شحات كلينيكس
هناك رأي يقول أن "الشحاتة" هي إختراع مصري، تملك مصر حقوق الملكية الفكرية الخاصة به، ولا تنازعها دولة أخرى في تفوقها "الفظيع" في هذا المجال..
ولأننا اخترعنا الشحاتة، فمن الطبيعي أن نعمل على تطويرها وابتكار أفكار جديدة في المهنة المصرية العريقة..، الآن لم يصبح من الغريب أن يلجأ الشحاتون إلي التطوير وهو ما ظهر بالفعل في وسائلهم الحديثة..
بعد ارتداء الجلباب المرقع ووضع المساحيق التي تضفي على الوجه بؤس وحزن وكآبة، وبعد بتر الأعضاء أو إظهارها وكأنها مشلولة..، بعد كل هذا اكتسبت المهنة new look، وأصبحت تكتفي بذلك اللباس الأنيق أو تقمص دور التائه أو بكل بساطة الإمساك ببعض مناديل الكلينيكس..
وللتعرف علي أحدث وسائل الشحاته إليك تجارب زبائن هؤلاء الشحاتين..
الشحات الأخضر
تقول لمياء: "الشحاته الآن أصبح لها صور لا أستطيع أن أتجنبها، فمثلا أثناء جلوسي أنا وأصحابي في الجامعة تجد ذلك الشحات الأخضر الذي أينما حللت في الجامعة وجدته، وهو الكناس، فتجده بكل براءة يقوم بكنس المنطقة المحيطة بنا بنشاط و"ذمة"، وكأن الجامعة بكل ما تحويها من قمامة قد أصبحت ناصعة البياض، ولم يتبقي سوي تلك المنطقة المحيطة بنا، وطبعا لا يصرفه عنا سوي ذلك الجنيه الإجباري".
وتشترك معها سارة في معاناتها من "الشحات الأخضر" الذي جعلها تكره تلك اللحظات التي تقضيها في انتظار إحدى صديقاتها فتقول بكل سخط: "كلما أعطيت لإحدى صديقاتي ميعاد لانتظرها في الشارع، يظهر لي ذلك المتطفل الذي يحيطني بكل تلك العفرة، حتى يحصل علي ما فيه النصيب من محفظتي، فالشغل الحقيقي لكل كناس في الشارع الآن هو الشحاته وليس نظافة الشوارع".
مناديل كل يوم
أما سميرة فقصتها مع التسول شبه يومية فكل يوم يوجد به دراسة جامعية فهو بالتالي يوم إجباري لشراء المناديل الكلينيكس فتحكي قائلة: "من حظي أن مكتب التنسيق رزقني بجامعة حلوان وأنا اسكن في الهرم يعني كل يوم مترو الأنفاق يعني كل يوم شراء مناديل كلينيكس من السيدة التي فور ما تراني في عربة السيدات تلزمني بشراء تلك لمناديل وطبعا ليس بالثمن المتعارف عليه في كل المحلات ولكن فيما لا يقل عن الجنيه، أعمل إيه في خجلي من إحراجها، رغم تأكدي من عدم احتياجها".
أشيك متسول.. في وسط البلد
ويعرب رامي عن شياكة متسوله الأسبوعي فيقول: "في طريقي إلي وسط البلد كل ليلة خميس أفضل ركوب مترو الأنفاق، ودائما وأبدا أجد ذلك الرجل الشيك الذي يرتدي تلك البذلة بكل أناقة ويسألني بكل شياكة (لو سمحت ممكن يا ابني تساعدني.. محتاج فلوس أسافر بلدي ما ما اتسرقت)، وطبعا ارضخ علي الفور لهذا الطلب بدون أي مقاومة، الغريب أن هذا الرجل الشيك يتعهد لي بأنه سيرسل لي بأي مبلغ أعطيه له فور وصوله لبلده.. وهو ما يجعلني متحمس لإعطائه مبلغ أكبر.. رغم عدم تصديقي لما يقوله".
ويشترك علاء مع رامي في إعجابه الشديد بشحاته المفضل فيقول وكل انبهار به: "شارع طلعت حرب بوسط البلد هو شارعي المفضل، وكلما مررت به أجد ذلك الفتي دائما متقمص دور الطالب الفقير المجد الجالس علي رصيف الشارع ليذاكر علي ضوء الشارع، ورغم إتقانه لهذا الدور إلا انه في كثير من الأحيان لا يقلب تلك الصفحة من الكتاب، ورغم تأكدي من تمثيله، إلا أني لا أتردد في إعطائه ما فيه النصيب، لأني بحب أشجع المواهب الشابة".
