ح تحضر فرح حبيبتك؟
"اعذريني يوم زفافك.. مقدرتش أفرح زيهم.. مخطرش أبدا يوم في بالي.. إني أبقى واحد منهم".. كلمات أغنية للفنان "وائل جسار".. فهل تخيلت نفسك في نفس الموقف؟!
قصة حبك انتهت بفراق ونهاية غير سعيدة.. وجاء يوم زواج الحبيب أو الحبيبة.. هل ستتماسك وتحضر الفرح لتبارك أو تسخر من هذه الزيجة أم لن تذهب مطلقاً؟!
مشيت بسرعة
في البداية يقول محمد أنس: "الموقف ده أنا فعلا مريت به، وحسيت يومها إني بموت ألف مرة لأني تخيلت نفسي مكان الشخص اللي جنبها وافتكرت كل أحلامنا اللي رسمناها، ومشيت بسرعة جدا لأني خلاص مكنتش قادر استحمل الضغط العصبي اللي أنا فيه، وخرجت من القاعة بسرعة لأني مقدرتش أفرح زى الموجودين".
عبده السيد، يقول: "إحساس صعب جدا، لأنك حاسس أن كل الناس بتتفرج عليك، وأنت على رقبتك سكينة ولازم تضحك، رغم أنك شايف حلمك بيضيع قدام عنيك".
كفاية جرح واحد
مني درويش، تقول: "طبعا لأ، هستفيد إيه يعني لما أروح، ده حتى حرام هفضل فاكرة الموقف ده طول عمري، ولو رحت ممكن أنهار وتحصلي حاجه وتبقي فضيحة ليا وأنا في غنى عن الإحساس اللي يذلني".
إيناس مدني، تقول ضاحكة: "ده وضع غريب عمري ما فكرت إني أحط نفسي فيه، بأي منطق أروح لواحد باعني وفضّل حد تاني عليّ أكيد هيبقي شكلي مش لطيف لو رحت مش قدام نفسي لوحدي لكن قدام أهله واللي يعرفونا أنا وهو .. كفاية جرح واحد مش هكون وقتها مستعدة إني استحمل جرح ثاني لأن كل واحد فينا هيعيش مع حد ثاني".
هطرده من حياتي
وتقول أسماء المندوه: "الإنسان اللي يطعني في ظهري مهما كانت أعذاره لازم أطرده من حياتي لأن أنا مليش ذنب، وحضوري ممكن يخليني أتعلق بيه أكثر ويحطني في مشاكل وأنا مش متخيلة نفسي في وضع مقلوب كده لأن أنا إنسانة عندي كرامة وربنا يهنيه على كل حال ويقدرني وقتها أني أنساه".
حاتم ناصر، يقول: "طبعا استحالة أحضر لأني مش هقدر أستحمل إني أشوف حد بيلمسها غيري وبيسرق معاها حلم عمري بعد ما كانت كل شيء في حياتي لمجرد أن الظروف أقوي مني، فمعنديش الجرأة إني حتى ألمحها مش إني أحضر الفرح".
وتقول إيمان منجي: "أنا مريت بتجربة حب كانت كل حياتي لكن أحيانا ظروف البنت في مجتمعنا بتحكم عليها أنها تعمل حاجات مفروضة عليها وملهاش يد فيها ومعرفتش أواجهه وأقوله".
علشان أحرق دمها
ويؤكد ماهر الجميل: "الموقف حصل معايا ورحت الفرح مخصوص علشان أحرق دمها لأن أهلها فضّلوا أنها تتجوز عريس مش من جنسيتها لمجرد أنه غني، ورحت الفرح مع البنات زمايلنا اللي مكانتش بتستحمل إني أكلمهم وهرجت وضحكت وباركت ورقصت عشان أقولها من غير ما أتكلم أنتي ولا حاجه".
رشا السادات، تقول: "أكيد مش هتمالك أعصابي وحعيط وأنا مش بحب أكون ضعيفة وأحس الإحساس ده، وأنا شفت منظر استحالة أنساه كان لواحد قريبي مرتبط بواحدة من العيلة وانفصلوا فخرج يوم الفرح بره القاعة وانهار، فتكلمت معاه وطيبت خاطرة ودخل القاعة وضحك وقعد يرقص كمان لكن اللي جواه حاجه ثانية وأنا مقدرش أعمل زيه".
وأنت.. ممكن تحضر فرح حبيبك؟
اللي يحب واحد يتمناله الخير يا محمد يا حنفي
أرسل هذا التعليق بواسطة : مش خاطب
اللي يحب واحد يتمناله الخير صحيح الخطوبة تمت وفضلت 3 سنين لكن مفيش نصيب
وبعدين اول مرة اعرف ان السادات خلف بنت اسمها رشا
وانت فاكر اغنية يا ابو حنفي يا محمود بتاعة
بقية اللي فوق
أرسل هذا التعليق بواسطة : مش حاطب
بتاعة ليلى نظمي
سلام يا حنفي
(طبعا احضر فرح حبيبتى و كمان احضر جنازتها كمان)
اعتقد انة لا توجد اية مشكلة
و لية لالالالالالالالالالالالالالالالالالالالالالالالالالالالالالالالالالالالالالا