ثم تمتم: مفيش فايدة!

أحمد عبد الحميد – مساحة رأي – ولاد البلد – عشرينات – 18/8/2008

رأيته وهو جالس على القهوة كعادته.. يحتسي كوب القهوة السادة الذي لم يغيره منذ سنين عدة..

نفس السحنة التي تحمل علامات القهر والإحباط والمرض..

الفشل الكلوي هد حيله..

وعمليات الغسيل الكلوي بيشحت علشان يعملها..

ابناه عادل ومجدي يجلسان بجانبه في البيت منذ أربع سنين بعد تخرج الأول وثلاث سنوات بعد تخرج الثاني!

ابنه الأكبر عادل خريج الهندسة، لم يجد إلا وظيفة مسوق أو مندوبات مبيعات.. ككل الوظائف الموجودة في السوق..

كانت كل مهاراته فنية..

كان بارعا جدا في مجال الهندسة.. لذا ود الالتحاق في وظيفة في مجاله.. يبدع فيها كمهندس لا كتاجر يلف ويدور طول النهار يسوق البضاعة الصيني "النص كم"، كما كان يقول دائما.

أخوه مجدي جاب من الأخر.....

باع دهب الحاجة والدته واشتري بيه (توك توك)

رغم حصوله على ليسانس الحقوق بتقدير جيد، كان يود الالتحاق بسلك النيابة وبعدها بالقضاء ليشارك مع القضاة الأحرار في وقفتهم ضد النظام الفاسد اللي خرب البلد

لكن ما باليد حيلة.. فقر أبوه وقعدته على القهوة من 5 سنين بعد طرده من الشركة في صورة "معاش مبكر" وعدم موجود واسطة حالا دون ذلك..

حاول أن أن يتدرب مع محامي، لكن كان بيطلع عينه ويديله في الشهر 150 هلفوت

كان ينفق على المواصلات والأكل بس "ييجي 200 جنيه"

"هو كده إن كان عاجبك.. سيادتك بتتمرن، و100 واحد زيك قاعدين على القهوة يتمنوا التدريب بتاعك ده".. هكذا قال له المحامي عندما طلب منه مجدي زيادة المرتب حتى لو 200 جنيه.

الحاجة أم عادل..

مستنية ربنا يفرجها على الحاج أبو عادل علشان يجيبوا موسم عاشورا للبت المتجوزة "يا دي الكسوف أهل جوز بنتي يقولوا علينا إيه.. مش كفاية الموسم اللي فات اتحججنا بموت واحد من قرايبنا".

اقتربتُ من الحاج..

لسه حاطط إيده تحت دقنه

"إزيك يا حاج.. عامل إيه؟!"

نظر لي بعينيه المحمرتين لا أدري من السهر، أم من البكاء، وهو يتمتم:

"مفيش فايدة"

ea76

ههههههههههههههههههههههههههههه

صورة واقعية لحالنا اليوم

نسأل الله العفو والعافية

تفاءلوا بالخير تجدوه

أرسل هذا التعليق بواسطة : أحمد زهران

بالرغم من براعة أخي أحمد في رسم هذه الصورة المكرورة من حياتنا إلا أنني لا أحبذ الخاتمة بقوله على لسان الحاج الكبير السن : \"ما فيش فايدة\" لأننا نعمق بذلك جراحاتنا ونقنع أنفسنا بأن الأمل غار في الأرض أو طار في السماء

وكنت أحب أن نذكر أنفسنا والناس بأنه لا يزال هناك أمل وتفاؤل ، فالتفـــاؤل يولد الأمــل، ومن الأمـــل يولد العمــل، ومن العمــل يولد النجــاح

التفاؤل هو الشعور بالرضا والثقة بالنفس والسيطرة على المشاعر المختلفة، وأعجبتني الحكمة البوذية التي تقول: \"إن لكل انسان شمسين: واحدة في السماء وواحدة بداخله، وإنه حين تغيب شمس السماء ويظلم الكون فلا يضيء للانسان سوى شمسه الداخلية، وإنه لهذا السبب لا بد أن يحتفظ بها متوهجة دائمًا في داخله\".