وبكل ارتباك تسأل تلك السيدة صاحبة الوشاح الأسود وذلك الحذاء اللامع سماح، كلما مرت من أمام ذلك المحل الفخم لتسألها أن تعطيها حق التذكرة لتتمكن من العودة بعد أن فقدت كل ما لديها بسبب أولاد الحرام، ويبدو أن حق التذكرة لا يكتمل أبدا مهما استمرت في تصديقها ومساعدتها في تجميع حق تلك التذكرة.
وحدووه..
لكن أحدث وسائل الشحاتة فعلا هي تلك التي تشهدها ميكروباصات شارعي فيصل والهرم، يركب شاب أو اثنين فجأة في الميكروباص، ويبكيان قائلين: "يا جماعة في ست غلبانة ماتت ومش لاقيين ثمن كفنها، ساعدونا"
طبعا لهذه الطريقة توقيتها، فهي عادة يتم استخدمها في رمضان وقبل الأعياد.. الناس مؤهلة نفسيا، والموسم يحتاج لحسنات، حتى لو كان ثمن كفن لسيدة وهمية..
غزل البنات
بدافع حب غزل البنات تورطت غادة في متسول غزل البنات فعنه تقول: "عند مروره لأول مرة بجانب المنزل كان دافع شرائي لغزل البنات منه هو حبي لغزل البنات، وفي حينها علمت انه أبكم واصم ويعيل أسرته، وطبعا لم أعطيه فقط حق ما أخذته ولكن بزيادة شوية، ومن ساعتها كلما مر من أمام البيت لا يتردد في رن جرس البيت لأعطيه حق غزل البنات بدون الحصول عليه".
ورغم أنهم متسولون إلا أنهم دائمي البحث عن الجديد في تلك المهنة ليستحقوا ما يحصلوا عليه من أموال، بذل المجهود في الحصول عليه، وأنت ما قصتك مع متسولك الإلزامي..
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
الشحاته دي ظاهره مؤلمه فعلا
ازاي واحد يمد ايده و يقول انا عايز اكل و لا عايز فلوس
الواحد لما بيكون مسلف واحد فلوس بيبقا مكسوف يقوله ردها تاني الا لو طول عليك اوي و طنش
اما بقا عن شحاتي المفضل او شحات كل يوم فهو ولد في منتهى البؤس ( او هكذا اظن ) كما كان يظن خالد كساب بالولد اللي كان بيذاكر تحت المطر في شارع طلعت حرب
الشحات هو فتى السايبر
بيخرج كل يوم من بيتهم شايل شنطة مدرسة تقول فيها قنبلة نووية ( كبير طحن ) و شايلها يا ولداه على كتفه
الولد مبيروحش المدرسة بيروح السايبر كل يوم من الساعة 9 الى الساعة 2
طيب بيجيب الفلوس دي منين ؟؟؟
ده السؤال اللي كنت بسأل لنفسي
فضلت انخرم وراه لحد ما عرفت انه بيشحت بينزل الصبح يلقط رزقه في الزحمه و لو الفلوس خلصت بينزل يلقط رزقه من المنطقة اللي خوالين السايبر
بمنتهى المسكنةو البؤس الحقيقي ( مش تمثيل ) بيألف قصه عشان يجيب فلوس يقعد بيها على النت
يلعن ابو النت يا اخي اللي تخلي الواحد يشحت و يلعن ابو الفيفا
و يلعن ابو الظروف اللي خلت ولد صغير يهرب من المدرسة و يروح السايبر
انا بقى الشحات بتاعى ولد صغير تحفه بييجيلى كل ما بروح اشترى ايس كريم
(حته و النبى اصلى مفطرتش يا ابله)
ة اكيد لوالظهر يبقى متغداش و لة العشا يبقى متعشاش ..بيمشى حاله يعنى
انا برده نخورت وراه لحد ما عرفت انه ابن بواب العماره اللى جنب محل الايس
كريم.و لانى بموووووووووووووت ف الايس كريم ..بجيب له دايما واحد معايا كل ما بشترى..
