آسف على الإزعاج.. أسفك مقبول!

عندما انتهى المشهد الشهير (إحنا في زمن المسخ) في فيلم عمارة يعقوبيان، تساءل الجمهور والنقاد، لماذا أضاع عادل إمام مشواره الفني في أفلام الكوميديا، ولم يقم بصناعة فيلم درامي يظهر فيه مواهبه الحقيقية.. يبدو أن أحمد حلمي فهم هذا الدرس مبكراً، وقدم فيلماً درامياً.. سيكون تاريخياً ومحورياً في مشواره.

كل المؤشرات كانت تؤكد أن أحمد حلمي لا يمكن أن يجازف أبداً في هذا الوقت الذي تتشكل فيه نجوميته ويتنازل عن تقديم فيلم كوميدي صافي في موسم الصيف الساخن، لكنه وبكل جرأة خرج على جمهوره بفيلم (آسف على الإزعاج) الذي سالت فيه دموع المشاهدين في عدد من المشاهد شديدة التأثير، قدم فيها حلمي تمثيلاً عالمياً نال تصفيق الجمهور عدة مرات أثناء العرض.

زي وشكم

سينما (أوديون) كانت هي ملاذنا الوحيد، لمشاهدة فيلم أحمد حلمي الجديد، فهي تعتبر من أرخص دور العرض. دعك من الجنيهات الثلاثة التي "لطشها" موظف الشباك لقوله: "عشان أجيب لكم مكان حلو زي وشكم".. رضينا بدفع رشوة رغماً عن "وشنا"؛ لأن العرض كان على وشك البدء.

3 دقائق كانت هي مدة إعلان "بحر النجوم" الذي شهد تصفيق وصفافير الجمهور لمشاهدة هيفاء وهبي وأخواتها على الشاشة الكبيرة، وبعدها بدأ الفيلم..

استراحة:

أن تقوم بتحليل عمل سينمائي، أمامك خيار من اثنين: إما أن تكتب لمن شاهدوا العمل فتحكي وتحلل القصة، فتنجح بكل "بجاحة" في "حرق" قصة الفيلم، وإما أن تكتب لمن لم يشاهدوا الفيلم، و"تمشي على طراطيف صوابعك" حتى لا يغضب منك هؤلاء.. سأضطر هنا إلى أن أكون حريصاً وأرضي الطرفين.

أيمن وخالد

مهما أخبرك الناس من أن قصة (آسف على الإزعاج) مستوحاة من عدد من الأفلام الأمريكية، فلا تلق بالاً بذلك، فحتى لو كانت قصة الفيلم "مسروقة حرفياً"، وهو ما لم يحدث بالطبع، فيكفيك أن تستمع بأداء حلمي والعملاق محمود حميدة والقديرة دلال عبد العزيز اللذين جددا شبابهما في هذا العمل.

ففي التجربة الثانية للمؤلف أيمن بهجت قمر، نجح في صياغة عمل اهتم فيه بكل تفصيلة، كعادة أفلام أحمد حلمي، فالسيناريو رغم تعقيده، كان بالغ الإحكام، وإذا فكرت مراراً في أي تفصيلة ستجد أن مبررها الدرامي موجود.

ولكن حبكة السيناريو ما كانت لتتم بهذا الإتقان لولا الإخراج. وهذا له حكاية أخرى، فخالد مرعي ينفذ ثاني أعماله بعد (تيمور وشفيقة)، وهو في الأساس من قام بمونتاج 13 فيلماً من أجمل ما قدم في السينما المصرية في الأعوام السابقة، ومنها "عمارة يعقوبيان – ظرف طارق – بحب السيما – تيتو – أيام السادات - سهر الليالي – جعلتني مجرماً".

خالد الذي يجلس طويلاً أمام ماكينات المونتاج بعد تصوير هذه الأفلام، رأى نقاط القوة في أبطال فيلمه من خلال خبرة الأعمال السابقة. استخرج لحظات صرامة وشموخ محمود حميدة في "بحب السيما"، واستحضر الجانب الدرامي في أداء أحمد حلمي في "ظرف طارق" و"جعلتني مجرماً"، وقام بصناعة فيلم جميل يستحق المشاهدة عدة مرات.

