رامز جلال .. منحرف وشنكوتي
عاشق للمقالب والاشتغالات وأحيانا يكون "شنكوتي"، يعترف أنه أحيانا بيغني على البنات وبيكلمهم عن سهر الليالي والعشق، قام ببطولة مطلقة في فيلم "شبه منحرف"، وقبله "أحلام الفتى الطايش"، يؤكد أن حياته في الأفلام تشبه حياته العادية، ويؤكد أيضا أنه "هيفضل كدة".
انه رامز جلال المتسبب دائما في صداع "دمه خفيف" لزملائه وأصدقاءه في الوسط الفني.
رامز أنت ليه كده؟
عشان هي كده واللي عايزها على كده هيفضل يضحك واللي بيدور إنها تكون غير كده هيتعب.
فلسفة
فلسفة ده مبدأ في الحياة أنى أعيش الدنيا زي ما تكون وزي ما تودينا.
مبدأ ولا لامبالاة؟
سموها زي ما تحبوا بس أنا بحب أعيش حياتي زي ما هي بحلوها ومرها بجنونها وهدوئها بأفراحها ودموعها أصل مفيش حاجه بتدوم، اللي بيضحك بكرة هتلاقية يبكى والعكس فلو كل واحد قال كده الدنيا هتمشي زي الفل.
واضح انك منحرف وليس شبه منحرف؟
ضاحكا: الأستاذ طارق الشناوي قال عنى في مقال له .. إذا كان رامز هو الشبة منحرف فمن يكون المنحرف.
وهل أعجبتك المقولة؟
ضحكتني وأي حاجه يقولها أستاذ طارق أنا موافق عليها منحرف .. خلاص أنا منحرف.
لكن الفنان سمعة؟
وهو يعنى أنا قلت أنا منحرف في أخلاقي، لا طبعا أنا منحرف أخر حاجة في حياتي يعنى بعيشها عكس الناس ده قصدي ودي حرية شخصية.
لكن اعتقد أن هذا الوصف قد يغضب الفتاة التي سترتبط بك
اللي ناويه ترتبط بيه أنا بقولها اهو من دلوقت أنا طبعي كده وبموت في كده على رأي نيكول سابا والمجانين كتار و ممكن يوافقوا.
رامز مضحكتش مرة على البنات؟
والله أنا ما بكون قصدي لكن في بنات بتحب تشتغل نفسها اعملها إيه بشتغلها أنا كمان يعنى واحدة مثلا أكون متفق أنا وهى إننا أصحاب وبس، تيجي تقولى أنا واحد متقدم لي اعمل إيه، أقولها إيه وهى عارفة إننا أصحاب وبس.
انت شنكوتي على رأي عصام كاريكا؟
ومين من الشباب مش شنكوتي.
رامز مش هتبطل مقالب واشتغالات؟
ليه ابطل.
زملائك ملوا وصدعوا من مقالبك أوعدنا انك هتبطل ..هل تستطيع ؟
لا موعدتكوش ده أنا مخلوق بحب الاشتغالات أوى وكمان مين اللي أنا صدعتهم.
الفنان صلاح عبد الله قال لي انه تعب منك ومل مقالبك؟
عم صلاح ده حبيبي طب قولي له كده تقدر تستغنى عن رامز هيقول لك رغم كل أرف رامز برضو بحبه.
ما هي حكايتك مع شبة منحرف؟
لحمد لله الفيلم عامل ردود أفعال جامدة وأنا مبسوط بيه وشايف أنى ماشي بخطوات بطيئة لكن علمت مع الناس.
قبل فيلمك شبه منحرف قدمت أحلام الفتى الطايش..انت طايش ولا منحرف ؟
تقدري تقولي الاثنين.
حياتك في أفلامك مثل حياتك العادية؟
طلعا لأني بحب أمثل نفسي معرفش اكون غير نفسي وبس، يعنى تقدري مثلا تتخيليني في دور رومانسي طحن وهادى اعتقد صعب لأني أنا بحب الحياة دي ومقدرش أنفصل عن واقعي رغم أنى قدمت قبل كده في مسلسل (الرجل الأخر) شخصية هادية وطيبه لكن في السينما اعتقد صعب شويه ومحتاج لمؤلف ومخرج يكتشفوا الرومانسية فيه.
ما هو الجديد عندك؟
داخل قريب تصوير فيلم (الفرح) مع المنتج احمد السبكي ومعانا جومانا مراد وعم صلاح عبد الله وخالد الصاوي وماجد الكدواني ومي كساب وروجينا ومحمود الجندي وباسم سمرة وياسر جلال ودنيا سمير غانم عن قصة للسينارست احمد عبد الله وإخراج سامح عبد العزيز.
نفس فريق عمل فيلم (كبارية)؟
نفس الفريق ماعادا فتحي عبد الوهاب وأستاذ احمد بدير لكن مش جزء تانى ده فيلم مختلف خالص كوميدي اجتماعي لايت.
والتليفزيون؟
داخل إن شاء الله سيت كوم "حلزوني تي في" مع المؤلف أيمن عبد الرحمن وعم حسن حسني والقصة كوميدية حول تاجر يعمل في استيراد البضائع الصينية و يسوقها عن طريق قناة فضائية أنشأها بأموال ابنة أخيه التي تكتشف ذلك وتدخل مع عمها في صراعات عديدة
رامز قدمت فيلمين بطوله مطلقة ممكن تقوم بعد ذلك بدور السنيد؟
على فكرة أنا مبحبش أبدا المسميات دى زي البطولة المطلقة والرجالية والنسائية والسنيد أنا مقتنع بشيء واحد هو ورق جيد ومخرج كويس وفنانين يقدروا يشيلوا فيلم ،وفى النهاية النجاح ينسب للكل مش لفرد واحد عشان اسمه الأول ولا عشان متصدر الأفيش.
الأسيوطي
أرسل هذا التعليق بواسطة : الأسيوطي بك
يا مطرقعة يا مروة بصراحة حوار لطيف ودمة خفيف زيك وزي رامز
حوار جامد اخر حاجة
أرسل هذا التعليق بواسطة : دودو
حلو اوي الحوار ده يا ميروووو وطريقة كتابته جميلة ومختلفة ومناسبة مع رامز جلال
منحرف وشنكوتي
أرسل هذا التعليق بواسطة : مش رضوى حسن ولا مروى صلاح
طيب منحرف وعرفناها
شنكوتي يعني ايه
شنكوتي
أرسل هذا التعليق بواسطة : شنكوتى
شن شن شنكوتى اللى بيسهر وياه اصحابة في التليفون ويظبط في حبيبة صاحبة ويغدر بيه ويخون يبئا الواد ده شنكوتىىىىىىى
مفيش داعي
أرسل هذا التعليق بواسطة : مش مهم
هههههههههههههههههههههههههههههه جامدة اخر حاجة يا مروة يا مزة
احمد عز فارس الصناعه
أرسل هذا التعليق بواسطة : احمد عز فارس الصناعه
جروب جديد على الفيس بوك اسمه
احمد عز فارس الصناعه
www.facebook.com/group.php?gid=28499404177