شعبولا: طلعت خلاص براءة.. وإييييييية
- الحشيش ده بيعمل إيه في قميصك؟
= الحشيش ده مش بتاعي يا بيه، وأكيد واحد من اللي بيكرهوني دسهوللى في لبسي والله أعلم بنيته.
هكذا كان رد المطرب الشعبي شعبان عبد الرحيم بقسم شرطة الهرم بعد أن تم نقله إلى المستشفى ليلة عيد الأضحى في حالة اختناق وتردد أنه نتيجة شرب الحشيش..
(ولاد البلد) ذهبت إلى مستشفى والتقت شعبولا بعد ما طلع براءة..
كيف استقبلت قرار براءتك والإفراج عنك بكفالة؟
استقبلته عادي.. أنا عارف أنى بريء بس الصحافة بيحبوا أوي يكبروا المواضيع، مش عارف بيكرهوني ليه مع أني بحبهم، دول حتى زي أخواتي.
ولماذا تكرهك الصحافة؟
مش عارف اسألوا نفسكم.. بس ده حقد عشان أنا ناجح وكل الناس بتحبني، مجتش على الصحفيين يعنى مش عايزهم يحبوني.
سمعنا من بعض أطباء المستشفى أن واحد من أفراد أسرتك قام بتغير العينة إلى كانت تحتوى على مخدرات إلى أخرى ليس بها أي نسبة؟
اللي عايز يقول حاجه يقولها ميهمنيش رأي الدكاترة ولا غيره المهم في الأخر طلع شكل كويس أدام العيال وأمهم، وعينات إيه اللي هتتغير هو إحنا مجرمين ولا مسجلين خطر.
وماذا عن الحشيش الذي وجد في قميصك؟
الله أعلم.. تلاقي واحد ابن حلال كاره نفسه حطهولي ولا حاجه عشان يدبسني، بس عشان ربنا عارف أني غلبان وفي حالي وقف جنبي وكلمة ربنا هي اللي بتمشي في النهاية.
تقدر تقول لنا حصل إيه بالضبط ليلة الحادث؟
كنت قاعد مع صحابي زي ما الناس كلها بتقعد في ليلة الوقفة مع بعضها، وكان الدكتور هشام اللي بيعالجني كاتب لي علاج عشان ضيق التنفس اللي بيجيلي ساعات كتير، وكان قايل لي خد قرص واحد، لكن ساعتها بصراحة تقلت في الشيشة حبيتين وحسيت أني تعبت فأخذت قرص تاني فحصل اللي حصل وربنا ستر الحمد لله ونجانا.
وممكن تبطل شيشة وتدخين؟
يا رب .. بس أنا قررت خلاص أنى أبطل تدخين بجد المرة دي لأني نويت كتير لكن كنت بضعف لما بقعد مع صحابي على القهوة.
مش شايف أن تدخينك يتعارض مع حملة (أوقفوا المخدرات) مع الداعية عمرو خالد؟
إيه اللي هيعارض.. ده مالوش علاقة بده.. إحنا بنقول المخدرات ومش السجاير ولا الشيشة، وكمان الحاج عمرو ربنا يكرمه فاهم أني بشرب شيشة ونصحني كتير أني أبطل وإن شاء الله هبطل كل حاجة، ومش معنى كده إن الشيشة حاجة حلوة لا دي مضرة أوى وضررها أكتر من السجاير كمان وربنا يهدينا ويهدي الشباب كلها والحملة تنجح دي أبسط حاجة ممكن نعملها للشباب المصري اللي زي الفل.
وأولادك خميس ورمضان بيدخنوا؟
أه بيدخنوا بس لما شافوا اللي حصلي حلفوا أنهم مش يقربوا من السجاير تاني بس أنا عارفهم الجلالة بتاخدهم كده شويه وهيرجعوا يدخنوا تانى وأكتر من الأول دول أولادي وأنا عارفهم كويس.
وبالنسبة لطريقة لبسك مش ناوي تغيرها؟
أغيرها ليه هي وحشه؟
أنت شايف ايه؟
شايفها زي الفل طبعا وستايل جديد مش بدله وكرافته وجينزات خلي البساط أحمدي وبلاش كلاكيع.
ية هية هية رمز وضيع من رموز الفترة الوضيعة
الرموز الوضيعة فى الفن والسياسة والاقتصاد والاثتثمار
القوالب نامت والانصاص قامت
سوسو
أرسل هذا التعليق بواسطة : سوسو العسول
يعنى هيا جت عليه يا امور ما كله فى اللذاذة ولا عشان شعبان طيب وعلى نياته ما عندك المهرج عادل امام وشوية الممثلين الكبار اوى اللى واكلينها والعه يحيى الفخرانى ونور الشريف وشوية الحريم الكسر يسرا والهام ونبيله يا راجل اقعد ساكت طب ده شعبان احسن منهم على الاقل مش بيدعى الثقافة