تابوهات:

يبدو أنه موسم كسر التابوهات..

أولاً: تسويقياً: أحمد حلمي يقدم فيلماً درامياً.. والمفارقة الثانية أنه يقدمه في فصل الصيف.. المفارقة الثالثة أنه جاء بعد أسبوعين فقط من نزول فيلم عادل إمام وعمر الشريف (حسن ومرقص)!

ثانياً: فنياً: رغم أن أحمد حلمي يحرص دوماً على اختيار أدوار تكون قريبة من المجتمع، (مندوب إعلانات في جعلتني مجرماً)، (موظف في شركة محمول في ظرف طارق)، (عاطل عن العمل في كده رضا)، إلا أنه أقدم على مجازفة كبيرة عند اختيار دور مهندس طيران من عيلة القوم، ينفق ببذخ، فوالده طيار ووالدته مديرة بنك، إلا أن الحبكة الدرامية ستجعلك تتعاطف معه وتنسى الترف والنعيم الذي يعيش فيه.

ثالثاً: سياسياً: أن يتم ذكر الرئيس مبارك في أي فيلم فهذا أمر معتاد.. أن يرسل بطل أي فيلم خطاب إلى الرئيس، فهذا أصبح عادياً بعد (جواز بقرار جمهوري)، ناهيك عن فيلم طباخ الريس (الذي لم يظهر فيه مبارك).. بعيداً عن كل هذا، ظهر أحمد حلمي في العمل وهو في مشهد جرئ أمام القصر الجمهوري بعد أن أرسل 1300 خطاب.. بلا مجيب!

أبيع يا باشا!

احتار (حسن) أو أحمد حلمي في نهاية العمل، عندما وُضع بين خيارين: هل يبيع مبادئه أم لا؟.. اختار (حسن) أن يبيع (ولكن ليس مبادئه).. فعلى الجميع أن يسأل نفسه: ماذا لو كان مكانه؟

(حسن) أحب وطنه وأحب المكوث فيه.. لكن كثيراً منا لو كان مكانه لاختار نصيحة أبيه ولباع أفكاره ومبادئه لأول من يدفع.. فلا أحد يستطيع أن يأكل "هوية" أو أن يشرب "انتماء".. لذلك أحب أصحاب العمل أن ينتهي العمل نهاية سعيدة لكل الأطراف.. وقد كانت سعيدة بحق، فقد ظن كثيرون أن مشهد النهاية هو مشهد الذروة في الفيلم.. ولكن حمداً لله لم يكن!

(حسن) كتب في خطابة الأخير للرئيس: آسف على الإزعاج.. ونحن نرد نيابة عنه: أسفك مقبول.. ويارب تزعجه دايماً!

9c7f

فيلم اكثر من رائع

أرسل هذا التعليق بواسطة : محمود محمد

الفيلم بجد فوق رائع وبيناقش مشكلة بجد ناس كتير بتبص ليها بإستهزاء وسخرية بينما هي مشكلة حقيقية وبتحصل بحق وحقيقي ، انا شخصيا اعرف شخص مر بالمشكلة دي ، حاجة مؤلمة فوق الوصف بجد ، لكن المشكلة إن الناس اللي داخلين الفيلم عايزين يضحكوا وبس ، علشان كده الناس كانت عمالة تشتم في الفيلم ، وانا اتخنقت اوي لدرجة إني زعقت مع واحد في الفيلم ، انا عمال أدمع وهوا قاعد ورايا عمال يألس ويتمسخر ، بجد فيلم هزني من جوة وفيه جرعة ضحك معقولة برده ، لكن فيلم انساني جدا وخصوصا لو انت عندك إحساس فعلا إن دي قضية حقيقية ومشكلة واقعية جدا وممكن تحصل لناس كتير ، انا احيي احمد حلمي أنه عمل الفيلم ده واحييه إنه اكتشف نفسه وما كررش نفسه تاني ، الف تحية بجد لأحمد حلمي

