لعبة العيد.. بوحة!

اعتدنا دوما على إعلانات أفلام العيد قبل شهر رمضان.. المرا دي ولاد البلد بتقدم لعبة العيد.. بوحة!

بوحة هي لعبة الكترونية حديثة على أبواب السوق المصري وتستعد للنزول والانتشار تقدمها شركة خيال وهي شركة مصرية تأسست في15 أكتوبر 2005 تحوي عاملين مصرييي الجنسية وجميعهم شباب متوسط سنهم 26 سنة تقريبا.. جميعهم مهندسين حديثي التخرج من كليات مصرية مابين هندسة وفنون جميلة وفنون تطبيقية وإدارة أعمال.

وكان لي هذا الحوار مع المهندس احمد صبري احد مؤسسي الشركة " وحاليا هو المسؤول عن تطوير المحرك الفيزيائي للعبة.. وهو جزء من اجزاء اللعبة مسؤل عن تحريك الاجسام حركة طبيعية مثل سقوط صناديق على سلم مثلا بطريقة طبيعية وهكذا!

مين صاحب فكرة لعبة بوحه؟

ماتقدريش تقولى ان فى حد صاحب الفكرة .. بس انا وكل العاملين فى الشركة كان يجمعنا حلم عمل اول لعبة مصرية .. فقررنا نعمل لعبة .. فكرة اللعبة جت فيما بعد نتيجة قعدات عصف ذهني.

فيلم بوحة تعرض لكثير من الانتقادات.. ليه اخترتو فيلم بوحه بالذات عشان تطلعوا منه اللعبه؟

أولا يمكن يكون الفيلم موش عاجب ناس كتير, بس الشخصية نفسها ظريفة! (عملنا إستفتائات فى الموضوع) كمان مناسبة جدا جدا للعبة. خصوصا إنه جزار وليه أسلحة وأدوات. ده غير إن سيناريو الفيلم فى حد ذاته أنسب للعبة منه لفيلم (ده رأى شخصى بس مبنى عن دراسة).

ده غير إن بوحة مافهوش أى شىء مخجل أو منافى للاّداب. ماتنسوش إن الهدف الأساسى والأول من أى لعبة هو الترفيه والمرح, قبل التعليم ونشر الوعى وخلق الثقافة و كل الكلام الكبير ده, وده اللى هانحاول نعمله برضه, بس من غير ما ننجرف و ننسى الهدف الأساسى والأول من أى لعبة!

اللعبة هتتباع بكام في الأسواق؟

سعر اللعبة هايكون بين 40 الى 60 جنيه .. وحاليا جارى البحث عن ممولين لأن ده ممكن يساعد فى ان ثمن اللعبة ينزل عن كده!

ايه الإجراءات اللي تم اتخاذها لحماية حقوق ملكية الشركة للعبة؟

تم تسجيل اللعبة فى المصنفات الفينة .. كذلك تم عمل حمايه للعبة ضد عمليات الـcracking .. طبعا مفيش حماية 100% .. بس ادينا بنحاول .. ويارب الناس يكون عندها وعى كافى انها ماتضربش اللعبة .. خصوصا ان سعرها هايكون مناسب .. ( 40 الى 60 ) .. ومازلنا بنحاول نخفضه عن كده.

ايه رايك في قانون الملكية الفكرية في مصر؟

مش رادع قوى .. منطقة الشرق الاوسط و الشرق الاقصى ( الصين ) معروفين ان فيهم اكثر نسبة سطو على الملكية الفكرية .. ده معناه ان القانون غير رادع .. بس برده ارجع واقول ان فى بعض الاحيان الناس بتكون معذوره لأن فرق العمله مابينا وبين بره بيخلى معظم البرامج اسعارها غالية جدا بالنسبة لأغلبية الشعب .. وان كنت اعتقد ان لو توافر للناس برامج بسعر معقول .. فانها سوف تقبل على شرائها, - اتمنى ذلك - .هل كان فيه إجراءات قانونية او كلام مع الممثل محمد سعد عشان استخدام الاسم التجاري للفيلم وشخصية بوحه؟محمد سعد مالوش حقوق .. الحقوق بتكون مع المنتج .. واحنا الحمد الله نسقنا مع المنتج وحاليا جارى دراسة امكانية مشاركة محمد سعد بصوته فى اللعبة.

إذا نجح المشروع بإذن الله ونجحت اللعبة فى تحقيق نجاح كبير.. ايه المشروع القادم المتوقع تقديمه من شركة خيالي؟

اكيد العاب اخرى بمستوى أحسن .. دايما أول خطوه بتكون صعبه خصوصا ان الموضوع جديد علينا وعلى الناس .. أصلا الصناعة دي مش موجوده ومفيش أي دراسة حقيقة للسوق – كلها تكهنات واستطلاعات رأى - .,ا2.لو باذن الله اللعبة حققت نجاح في مصر هل ممكن تفكروا فى تصديرها للبلدان العربية او السوق العالمية؟احنا هانبيع أول لعبة فى الوطن العربى كله – ان شاء الله – كذلك ستتاح امكانية شرائها عن طريق الانرنت .. عشان العرب و المصريين اللى عايشين برده يقدروا يشتروها ..

