فاكر أول شريط اشتريته؟
فاكر أول شريط اشتريته؟
محمد صالح- ولاد البلد- عشرينات- 4/12/2008
اختفى "الشريط الكاسيت" من حياة الكثير منا، بعد أن حل مكانه الكمبيوتر و الـ CD والـ DVD .. لكن يبقى لأول شريط اشتريته في حياتك ذكرى خاصة، فلا تنسى مادته المسجلة عليه سواء أغنية أو أناشيد دينية أو وعظ مهما مرت السنوات..
(ولاد البلد) حاولت استعادة ذكريات أول شريط مع شباب دلوقتي وشباب زمان..
شباب دلوقتي
صفاء، 20 سنة، تقول: "كنت الأول لا أحب الشرائط وأرى أنها مضيعة للمال، ولكن مرة كنت مع صاحباتي وكانوا بيشتروا شرايط ولمحت شريط ليلي مراد (من بعيد يا حبيبي اسلم) ولأني بحب ليلى مراد جدا اشتريته فورا، وكان أول شريط أشتريه ومازلت أحتفظ بيه حتى الآن".
ويقول خالد سليمان، 21 سنة: "أول شريط اشتريته كان شريط عمرو دياب (الليلا دي)، وكان ساعتها عندي 16 سنة وده كان مصاحب لأول حب في حياتي، وعشان كده أنا مازلت محتفظ بالشريط رغم أنه بقى موجود عندي على الكمبيوتر، بس الشريط له طعم تاني لأنه بيفكرني بحاجات ثانية".
أما وليد محمد، فيقول: "أول شريط اشتريته كان شريط محمد فؤاد (القلب الطيب)، واشتريته من بائع في محطة رمسيس، وللأسف لما جيت أشغله طلع فاضي"!.
أحمد حماد، 19 سنة، يقول: "كان شريط (سحراني) للفنان إيهاب توفيق، بس بصراحة مش محتفظ بيه لأن عندي كمبيوتر وعليه كل الأغاني ومش مضطر اشتري شرائط ".
وعلى غير المعتاد تقول لمياء،18 سنة: "أول شريط اشتريته كان لسيدة الغناء العربي أم كلثوم وكان اسم الشريط (رق الحبيب) وهي أغنية قديمة ونادرة، سمعتها مرة في الإذاعة وفضلت أدور على الشريط لحد ما لقيته".
أناشيد ووعظ
محمد جمعة، 22 سنة، طالب بكلية أصول الدين، يقول: "أنا أول شريط اشتريته كان شريط أناشيد دينية بعنوان (أوعى الحجر) لمحمد نجيب وأشرف زهران، واشتريته من 7 سنين وده لأننا كلنا في البيت مبنسمعش شرايط أغاني".
شريف سيد، طالب بكلية الشريعة والقانون، يقول: "أول شريط اشتريته كان شريط لمحمد حسين يعقوب بعنوان ( أهوال القبر الستة) وده كان على جزأين".
شباب زمان
منى، 40 سنة، تقول: "أول شريط طبعا كان لحليم وإحنا في ثانوي وكان "زي الهوا"، وكنا نقعد أنا وأخواتي البنات نسمعها في البيت ونغني معاها وكان بيبقى جو جميل.. الله يرحم أيام زمان".
عادل عبد الرازق، 45 سنة، يقول: "عيون القلب لنجاة الصغيرة كان أول شريط اشتريته في حياتي، وكان عندي وقتها 19 سنة، ومن يومها بجمع كل شرايط نجاة لأن الشريط ده خلاني أحبها موت".
وأنت.. فاكر أول شريط اشتريته؟
فكرة حلوة
أرسل هذا التعليق بواسطة : مايسة
الموضوع جميل يا أستاذ محمد قكرة جميلة فكرتني باول شريط والله كانت ايام حلوة قيل الام بي ثري والنت
محمد جمعة، 22 سنة، طالب بكلية أصول الدين،
هو لسه فيه كلية اصول دين في مصر
الله يرحم اصول الدين والله يرحم الشيخ الشعراوي والشيخ الغزالي
دبحونى بقزازة وبربور على الحيط
أرسل هذا التعليق بواسطة : ومش هو
اول شريط اشتريتة فى حياتى كان
بربور على الحيط ودبحونى بقزازة للمطربة بقاليظوا
وهو دا حال الدنيا السي دي زحلق شريط الكاست كما زحلق شريط الكاست اسطوانات البيكب والريكوردر
أرسل هذا التعليق بواسطة : مش سامع
زمان كان فيه حاجه اسمها البيك اب كانت اسطوانه كبيرة سوداء تتحط على جهاز البيك اب وبعدين فيه دراع كده يدلع من البيت اب عليه سن مدبب يركب على الاسطوانه وتدور الاسطوانه ونسمع اللي متسجل عليها
وكمان كان فيه حاجه اسمها الريكوردر كان بيركب عليه شريط زي شريط الكاست كده بدون علبه بس اد الشريط الموجود جوه الكاست حوالي 15 مرة
جه الشريط الكاست واختفى البيك اب والريكوردر
وجه السيدي واختفى شريط الكاست
واكيد حيطلع حاجه تانية حتخلي السي دي يختفي
وهذا حال الدنيا