انتقل إلى المحتوى
أرشيف عشريناتفبراير ٢٠٠٤ – مارس ٢٠١٠

سمعونا زغرودة

ولاد البلدقراءة في ٥ دبقلم محمد فاروق عجم

الفرح الشعبي والفرح الريفي وجهان لعملة واحدة.. هذه العملة هي (الفرحة الحقـيقية) سواء للعروسين أو الأهل، والفرحة هنا لا تقتصر علي يوم أو ليلة واحدة أو فترة زمنية محددة كما هو الحال في أفراح المدينة في القاعات والنوادي والفنادق.

فمراسم الاحتفال في الأفراح الشعبية والريفية تمتد لأربعة أيام أو أكثر من ذلك، ولكل يوم من هذه الأيام طقوسه وأغنياته الخاصة النابعة من تراثنا الشعبي المصري.

التنجيد و الأثاث

يبدأ الفرح بـ (ليلة التنجيد) حيث يجتمع أهل العروسين للإعلان عن بداية الأفراح واقتراب موعد الزفاف وهنا نسمع أغاني خاصة بهذه المناسبة فنسمع مثلاً

ما تعلي باب الأوضة يا واد يا بنا…

وعلي باب المندره يا واد يا بنا…

وعلي باب القاعة يا واد يا بنا…

ثم تأتي ليلة (نقل الأثاث) من منزل العروسة إلي عش الزوجية، فتنطلق الزغاريد والأغاني من فوق السيارات التي تحمل الأثاث ويبدأ الجميع في الغناء من حول السيارات فنسمع :

افرحي يادي الاوضة.. جياكي عروسه موضة...

افرحي يادي المندرة.. جياكي عروسه سكرة...

افرحي يادي القاعة.. جياكي عروسه الساعة...

وما أن يقتربوا من المنزل الذي سيجمع العروسين حتى نسمع :

رشوا الشارع ميه.. عروسة الغالي جاية .

رشوا الشارع ريحه.. عروسة الغالي مليحة .

ليلة الحنة

ثم يأتي بعد ذلك مظاهـر الاحتفال بالحنة أو(ليلة الحنة) والتي تكون غالبا في بيت العروسة فنجد العروسة تجلس وسط صديقاتها وتتولى إحدى السيدات رسم الحناء علي يديها، ويبدأ أهلها وأقاربها في الغناء علي دق الطبلة فنسمع

مدي ايدك يا عـروسه.. مدي ايدك للحنة...

مدي ايدك يا عـروسه.. مدي ايدك وتحنَي...

وكذلك تتغنى السيدات طلبا للعريس

بس الوله يجي.. بس الولة يجي...

يجي عالمحطه.. وادبحلوا بطة...

يجي عالرياح.. وادبحلوا فراخ...

يجي عالتسريحة.. وأحطلوا ريحه...

وإسكاتا للأب تغني السيدات

يحيا أبوها يحيا.. يحيا أبوها يا جدعان...

يحيا أبوها وشنبه.. اللي ما حدش غلبه...

وطبعا مالناش الحق نسال اللي أبوها حالق شنبه يعمل إيه.

أما في منزل العريس فالأمر لا يختلف كثيراً فنجد فيه (حفلة وداع العزوبية) وهنا نجد أصدقاء العريس يغنون له فيقول أحدهم

حلال عليك ست الحلوين.. عرفت يا عريسنا تنقي...

رشوا الملح يا ناس م العين.. ورقصوني ده أنا من حقي...

الليلة ليلة هنا وسرور.. وكوبيات في صواني بدور...

ومالناش دعوة باه الكوبيات دي فيها إيه

أدحرج واجري يا رمان

ونصل إلي ليلة الفرح الكبرى .. ليلة الزفاف أو ( ليلة الدخلة ) .. فالأنوار معلقة في بيت العروسين .. أصدقاء العروسة يحيطون بها في إحدى غرف المنزل حيث تجلس بين يدي " الكوافيرة " فتنطلق أغنية

ما تزوقيني يا ماما.. قوام يا ماما...

ده عريسي هايخذني.. بالسلامه يا ماما...

ومتعرفش بصراحة هي مستعجلة علي إيه، أكنها مخطوبة للسيد نجل.... ولا بلاش

أما بيت العريس فترى نفس المشهد , فأصدقاؤه يحيطون به وهو يرتدي ملابس الفرح وهنا نسمع

يا أولاد بلدنا يوم الخميس..

ها كتب كتابي وابقي عريس..

الدعوة عامة وها تبقي لمة..

وها يبقي ليه في البيت ونيس... يا أولاد بلدنا.

أما في الليل تنطلق الزفة وتبدأ بزغاريد متتالية ثم يبدأ الغناء من الجميع، فقد وصلت الفرحة ذروتها، فعلي نغمات الفرق الموسيقية نسمع :

بسم الله الرحمن الرحيم وهنبدأ الليلة.. آه.. آه ..

عريسنا قمر وعروسته حلوة وجميلة.. حنقول يا ليل، ونقول ياعين..

14 و15 وردة عليهم الليلة...