إن المتشائم لا يستطيع أن يمنع الأفكار السلبية من الدخول إلى عقله. ولكن يمكنه أن يمنع نفسه من أن يعيش عليها؛ فلماذا لا نحاول جميعًا أن نتحكمفي نفسياتنا ونسيطرعلى هذه الأفكار السلبية وتتفاءل. وكما قال الرسول الكريم: \"تفاءلوا بالخير تجدوه\".

اللهم سلم

أرسل هذا التعليق بواسطة : وجيه سعد

الحقيقة انه يوما بعد يوم يزداد اعجابي بالازهري الأديب الاستاذ احمد خاصة في هذا النوع من القصص المؤثر من حيث جودة المضمون وبلاغة العرض ولكني اضم صوتي الى صوت استاذنا الفاضل الاستاذ احمد زهران في ان نجيد العرض لجرحنا الاليم نعم ان نحسن نقل وشرح واقعنا المرير نعم ولكن ان نستسلم له لا . لان ترسيخ عدم الجدوى قطع للامل وتثبيط للهمم وتوقيف للعمل فاذا بنا بدلا من ان نحسن في نقل الصورة استفزازا للامكانات المعطلة والطاقات الخاملة اذا بنا نمرنها وندربها على القعود والسكون . انا طبعا أؤكد ان الاستاذليس مراده ذلك كيف وهو احد جزيئات هذا التيار الجارف الذي بدأ يسري في شرايين هذه الامة لتنتبه من غفلة وتتحرك من سكون

استدراك

أرسل هذا التعليق بواسطة : أحمد عبد الحميد

الأستاذين الجليلين رجال ا

أحمد زهران ووجيه سعد

شكرا أولا علي مروركما وتعليقكما القيم

ثانيا بالنسبة للنبرة التشاؤمية الموجودة بالقصة

لا يعني بالمرة فقدان الأمل في التغيير ، ونفض اليد عن الإصلاح ، أو القعود للبكاء والنحيب علي ما ألم بالأمة

وإنما القصة في النهاية تعري واقعا مؤلما يتم دفنه وطمسه أمام عنتريات رجلي الأعمال أحمد عز وهشام طلعت مصطفي ، وغلبة أخبار المناضلين الكرويين الحضري وأحمد شوبير ، ونزوات الفاتنتين المفتونتين هيفاء واليسا ، ,ومسلسلات المراهقتين أبدا ودائما يسرا والهام شاهين

أبقاهما الله ذخرا للفن الهادف وال‘لام المصري الرائد ...

القصة تحاول أن تضع في الصورة عم عاشور اللي بيقبض من الأوقاف 195 جنيه في الشهر وعنده تسع بنات ( الله أكبر ) ونفسه ومني عينه يجهز الكبيرة فيهم قبل ما يتفضح أمام خلق الله

بتحط في الصورة الست زينب اللي جوزها الفلاح اللي بيطلع علي الله بيشتغل بيوميه 25 جنيه وأخرة المتمة -علشان فلاح ومالوش تأمين - لم مرض الكبدي أصابه وهد حيله ماعرفش يتعالج علشان ماعندوش تأمين ولا معاش

القصة بتحاول انها تحط في الصورة اللي الزوم بتاعها ضيق أوي وما عرفش يشوف غير نزوات حسام أبو الفتوح مع دينا ، وألبوم تامر حسني الجديد والدعاة الجدد اللي مش بنشوفهم إلا في التكييف إنها تطلع

صبري حسن صاحبي اللي متجوز ومخلف ومعاه بكالورويس حقوق وشغال ب300 جنيه في شركة أمن طبعا بعد ما بيدفع 35 جنيه تأمين