موضوع جامد مووووووووووووت

أرسل هذا التعليق بواسطة : مروة عبد الفضيل

استاذ على بجد طريقتك النقدية تحفه وهايلة بعد كده بئا هستطلع رأيك في الافلام كلها ومش هحتاج خلاص اراء نقاد زيتنا في دقيقنا وفرت والله يا استاذ علي مكالمات واتصالات

كده لازم أروح الفيلم

أرسل هذا التعليق بواسطة : أول مرة يعلق

أنا أول مرة أعلق بس انت اضطرتني يا عم علي ... أسلوب جميل وخلتني لازم أروح الفيلم .. بس لو ماعجبنيش هتدفع ومش اللي انت دفعته في أوديون لأني هروح جلاكسي عارف جلاكسي بكام ..

لأ ..كده تدخل في الكتابة النقدية عدل

أرسل هذا التعليق بواسطة : أحمد عبد الحميد

بداية أسلوبك في العرض بسيط ورائع يا حاج علي ..ما شاء الله

أحمد حلمي لو اتجه في المشوار ده انه يكون لأفلامه ( حتي ولو كانت أفلام كوميدية ) قضية هتبقي إضافة ليه هايلة

أحمد عبد الحميد

aa_hameed@hotmail.com

تحية للعملاق الجديد احمد حلمى

أرسل هذا التعليق بواسطة : محمد مصطفى السيسى

انا دخلت الفيلم وانبهرت

لأ انبهرت دى كلمة يسيطة

أحمد حلمى ياجماعة ممثل دراما تراجيدى تقيل قبل ما يكون كوميديان ده حسيته فى مشهد فى فيلم صايع يحر اللى متابع سينما بجد هيفتكر المشهدز

تحية كبيرة لحمد حلمى لكتر من سبب:

اولا انه اكتشف الطريق اللى كنير خايفين منه وهو اكتشاف الذات

ثانيا انه طلع الحمد لله عند تةقعاتى وامنياتى من زمان انه يقدم فيلم رومانسى او تراجيدى بيور والحمد لله أجمد حلمى حققلى أمنيتىز

أحمد حلمةى عغلامة مضيئة فى سينما الزمن ده يارب ربنا يكرمه وياخد المكان الصح داما

أخيرا انا بطلب منه انه ما يفكرش غير فى حاجة واحده هى انه يعمل السينما اللى عايزها ويجدد ويغلمر بس اهم حاجة يعمل الفيلم صح من غير غلطة وأكيد دايما جمهوره هيفضل وراه وهيكسب جمهور جديد كمان

تحية كبير ة ليك من كل جمهورك فى المنصورة بجد الفيلم عاجب الناس هنا اوى

فيلم عااااااااالى جدا

أرسل هذا التعليق بواسطة : مروه احمد

اولا احب احيك بجد يا استاذ على الكلام حلو اوى وبجد اسلوب رائع

بالنسبة للفيلم بجد انا بشكر احمد حلمى على الفيلم ده بجد فيلم ملهوش حل انا فعلا عيطت كذا مره فى الفيلم بالرغم من انى بعرف امسك نفسى ادام الناس بس المره دى مقدرتش تمثيله بجد فوق الوصف..وفعلا ناس كتير كانت داخله تضحك وبس وعشان كده معجبهومش...هى المشكله الوحيده كانت فى الاعلان انه اثبتلهم اكتر انه كوميدى...بس فى الاخر بجد فيلم عااااااااااااااالى اوى اوى ولازم ادخله تانى ان شاء الله

اسف على الازعاج

أرسل هذا التعليق بواسطة : آسف على الإزعاج

اسف على الإزعاج فيلم جامد جدااااااااااااااااااااااااااا

شكراً أحمد حلمي

أنصح كل الناس تدخل الفيلم.. شكراً أيمن بهجت قمر

شكراً خالد مرعي

آسف على الإزعاج يا إخوانا

اسف على الازعاج

أرسل هذا التعليق بواسطة : اسف على الازعاج

أنا دخلت الفيلم.. وهو على فكرة حلو أوي.. ونفسي أدخله تاني لكن للأسف السينمات غالية أوي.. هاستنى لما يبقى معايا فلوس وهاخشه مرة تانية