ثم يبدءون في

صلي.. صلي.. ع النبي صلي

واللي ما يصلي أبوه أرملي.. صلي صلي

وكذلك

أدحرج واجري يا رمان.. وتعالي علي حجري يا رمان..

دانا حجري حنين يارمان.. يخدك ويميل يا رمان..

ونسمع أيضا اشهر الأغاني الشعبية

دقوا المزاهر يلا.. يأهل البيت تعالوا

جمع ووفق والله.. وصدقوا اللي قالوا

عين الحسود فيها عود يا حلاوة..

عريس قمر وعروسته نقاوة..

واحنا الليلة دى كدنا الأعادي.

وعند توصيل العروسين تزف العروسة بـ

طالعة السلالم يا مشا الله عليها..

ست العرايس والعريس في أيديها.

المنافسة مشتعلة

أما الطريف أننا نسمع أغاني كثيرة تعبر عن المنافسة بين أهل العريس أهل العروسة فلكل جانب أغنياته.

فأهل العريس ينشدون

خدناها ..خدناها ..

طلبناها م الصيف الماضي.. وأبوها ما كنش راضي..

وعلشنها بعنا الأراضي.. الحلوة اللي كسبناها..

خدناها بالملايين.. وهما ما كـنوش راضيين..

علشنها بعنا الفدادين.. الحلوة اللي كسبناها.

أما أهل العروسة يغنون

اوعيلوا يابت اوعيلوا.. الضابط يبقي زميله...

اوعالها يا واد اوعالها.. ده العمدة يبقي خالها...

وكذلك يغنون مخاطبين العريس

جبناها لك وجينا.. وان كنت راجل عــشينا..

وتستمر هذه الأغاني وسط فرحة الأهل والأحباب حتى تنتهي الزفة ومعها تنتهي الأغنيات في هذه الليلة لتبدأ في مكان آخر إعلانا عن ميلاد فرحة جديدة في منزل جديد .

شاهدوا الجاليري :

9e40

الكُتَّاب

الأقسام

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. هوووووووبه , مش شغلك وهبهوب سابقا كُتب في
    كدا البيئه ولاه .....بلاش
    والله يا عجم يا بني انت كدا جبت" البيئه "اللي علي اصولها , فكرتني وانا عامله زي الهبله بتخانق عشان اشوف الحنه في الشارع والاغاني الكميله دي" بس اموت واعرف الست اللي كانت شايله الحنه علي راسها والبتاع اللي الشفاف دا ما بيتحرقش ليه ؟؟" ,و فيها ريحه بكاروالمندره و البرسيم كمان يا خراشي ياني" ان هدا لكثير وخدالي بالك يا نوفا ",
    و"كان يا ما كان " بيتين شعر حلوين اهو بهديهم للي في بالي .
    و اة و يا فرحة قلبي
    كنت طير و صبحت مراكب
    بجناحين و حملت حبايبي
    يا هنايا في ريح النيل
    و ابتسام الفجر دليل
    يا حياتي و سر حناني
    لما افتح لك انا احضاني
    كل شط يلاقي التاني
    و العطاشي يلاقوا سبيل
    و الليالي تقول لك اة
    اة و اة و يا فرحة قلبي........
    كل شط لقيتة طارح حلم بكرة و حلم امبارح
    و القلوب كلها تتصالح
    في الغناوي و المواويل
    الي تعلي معاها الاهة
    اة و اة و يا فرحة قلبي........
    والله انا بقالي قرن بتحايل علي الموقع دا ان حد يسمعنا زغروده مش راضين , اسمعكوا انا لووولوووووووولووووووووي قطعت نفسي يا جدع .
  2. بتاع النور كُتب في
    الى اللى من غير نقطة
    البلوووج مش شغال ليه ؟
  3. اللي فوق دي . كُتب في
    يا اهلا بالموز ......
    " طفي النور يا بهيه " دي الكلمه اللي حضرتك قولتهالي اخر مره لو حضرتك "واحد تاني ".
    الغريبه اني قولت مش عايزين نشوف الواحد "فاي " بعديها اختفيت فعلا,
    ليه يا بت قفلت البلج بتاعك عشان اتعرضت لمضايقات اولها ان ماليش خبره في حكايه البلجات دي وتلقيني بخبط في الحلل وانا اساسا هبله في الكمبيوتر وعملت البلج دي بالصدفه مش عايزه اقول اني مكنتش اعرف بالضغط علي اسم الشخص تخش البلج بتاعه , المهم ايه يا سيدي بعد ما اكتبت عن الايميل بتاعي لقيت بشر كتيره عايزه تضيفيني , الووووو مين حضرتك معرفش , السبب التاني بقي افضل الاحتفاظ بيه , واخيرا سوال جامد اووووووووي
    هو فين الواحد التالت ؟؟؟؟؟؟؟؟؟؟
  4. نيفين..نيفى..نوفا كُتب في
    وخداللك بالى يا هوووبه
    فعلا ان هذا لكثير
    حلو الموضوع يا عجم بس عندى ليك سؤال و تجاوب بصراحه
    الصور دى متاخده من الزفاف الجماعى بتاع الحزن اقصد الحزب الوطنى
    صح؟؟؟؟؟؟؟؟؟؟؟؟؟؟؟
العودة إلى الأعلى