القصة بتحاول انها تحط في الصورة صاحبي الشيخ عاشور اللي قاعد بيشكي ليا انه بيقبض 450 جنيه من وزارة الأوقاف

بيخلصوا في عشر ايام في الشهر رغم انه واخد ليسانس أصول دين بتقدير عام امتياز مع مرتبة الشرف

بتحاول انها تحط في الصورة تلاتة اربع اصحابي اللي مش عارفين يقبضوا من جريدة الدستور المناضلة 50 جيه علي المقالة في القوت اللي بيهبش صاحبها ألاف مؤلفة من الهب والفضة والقناطير المقنطرة من توزيع الجريدة وفلوس الإعلانات ( الاعلان نصف صفحة واقف ب80 الف جنيه )

علشان الناس تحسد وتقر وتنق زي ما هي عايزة ( هم بيتأثروا بحاجة )

أما عن اللتفاؤل

ربنا يسهل كده

واشوفكم راكبين

عربية رايحة فيصل وواقفة بيكم في نصف الشارع

ساعتها

هاتمحوا من القاموس اللغوي بتاعكم كلمة تفاؤل

شرفتم مقالي

ازيك يا احمد عبدالحميد

أرسل هذا التعليق بواسطة : مش سهير زكي ولا فيفي عبده

انت حضرتك قلت في مقال سابق

حتى وقت تخرجي منذ خمس سنوات من جامعة الأزهر بإحدى كلياتها العملية

حضرتك خريج كلية عملية على حسب قولك

ممكن تحكيلنا الظروف السعيدة التي القت بك الى عالم الصحافة

لا لا - فية فايدة

انتم فاكرين ان الشباب ماتوا لشعب تعدادة 80 مليون فية 30 مليون شاب مطحون

احنا بنجرب التغيير السلمى

اذا لم ينجح هنعمل زى شباب الاربعينات والحرب فى القناة وتحرير البلد

فية طرق اخرى للتغيير هييجى دورها1

انما للصبر حدود

صورة راااااااااااااااااااااااااااااااااائعة

ههههههههههههههههههههههه

بس هو دة الكتوب على اللى زية

بس هو هايعمل اية اذا كان مافيش شغل

دى حاجة تجيب المرض \\اؤيدك

ياحمد

فى الكلام دة

جامد

أرسل هذا التعليق بواسطة : علي حسن

قصة قصيرة جامعه لحالنا الباس نسال الله السلامة من هذا الزمان

بس النهاية في رايي ضعيفة عن الواقع لان المفروض الراجل يموت قهرا

لانه كان المفروض يفرح باولاده اللي هيسندوه في كبره بس للاسف

الولاد عايزين اللي يسندهم و يساعدهم في شغلهم و بعدين جوازهم

و لا عزاء للمصريين

الى الاخوة المعلقين

أرسل هذا التعليق بواسطة : مش حكرهك

يا جماعة الراجل كاتب كلمتين علشان خاطر يقبض منهم مبلغ يمشي بيه حاله

ما تعيشوش الدور يعني

بذمتكم فيه واحد عنده فشل كلوي بيقعد يشرب شاي على القهوة

ولا اهو بأه اكل عيش وخلاص

دا انت غلس أوي

أرسل هذا التعليق بواسطة : لأ هاكرههك

يا عم انت يا بتاع الشاي

يا غلس يا رخم

الرجل من زهقه

قعد ع القهوة

وشرب شاي بخمسين قرش سادة من غير حليب

وكمان ع النوتة

انت مالك انت

دا انت غريب وغلس بشكل يا أخي

سؤالي واضح

فيه حد يا ناس يا هو عنده فشل كلوي بيقعد على القهوة بيشرب شاي زي ما الاستاذ احمد عبدالحميد كاتب في مطلع المقال