شفتوش هبل اكتر من كده
يللا كله بثوابه
حرام عليكم تحكو هيك عنهم .. لانه في كتير منهم ما لاقيين ياكلو بجد .. نفسي كل واحد فيكم يحط نفسه مكان هدا الشحات و يحكيلي شو شعوره ؟
بعدين إللي ببيع كلينكس أو بسكويت عشان يترزق هدا مو شحات ..
الله يبعتلهم و يبعتلنا و يغنينا عن حاجة الناس ..
جمييل جدا الموضوع ده يا هبة ودايما انتى كده معودانا على المواضيع دى
دول نصابين أو شحاتين غلابة لكن احكيلك عن واقعة حصلت قدامى تدخل أسرة بنعش ميت لصلاة العصر للصلاة على الميت بعد صلاة العصر و كالعادة قبل الصلاة على الميت يسأل هل هناك من غير راض عنه فهنا يصرخ رجل أنا دا حرامى و ابن ونصاب دا كان سالف منى ألفين جنيه وما جابهم وهنا يضطر المصلين أنهم يلمو علشان يفكو ضيقة مسلم وياخد الراجل الفلوس ويمشي وتبدأ الصلاة على الميت وبعد الصلاة ينتظر أن يأخد أهل الميت المرحوم ولا أحد ياتى فننظر في النعش نجد مخدة علشان تعرفو أنكم بتلعبو مع مبتدأين لسة
ميصحش ابدا تكتبوا
""الشحاتة" هي إختراع مصري، تملك مصر حقوق الملكية الفكرية الخاصة به، ولا تنازعها دولة أخرى في تفوقها "الفظيع" في هذا المجال..
ولأننا اخترعنا الشحاتة، فمن الطبيعي أن نعمل على تطويرها وابتكار أفكار جديدة في المهنة المصرية العريقة."
عيب أوي وميصحش....يعني لما حد مش مصري حيقرأها يقول علينا ايه....ارحمونا بأه أرجوووكم واعرفوا قيمة بلدكوا
بجد الموضوع دا فكرنى بفيلم عادل امام المتسول فيلم كان جميل اووووووووى
هوة يعتبر احسن تعليق على الموضوع
وبعدين يااخت مى انا شايفة الموضوع مش بيتهكم على بلدك دا بالعكس بلدك هية اللى بتتهكم علينا
لو وفرت شغل للناس دى مكنش دا حصل وبعدين لما بلدنا تقدرنا نبقى نقدرها
وياريت تهدى اعصابك شوية دا مجرد موضوع
وسيبنا ننفس عن نفسنا شوية كفاية خنقة
انا معرفش الاخت طماطم مصرية أم لا....بس عموما انا مش ضد النقد البناء ومش باقول ان مصر خالية العيوب... بس انا ضد التجريح أو الاساءة إليها....كلام زي دا انا في وجهة نظري انه ميصحش يتكتب...وكل واحد حر في رأيه....
وشكرا
ايوه يامى انا مصرية بس انا شايفة ان الموضوع نفيهوش اى تجريح لانة موضوع واقعى فعلا يعنى اللى كتب مجبش حاجه من عنده ودا مجرد موضوع وبتناقش فية مش اكتر
ولما انتى شايفة ان كل واحد حر فى راية
لية بتهاجمى الموضوع
عموما متزعليش مصر دى جنه ولا تزعلى
كانوا بيقولوا زمان محدش يفتح بقوا على مصر لان ده بيسيء سمعتنا و ده بيعتبر نشر لغسيل مصر الوسخ او بمعنى اصح بنشرد لنفسنا ( تقولش احنا مش مشتشردين )
اما جاليا في عالم بسموات مفتوحة و مفيش حاجة تستخبى لازم ننشر غسيلنا حتى لو كان وسخ عشان نتكسف شويه و نحس على دمنا و نحاول ننظفه
امال مدام نظيفه هتلاقي شغل ازاي ؟؟
و القطنه مبتكدبش
يا ستي انا مقلتش ان مصر جنة بس هي مش نار برضه...وفي رأيي نار مصر ولا جنة الغربة..زواللي يسافر حيعرف...انا لفيت الدنيا بس شايفة انه مفيش زي مصر...ومفيش حاجة تساوي كباية الشاي اللي الواحد بيشربها وسط أهله...
انا مش بهاجم حد...هما حرين يقولوا رأيهم وانا كمان وانت وكل واحد حر.. والاختلاف في الرأي لا يفسد للود قضية...انا بس شايفة انه فيه حدود خصوصا في حاجة يقرأها غير المصريين...