اسف على الازعاج جامد جدا وعايز أقول إن أحمد جلمي تفوق على نفسه في الفيلم.. وعايز أقوله شكراً على المجهود اللي عملته في الفيلم أنت وكل فريق العمل

اسف على الإزعاج هو فيلم الموسم.. وكل عام وأنت بخير يا عم بوشكاش ودبور والبيبي دول وحسن ومرقص.. اسف على الازعاج هو التووووووووووووووووب

من حبى فى احمد حلمى نفسى اجوزة

أرسل هذا التعليق بواسطة : سهر

احمد حلمى نجم هايل لة مستقبل انا فى اى فيلم بالفة بافتكرة والفيلم الجديد دة هيضرب وهيكون من الافلام التاريخية انا نفسى اقابلة وامثل معاة لانة بحد ممثل تحفة الفيلم تحفة والناس الهبلة مش عوزين يتفهمو الموقف كويس هوزين يضحكو وخلاص فى البلا الاخرى الناس بتقدر الفن الحقيقى هنا عوزين محمد سعد بلد تحب الكوسة

فيلم جميل

أرسل هذا التعليق بواسطة : سلمى

الفيلم جميل جدا ما تحس معاه بوقت شكرا جدا يا علي ان انت شجعتني ادخل الفيلم بمقالاك الجميل

عالمى يا حلمى !!

أرسل هذا التعليق بواسطة : فؤاد

احمد حلمى عمل فيلم مينفعش حد يقول عليه فى غلطه

ايمن بهجت : نفسى اعرف دماغه بتروح كده ازاى !!

خالد مرعى : مخرج عبقرى .

محمود حميده : الراجل ده استاذ و طبعا مش محتاجين نقول عليه كده .

الفيلم رووووعه و لازم كل الناس تشوفه .

أسف على الازعاج

أرسل هذا التعليق بواسطة : أحمد بيرم

فيلم روووووووووووووووووووووووووعة وقصة جديدة عن السينما المصرية

مش ممكن

أرسل هذا التعليق بواسطة : اسامة المصرى

واللة فلم عالمى واحمد حلمى ممثل يمكن يغير شكل السينما المصرية للعالمية الحقيقية لان فضل يمشى فى سكة صعبة يمكن عادل امام نفسة ميقدرش يمشى فيها واحترافية تمثيلة للدور دة كانت هايلة واعتقد انة لو دخل اوسكار احسن فلم اجنبى 2008 ممكن يعمل حاجة

الفيلم الأفضل

أرسل هذا التعليق بواسطة : العمـــــــــــــــدة

أفضل أفلام هذا الموسم على الإطلاق ولمواسم قادمة أخرى فظهرت قمة إبداع احمد حلمي ولم نجد أي نوع من أنواع الابتذال كما هو معتاد ان يشاهد في أفلام البيزنس

لقد أثبت أحمد حلمي وتحدى الجميع أنه بإمكانه عمل فيلم درامي خالص مع بعض المواقف الكوميدية العابرة التي لم تؤثر في درامية الفيلم بل أثرته وأضافت عليه جو من الفكاهة في بعض اجزائه

أقول وبكل ثقة ........ أحمد حلمي ............ شكرا على الإزعاج

مش مصدقة نفسي

أرسل هذا التعليق بواسطة : مريم

اللي كتبته يا علي حلو وكل حاجة وأحلى مافيه إنه ماحرقش الفيلم لأي حد بيقراه... ودي أكتر حاجة بتكرهني في النقاد والتحليل اللي بيكتبوه عن الفيلم... واللي المفروض إن الواحد يقراه علشان يا يتشجع يدخل الفيلم يا ما يتشجعش ولا يتعب نفسه ويدفع فلوس على الفاضي

بحمد ربنا إني مقرتش أي شيء عن الفيلم قبل ما أروح النهاردة.... الفيلم بجد معدي وموضوعك ما أشبعش عندي الرغبة في التعبير عن كل اللي حسيته ناحية الفيلم... أحمد حلمي فعلاً عبقري.. والفيلم فيه قيمة عالية جداً... مش حقدر أقول أي شيء أكتر من كده بس مش خسارة تذكرتين سينما في الفيلم ده علشان لازم يتشاف مرتين.