ولعت يا عرابي.. المحكمة

معرفش يضحك ولا يعيط.. سكت.. واتلقاها مذهول ووحيد.. والواد مشى بزهو يخوف..

منى سليم - مساحة رأي - ولاد البلد – 10/9/2008

حط طربوشه والساعة.. جمع رفاقه فى الساحة.. ومن فوق حصانه هتف في وش أبو بدلة إيافة: إحنا أحرار رغم أنفك يا سيادة.. الناس فرحت وبجد.. وقالت عرابي ده راجل وجاى يشد.. يشد يمكن.. تصدف وتعدل اللى مال واتهد.

أصحاب المعالي واللي جايين من البحار الأعالي.. ما عجابهومش الوضع.. يعني إيه حتة فلاح ومعاه شوية حواشي عايزين يغيروا البلد ويعدلوا البخت.. تماحيك ورا تماحيك.. وقف قدامها الوفي.. ومعاه كثير تانيين حلفوا يصدوا مين يعتدي.. ومن فوق طوابي إسكندرية كانت ثورة مش هوجة عرابية.. وفلاحة فى الصبحية واقفة على أول الطريق.. وقالت ياللي طالعين هناك خدوا البلح ده لعساكر الجهادية.. وعلى قلبكم وصلوا التحية.

لكن الخيانة فى طبعهم.. هم هم ما يتغيروش.. صف خامس دايما موجود يتفرج على المغامر اللى يفجر ومعاه شجعان وبساطة ييجوا يركبوا ويهدوا كل اللى كان.. ووقع البطل وصحابه من فوق التل.. والسكاكين كترت..والمحاكمة اتنصبت.. وقالوا اعتذر!.. يعتذر لمين وعلى إيه.. على أنه صحا شعب وقال للعدو: إنجلي.

لكن البني آدم تعرف معدنه.. مرة أصلب من الحديد ومرة أخف من قشرته.. والراجل جه فى لحظة وخانه وعده وصعب عليه منظر عساكره والدم اللى ساح.. الحقيقة تاهت من بين إديه.. وقال في نفسه دمرت الناس ووقفت فى وش بابور جاز.. وخبى المقولة أنه كان صوت كرامة ومعلمة.. ولأجل يحل القضية.. قام اعتذر.. يومها بس انهزم..يوم ما تبنى نظرية عدوه.. ويومها انكسر.. وانحسر.. وكان النفي من قبل السفر.

رجع بعد ما فات عشرين صيف.. رجع ورفيق عمره مشلول وكفيف.. الضعف ناخر عظم الجميع.. وهو شاب وعمره ما عاب.. ولا كان غاوي نجومية.. وعشان كده.. وحده انزوى.. وفي يوم قال أروح أصلي عند سيدنا الحسين.. لاجل يسمع شكوتي ويحس بكسرة نفس الثورجية.. لكن السنين غيرت كتير..

جه كامل ووطنيين واتغيرت الرواية من ثورة لهوجة ومن زعيم لركوبة.. حماسهم خانهم وقاله عنه خاين وضعيف.. ببساطة كده.. طاب سافر وعيش.. واسألأ يا ناس من منا لحظة ضعفه ما بتجيش.

لكن مين يسمع من غير ما يجرب .. ده كان لسه واد شاب صغير فى العشرين .. شاف الشيخ قاله: عرابي؟.. معرفش يضحك ولا يعيط.. سكت.. واتلقاها مذهول ووحيد.. والواد مشى بزهو يخوف.. مشى بعد ما تف في وش الراجل اللى يوم نادوا له يا ريس وغنوا له.. لو لا أنت يا عرابي.. كان خرابي.

والولد يبعد والشيخ يغوص.. يغوص في نفسه وينهال فوقها التراب.. يروح لمين ولمين يشتكي.. جري واستخبى جوه بيته.. يومين تلاتة وكان الخبر.. راح عرابي.. مات عرابي.. راح بعد ما انحسر.

يا حسرة قلبي عليك يا عرابي.. يا لحظة ضعف عايزة أمسحها عن قلبك قبل ما امسح فعلة الواد الشبابي.. لحظة ضعف وشربت القهر.. ليه يا ناس غاويين دمار.. مهما كانت قولة اعتذار.. تيجي إيه دى فى التاريخ في وقفته جنب الطوابي في صرخته علشان ثوار.