سؤال واضح وعايز الاجابة عليه

اصل ممكن الواحد يضرب حجرين ماشي

يضرب سندوتشين مخ ماشي

يضرب كباية شاي ماشي

لكن يضرب مقال صحفي ما تنفعش معايا دي

فاكرني يا احمد

أرسل هذا التعليق بواسطة : محمد البربري

يا الروقان دا يا محترم والله اعنقد انك عبرت عن ما يجول فى خاطر كثير من شعبنا العجيب مش عايز اقول طيب وغلبان لاننا احنا بسكوتنا على ال بيعملة النظام منبقاش طيبين بل نبقى اى حاجة تانية غير موضوع طيبين دة عموما تهانيا لك يا حبيب قلبي فكل مقالة لك او قصة او اى شيئ تكتبة يستحق التهنئة وعقبال مااهنيك لما شعبنا يتحرك ويقول لالالالا طويلة الامد لحد ماالنظام يعدل الحال او يرحل ويسيبها لحد تاني يحاول ينقذ السفينة لانها بتغرق ... ودمتم

القصة معقولة لكن حكاية الفشل الكلوي دي هي اللي غيظاني

يرجى حذف السطرين دول

الفشل الكلوي هد حيله..

وعمليات الغسيل الكلوي بيشحت علشان يعملها..

شعب غريب

أرسل هذا التعليق بواسطة : وسام

إيه رأيكم إن شعبنا ضد نفسه لدرجة لا تتخيلوها.. مش بس ممتنع عن الثورة ضد الجور والفساد.. لأ وكمان تلقى الواحد يشرب شاي برغم إن عنده فشل كلوي.. تفتكروا الشعب بيحب الانتحار..

يا أخي دا انت تيجي في الهايفة وتتصدر

أرسل هذا التعليق بواسطة : احمد

سيادة اللوا أركان حرب اللي بيعلق علي موضوع الشاي ، كأن سيادتك ما عرفتش قبل كده ان تسعين في المية من المصريين اللي عندهم سكر مثلا مش بيبطلوا أكل محشي كل يوم خميس ، وضرب كنافة بسمنة بلدي في رمضان ، وشاي سكر زيادة بيحبسوا بيها بعد كل أكلة ، وقزقزة لبة كوسة وعباد ولب سوري وأحيانا حمص الشام في أي ماتش كورة حتي ولو كان بين قطبي الكرة المصرية سوهاج والسنبلاوين

الله ينور

قصه واقعيه لواقع نحياه

بل ويحدث ما هو اشد من ذلك

نسأل الله العفو والعافيه

وهو وان كان فى ظاهره يدل على التشاؤم الا انه يعكس الواقع بشكل كبير

فنحن لا نجد شخصا ما لديه كل هذه المشاكل ونراه مبتسم الثغر فرح الفؤدا

مرددا ( الحياه حلوه بس نفهمها الحياه غنوه ما احلى انغامهما )

واذا وجدنا شخص يفعل ذلك فلابد انه فقد عقله من هول ما يجد

القصه واقعيه وتحدث كثيرا ولست ارى لها نهايه افضل من ذلك

والا نكون بعدنا كثيرا عن الواقع

اما بالنسبه لمن يعيب فى كاتبها ويرى انه وعلى حد تعبيره ( كاتب كلمتين علشان يا خد بيهم .....الخ )

هذا ليس باسلوب رحمك الله !!

وان كنت ارى يا اخى ان هذه الصوره نراها جميعا ليل نهار فلما التهكم والسخريه !!!!

مع الاخذ فى الاعتبار ان شرب الشاى عاده اعتادها المصريون

ولو كانت نظرتك عميقه لما سخرت منه وقلت ذلك

فهو وان كان ينتقد الواقع الذى يعيشه هذا الرجل الا انه ينتقد ايضا

جهل هذا المجتمع وثقافته ازاء استعمال هذه الاشياء

فكثير منا نراه وقد استهلك المرض قواه الا انه لايزال يفعل ما يضره

ولن ابالغ اذا قلت انه احيانا يكون الانسان لديه سرطان بالرئه ولا يزال يدخن

وعجبي

تسلم الايادى