أما بالنسبة لغزو السوق الاوربى احنا لينا منتج بنبيعه بره حيوي جدا في الـ simulations اسمه الــ physics engine* وده كان أول محاولة للانتاج من الشركة قبل بوحة.

هل اللعبة موجهه لسن معين ؟

لأ .. – خصوصا انها مفيهاش اى كلام خارج – او صور اباحيه .

هل فيه دور للرقابة الفنية على اللعبة؟

لأ .. جرى العرف على ان بعد عمل اللعبة بيتم وضعها للمصنفات الفنية ثم يتم الموافقة عليها واحنا لسه ماطلعناش المنتج النهائى فمعرفش .. بس ربنا يسهل ومفيش أى حاجه تتمسح فى اللعبة!

ما هي المواصفات الفنية لجهاز الكمبيوتر اللى ممكن تشتغل عليه لعبة بوحة؟

P4 Processor (Any P4 or equivalent will do)

56 MB RAM

64 MB video card

و بنحاول قدر الامكان ان اللعبة تشتغل على اقل المواصفات.

اللعبة هتنزل امتى السوق؟

ان شاء الله اللعبة تكون فى الاسواق قبل العيد .. – اذا لم يطرأ أى مانع .. حيث هناك اكثر من الامور خارج سيطرتنا .. من توزيع و دعايه ..الخ

في رايك ايه أهم المشاكل اللي بتواجه المبرمج المصري؟

المبرمج المصرى كويس جدا.. بس اول مايشتغل فى شركة بيموت نتيجه الاعمال الروتينية.

هل انت راضي عن عن مستوى تعليم البرمجة في مصر بما ان كل العاملين في الشركة خريجي جامعات مصرية؟

اه .. البرمجة دي مهارة سهل جدا تطويرها ذاتيا .. فلو التعليم فيه مشاكل فده مش عذر لان فى حاجة اسمها انترنت وكتب ووسائل أخرى.

في رأيك ليه الانتاج المصري للعب الالكترونية صغير ؟

عشان الالعاب محتاجة اشياء كتير اوى تكون مجتمعة ... مبرمج.. فنان.. سيناريست..اخراج.. موسيقى الخ .. حيث ان الالعاب من اصعب الاشياء .. فهى قمة البرمجة وقمة الفن مجتمعين .. حيث تحتوى على AI , Physics , Graphics, Database, …etc كل ده بيصعب ان شركة تفكر في اقتحام مثل ذلك المجال بالاضافة الى عدم وجود دراسات للسوق.. بس فى اعتقادى لو بوحة حققت نجاح ده هايغرى شركات كتير انها تخش المجال ده.

هل سوق الالعاب الالكترونية في مصر نقدر نقول عليه سوق مربح؟

مفيش اى دراسة لسوق الالعاب اصلا.. بس الشباب بيلعبوا جيمز السؤال اللى هانعرفه هل عندهم استعداد يشتروها لو السعر مناسب !!؟

للاطلاع على خلفية المنتج

موقع لعبة بوحة

شاهد صور من لعبة بوحه

0776

ekramey

ما هو البرنامج المستخدم في اللعبة

أرسل هذا التعليق بواسطة : المبرمج أحمد

ياريت لو نعرف البرنامج المستخدم في صناعة هذه اللعبة أو حتى اللغة البرمجية الخاصة بها

تعليقي انكم ان شاء الله هتفجره الدنيا في السوق لانكم بتسعوا بجد علي عملكم بمجهو كبييير والدليل اللعبة ديه ده بس قبل ماتنزل اللعبة امال لما تنزل هيحصل ايه !! ونتمني ان نري لكم الكثير من اللاعاب الاخري بس انا كان عندي سؤال بس اللعبة هتنزل امتي ولكم جزيل الشكر sedek_sedek2001@yahoo.com

ربنا معاكوا

أرسل هذا التعليق بواسطة : memo the ghost

اكيد طبعا هاشجع الانتاج المصرى وربنا معاكوا وان شاء الله اللعبه الجايه تنافس الالعاب الاجنبيه

ومرسى

memo_ghost2003@yahoo

memo_ghost2003@hotmail

www.gelrewesh.net.tf

حلوه جدا العبه

أرسل هذا التعليق بواسطة : ُEs20

انا اشتريتها و بشجع كل الشباب يشتروها العبه جامده جدا و حتي الجرافيكس لو مش عاجب بعض الناس فطريقة العب لوحدها جامدا و تحركات اللاعب مريحه جدا

وربنا معاكم و تعملولنا العبه الجايه احسن و الجرافيك اجمد

Es_yah@yahoo.com

www.voyage-news.net.tf

www.parpystarhotmail.com

أرسل هذا التعليق بواسطة : د ينا 144

اخى يريد ان يلعب لعبة بوحة اريد ان اعرف كيف اشغلها

سؤال محتاج للاجابه

أرسل هذا التعليق بواسطة : ahmed

انا عندي سؤال وحتاج ضروري حد يجاوب عليه :هل برمجه الالعاب اصعب ولا الجرافيك اللي معملو فيها ؟ولماذا ؟

ارجو ارسال الاجابه علي :inter_milan44@yahoo.com

جيد

أرسل هذا التعليق بواسطة : omar22

جيد جدا وهذه بدايه جيده وربنا يوفقهم ونشوف العاب جديده افضل