وفاتت جنازته.. ومن قدام القبة اللي جواها كانت المحكمة.. فات وعدي.. ولا حد هدى.. فيه واحد مشي أو واحد بك؟.. يااه بقى.. يلعن أبو دي محكمة جوه مبنى شورته بقت مهببة.. آه مهببة.. وخلينيي أحكي لك على اللي فاتك من الملحمة.

اللي ما تعرفوش إن فات ييجي 100 سنة ومن كان يوم بس.. كنت بمر من هنا.. من مكان الذل اللي سموه محكمة.. الساحة ولعت.. قالوا الإهمال السبب.. قالوا فعل فاعل وهرب..

استحالة أقدر أجاوبك من هنا.. أصل هنا بقى الحال يحير مفيش إجابة مفيش نيابة.. هنا غش وخيانة وحرفنة.. يتهموا السمك بالقتل ويفكوا عن قاتل الألف حد المقصلة.. مش برضه حاجة مسخرة.. حاجة تكسف حاجة شيطنة فى التجويع والنصب والفتونة.. هنا حاجة ما اتكررتش ييجي من مية متين سنة.

وعشان أنا.. رافضة أعيش زي اللي عايشيين هنا.. أفتكرتك بسرعة.. وفرحت.. وقلت.. أنا أعرف النار دي جت منين.. أتلفتولي وجهزوا الحديد.. قلت ياللي ما بتقروش تاريخ.. دي النار اللي اتكمتت في قلب مظلوم مناضل فاته الزمن ووقع فى إيد ناس ما تساويش.. واللي يساوى اختفى من زمان.. واللي ما يساويش تلاقيه على الأرصفة وجوه القاعات للي ياما لسه هتتحرق..

لكن بعد ما تكون ظلمت مليون مناضل وكرمت مليون مهادن وكل الناس اتجننت.. وتكون البلد أتأممت والناس اتجننت.. هو ده حالنا ييجى بعد مية سنة.. لا تقولي ضعف ولا لحظة ده عمر.. عمر يغم ولا فيه حاجة اتبدلت.

وبعد عرابي وكامل جه جمال عبدالناصر

جه جمال عبدالناصر والاخوان المسلمين ما سكتوش قالوا مااحناس لاعبين ومسك جمال عبدالناصر في خناق الاخوان لحد ما لقينا نفسها في 67 وبصينا لقينا سينا ضايعه والبلد بتنهار والاقتصاد في النازل والحرامية عمالين يسرقوا ويعبوا لغاية ما جه نظيف وقال الحل ندمج البنوك ودمجنا البنوك ولكن يظهر الدمج طلع غلط والعملية اتنيلت اكتر من الاول وجت على رغيف العيش اللي اصبح حيكلوه الناس الاغنياء فقط وفيه مشروع للفقراء يعملولهم عيش من روث البهايم بس ما تخافوش عيش حلو اوي وبعدين الامن المركزي رايح يضرب في الناس الجعانة اللي مش لاقيه والفشل الكلوي بقا عامل زي الكحه في البلد واللي معاه فلوس يتعالج واللي معهوش يموت والجواز العرفي انتشر ما هو اصل ما فيش لا شقق ولا ظايف يبقى ما فيش حل الا اننا نقلد القطط والكلاب ما لهم القطط والكلاب دول احسن مننا كتير اوي وبعدين جه غزو العراق وانكشفت اللعبة وكلها لغاية عشرين يناير اللي جاي لما اوباما يمسك الحكم وحيبقى نهار ابونا اسود كلنا

الاخوان سبب كل بلاوى البلد -- ازاى -- اقول لكم

أرسل هذا التعليق بواسطة : لا - لا -لا

حسنى مبارك يتقرب الى امريكا بمحاربتة الاخوان واعتقالهم وتقديمهم الى المحاكم العسكرية

وامريكا حاولت مخاطبة الاخوان وردوا عليها بغباء مشهود لهم

ماذا تريد امريكا من الاخوان لتسمح لهم بتولى الحكم وازالة النظام الحالى ؟

ان يعترفوا باسرائيل وبا اتفاقية كامب دفيد وعدم معاداة اسرائيل

لو قبل الاخوان ذلك سوف يحكموا مصر بعد شهر واحد وبمساعدة الامريكان

يا ايها الاخوان غيروا موقفكم الغبى

اعترفوا باسرائيل

قولوا نقبل السلام معها

خليكم زى الوفد والوطنى

العبوا على كل الحبال

وحتما ستحكمون البلد وتنقذون مصر