علي عروسه، وأعجبت به مع حذر شديد، ولكنه أستطاع أن يغير تفكيرها، وهكذا كنت أنا وسط خير بينهم".

كباري جامعية

أحمد إسماعيل، يقول: "في الكلية أتعرفت على بنت في مرة، وكانت لها أخت في نفس سني، فطلبت منها تعرفني علي أختها، ولكن صدمت عندما جاء ردها "هو أنا كوبري"، طبعا نفيت بشدة لكن لم أمل من إلحاحي عليها وبعد معاناة وافقت وبالفعل أختها زوجتي الآن".

ويقول أيمن إبراهيم: "واحد زميلي في الكلية حسيت أنه بيتقرب مني علشان يعملني كوبري علشان أعرفه على أصحابي البنات، هو الصراحة كان مؤدب ومتفوق في الدراسة، فقلت أعرفه على صحابي وأستغله في المذاكرة، وفعلا بقينا كوبري ways2، أعترف أنه ساعدني كتير وأنا برده اللي معرفه علي خطيبته الآن".

وتقول شريهان أحمد: "مرة كنت خارجه أنا وواحدة صاحبتي، وقابلت زميل من أيام الدراسة، عرفته على صحبتي، وبعد كده كان كل يوم يكلمني يقولي عايز أشوفكوا، وفعلا شوفناه مرة، ودلوقتي هما مخطوبين، وعلشان يردوا الجميل للكوبري اللي عرفهم ببعض، عرفني زميلي على أخوه، وفعلا تمت خطبتنا".

كباري أخرى

الأمهات برده ممكن يكونوا كوبري، فالسيدة مني حمدي، تخبرنا قائلة: "أعتقد أني دائما كوبري عندما يكون أولادي عايزين فلوس من أبيهم ومتخانقين معاه، فباخد أنا وأديهم بس من غير ما يعرف طبعا، وأحيانا بكون أنا اللي متخانقة معاه وهما اللي بيكونوا كوبري وبيجبولي فلوس".

بسنت محمود، مهندسة، تقول: "في يوم استضفت مجموعة من الناس للمناقشة في مشروع جديد وبعد ما عرفتهم ببعض واتفقنا علي أساسيات المشروع، اتصلوا بي للاعتذار عن المشاركة في المشروع، ولكن بعد شهر اكتشفت أنهم عملوا نفس المشروع مع بعض اللي كنت أنا مقترحاه، فأحسست وقتها أني كوبري!

وأنت .. عمرك كنت كوبري؟!

0d33

حلو موووووووووت

أرسل هذا التعليق بواسطة : مروة عبد الفضيل

حلو يا رنا الموضوع ده بجد يجنن وانتى عارفه شعوري من ناحية الموضوع ده بالذات وبلاش نسيح بئه ادام الناس المهم بجد الموضوع حلو مووووووووووووووت ومستنين مواضيع منك تكون جامده كده